சுவரில் எழுதுதல்

இந்தியாவில் பத்தாண்டுகளில் பள்ளிச் சேரும் பிள்ளைகளின் எண்ணிக்கை 300 மில்லியன் ஆக அதிகரித்துள்ளது. ஆனால் கல்வித் தரமாக உள்ளதா? ஆண்டுதோறும் ஜனவரி மாதம் குடிமக்கள் அறிக்கை அட்டையில், (ASER அல்லது வருடாந்திர கல்வி நிலை அறிக்கை) பள்ளிகளில் பிள்ளைகளுக்கு என்ன கற்பிக்கப்படுகிறது- அவர்களால் அடிப்படையான சொற்களை, எண்களை படித்து புரிந்துகொள்ள முடிகிறதா என்று கண்டறிந்து தெரிவிக்கப்படுகிறது

அறிக்கையின் தரமான கண்டுபிடிப்புகள் அரசின் வெற்று புள்ளிவிவரங்களை வெட்ட வெளிச்சம் ஆக்குகிறது. ASER அனைத்து பள்ளி செல்லும் குழந்தைகளையும் அடிப்படை கற்றல் நிலைகளுக்கு சோதிக்கிறது. அவர்களால் பாடங்களைப் படிக்க முடிகிறதா, 2ஆம் வகுப்பின் கணித கேள்விகளுக்கு தீர்வு காண முடிகிறதா என்று பார்க்கிறது. உதாரணமாக, 2008 ஆம் ஆண்டில், 44 சதவீத பள்ளி மாணவர்களால் அடிப்படை கழித்தல், வகுத்தல் கொண்ட 2ஆம் வகுப்பு கணித கேள்விகளை தீர்க்க முடியவில்லை என்று கண்டறிந்தது.

பிரதம் என்ற அரசு சாரா அமைப்பால் முன்னெடுக்கப்படும் இந்த மூன்று மாத கால முயற்சியில், மாணவர்கள், விஞ்ஞானிகள் முதல் முதலீட்டு வங்கியாளர்கள், ஊறுகாய் தயாரிப்பாளர்கள் வரை 30,000 க்கும் மேற்பட்ட ஆர்வமுள்ள தன்னார்வலர்களை ஒன்றிணைக்கிறது. இவர்கள் இந்தியாவின் நகரங்கள் மற்றும் கிராமங்களில் குழந்தைகளை சோதிக்கவும், பள்ளிகளின் உள்கட்டமைப்பை பார்க்கவும் செல்கின்றனர். இந்த ஆண்டு 3 லட்சம் வீடுகளில் 7 லட்சம் குழந்தைகள் இந்த பயிற்சியில் பங்கேற்றுள்ளனர்.

பிரதம் பயிற்றுவிப்பாளர் சுவாமி அலோன், ஒன்பது வயதான நான்காம் வகுப்பு மாணவி கீதா தாக்கூரை பரிசோதிக்க, எண்களை பற்றி கேட்டதும் அழத் தொடங்கிவிட்டாள். 39-லிருந்து 27-ஐ கழிப்பது அவளுக்கு போராட்டமாக இருந்தது. இறுதியாக அவள் 116 என்று பதிலளித்தாள். அதற்கு காரணம் உள்ளது: அவரது கிராமப் பள்ளியில் கட்டாயமாக இருக்க வேண்டிய நான்கு ஆசிரியர்களுக்கு பதிலாக ஒற்றை ஆசிரியர் இருக்கிறார்.

சத்தீஸ்கர் மாநில அரசு கடந்த தசாப்தத்தில் தொழில்முறை ஆசிரியர் நியமனத்தை நிறுத்திவிட்டது, அரசுப் பள்ளிகளுக்கு ஒப்பந்த அடிப்படையில் குறைந்த ஊதியத்தில் தகுதியற்ற துணை ஆசிரியர்களை மட்டுமே பணியமர்த்தியுள்ளது. 21 வயதான இளங்கலை பட்டதாரி நவன் குமார், அத்தகைய ஒப்பந்த பள்ளி ஆசிரியராக விண்ணப்பித்துள்ளார். சர்வேயர்கள் அவரை சோதித்தபோது, அவரால் 919 ஐ 9 ஆல் வகுக்க முடியவில்லை. "பல கிராமங்களில் ஆசிரியர்களுக்கு அடிப்படை கணிதம் கூட தெரியவில்லை. எனவே குழந்தைகளுக்கும் அவர்கள் தவறாக கற்றுக்கொடுக்கிறார்கள்," என்று அலோன் கூறினார்.

