یکش گان میں خواتین فنکاروں کی شمولیت

موکامبیکا کے دادا نے جب انہیں یکش گان کی فنی پیشکش کے مختلف انداز کی نقل کرتے دیکھا، تو ’’وہ بہت ناراض ہوئے اور مجھے ڈانٹا۔‘‘ انہوں نے اس نوعمر لڑکی کو آگاہ کیا کہ ساحلی کرناٹک اور کیرالہ کے کاسرگوڑ میں رائج ڈرامے کی شکل والے اس مقامی رقص میں خواتین کو حصہ لینے کی اجازت نہیں ہے۔

اب ۷۵ سال کی ہو چکیں موکامبیکا وارَم بَلّی بچپن سے ہی اُڈوپی ضلع کے اپنے گاؤں ماروی میں یکش گان کی پیشکش کی جانب متوجہ ہو گئی تھیں۔ رقص پر مبنی یہ ڈرامائی پیشکش وہاں اکثر شام سے صبح تک چلتی رہتی تھی۔ انہیں یاد ہے کہ انہیں دیکھنے کے لیے عورتوں، کنبوں اور پڑوسیوں کی بڑی جماعت کے ساتھ پیدل چل کر کافی دور جانا پڑتا تھا۔ اگلے دن وہ اپنے گھر کے سامنے، آنگن میں دوستوں کو جمع کرتیں اور ’پرسنگ‘ (ڈرامہ) کے لیے چادر یا تولیہ کو پوشاک کے طور پر استعمال کر کے رقص کے مختلف انداز کی نقل کیا کرتی تھیں۔

وہ بتاتی ہیں، ’’ہم گھر کے سامنے والے آنگن میں ڈرامے کھیلا کرتے تھے، مگر صرف تبھی جب میرے دادا آس پاس نہیں ہوتے تھے۔ ان کا ماننا تھا کہ یکش گان لڑکیوں کے لیے نہیں ہے۔‘‘

یکش گان کا لفظی معنی ہے ’دیوتاؤں کے گیت‘ اور صدیوں سے ساحلی کرناٹک اور کیرالہ کے کاسرگوڑ ضلع میں اسے پیش کیا جاتا رہا ہے۔ یہ پیشکش دیو مالائی کہانیوں اور رامائن مہابھارت جیسے رزمیوں کو موسیقی، رقص، مکالموں اور بیانیوں کے ذریعہ کی جاتی ہے۔ یکش گان میلوں کو اکثر اس علاقہ کے بڑے مندروں کی سرپرستی حاصل تھی۔

یہ جسمانی طور پر فن کی ایک طاقتور شکل ہے، جسے مقامی سطح پر ’گنڈو کلے‘ کے نام سے جانا جاتا ہے، جس کا مطلب ہے ’مردوں کے لیے فن کی ایک شکل‘۔ اس رقص میں اونچی چھلانگ اور گھماؤ کی ضرورت ہوتی ہے جس کے لیے چستی اور تندرستی چاہیے، جسے عام طور پر مردوں کا میدان مانا جاتا ہے۔ خواتین کرداروں کا رول ادا کرنے کے لیے بھی مرد ہی ہوتے تھے۔

تجربہ کار یکش گان فنکار اور یکش گان اکیڈمی کے سابق صدر، ایم ایل سمگا کہتے ہیں، ’’ناظرین ڈراموں اور کہانیوں کے بارے میں پہلے سے ہی جانتے ہیں۔ مگر ہر پیشکش کے ساتھ وہ اسے ایک نئے نظریہ سے دیکھتے ہیں اور ہر بار اُس تجربہ کو پھر سے جیتے ہیں۔ انہیں جو چیز متوجہ کرتی ہے وہ یہ ہے کہ کوئی اداکار کسی کردار کو مختلف طریقے سے کیسے ادا کرتا ہے۔‘‘

