’لڑکیوں کو امتحان میں بار بار بیٹھنے کا موقع کون دیتا ہے؟‘

’’امتحان کی تیاری کرنا ہماری ذمہ داری ہے۔ پاس ہونے کی ذمہ داری ہماری ہے۔ یہ یقینی بنانا کہ امتحانی پرچہ محفوظ رہے، حکام کا کام ہے،‘‘ اپنا غصہ ظاہر کرتے ہوئے انشو کماری کہتی ہیں۔

انشو کماری (۲۴) مسابقتی امتحانات کے دباؤ سے بخوبی واقف ہیں۔ وہ ایک اسکول میں بطور ٹیچر خدمات انجام دے رہی ہیں۔ اس کے ساتھ ساتھ وہ ایک اوپن یونیورسٹی سے بیچلر آف ایجوکیشن (بی ایڈ) کی تعلیم بھی حاصل کر رہی ہیں اور سرکاری اسکول میں ملازمت کے لیے سینٹرل ٹیچر ایلیجیبلٹی ٹیسٹ (سی ٹی ای ٹی) کی تیاری بھی کر رہی ہیں۔

سال ۲۰۲۳ اور ۲۰۲۴ میں انشو نے بینکوں کی بھرتی کے امتحانات میں بھی شرکت کی، اس امید کے ساتھ کہ انہیں سرکاری ملازمت مل جائے گی، لیکن کامیابی ان کا مقدر نہ بن سکی۔ چنانچہ انہوں نے تدریس کو اپنا پیشہ بنا لیا، جبکہ راتوں کو جاگ کر ریاستی سطح کے تدریسی امتحانات کی تیاری بھی جاری رکھی۔

انشو کا تعلق بہار کے بیگوسرائے ضلع سے ہے۔ سال ۲۰۰۰ کے آس پاس ان کی فیملی روزگار کی تلاش میں فرید آباد منتقل ہو گئی، جہاں ان کے والد کو ایک پرنٹنگ پریس میں مزدور کی حیثیت سے کام مل گیا۔

حالیہ برسوں میں امتحانی پرچوں کے بار بار لیک ہونے کے واقعات نے انشو کو شدید مایوسی اور ریاستی نظام پر غصے سے بھر دیا ہے۔ وہ سوال کرتی ہیں، ’’اگر حکومت اتنا بھی نہیں کر سکتی کہ پرچے لیک ہونے سے بچا سکے، تو پھر طلبہ کہاں جائیں گے؟‘‘

وہ مزید کہتی ہیں، ’’اور اگر آپ [حکومت] یہ بھی نہیں کر سکتے، تو پھر اقتدار چھوڑ دیجیے۔‘‘ یہ بات قریب ہی کھڑی سادھنا جادون نے بھی ہماری گفتگو سنتے ہوئے جنتر منتر پر گزشتہ ہفتے کے اوائل میں کہی۔

قریبی ریاست ہریانہ کے ایک پرائیویٹ اسکول کی پرنسپل سادھنا جادون اس احتجاج میں شریک تھیں، جس کا آغاز سماجی کارکن سونم وانگچک اور کاکروچ جنتا پارٹی (سی جے پی) نے امتحانی پرچوں کے مسلسل لیک ہونے اور عوامی اداروں، مجموعی نظام اور طرزِ حکمرانی پر گہرے ہوتے ہوئے عدم اعتماد کے خلاف کیا تھا۔ جنتر منتر کا یہ احتجاج اپنی پہلی بڑی کامیابی اس وقت حاصل کرنے میں کامیاب ہوا جب ۲۵ جولائی ۲۰۲۶ کو مرکزی وزیرِ تعلیم، دھرمیندر پردھان نے اپنے عہدہ سے استعفیٰ دے دیا۔

اساتذہ نے پاری کے نامہ نگاروں کو بتایا کہ ان جیسے کم آمدنی والے خاندانوں کے لیے سرکاری ملازمت ہی بہتر مستقبل کی واحد امید ہے۔ یہی نہیں، یہ خواتین کے لیے باقاعدہ روزگار کے شعبے میں دستیاب چند منصفانہ مواقع میں سے بھی ایک ہے۔

