पझवेरकाडु के पानी गढ़त नवा जीविका

कार्तिक (नवंबर)के अमावस आय, अऊ रतिहा के 9 बजे हवय. तमिलनाडु के समुन्दर पार ले दूरिहा, पझवेरकाडु (जेन ला पुलिकट घलो कहे जाथे) के मुहाना के मुहटा शांत हवय. पानी उपर एक ठन नीला डोंगा तइरत हवय, जेन ह धार के संग बोहावत समुन्दर कोती जावत हवय.

डोंगा मं सरत कुमार, अरुण कुमार अऊ सेवित कुमार ठाढ़े हवंय. ओ मन के गोड़ के लकठा मं लकरी के सात ठन खंभा अऊ नायलॉन के बंधाय जाल परे हवंय. ये लोगन मन तोनिरेवु गाँव के बासिंदा आंय, जेन ह समुन्दर के तीर मं बसे हवय, अऊ वो मन बचपना ले मछरी धरे के बूता करत चले आवत हवंय.

वइसे मोर लालन-पालन समुन्दर ले जियादा नइ होय रहिस, अऊ अक्सर समुन्दर मं जाय के सपना देखत रहेंय, फेर मोर दाई जेन ह अकेल्ला हमन ला पालत-पोसत रहिस, मोर अऊ मोर बहिनी के सुरच्छा ला लेके भारी संसो करत रहय. पानी मं उतरे हमर बर मना रहिस.

जब मंय पहिली बेर पझवेरकाडु गे रहेंय, वो बखत 16 बछर के रहेंय. मंय चेन्नई क्लाइमेट एक्शन ग्रुप डहर ले आयोजित एक ठन फ़ोटोग्राफ़ी वर्कशॉप मं भाग लेंय, अऊ फ़ोटो-पत्रकार पलानी कुमार ह मोर मार्गदर्शन करिस. मंय वो लोगन मन के जिनगी ला जाने बर आतुर रहेंय, जेन मन समुन्दर तीर के ये इलाका ला अपन घर मानथें.

पानी मं उतरे मं मोला कुछु अऊ बछर लाग जाही.

मोर बनेच दिन के साध पूरा होइस, जब मंय एक ठन नीला डोंगा मं बइठ के पझवेरकाडु के बदलत माहौल अऊ उहां के मछुआरा मन के पानी के संग बदलत नाता ला समझे बर मछरी धरे जावत ओ मन के संग निकर गेंय.

मंय चेत धरे सुनथों, जब 30 बछर के सरत मोला समझाथे: “नदिया जोर ले समुन्दर कोती बोहाथे, अऊ जब ज्वार उतरथे, त मछरी, चिंगरी अऊ दूसर जीव धार के संग बोहाथे.”

घंटा भर बाद, रतिहा 10 बजे, वो ह जाल डारे बर पहिला खंभा पानी मं डारथे. सरत कहिथे, “खंभा लगाय के मतलब आय के अपन सांस रोक के पानी के बहाव ले जूझे.” अरुण अऊ सेवित, जेन मन के उमर 40 बछर के करीबन हवय, बाकी खंभा मन ला लगाथें अऊ ये देखथें के जाल रात भर मं बगर जाय. हरेक जाल करीबन 32 मीटर लंबा होथे. एक ठन डोंगा तीन ले चार जाल लगाथे अऊ ओला करीबन छै घंटा तक पानी मं छोड़ देथे.

पझवेरकाडु चेन्नई ले करीबन 20 कोस भंडार दिग मं, तिरुवल्लूर जिला मं, पुलिकट झील के दक्खिन पार मं बसे हवय – ये ह देस (भारत) के सबले बड़े नुनछुर पानी के झील मन ले एक आय, जेकर इकोसिस्टम करीबन 720 वर्ग किलोमीटर इलाका मं बगरे हवय.

ये इलाका मं करीबन 40 ठन मछुआरा बस्ती हवंय, जेन मन अपन रोजी-रोटी बर इही पानी के भरोसे हवंय. थोनीरेवू के ये परिवार कस कतको परिवार मन के इतिहास ह उत्तरी चेन्नई मं बंदरगाह अऊ औद्योगिक गलियारा बने के पहिली के आय. अधिकतर परिवार दलित समाज ले हवंय.

आज रात, गाँव के 10 ठन अऊ मछुआरा घलो हवंय: चार ठन डोंगा बनेच मछरी धरे के आस मं निकर परे हवंय.

खाड़ी के मुहाना मं मछरी मारे के बात ला लेके कभू गांव मन मं झगरा हो जावत रहिस. जमात – जेन ह समाज के सभा आय – ओहा 'पाडू' प्रथा ला मानथे. ये ह मछरी मारे के हक के एक ठो जुन्ना पारंपरिक पाली (रोटेशन) के तरीका आय, जेकर ले मछरी मारे के रात मन ला तीन ठन गाँव, तोनीरेवू, लाइट हाउस अऊ सेनबापल्ली मन ला बांटे जाथे. हरेक गाँव मं करीबन 40 झिन मछुआरा मन के एकठन मंडली/ टोली रहिथे.

“हमन करीबन 6 घंटा जाल ला पानी मं डारे राखथन,” सरत कहिथे. “कुछेक दिन हमन सिरिफ किलो भर चिंगरी लेके लहूटथन. अऊ कुछेक दिन एक टन धरके. जब तक हमन लहूट के नइ आ जावन, हमन ले कोनो ला पता नइ रहय के हाथ मं काय आही.”

