دہلی سے گھر لوٹنے کو مجبور یومیہ مزدور

سونو کمار راوت اور ان کی فیملی کو آنند وہار ریلوے اسٹیشن پر آخرکار ایک پرسکون جگہ مل گئی ہے، حالانکہ یہاں پر لوگوں کی اس وقت بہت زیادہ بھیڑ ہے۔ ان کے اردگرد مسافر، خوانچہ فروش اور ٹرینیں آ جا رہی ہیں۔ سونو (۲۷) اپنے سامان پر گہری نظر رکھے ہوئے ہیں۔ ان کی بیوی ستارہ خاتون اپنے شیر خوار بچے کو گود میں لیے ہوئی ہیں۔ مگر ابھی دوپہر کے دو ہی بجے ہیں۔ انہیں اپنے گھر بہار جانے کے لیے لچھوی ایکسپریس ٹرین پکڑنی ہے، جو یہاں سے چار گھنٹے بعد چلے گی۔ تب تک انہیں اسی پرہجوم پلیٹ فارم پر اس گھٹن بھری گرمی میں انتظار کرنا ہوگا۔

سونو ایک راج مستری ہیں، جب کہ ستارہ تعمیراتی مقامات پر کام کرتی ہیں۔ دونوں ہر صبح غازی آباد کی لیبر منڈیوں میں قطار لگاتے ہیں، تاکہ کوئی کام مل سکے۔ سونو بتاتے ہیں کہ گزشتہ ہفتے ’’ہم نے پورا پورا دن لیبر چوک پر گزارا، لیکن دو یا تین دن تک ہمیں کوئی کام نہیں ملا۔‘‘

امریکہ اور اسرائیل کے ذریعہ ایران پر حملہ اور اس کے بعد آبنائے ہرمز کی ناکہ بندی کے نتیجہ میں ملک بھر میں ایل پی جی کی قیمتوں میں بے تحاشہ اضافہ کے بعد راوت فیملی کے لیے دہلی میں رہنا معاشی طور پر ناممکن ہو گیا ہے۔

سونو کہتے ہیں، ’’پہلے ہم گیس سلنڈر پر ۱۲۰۰ روپے، مکان کے کرایے پر ۲۵۰۰ روپے اور بجلی پر ۵۰۰ روپے خرچ کرتے تھے۔ یعنی کھانے کے علاوہ ہر مہینے ۴۰۰۰ سے ۵۰۰۰ روپے خرچ ہو جاتے تھے۔‘‘ بنیادی ضروریات پوری نہ ہو سکنے کی وجہ سے اب ان کے پاس اپنے گاؤں واپس جانے کے سوا کوئی دوسرا راستہ نہیں بچا ہے۔

لیکن ان کی واپسی شدید بے چینی سے بھری ہوئی ہے – یہ بین المذاہب جوڑا گھر سے بھاگ کر شادی کر کے آیا تھا۔ وہ ایک سال سے بھی کم عرصہ پہلے شناخت چھپانے اور کام کی تلاش میں دارالحکومت آئے تھے۔ اب انہیں واپس جانا پڑ رہا ہے۔ وہ ستارہ کے آبائی علاقہ، سیوان ضلع کے میرواں قصبہ جانے کی کوشش کریں گے، اس امید کے ساتھ کہ وہاں ان کا استقبال قدرے نرمی کے ساتھ ہوگا۔

دہلی میں یہ فیملی کنونی گاؤں کی ایک کچی بستی میں ایک کمرہ میں رہتی ہے۔ سونو مزید کہتے ہیں، ’’ہمیں مہینہ میں شاید ۲۰ دن کام ملتا ہے۔ اچھے مہینہ میں ہم میں سے ہر ایک ۱۰ ہزار [روپے] کما لیتا ہے۔‘‘ وہ افسوس کے ساتھ بتاتے ہیں کہ کس طرح ایل پی جی کے بحران نے ان کے محتاط گھریلو بجٹ کو درہم برہم کر دیا ہے۔