உலகிலேயே அதிக கல்வியறிவு இல்லாத நாடு என்ற மோசமான பெயரை இந்தியா கொண்டுள்ளது - 300 மில்லியனுக்கும் அதிகமானோரால் படிக்கவோ, எழுதவோ அல்லது எண்களை பயன்படுத்தவோ முடியாது. ஒரு தாய்க்கும் அவரது குழந்தைகளின் கல்விக்கும் இடையே நேர்மறையான காரண தொடர்பு இருக்கிறதா என்பதைக் காண இந்த ஆண்டு, ASER கணக்கெடுப்பு, பெண் கல்வியறிவு நிலைகளையும் சோதிக்கிறது. 50 வயது நெல் விவசாயி ஹிராமதி தாக்கூர், சிறுவயது திருமணத்தால் பள்ளியில் இடைநின்றுவிட்டார். இப்போது பெரியவர்களாக இருக்கும் அவரது குழந்தைகளும் படிப்பை பாதியில் நிறுத்தியவர்கள். இந்த ஆண்டு தேசிய வயது வந்தோர் எழுத்தறிவு இயக்கத்தில் சேர்ந்த ஹிராமதி இப்போது அடிப்படை சொற்களை இடைவிடாமல் படிக்கிறார். " ஒரு ஏழை இன்று படிக்காவிட்டால், கூலி வேலையில் அவரது வாழ்க்கை கழிகிறது. எனக்கு ஓய்வு கிடைக்கும் போதெல்லாம், ஒரு புத்தகத்தை எடுத்து வாசித்து கற்பேன். அவர் புன்னகையுடன் சர்வேயர்களிடம் கேட்டார்: "எனக்கு இப்போது வேலை கிடைக்குமா?"

இந்த கிராமப் பள்ளி 1 முதல் 7-ம் வகுப்பு வரையிலான மூன்று அறைகள் கொண்ட கட்டடமாக உள்ளது. அங்கு பிரத்யேக குடிநீர் வசதிகளோ, கழிப்பறைகளோ இல்லை ("உஸ்கா பிரபோசல் ரஹா ஹை" [அதற்கான திட்டம் பரிசீலனையில் உள்ளது] என்று பழங்குடியினர் நலத்துறையைச் சேர்ந்த ஒரு அதிகாரி கூறினார். திங்கட்கிழமை காலை, பள்ளியில் ஒரு ஆசிரியர் கூட இல்லை.

தங்களின் தற்போதைய ரூ.4,000-6,000 வரையிலான ஊதியத்தை உயர்த்தக் கோரி மாநிலம் முழுவதும் ஆயிரக்கணக்கான ஒப்பந்த ஆசிரியர்கள் வேலைநிறுத்தத்தில் ஈடுபட்டுள்ள நிலையில், 25 வயதாகும் மாதவ் ஜாதவ் மற்றும் சத்ய பிரகாஷ் போன்ற பிஎட் மாணவர்கள் வாரத்தில் மூன்று நாட்கள் குழந்தைகளுக்கு பாடம் கற்பிக்கின்றனர். 1-3 வகுப்புகள் ஒரு குறுகலான அறையில் ஒரே நேரத்தில் கற்பிக்கப்பட்டுக் கொண்டிருந்தன. ஜாதவ் கூறுகையில்: "குழந்தைகளின் கல்வி நிலை மிக மோசமாக உள்ளது, அவர்களால் அடிப்படை கணக்குக் கூட போட முடியாது. நிறைய வேலை செய்ய வேண்டி இருக்கிறது."

இந்தியாவின் மோசமான பொதுப் பள்ளிகள் எனும் புகைப்படத் தொகுப்பிற்காக சத்தீஸ்கர் தலைநகர் ராய்ப்பூருக்கு தெற்கே 290 கிலோமீட்டர் தொலைவில் உள்ள பஸ்தரின் பர்ச்சன்பால் கிராமத்தில் ஒரு வார இறுதியில் நடந்த கணக்கெடுப்பில்இக்கட்டுரையாளர் பங்கேற்றார்.

தமிழில்: சவிதா