यक्षगान के मंच पर अब महिला कलाकारन के पैठ

मुकाम्बिका के बाबा जब उनका के यक्षगान के चाव धरत पकड़नी तब, “उ बहुत खिसिययिलन औरी हमरा के बहुत डटलन.” उ सयान लईकी के चेता के कहलन कि कर्नाटक औरी केरल के कासरगोड के मेहरारू लोग के इ सब नाच-गान करे के अगेया नइखे.

मुकाम्बिका वारमबल्ली, जे अब 75 बरीस के बाड़ी, आपन लायिकाईं के उडुपी जिला के गांव मारवी के यक्षगान के तमासा के मन पारेली, कि कइसे उ यक्षगान से मोहाइल रहस. इंहा इ सब नाच-गान अक्सरहां बिहाने से सांझ ले चले. औरी एकरा के देखे खातिर उ परिवार औरी पड़ोसी, औरी मेहराऊ लोग के साथे बड़का झुण्ड बना के बहुत दूर ले जास. अगिला दिने उ आपन सखी-सलेहर के अपना घर के अंगना में गोटिया लेस. तमासा करे खातिर चादर औरी गमछी से भेस बना के तमासा करस.

उ कहली, “हमनी घर के बहरी वाला अंगनाई में तमासा करीं. बाकिर तब्बे जब हमार बाबा कहीं लगे ना होखस. उनकर कहनाम रहे कि यक्षगान लयिकिन खातिर नईखे.”

यक्षगान के मतलब ह ‘देवता के गीत’ औरी इ सईयन साल से कर्नाटक औरी केरल के कासरगोड जिला में कईल जाला. गीत, बाजा, बात से इ तमासा रामायन औरी महाभारत जइसन पुरान ग्रंथ के कथा औरी महाकाव्य के कहानी पर होला. यक्षगान मेला के इलाका के परमुख मंदिर देख रेख, संरक्षण देत रहे.

देह-दसा से नीमन लोग के कला के रूप में, एकरा के गांव-जवार के लोग गंडू काले के नाम से जाने. जेकर मतलब ह- ‘पुरुख के कला रूप’. इ नाच में खूब ऊपर ले कूदल औरी घुमावदार नाच के जरूरत होला. जेकरा खातिर फरहर भईल जरूरी बा. इ मरद लोग के ही कार मानल जाय. जब मेहरारू के रूप धरे के होखे तब्बो मरदे लोग आगे आवे.

यक्षगान के कलाकार औरी यक्षगान अकादमी के पहिलका अध्यक्ष एम. एल. समागा कहेलन, “दर्सक लोग पहिलही से नाटक औरी कथा जानत रहेला. बाकिर हर बेर के तमासा के नया जइसन देखेला. औरी हर बेर एगो नया अनुभव ले के जाला. ऊ सब के ई बात से मोहल जाला कि एगो कलाकार कौनो चरित्र के अलगे के तरे देखावता.”

मुकाम्बिका वारमबल्ली कहेली कि उ अपना बाबा मारवी रामाकृष्ण हेब्बर के तमासा देखत सयान भईल बाड़ी. उ नामी कलाकार रहलन. बाकिर ऊ अपना साथे उनका के सामिल करे के ना चाहत रहलन. उ आगे कहली कि ओ बेरा यक्षगान कलाकार लोग के कम मेहनताना दहल जाय. औरी समाज में ओ लोग के खाली नाच-गा के खेल करेवाल बूझल जाय. ओ बेरा, समाज में ओ लोग के मान-जान ना रहे.

बाकिर मुकाम्बिका, जे ओ बेरा बीस बरीस के लमसम रहली, हिम्मत ना हरली. “हमरा यक्षगान सीखे औरी करे के बहुत मन करे.” ओ बेरा बैंक में कार करत ऊ अपना चार-पांच गो महिला सहकर्मी के देखली जे इ नाच सीखे के चाहत रहे. ऊ सब लोग के अपना गहरे से पूछे के परल. इ उत्साही कलाकार के इयाद बा कि उ अपना मरद, जे एगो स्कूल के शिक्षक रहलन, से इ बात के बारे में पूछली औरी ऊ इनकर फैसला के साथे होत कहलन कि “कवनो कला के कईला में कवनो तरह के रोक नईखे.”

समूह भागसाली भईल जब बैंके के एगो साथी श्रीधर ऐथल, जौन एगो सीखल यक्षगान कलाकार रहलन, इ लोग के सिखावे खातिर मान गइलन. इ समूह अपना कार के बाद एकर अभ्यास कईल. औरी इ मस्किल कला के मस्किल रूप में एकदम डूब गईल. एकरा बाद उ लोग कब्बो पाछे घूम के ना देखल. औरी 1976 के दिसंबर में मुकाम्बिका वारमबल्ली औरी उनकर महिला मंडली अपना बैंक के मनोरंजन दिवस पर परदरसन क के इतिहास रच दहल.

