ایران میں جنگ بندی، یوپی میں مڈ ڈے میل بند ہونے کا خطرہ

دیویشوری کے لیے اسکول کا وقت دوپہر ۲ بجے ختم ہو جاتا ہے، لیکن ان کا کام ختم نہیں ہوتا۔ کندھے پر تھیلا ٹانگ کر اور سر پر سوتی دوپٹّہ اوڑھے، وہ ۴۰ ڈگری سیلسیس کی گرمی میں اسکول سے باہر نکلتی ہیں۔ لیکن وہ گھر نہیں، بلکہ لکڑی کی تلاش میں جاتی ہیں۔ ’’میں اس پرائمری اسکول میں ٹیچر ہوں،‘‘ وہ کہتی ہیں۔ ’’لیکن مجھے یہ بھی یقینی بنانا ہوتا ہے کہ میرے طلباء کو ان کا مڈ ڈے میل [دوپہر کا کھانا] ملتا رہے۔ اس لیے اب میں جلاون کی لکڑی تلاش کرنے جا رہی ہوں۔‘‘

دیویشوری نیگی (۴۸)، لکھنؤ کے مضافاتی دیہی علاقہ کے مال بلاک میں واقع پرائمری اسکول رودان کھیڑا کی ٹیچر انچارج ہیں۔ اسکول کی سبھی پانچ ملازم خواتین ہیں، جن میں دو معاون ٹیچر اور تین رسوئیا (باورچی) ہیں، جو بچوں کے لیے دوپہر کا کھانا بناتی ہیں۔

مرکزی حکومت کی مڈ ڈے میل اسکیم کے تحت، اتر پردیش کے ایک لاکھ ۴۱ ہزار سے زیادہ سرکاری پرائمری اور اپر پرائمری اسکولوں میں ڈیڑھ کروڑ سے زیادہ طالب علموں کو تازہ اور غذائیت سے بھرپور کھانا پانے کا حق حاصل ہے۔ تقریباً سبھی اسکولوں کو ایل پی جی کنکشن دیا گیا ہے۔ لیکن امریکہ و اسرائیل کے ایران پر حملے کی وجہ سے پیدا ہوا ایل پی جی بحران اس انتہائی اہم اسکیم میں رخنہ پیدا کر رہا ہے۔ بڑی تعداد میں اسکول متاثر ہوئے ہیں، لیکن کتنے، اس کی باقاعدہ جانکاری نہیں ہے۔

تقریباً ایک مہینہ سے، ہر دن اسکول کے بعد دیویشوری اور باقی چاروں عورتیں گھر جانے کے بجائے گاؤں میں الگ الگ سمتوں میں لکڑی اکٹھا کرنے نکل پڑتی ہیں۔ ’’ہم نے گیس ایجنسی اور مقامی لکڑی فروشوں سے بھی مدد مانگی، اور ہم نے گاؤں کے پردھان سے بھی گزارش کی، لیکن اس مشکل وقت میں کوئی مدد نہیں کر پا رہا ہے،‘‘ نیگی پاری کو بتاتی ہیں۔

جلاون کی لکڑی پہلے آسانی سے مل جاتی تھی، اب لکھنؤ شہر کے کاروباری خریدار اسے خرید لیتے ہیں۔ مقامی لکڑی فروش دھرمیش یادو کہتے ہیں، ’’ہم نے اپنا سارا اسٹاک ریستوراں اور ہوٹلوں کو بیچ دیا ہے۔ ایسا نہیں ہے کہ ہم اساتذہ اور طلباء کی مدد نہیں کرنا چاہتے، لیکن ہمارے پاس سب کے لیے لکڑیاں نہیں ہیں۔ جو تھوڑی بہت بچی ہیں وہ ہماری روزمرہ کی ضروریات کے لیے ہیں۔ ورنہ ہم کیا کھائیں گے؟‘‘

طلباء بھی لکڑیاں جمع کرنے میں مدد کرتے ہیں۔ وہ اسکول کی چھت سے لگے درختوں کی شاخوں سے چھوٹی بڑی ٹہنیاں توڑتے ہیں۔