موکامبیکا وارَم بَلّی کہتی ہیں کہ وہ اپنے دادا ماروی رام کرشن ہیبّار کو اس کی پیشکش کرتے دیکھ کر بڑی ہوئی ہیں۔ وہ ایک مشہور فنکار تھے، لیکن وہ انہیں اپنے ساتھ شامل کرنے کے خواہش مند نہیں تھے۔ وہ مزید بتاتی ہیں کہ اُن دنوں یکش گان فنکاروں کو کم اجرت ملتی تھی اور انہیں صرف تفریح فراہم کرنے والوں کے طور پر دیکھا جاتا تھا۔ معاشرہ میں ان کی کوئی عزت نہیں تھی۔

لیکن تب تقریباً ۲۰ سال کی موکامبیکا اس سے مایوس نہیں ہوئیں۔ وہ کہتی ہیں، ’’مجھے یکش گان سیکھنے اور پیشکش کرنے کی دلی خواہش تھی۔‘‘ اسی دوران ایک بینک میں نوکری کے دوران انہیں پتہ چلا کہ چار پانچ خواتین ملازمین بھی اسے سیکھنا چاہتی ہیں۔ ان سبھی کو اس کے لیے اپنے گھر والوں سے اجازت لینی پڑی۔ موکامبیکا یاد کرتی ہیں کہ انہوں نے اپنے شوہر سے اس کے بارے میں دریافت کیا جو ایک اسکول ٹیچر تھے۔ شوہر نے ان کے فیصلہ کی حمایت کرتے ہوئے کہا، ’’فن کی کسی بھی شکل کو اپنانے پر کوئی پابندی نہیں ہے۔‘‘

ان کے گروپ کی قسمت اچھی تھی کہ انہیں بینک میں اپنے ساتھی ملازم شریدھر ایتال ملے، جو ایک تربیت یافتہ یکش گان فنکار تھے اور وہ انہیں سکھانے کے لیے تیار ہو گئے۔ کام کے بعد یہ گروپ مشق کرتا تھا اور اس مشکل فن کی پیچیدگیوں میں ڈوب جاتا تھا۔ وہ اپنے راستے پر چل پڑے تھے اور دسمبر ۱۹۷۶ میں موکامبیکا وارَم بلّی اور ان کی خواتین ٹولی نے اپنے بینک کے تفریحی دن کے موقع پر یہ فن پیش کر کے تاریخ رقم کر دی۔

ان کی یہ شمولیت تُلوناڈو میں خواتین کے اسٹیج پر آنے کی ابتدائی جانی پہچانی مثالوں میں سے ایک تھی، جس نے مردوں کے غلبہ والی اس فنی شکل کی طویل عرصے سے چلی آ رہی روایت کو توڑ دیا۔ وہ یاد کرتی ہیں، ’’ہمارے ذہنوں میں کئی سوال تھے۔ لوگوں کا ردعمل کیا ہوگا؟ کیا وہ ہمیں تسلیم کریں گے؟ لیکن ہمیں تعجب ہوا کہ ہمیں ناظرین سے امید بخش ردعمل ملا۔ بیشک کچھ لوگ اس تجربہ سے زیادہ خوش نہیں تھے، لیکن ہم خوش تھے۔ لوگ آئے، انہوں نے دیکھا اور اس سے لطف اندوز ہوئے۔‘‘

موکامبیکا کے مرکزی رول کے ساتھ گروپ نے ’ببرو واہنا کالگا‘ (ببھرو واہن کی جنگ) نامی ڈرامہ سیکھنے کا فیصلہ کیا۔ وہ یاد کرتی ہیں، ’’لوگوں کے اندر خدشات تھے۔ وہ شک و شبہ میں مبتلا تھے، مگر عورتوں کو مردوں کا لباس پہنے اور یکش گان میں مرد و خواتین دونوں طرح کے کردار نبھاتے ہوئے دیکھنے کے بارے میں پرجوش بھی تھے۔ مگر ہمارے اندر سیکھنے اور پیشکش کرنے کی خواہش ہمارے ارد گرد کی تمام اٹکلوں سے کہیں زیادہ مضبوط تھی۔‘‘