इ सुरुआत तुलुनाडु में महिला लोग के मंच प गोड़ राखे के पहिलका जानल उदाहरण में से रहे. इ लमहर बेरा से चल पुरुख-परधान कला के तूर देले रहे. ऊ मन पारेली, “हमनी के मन में कई गो सवाल रहे. लोग का कही? का हमनी के ई रूप के सकारी? बाकिर हमनी के बहुत ताजुब लागल कि लोग से हमनी के खुस होखे वाला भाव मिलल. भले कुछ लोग इ परयोग खातिर बहुत आगे ना रहे, बाकिर हमनी खुस रहनी. लोग आइल, देखल औरी एकर आनंद लहल.”

मुकाम्बिका मुख्य भूमिका के साथे बब्रूवाहना कालगा (बब्रुवाहन के लड़ाई) नाम से नाटक सीखे के फैसला कयिली. उ मन पारेली, “लोग के आपन संका रहे. बाकिर उ सब संका में त रहे साथही मेहरारू के पुरुख भेस में औरी मरदाना के मेहरारू औरी मरदाना दुनू के बेस में देखे के उत्सुको रहे. बाकिर हमनी खातिर इ कला के सीखे, परदरसन करे के हमनी के मन सब अटकलबाजी के सबसे ऊपर रहे.”

आपन पहिला परदरसन के बाद, मंडली के मैंगलोर में फेर से परदरसन करे के नेवता मिलल. अगिला साल, 1977 में उ लोग इन्द्रजीत कलगा के खेला करे खातिर मंच प रहे. औरी मुकाम्बिका हनुमंत के भूमिका में रहली.

मुकाम्बिका कहेली, “लोग हमरा से पूछेला कि का हम यक्षगान के क्षेत्र में परवेस करे वाला पहिल मेहरारू रहनी? बाकिर ई दावा कईल मस्किल बा. काहे से कि इ एगो बिसाल क्षेत्र ह. जौन दख्खिन कन्नड़, उडुपी, उत्तर कन्नड़ औरी इंहां ले कि केरल के कासरगोड़ ले पसरल बा.”

इ कला के भूगोल बड़का बा. औरी मेहरारू लोग एकरा के बिना कौनो लाज, संकोच के ना खाली सीखल, एकर परदरसनो कइले होई. बाकिर इ यक्षगान ऐतिहासिक रूप से खुला में, जेकरा के बयलाटा कहल जाला, कईल जात रहे. एसे इ असंभव बा कि मेहरारू लोग नियमित हो के इ मेला में भाग लेत होई.

आजो मेला में खुला मैदान के अस्थायी मंच प यक्षगान होला. मंडली एक गांव से दूसर गांव जाला. औरी अस्थायी मंच औरी तंबू लगा के ग्रीनो रूम के कार करेला.

कुछ महिला लोग मेला में परदरसन करे. अब्बो करेला बाकिर तब्बे जब ओ लोग के मरद इ मंडली में कर करत होखे. अइसन मौका पर ओ लोग के भुगतान कईल जाला. बाकिर मेहरारू लोग खाली यक्षगान से आपन गुजर क लेवे लोग अइसन कौनो पईसा-रोपया वाला व्यवस्था नईखे, जबकि मेला सालन पहिले रोका जाला. औरी हर तरे के समाज, अमीर-गरीब लोग एकरा में सामिल होला.

मणिपाल इंस्टीच्यूट ऑफ टेक्नोलाजी के शोधार्थी श्रुति बनगेरा कहेली, “महिला कलाकार के पहिले के कलाकार जइसन जान-मान ना मिलेला. अब उ लोग मेला में प्रस्तुति न देला, एसे ओ लोग के कार के शौकिया मान के नजरंदाज क दहल जाला.” उ आगे कहेली, कि सुरु में बेसी महिला लोग धनिक घर से रहे. अक्सर त बैंक में नौकरी करत रहे. यक्षगान कलाकार श्रुति कहेली, “ओ लोग आपन नाच खातिर कवनो पइसा ना ले औरी आपन मजूरी लेवे से इनकार करत रहे. इहे चलन आजो बा. आजो महिला के चलावल कौनो मेला मंडली नईखे.”