آج ایل پی جی بلیک مارکیٹ میں ۳۰۰ سے ۴۰۰ روپے فی کلو کے حساب سے فروخت ہو رہی ہے، جو عام قیمت سے تین یا چار گنا زیادہ ہے۔ ایک کلو گیس زیادہ سے زیادہ دو سے تین دن تک چلتی ہے۔ ان کے مکان مالک نے کمرے میں لکڑی کے چولہے یا بجلی سے چلنے والے چولہے (انڈکشن اسٹوو) کے استعمال پر پابندی لگا رکھی ہے، جس کی وجہ سے وہ مکمل طور پر بلیک مارکیٹ سے ملنے والی ایل پی جی پر انحصار کرنے پر مجبور ہیں – جو اب نہ تو باقاعدگی سے دستیاب ہے اور نہ ہی اسے خریدنے کی ان میں استطاعت ہے۔

راوت اکیلے ہی دہلی واپس آنے کا ارادہ رکھتے ہیں۔ مگر کب؟ ’’مجھے نہیں معلوم،‘‘ وہ سر ہلاتے ہوئے کہتے ہیں۔

اسی اسٹیشن پر محمد سراج دوپہر ڈھائی بجے کی سپت کرانتی ایکسپریس کا انتظار کر رہے ہیں، جو انہیں موتیہاری لے جائے گی۔ سراج (۳۰) اپنی بیوی مومنہ خاتون اور اپنی تین بیٹیوں کے ساتھ بہار میں اپنے گاؤں ماری پور ملیک واپس جا رہے ہیں۔ ان کی ایک بیٹی تیز بخار اور قے میں مبتلا ہے۔ ماں باپ اسے باری باری سے گود میں اٹھاتے ہیں۔

سراج ہریانہ کے بہادرگڑھ شہر میں تعمیراتی مقامات پر یومیہ اجرت پر کام کرتے ہیں۔ انہوں نے اس شہر کو خشک سالی، معاشی سست روی اور وبا کے دوران بھی دیکھا ہے، مگر ایسا وقت پہلے کبھی نہیں دیکھا۔

وہ کہتے ہیں، ’’جب سےایل پی جی کے سلنڈر ملنا بند ہوئے ہیں، ہمیں بہت سی مشکلات کا سامنا کرنا پڑ رہا ہے۔ میں زیادہ سے زیادہ ۴۰۰ روپے روز کماتا ہوں، اور بلیک مارکیٹ میں ایک کلو گیس بھی ۴۰۰ روپے کی ہے۔ پھر ہمارے کھانے کے لیے کیا بچے گا؟‘‘

سراج اور ان کی فیملی، جو ہریانہ کے گروگرام کے بجگھیرا لیبر کیمپ میں رہتے ہیں، گزارہ کرنے کے لیے چولہا استعمال کر رہے تھے، مگر مکان مالک نے اس پر اعتراض کرنا شروع کر دیا۔ سراج کے مطابق اب لکڑی بھی ۱۰ روپے کلو ہو گئی ہے، جو پہلے ۴ روپے میں ملتی تھی۔

مومنہ بھی پریشان ہیں۔ وہ کہتی ہیں، ’’بچے کو روز دودھ گرم کر کے پلانا پڑتا ہے، اتنا گیس استعمال ہوتا ہے…‘‘

سراج کہتے ہیں کہ بلیک مارکیٹ میں ایل پی جی کی قیمتیں بے حد غیر یقینی ہیں۔ ’’کچھ عرصہ پہلے یہ ۶۰۰ روپے کلو تھی، اب ۳۵۰ روپے کلو ہو گئی ہے۔ کبھی بڑھ جاتی ہے، کبھی گھٹ جاتی ہے۔‘‘

سراج بتاتے ہیں کہ وہ تقریباً ۱۵ دن بعد دہلی واپس آنے کا ارادہ رکھتے ہیں۔ مگر جس دہلی کو چھوڑ کر وہ جا رہے ہیں، وہ پہلے جیسی نہیں رہی جہاں وہ ۱۶ سال پہلے آئے تھے۔ وہ ٹرین میں سوار ہونے کی تیاری کرتے ہوئے کہتے ہیں، ’’میں ۲۰۱۰ سے دہلی میں رہ رہا ہوں اور کام کر رہا ہوں، میں نے پہلے کبھی گیس کا ایسا بحران نہیں دیکھا۔‘‘