اپنی پہلی پیشکش کے بعد اس گروپ کو منگلور میں پھر سے پیشکش کے لیے بلایا گیا۔ اگلے سال، ۱۹۷۷ میں یہ ٹولی ’اندرجیت کالگا‘ پیش کرنے کے لیے اسٹیج پر نمودار ہوئی اور موکامبیکا نے ہنومنت کا کردار ادا کیا۔

موکامبیکا کہتی ہیں، ’’لوگ مجھ سے پوچھتے ہیں کہ کیا میں یکش گان کے شعبہ میں آنے والی پہلی خاتون تھی۔ یہ دعوی کرنا مشکل ہے، کیوں کہ یہ جنوبی کنڑ، اُڈوپی، شمالی کنڑ اور کیرالہ کے کاسرگوڑ تک پھیلا ہوا ایک بڑا علاقہ ہے۔‘‘

اس فن کا جغرافیہ کافی وسیع ہے اور ہو سکتا ہے کہ خواتین نے بغیر کوئی باقاعدہ ریکارڈ چھوڑے اسے سیکھا یا پیش کیا ہو۔ لیکن چونکہ یکش گان تاریخی طور پر ’بیلاٹا‘ یعنی کھلی جگہ پر کیا جاتا رہا ہے، لہٰذا یہ مشکل ہے کہ عورتیں باقاعدگی سے میلوں میں پرفارم کرنے کے لیے حصہ لیتی ہوں۔

آج بھی میلوں کے کھلے میدانوں میں عارضی اسٹیجوں پر یکش گان ہوتا ہے، جو رات بھر چلتا ہے۔ ٹولیاں ایک گاؤں سے دوسرے گاؤں جاتی ہیں، عارضی اسٹیج تیار کرتی اور ٹینٹ لگاتی ہیں جو گرین روم کا بھی کام کرتے ہیں۔

کچھ عورتیں میلوں میں پیشکش کرتی تھیں اور کرتی ہیں، لیکن عموماً تب جب ان کے شوہر موسیقار یا فنکار کے طور پر پہلے سے ہی اُس ٹولی کا حصہ ہوتے ہیں۔ ایسے موقعوں پر انہیں پیسے بھی ملتے ہیں۔ لیکن عورتوں کو صرف یکش گان کے ذریعہ گزر بسر کے لیے کوئی مالی ڈھانچہ موجود نہیں ہے، جب کہ میلے کئی سال پہلے سے بُک ہو جاتے ہیں اور ان میں الگ الگ سماجی اور اقتصادی طبقوں کے ناظرین شامل ہوتے ہیں۔

منی پال انسٹی ٹیوٹ آف ٹیکنالوجی کی محقق شُروتی بنگیرا کہتی ہیں، ’’خواتین فنکاروں کو روایتی فنکار کے طور پر سنجیدگی سے نہیں لیا جاتا۔ چونکہ وہ میلوں میں پیشکش نہیں کرتیں، اس لیے ان کے کام کو اکثر شوقیہ پیشکش مان کر خارج کر دیا جاتا ہے۔‘‘ وہ مزید بتاتی ہیں کہ شروعات میں زیادہ تر عورتیں نسبتاً خوشحال خاندانوں سے تھیں اور اکثر بینکوں میں نوکری کرتی تھیں۔ شروتی خود ایک یکش گان فنکار ہیں۔ وہ کہتی ہیں، ’’وہ اپنی پیشکش کے لیے فیس نہیں لیتی تھیں اور محنتانہ لینے سے انکار کرتی رہیں۔ یہ چلن اب بھی جاری ہے۔ آج تک خواتین کی قیادت والی کوئی میلہ منڈلی نہیں ہے۔‘‘