बाकिर जानकार लोग के कहनाम बा कि मुकाम्बिका के मंडली सही तरिका से अइसन रास्ता खोल दहलास जौन बहुत लमहर बेरा से बंद रहे. इ परयोग औरी आपन तरीका के रास्ता खोल दहलस जौन कब्बो बहुत कड़ा पहरा में रहे. सब महिला मंडली में मेहरारू कलाकार मरदों के भेस धरेला. अक्सर राक्षसों के, जेमे ओश्र लोग के आपन बोली बदले औरी भेस के जइसन देह के बालो देखावे के होखेला. बाहरी परदरसन में महिला भेस-महिला के रूप -सईयन साल से मरद लोग करत रहे. कब्बो हंसी-खेल खातिर, कब्बो बढ़ा-चढा के. मेला में मेहरारू लोग के करे से इ सब भेस के नया रूप, नया बनावट मिलल. औरी एगो अलगे तरे के उपस्तिथिति मिलल.

यक्षगान अब खाली मेला जइसन माहौल से आगे बढ़ के बकायदा मंच प्रस्तुति में बदल गईल बा. औरी मेहरारू लोग खातिर एकर नाटक आसन हो गईल बा. एहीसे, जहां तरह-तरह के समाज, संस्कृति वाला मेहरारू लोग यक्षगान सीखे औरी परस्तुत करेला, ऊंहे ओ लोग के एगो मौका सांस्कृतिक कार्यक्रम, एगो मंचीय सभा के रूप में मिलेला. अब मेला कम्मे मिलेला.

अब के दिन में इ औरी आगे बढ़ गईल बा. ऐसनो परयोग भईल बा जहां मरद महिला के सब भूमिका करता औरी महिला मरद के रूप में आवता.

यक्षगान के दू तरह से कईल जाला. तेंकुटिट्टू औरी बडगटिट्टू. तेंकुटिट्टू बेसी कर के तुलुनाडु में कईल जाला- कर्नाटक के एगो क्षेत्र जौन अरब सागर के आर प बा. मने दक्खिन कन्नड़ औरी कासरगोड जिला. बडगटिट्टू उत्तरी क्षेत्र में बेसी चलेला औरी उडुपी, उत्तर कन्नड़ के भीतरी भाग में बेसी कईल जाला.

मुकाम्बिका सुरु में तेंकुटिट्टू सिखली औरी ओकरा के कईली, बाकिर उनकर मन बडगटिट्टू सीखे के रहे. एहीसे उ औरी उनकर कुछ सहयोगी लोग बडगटिट्टू सीखे खातिर यक्षगान केंद्र से संपर्क कईल.

उडुपी के ज्ञानपीठ पुरस्कार बिजेता डाक्टर शिवराम कारंत 1972 में यक्षगान केंद्र के बनवलन. जब मुकाम्बिका औरी उनकर मंडली केंद्र से संपर्क कईल, तब सिक्षक आपन रोज के नियमित कक्षा के बाद, जब समय मिले, तब ओ सब के सिखावे प राजी हो गईलन. दू-तीन महीना के परसिक्षण के बाद ऊ सब ताम्रध्वज कलागा के प्रदर्सन खातिर तईयार रहे. तब्बे, केंद्र के साथी-संस्थापक, जे तटीय कर्नाटक के सांस्कृतिक समुदाय में एगो परभावसाली आदमी रहलन, बिना बतवले ओ सब के देखे आ गईलन.

मुकाम्बिका मन पार के कहली कि उ कहलन, “मेहरारू लोग के यक्षगान ना करे के चाहीं.” एकरा तुरन बाद उ केंद्र प एगो तख्ती लगा दहलन, जे पर लिखल रहे कि उंहा महिला लोग के ना पढ़ावल जाई.

“हम ई बात के बाद बहुत रोअनी,” उ पारी के बतवली.

बाकिर दस महिला के मंडली अपना के संभरलस औरी हिरयार्दा गोपाल राय से परसिक्षण लहल. मंडली अपना के ‘सिंडिकेट बैंक रिक्रियेशन क्लब महिला दशावतार मेला’ नाम दहलस.

परसिक्षण बहुत भारी रहे. औरी मुकाम्बिका के इयाद बा कि उनका घुमरी आवे लागल रहे. एक दिन जब ऊ बेहोस हो गईली तब उनकर जांच में पावल गईल कि उ चार महीना के पेट से बाड़ी. एहीसे, उ 1981 में यक्षगान से एक साल के छुट्टी लेवे के फैसला कईली.

जब उ फेर से सुरु कईली, त महिला यक्षगान के नाटक के खुसी से स्वागत भईल. सत्तर के बेरा से पहिले में जून बदलाव भईल रहे उ संस्था के बदलाव ना रहे. आपन अकेला के सफलता रहे जौन समय के साथे एगो बड़का रूप में बढ़ल. उ कहली, “हम मेला में, मने गांव-गांव घूमे वाला, रात भर चले वाला खेल में हमनी नाटक ना करीं. बल्कि हमनी सभागार में, मंच के औरी सांस्कृतिक कार्यक्रम में नेवता दहल जाय.” उनकर मंडली के उत्तरी औरी दक्खिनी कन्नड़ जिला कुल, बैंगलोर, गोवा औरी आंध्र परदेस के कई गो कार्यक्रम में बोलावल जाय.