رودان کھیڑا گاؤں کی پردھان راجیشوری کے شوہر ہنومان بتاتے ہیں، ’’میں پچھلے سال اگست تک مڈ ڈے میل کی دیکھ ریکھ کرتا تھا۔ اس کے بعد میں نے یہ کام میڈم [دیویشوری] کو سونپ دیا۔ لکڑی دستیاب ہونی چاہیے کیوں کہ ہم بھی گھر میں لکڑی کے چولہے پر کھانا بناتے ہیں۔ میں اسکول جا کر دیکھوں گا کہ مسئلہ کیا ہے۔ گزشتہ ۱۵ دنوں سے میں جا نہیں پایا۔‘‘ یہ دلت میاں بیوی صرف اپنے پہلے ناموں سے ہی پہچانا جانا پسند کرتے ہیں۔

اب کھانا کھلے میں مٹی کے چولہے پر بنایا جاتا ہے، جس میں لکڑی، پلائی اور جو بھی چیز جل سکے اسے ڈالا جاتا ہے۔ آج رسوئیا نے تہڑی بنائی ہے جو چاول، آلو اور سویابین (سردیوں میں مٹر) سے بنا ایک پکوان ہے۔ چمکدار اسٹیل کی پلیٹوں میں پیلی تہڑی بیحد لذیذ دکھائی دیتی ہے۔ رودان کھیڑا کے بچے اس کھانے کا لطف لیتے نظر آتے ہیں، اور کچھ بچے اسے اپنے پلاسٹک کے ٹفن باکس میں کھانا پسند کرتے ہیں۔

رسوئیا چھوٹی (۵۷) بتاتی ہیں، ’’لکڑی کو اچھی طرح جلنے میں ۱۵ منٹ لگتے ہیں، اس کے بعد ہی ہم کھانا بنانا شروع کر سکتے ہیں۔ ایندھن کی کمی کی وجہ سے ہم ان دنوں صرف ایک ہی پکوان بناتے ہیں۔‘‘ چھوٹی کا تعلق دلت برادری سے ہے، جو صرف اپنے پہلے نام کا استعمال کرتی ہیں۔ وہ اس کام کے عوض مہینہ میں ۲۰۰۰ روپے کماتی ہیں۔ وہ بتاتی ہیں، ’’ہم بھی انہی بچوں کے لیے بنائے گئے کھانے پر منحصر ہیں، اور انہیں کھلانے کے بعد ہی کھاتے ہیں۔‘‘

چوتھی جماعت کی ۱۰ سال کی طالبہ پرینکا گوتم کہتی ہے کہ اسے تہڑی اسکول میں ہی کھانے کو ملتی ہے، جو اس کی پسندیدہ ہے۔ ’’ہمارے گھر میں کبھی تہڑی نہیں بنتی۔ ایک بار ممی نے بنانے کی کوشش کی تھی، لیکن ویسی نہیں بنی جیسی یہاں ملتی ہے،‘‘ وہ بتاتی ہے۔ اس کے دو بڑے بھائی ہیں۔ ایک کی عمر ۱۵ سال اور دوسرے کی ۱۹ سال ہے، اور دونوں اسکول چھوڑ چکے ہیں۔

اسکول کے بعد ہم پرینکا کے گھر جاتے ہیں۔ وہ اندر جا کر اپنی ماں سے دھیرے سے کہتی ہیں، ’’آج تہڑی بنی تھی، میں آپ کے لیے اپنے ٹفن میں لے کر آئی ہوں۔‘‘

پرینکا کی ماں، ۴۷ سالہ روپ کلا گوتم کہتی ہیں، ’’ہمیں رات کا کھانا بنانے کے لیے لکڑی لانی پڑتی ہے۔ میں روٹی بناؤں گی اور صبح کی بچی ہوئی دال ہے۔ میں احسان مند ہوں کہ پرینکا کو اسکول میں دوپہر کا کھانا مل جاتا ہے، کیوں کہ یہاں کئی بار ہم دوپہر کا کھانا نہیں کھاتے۔‘‘ وہ آہستہ سے کہتی ہیں، ’’ہم دیر سے، تقریباً ۱۰ بجے ناشتہ کرتے ہیں، پھر دن بھر چائے پی کر کام چلاتے ہیں۔ لیکن رات کا کھانا کھاتے ہیں۔‘‘

روپ کلا اور ان کے شوہر زرعی مزدور ہیں اور یومیہ ۱۷۵ روپے کماتے ہیں۔

دیویشوری نیگی کہتی ہیں، ’’اگر یہی حالت رہی تو ہمارے اسکول میں مڈ ڈے میل کبھی بھی بند ہو سکتا ہے۔‘‘ اور اس کے ساتھ ہی، ان ۱۰۳ بچوں کو دوپہر کا مقوی کھانا بھی ملنا بند ہو جائے گا۔