لیکن ماہرین کو لگتا ہے کہ موکامبیکا کی ٹولی (منڈلی) نے باقاعدہ طور پر ایسا راستہ کھولا جو عرصہ سے بند تھا۔ اس نے فن کی شکل میں تجربات کرنے اور ہمت افزا تبدیلی کے راستے صاف کیے جو کبھی سخت پہرے میں تھا۔ سبھی خواتین منڈلیوں میں فنکار مردوں کے کردار نبھاتی ہیں، اکثر راکشسوں کی، جس سے انہیں اپنی آواز بدلنے اور جسمانی طاقت کا مظاہرہ کرنے کے لیے مجبور ہونا پڑتا ہے۔ باہری پیشکش میں ’استری ویش‘ یعنی خواتین کا کردار صدیوں سے مرد ادا کرتے رہے ہیں، جنہیں اکثر بڑھا چڑھا کر پیش کیا جاتا تھا اور کبھی کبھی طنز کے طور پر بھی پیش کیا جاتا تھا۔ میلوں میں خواتین کے انہیں نبھانے سے ان کرداروں کو نئی بُناوٹ اور ایک الگ طرح کی موجودگی حاصل ہوئی۔

یکش گان بھی صرف میلہ جیسے ماحول سے بڑھ کر زیادہ رسمی اسٹیج پرفارمنس کی جانب گامزن ہوا اور خواتین کے لیے اس کی پیشکش کرنا آسان ہو گیا۔ اس لیے، جہاں مختلف سماجی پس منظر سے تعلق رکھنے والی خواتین یکش گان سیکھتی اور اسے پیش کرتی ہیں، انہیں میلہ میں کم اور ثقافتی پروگراموں یعنی اسٹیج والی پیشکش میں موقع زیادہ ملتا ہے۔

حالیہ دنوں میں یہ چلن اور بھی آگے بڑھا ہے۔ ایسے تجربات ہوئے ہیں جن میں مرد خواتین کے تمام کردار ادا کرتے ہیں اور عورتیں مردوں کے رول نبھاتی ہیں۔

یکش گان کے دو مخصوص طرز ہیں، تینکو ٹِٹّو اور بڑگ ٹِٹّو۔ تینکو ٹِٹّو عموماً جنوبی تُلوناڈو یعنی کرناٹک کے بحر عرب کے ساحل پر واقع علاقہ یعنی جنوبی کنڑ اور کاسرگوڑ ضلعوں میں پیش کیا جاتا ہے۔ بڑگ ٹِٹّو شمالی علاقہ میں زیادہ رائج ہے اور اُڈوپی اور شمالی کنڑ کے اندرونی حصوں میں اس کی پیشکش ہوتی ہے۔

موکامبیکا نے شروعات میں تینکو ٹِٹّو سیکھا اور اس کی پیشکش کرتی تھیں، لیکن وہ بڑگ ٹِٹّو سیکھنے کی خواہش مند تھیں، اس لیے انہوں نے اور ان کی کچھ ساتھیوں نے بڑگ ٹٹّو طرز سیکھنے کے لیے یکش گان کیندر سے رابطہ کیا۔

یکش گان کیندر ۱۹۷۲ میں گیان پیٹھ ایوارڈ یافتہ ڈاکٹر کے شیو رام کارنت نے اُڈوپی میں قائم کیا تھا۔ موکامبیکا اور ان کی ٹولی کے رابطہ کرنے پر کیندر کے ٹیچر انہیں اپنی باقاعدہ کلاسوں کے علاوہ جب بھی وقت ملے، ٹریننگ دینے کو تیار ہو گئے۔ دو تین مہینے کی ٹریننگ کے بعد وہ تامر دھوج کالگا کی پیشکش کرنے کے لیے تیار ہو گئی تھیں۔ تبھی کیندر کے ایک شریک کار بانی بغیر کسی سابق اطلاع کے انہیں دیکھنے آ پہنچے، جو ساحلی کرناٹک کی ثقافتی برادری میں ایک با اثر شخص تھے۔