बिहनिया, रतिहा मं धरे चिंगरी मन ला एक जगा राखे जाथे, किनारा मं ले जाथे अऊ ओकर बाद 'इदइपराग़र' करा ले जाय जाथे – ये ह एक ठन दलाल आय जेन ह मछुआरा अऊ तेन माइलोगन मन के बीच मं मध्यस्थ के काम करथे, जेन मन वो इलाका मं धरेगे मछरी मन ला बेचथें.

चिंगरी के संग मछरी अऊ केंकरा मन घलो धराथें. फेर चिंगरी च जियादा धराथे. एक ठन रतिहा बने रहिथे, त एक झिन मछुआरा ह एक हजार रूपिया धरके घर जा सकथे. बरसा के दिन मन मं जियादा कमई होथे, फेर ओहा जियादा खतरा के घलो रहिथे. सेवित कहिथे, “जब हमन भारी बरसा मं खाड़ी (नदी के मुहाना) मं जाथन, त अपन जान ला खतरा मं डारथन. कभू-कभू तेज बहाव धन चक्रवात मं हमर जाल घलो गंवा जाथे.”

गर कोनो जाल समुन्दर मं चले जाथे, त वो मन ला हरेक जाल पाछू 7,000 ले 8,000 रूपिया के नुकसान होथे.

सेवित ह अपन एक झिन संगवारी के खोय के घटना ला सुरता करथे, जेकर अचानक तूफान बखत गहिर पानी (लहरा ) मं गिरे ले परान चले गे रहिस. ओ ह पारी ला बताथे, “हमन अपन संगवारी वेलमुरुगन ला खो देन. सरकार डहर ले कोनो आर्थिक मदद धन मुआवजा नइ मिलिस हे. हमन अपन काम मं जान के जोखम उठाथन. काबर के हमन ला पता नइ रहय के आगू काय हो जाही.”

ओंकर मन के काम के एक ठन चक्कर धन फेरा रहिथे - एक ठन रतिहा खाड़ी मं मछरी मारे, अऊ दू दिन कोसस्तलईयार नदिया मं महाजाल (कास्ट नेट) ले मछरी मारे. वो बखत मं मछुआरा मन कैटामरन (छोटे डोंगा) मं अकेल्ला जाथें. ओमन पानी में एक ठन महाजाल (नानकन गोल, वजनी जाल जेन ह बड़े डोंगा वाले जाल से अलग होथे) ला डारथें, कुछेक घड़ी अगोरथें अऊ फेर ओला धराय मछरी, चिंगरी अऊ केंकरा के संग बहिर तीरथें. गाँव के अधिकतर लोगन मन इही तरीका ले काम करथें.

सरत एलएंडटी शिपयार्ड मं ड्राइवरी घलो करथे, जेकर ले वोला महीना के 20,000 रूपिया के कमई हो जाथे. वो ह कहिथे, “हमर गाँव के अधिकतर लोगन मन रतिहा मं जाल ले मछरी धरथें. कुछेक लोगन मन अशोक लिलैंड अऊ एलएंडटी मं घलो बूता करथें.”

पानी मं करीबन 10 घंटा बिताय के बाद, आखिर मं डोंगा ह लहुटिस. जइसनेच हमन बहिर गोड़ राखेन, हमर गोड़ ह तीर के जुड़ाय अऊ शांत पानी मं बूड़ गिस. तीर-पार मं इरुला आदिवासी समाज के लोगन मन ला चारा डार के मछरी मारत देखे जा सकत रिहिस – ये तरीका ह कतको पीढ़ी ले चले आवत हवय.

“चारा डारके मछरी धरे हमर सबले जुन्ना अऊ पारंपरिक तरीका रहिस,” सेवित सुरता करथे. “फेर आज हमर सिरिफ चारा लगाके मछरी धरे के भरोसे गुजारा नइ होवय.”

तोनिरेवु के एक झिन संगी मछुआरा, भुवनेश ला वो बखत सुरता हवय जब मछरी जियादा मिलत रहिस. कोसस्थलइयार नदिया के गंदगी के बात करत जेन ह कल-कारखाना के कचरा ले गंदा होगे हवय – वो ह कहिथे,” तीस बछर पहिली, मछरी अऊ नदिया के पानी, दूनोंच बढ़िया हालत मं रहिन.”

“हमन कतको किसम के मछरी धरत रहेन. हमन चारा वाले कांटा मं नुनछुर केलिथि (मोंगरी) मछरी फंसा देवत रहेन –केंकरा ओला धरेय अऊ वो मं फंस जावय. अइसनेच हमन नदिया के मुहाना मं केंकरा धरत रहेन.”

कतको जिनिस बदलगे हवय, अऊ मछुआरा मन बताथें के अब वो मन अधिकतर चिंगरी धरथें. उत्तरी चेन्नई मं ओकर समुन्दर पार के तीर पहिलीच ले बड़े बंदरगाह के ढांचा हवय अऊ मछुआरा मन के कहना हवय के बीते कतको बछर मं समुन्दर के पानी तक हबरे के रद्दा सांकर होगे हवय. गाद जमे सेती कतकोन जगा मं खाड़ी के गहिराई करीबन 3.8 मीटर ले घटके 2 मीटर के करीबन रहिगे हवय. अडानी कट्टुपल्ली पोर्ट प्रोजेक्ट के बड़वार ह ओ अनिश्चितता ला अऊ बढ़ा दे हवय.

“गर [बंदरगाह] बड़वार परियोजना पूरा हो गीस, त हमन मछरी धरे नइ पाबो. चेन्नई के उत्तरी हिस्सा मं तीन ठन बंदरगाह काबर हवंय? येकर जरूरत कोन ला हे? काबर के ये हमर पुरखौती के काम आय, ते पायके हमन येकर बगेर गुजारा करे नइ सकन,” सरत कहिथे.

ये कहिनी पारी फेलोशिप 2025 के तहत छापे गे हवय.