एम. एल सामगा कहेलन, “मुकाम्बिका महिला यक्षगान के मंच प ले आवे के अगुआ रहली.” इ अनुभाव वाला कलाकार के कहनाम बा कि चूंकि महिला कलाकार शुल्क ना लेला, एहीसे ओकरा के गंभीरता से ना लहल जाला. औरी महिला लोग के मंडली बेसी कर के मौज-मजा के कार्यक्रम ले रह गईल, औरी कब्बो पैसा वाला यक्षगान मंडली के रूप में आगे ना बढ़ पावल. जौन मरद कलाकार लोग जइसन नियमित जात्रा औरी परदरसन करत होखे.

सांगा कहलन, “यक्षगान में अभियो मरद लोग के दबिस बा. ना खाली नाटक में, बल्कि सिंगार-पटार औरी कपड़ा तईयार करे जइसन कारो में. इलाका में कई गो हिस्सा में नियम से रात भर चले वाला परदरसन के कारन महिला लोग खातिर बहुत देर लर एमे रहल मस्किल हो जाला.”

महिला कलाकार के कब्बो-कब्बो लोग के तिरछा हंसी सहे के परे. कुछ देखे वाला लोग त मरद के भेस में ओ सब के नाटक देखत में मजाक उडावे. बाकिर कुल मिला के, उनका नाच के प्रतिक्रिया करेजा छुए वाला मिलल. मुकाम्बिका के एगो बेनामी चिठ्ठी मिलल रहे, जौना में लिखल रहे, “हमनी सब केहू बहुत बेसबूर रहनी कि का मेहरारू लोग काम भर के ताकत औरी फुर्ती बा कि ऊ लोग इ नाच क सके? बाकिर रउआ लोग के परदरसन देखला के बाद, हमनी दंग रह गईनी. रउआ इ परयास के साथे न्याय कईनी.” उ बतवली कि बड़ाई वाला पाती के गिनती सिकायत वाला से बेसी रहे.

अगिला दस साल ले मुकाम्बिका औरी उनकर मंडली आपन नाच करत रहल, उ सब नब्बे के समय में कुछ समय खातिर रुकल.

जीवन के गोला तब पूरा घूमल जब उनकर बेटी सहाना वारमबल्ली, जे हाई स्कूल के छात्रा रहली, अपना स्कूल के एगो कार्यक्रम में यक्षगान करे के चाहत रहली. उनकर के यक्षगान केंद्र मना क दहलस. जहां एक बेर उनकर माइयो के मना कईले रहे. करमचारी लोग सहाना औरी मुकाम्बिका के केंद्र के संस्थापक डाक्टर के. शिवराम कारंत से आगया लेवे के राय दहल.

मुकाम्बिका मन पारेली, “हम औरी हमार बेटी डाक्टर कारंत के घरे गईल रहनी. हम बेचैन रहनी औरी पहिले के पाबंदी से खिसियाईलो रहनी. जब हमनी उनका से भेंट कईनी त हम यक्षगान खातिर आपन सनक औरी अपना बेटी के इ सीखे के इच्छा के बारे में खोल के कहनी.”

डाक्टर कारंत कुछ देर में जवाब दहलन. उ कहलन, “यक्षगान केंद्र के यक्षगान सीखे में रूचि राखे वाला केहू भी बेक्ती के सिखावे खातिर बनावल गईल रहे. केहू के भी यक्षगान सीखे में लिंग के भेद ना करे के चाहीं. इ कला के सीखे खातिर सबकर स्वागत बा.”

जानकार लोग के कहनाम बा कि मुकाम्बिका के इ प्रयास के बहुत गहिरा असर भईल बा. बेसी से बेसी महिला लोग यक्षगान सीखता. श्रुती कहेली, “बहुत बढ़ल-चढ़ल, बडका औरी खुलल आन्दोलन, जौन ‘महिला देह’ खातिर असामान्य मानल गईल, ओकरा के मुक्ति वाला ही पावल गईल. औरी महिला लोग पारंपरिक स्त्रीवेश (महिला भेस) के बजाय पुरुष भूमिका करे औरी खोजे के इच्छा रखता.”

यक्षगान घरैतिन लोग के जिनगी में जगह बना लेले बा. औरी अब कई गो घरैतिन अपना खुसी औरी मन खातिर हर हफ्ता इ कला के अभ्यास करेला. श्रुति आगे कहली, “इ पुरान बात के कहे वाला नौका कथाकार ह लोग.”

इ कहानी मृणालिनी मुखर्जी फाउंडेशन (एमएमएफ) के फेलोशिप से समर्थित बा.

अनुवाद: स्मिता वाजपेयी