’’کچرا تو آپ کی وجہ سے اکٹھا ہو رہا ہے، پھر ہمیں ’کچرے والی‘ کیوں کہا جاتا ہے؟ سچائی تو یہ ہے کہ ہم لوگ ہی شہر کی صفائی کرتے ہیں۔ ایسے میں ’کچرے والے‘ تو شہری ہوئے؛ غلط کہہ رہی ہوں کیا؟‘‘ پونے میں کچرا اٹھانے کا کام کرنے والی سُمن مورے کہتی ہیں۔
سُمن تائی ’کاگد کاچ پتر کشٹکری پنچایت‘ کی ایک رکن ہیں۔ وہاں کی کچرا اٹھانے والی ۸۰۰ عورتوں نے ۱۹۹۳ میں یہ تنظیم بنائی تھی، جس میں آہستہ آہستہ بہت سی دیگر عورتیں بھی جڑتی چلی گئیں۔ شروع میں وہ پونے میونسپل کارپوریشن (پی ایم سی) سے شناختی کارڈ جاری کرنے کا مطالبہ کر رہی تھیں، تاکہ ان کے کام کو باقاعدہ طور پر تسلیم کیا جا سکے۔ تین سال کی لمبی لڑائی کے بعد، ۱۹۹۶ میں جا کر انہیں یہ کارڈ ملا۔
اب یہ عورتیں پی ایم سی کے لیے کام کرتی ہیں اور لوگوں کے گھروں سے کچرے اٹھاتی ہیں۔ ان کا تعلق مہار اور ماتنگ برادریوں سے ہے، جسے مہاراشٹر میں درج فہرست ذات کا درجہ حاصل ہے۔ سُمن بتاتی ہیں، ’’ہم لوگ سوکھے اور گیلے کچروں کو الگ کر لیتے ہیں، اور گیلے کچرے کو ٹرک میں ڈال دیتے ہیں۔‘‘ وہ مزید کہتی ہیں، ’’سوکھے کچرے میں سے ہم کام کی چیزیں اپنے پاس رکھنے کے بعد اسے بھی کچرا ڈھونے والے ٹرک کو دے دیتے ہیں۔‘‘
ان عورتوں کو اب یہ ڈر ستا رہا ہے کہ پی ایم سی کہیں ان سے یہ کام چھین کر نجی ٹھیکہ داروں یا کمپنیوں کو نہ دے دے۔ لہٰذا، وہ اگلی لڑائی کے لیے پوری طرح سے تیار ہیں – ’’ہم کسی کو بھی اپنا یہ کام چھیننے کی اجازت نہیں دیں گے،‘‘ آشا کامبلے پختہ لہجے میں کہتی ہیں۔
’مول‘ (قیمت) نام کی اس فلم میں، پونے میں کچرا اٹھانے کا کام کرنے والی عورتوں کی ہی زبان سے ان کی اس لڑائی کے بارے میں بتانے کی کوشش کی گئی ہے۔