موکامبیکا یاد کرتی ہیں کہ انہوں نے کہا، ’’خواتین کو یکش گان نہیں کرنا چاہیے۔‘‘ اس کے فوراً بعد انہوں نے یکش گان کیندر پر ایک بورڈ لگوا دیا جس پر لکھا تھا کہ وہاں طالبات کو نہیں پڑھایا جائے گا۔

وہ پاری کو بتاتی ہیں، ’’اس واقعہ کے بعد میں بہت روئی۔‘‘

لیکن ۱۰ خواتین پر مبنی گروپ نے پھر سے شروعات کی اور ہریڈکا گوپال رائے سے ٹریننگ حاصل کرنے لگیں۔ گروپ نے اپنا نام ’’سنڈیکیٹ بینک ری کرئیشن کلب مہیلا دشاوتار میلہ‘‘ رکھ لیا۔

ٹریننگ کافی مشکل تھی اور موکامبیکا کو یاد ہے کہ انہیں چکّر آنے لگے۔ ایک دن جب وہ بیہوش ہو گئیں تو جانچ کروائی گئی اور پتہ چلا کہ وہ چار مہینے کی حاملہ ہیں۔ اس لیے ۱۹۸۱ میں انہوں نے یکش گان سے ایک سال کا بریک لینے کا فیصلہ کیا۔

جب انہوں نے پھر شروع کیا تو خواتین یکش گان کی پیشکش کا پرجوش استقبال ہوا۔ وہ کہتی ہیں کہ ۷۰ کی دہائی میں ہوئی تبدیلی ادارہ جاتی اصلاح نہیں تھی، بلکہ ذاتی کامیابیاں تھیں، جو وقت کے ساتھ بڑی شکل میں آگے بڑھتی گئیں۔ وہ بتاتی ہیں، ’’ہم میلوں میں، گاؤں گاؤں گھومنے والے، رات بھر چلنے والے شو میں پیشکش نہیں کرتے تھے، بلکہ ہمیں آڈیٹوریم، ثقافتی محفلوں، اور اسٹیج والے پروگراموں میں مدعو کیا جاتا تھا۔‘‘ ان کی ٹولی کو شمالی اور جنوبی کینرا ضلعوں، بنگلور، گوا اور آندھرا پردیش میں کئی پروگراموں میں پیشکش کرنے کے لیے بلایا جاتا تھا۔

ایم ایل سمگا کہتے ہیں، ’’موکامبیکا خواتین کو یکش گان کے اسٹیج پر لانے میں سرفہرست رہیں۔‘‘ اس تجربہ کار فنکار کا ماننا ہے کہ چونکہ خواتین فنکار پیسہ نہیں لیتیں، اس لیے انہیں سنجیدگی سے نہیں لیا جاتا اور خواتین کے ذریعہ چلائی جانے والی ٹولیاں خاص طور پر تفریح کے وقت کی پیشکش تک ہی محدود رہی ہیں اور کبھی بھی پیشہ ور یکش گان ٹولیوں کے طور پر تیار نہیں ہو پائیں، جو اپنے مرد معاصرین کی طرح باقاعدگی سے دورے اور پیشکش کرتی ہوں۔

سمگا مزید کہتے ہیں، ’’یکش گان میں اب بھی مردوں کا غلبہ ہے، نہ صرف پیشکش میں، بلکہ آرائش اور پوشاک تیار کرنے جیسے معاملوں میں بھی۔ علاقہ کے الگ الگ حصوں میں باقاعدگی سے رات بھر کی پیشکش کے سبب خواتین کے لیے لمبے عرصہ تک ڈٹے رہنا مشکل ہو جاتا ہے۔‘‘

