نہان کا جشن

انہی الفاظ میں کوٹہ کے سانگود گاؤں کے آنجہانی شاعر سورج مَل وجے جنوب مشرقی راجستھان کے ہاڑوتی علاقہ میں منائے جانے والے نہان کے بارے میں بتاتے ہیں۔

گاؤں کے باشندے اور زیورات کے تاجر رام بابو سونی کہتے ہیں، ’’کوئی بھی سرکار کروڑوں روپے خرچ کر کے بھی ایسے پروگرام کا اہتمام نہیں کر سکتی ہے۔ جس طرح سے ہمارے گاؤں کے لوگ اپنی مرضی سے، اپنی خود کی ثقافت کے لیے اس کا اہتمام کرتے ہیں، ویسا انتظام تو نہیں کر سکتی۔‘‘ گاؤں میں یہ جشن پانچ دنوں تک چلتا ہے۔ اس کا اہتمام ہولی کے بعد مقامی ہیرو سانگا گورجر کے اعزاز میں کیا جاتا ہے، جن کے بارے میں لوگوں کا خیال ہے کہ وہ ۱۵ویں صدی میں ہوا کرتے تھے۔

نہان کا مطلب ’غسل کرنا‘ ہے، جو ایک اجتماعی غسل کے رواج کی علامت ہے۔ اس جشن کا تعلق ہولی سے مانا گیا ہے۔ اسے پوری طرح سے سانگود کے مقامی لوگوں کے ذریعہ منایا جاتا ہے، جو اپنے روزمرہ کے کاموں سے وقت نکال کر غیر معمولی رول ادا کرتے ہیں۔ اس کے لیے وہ اپنی آرائش و زیبائش اور لباس کا انتخاب خود ہی کرتے ہیں۔

’’تقریباً ۵۰۰-۴۰۰ سال پہلے مغل بادشاہ شاہجہاں کے دورِ حکومت میں سانگود میں ایک وجے ورگیہ ’مہاجن‘ رہتا تھا،‘‘ رام بابو سونی بتاتے ہیں۔ ’’وہ شاہجہاں کے لیے کام کرتا تھا۔ جب اس نے ریٹائرمنٹ لی، تب اس نے بادشاہ سے یہاں نہان کا اہتمام کرنے کی اجازت مانگی۔ تب سے ہی اس جشن کو سانگود میں منایا جانے لگا۔‘‘

گرد و نواح کے گاؤوں سے ہزاروں کی تعداد میں لوگ فنکاروں کا رقص، گانا، جادو کے کرتب اور قلا بازی دیکھنے کے لیے سانگود پہنچتے ہیں۔ یہ جشن دیوی برہمانی کی پوجا کے ساتھ شروع ہوتا ہے، جس کے بعد پرساد کے طور پر گھوگری (ابلے ہوئے چنے) بانٹی جاتی ہے۔

’’یہاں جادو دکھایا جائے گا، تلوار نگل لیے جائیں گے، اور ایسے بہت سارے دوسرے کرتب دکھائے جائیں گے،‘‘ ستیہ نارائن مالی بتاتے ہیں، جو خود یہاں اپنے فن کا مظاہرہ کرنے آئے ہیں۔ ’’ایک آدمی کاغذ کے ٹکڑے نگل لے گا اور اپنے منہ سے ۵۰ فٹ لمبا دھاگہ باہر نکالے گا۔‘‘

جشن کا اختتام بادشاہ کی سواری کے ساتھ ہوتا ہے، جب ایک معمولی آدمی کو ایک دن کے لیے بادشاہ بنایا جاتا ہے۔ اس کی شاہی سواری کو گاؤں کی سڑکوں پر گھمایا جاتا ہے۔ گزشتہ ۶۰ برسوں سے بادشاہ کا کردار رام بابو کے خاندان کا کوئی رکن ادا کرتا آ رہا ہے۔ ’’پچیس برسوں تک میرے والد کے ذمہ یہ کردار رہا اور اس کے بعد پچھلے ۳۵ سالوں سے ان کی وراثت میں سنبھال رہا ہوں،‘‘ وہ کہتے ہیں۔ ’’بادشاہ کا عہدہ اتنا ہی اہم ہوتا ہے، جتنا کسی فلم میں مرکزی کردار کا ہوتا ہے۔ یہ بھی ایک فلم ہی ہے۔‘‘

ایک دن کے لیے یہ کردار جو بھی ادا کرتا ہے اسے بادشاہ کے رتبہ جیسا اعزاز ہی دیا جاتا ہے۔

’’ہاں، ہر سال صرف ایک دن کے لیے،‘‘ وہاں موجود ایک آدمی بتاتا ہے۔ ’’آج یہی ہمارے بادشاہ ہیں۔‘‘

مترجم: محمد قمر تبریز