خواتین فنکاروں کو کبھی کبھی طنز بھی برداشت کرنا پڑتا تھا۔ مرد کردار نبھانے پر کچھ ناظرین ان کا مذاق اڑاتے تھے۔ مگر مجموعی طور پر ان کے شو کو دل چھو لینے والے ردعمل ملتے تھے۔ موکامبیکا یاد کرتی ہیں کہ انہیں ایک بار گمنام خط ملا، جس میں لکھا تھا، ’’ہم سبھی پرجوش تھے کہ کیا عورتیں ضروری توانائی اور قوتِ برداشت کا مظاہرہ کر پائیں گی۔ لیکن آپ کی پیشکش دیکھ کر ہم حیران ہیں۔ آپ نے اس کوشش میں انصاف کیا ہے۔‘‘ وہ بتاتی ہیں کہ تعریفی خطوط کی تعداد تنقیدی خطوط سے کہیں زیادہ ہوتی تھی۔

اگلے دس سال تک موکامبیکا اور ان کی خواتین یکش گان فنکاروں کی ٹولی نے پیشکش جاری رکھی۔ نوّے کی دہائی میں موکامبیکا نے کچھ وقت کے لیے چھٹی لے لی۔

زندگی میں دوبارہ وہ موقع آیا جب ان کی بیٹی اور ہائی اسکول کی طالبہ سَہانا وارَم بلّی نے اسکول کے ایک پروگرام میں یکش گان کرنا چاہا۔ یکش گان کیندر میں بھی اسے منع کر دیا گیا، جہاں کبھی اس کی ماں کو منع کیا گیا تھا۔ ملازمین نے سَہانا اور موکامبیکا کو کیندر کے بانی ڈاکٹر کے شیو رام کارنت سے اجازت حاصل کرنے کی صلاح دی۔

موکامبیکا یاد کرتی ہیں، ’’میں اور میری بیٹی ڈاکٹر کارنت کے گھر گئے۔ میں پچھلی پابندیوں کی وجہ سے بے چین اور تھوڑی ناراض تھی اور ان سے ملنے پر میں نے یکش گان کے تئیں اپنے جنون اور اپنی بیٹی کی اسے سیکھنے کی خواہش کے بارے میں کھل کر بات کی۔‘‘

ڈاکٹر کارنت تھوڑا رکے اور بولے، ’’یکش گان کیندر اس میں دلچسپی رکھنے والے کسی بھی شخص کو یکش گان سکھانے کے لیے قائم کیا گیا تھا۔ جینڈر [صنف] کی بنیاد پر کسی کو بھی یکش گان سکھانے میں کوئی اعتراض نہیں ہونا چاہیے، فن کو سیکھنے کے لیے ہر کسی کا استقبال ہے۔‘‘

ماہرین کا کہنا ہے کہ موکامبیکا کی پہل اور کوششوں کا دائمی اثر پڑا ہے۔ زیادہ خواتین یکش گان کو اپنا رہی ہیں۔ شروتی بتاتی ہیں، ’’مبالغہ آرائی، بڑی، اور کھلی حرکتیں، جنہیں عام طور پر ’خواتین‘ کے جسم کے لیے غیر معمولی سمجھا جاتا ہے، آزادی کا سبب پائی گئی ہیں۔ اور خواتین میں روایتی ’استری ویش‘ [خواتین کردار] کے مقابلے مرد کردار نبھانے اور انہیں سمجھنے کی خواہش بھی رہتی ہے۔‘‘

یکش گان نے گھریلو خواتین کی روزمرہ کی زندگی میں اپنی جگہ بنا لی ہے، جن میں سے کئی اب تفریح طبع کے لیے ہفتہ واری طور پر اس فن کو اپناتی ہیں۔ شروتی مزید کہتی ہیں، ’’وہ پرانے زمانے کی نئی داستان گو ہیں۔‘‘

یہ اسٹوری مرنالنی مکھرجی فاؤنڈیشن (ایم ایم ایف) سے ملی فیلوشپ کے تحت لکھی گئی ہے۔

ترجمہ نگار: قمر صدیقی