سادھنا پوچھتی ہیں، ’’آخر ایک لڑکی کو امتحان دینے کے کتنے مواقع ملتے ہیں؟‘‘ ان کی شادی اتر پردیش کے اپنے آبائی شہر آگرہ میں صرف ۱۸ سال کی عمر میں ہو گئی تھی۔ اب ۳۵ سالہ سادھنا نے ایک وقت میں گھریلو ذمہ داریوں کے ساتھ ساتھ مسابقتی امتحانات کی بھرپور تیاری کی اور اسٹاف سلیکشن کمیشن (ایس ایس سی) کے امتحان میں دو مرتبہ شرکت کی۔ ’’دونوں بار ریاست میں فرقہ وارانہ فسادات کے باعث امتحان منسوخ کر دیا گیا،‘‘ انہوں نے یاد کرتے ہوئے کہا۔

ہمت نہ ہارتے ہوئے سادھنا نے بیچلر آف ایجوکیشن (بی ایڈ) کی ڈگری حاصل کی تاکہ اتر پردیش ٹیچرز ایلیجیبلٹی ٹیسٹ (یو پی ٹی ای ٹی) دے سکیں۔ لیکن ایک امتحان اسی نوعیت کے ہنگاموں کے باعث منسوخ ہو گیا، جبکہ دوسرا سوالیہ پرچہ لیک ہونے کی وجہ سے ردّ کر دیا گیا۔

تیسری کوشش ان کے لیے سب سے زیادہ تکلیف دہ ثابت ہوئی۔ سادھنا آدھا پرچہ حل کر چکی تھیں کہ امتحانی حکام ہال میں داخل ہوئے اور جوابی کاپیاں جمع کرنا شروع کر دیں۔

’’پرچہ ایک بار پھر لیک ہو چکا تھا،‘‘ وہ ٹوٹتی ہوئی آواز میں کہتی ہیں۔ ’’میں اس درد کو الفاظ میں بیان نہیں کر سکتی۔‘‘ یہ کہتے ہوئے ان کی آنکھوں سے آنسو بہنے لگے۔ قریب کھڑا ایک نوجوان مظاہرہ کرنے والا، جو خاموشی سے ان کی بات سن رہا تھا، آگے بڑھا اور انہیں پانی کی بوتل پیش کی۔

بار بار ملنے والی ناکامیاں خاص طور پر اس لیے تکلیف دہ تھیں کیونکہ شادی کے بعد تعلیم جاری رکھنا بھی ایک جدوجہد رہی ہے۔

وہ پاری کو بتاتی ہیں، ’’ہندوستان میں اکثر لڑکیوں کی زیادہ تعلیم حاصل کرنے کی حوصلہ افزائی نہیں کی جاتی۔ میں نے خود کو سنبھالا… میں نے اپنی زندگی ختم نہیں کی۔ لیکن اس بات کی کوئی گارنٹی نہیں ہے کہ آنے والی نسل، یا یہاں تک کہ میرے اپنے بچے بھی، ان حالات کا مقابلہ کر پائیں گے۔‘‘

سندھیا، سادھنا، انشو اور پرینکا نے فرید آباد سے آٹو رکشہ کے ذریعے احتجاج میں شرکت کے لیے سفر کیا، کیونکہ جنتر منتر کے آس پاس کے علاقوں میں عوامی نقل و حمل بند کر دی گئی تھی۔

وہ سیدھے اپنے اسکول سے احتجاجی مقام پر پہنچیں، اور اپنے گھر والوں کو اس بارے میں اطلاع نہیں دی۔ ’’لڑکیوں کو پولیس کے ہاتھوں گھسیٹے جانے اور احتجاج کے دوران ان کے ساتھ بدسلوکی کی ویڈیوز دیکھنے کے بعد، کون سا خاندان اپنی بیٹیوں کو آنے کی اجازت دے گا؟ ہمارے خاندانوں نے ہمیں اجازت نہیں دی، لیکن ہمارا یقین ہے کہ تعلیم کے بغیر آپ اپنے لیے مستقبل تعمیر نہیں کر سکتے،‘‘ انشو نے کہا۔

سادھنا ان سب کو ساتھ لے کر آئیں۔ ’’ہمیں لگا کہ اگر ہم آج آواز نہیں اٹھاتے، تو ہمارے دل میں ہمیشہ یہ احساسِ جرم رہتا کہ اتنی تکلیف برداشت کرنے کے باوجود ہم کبھی باہر نکل کر اس کے بارے میں بول بھی نہیں سکے۔ کم از کم ہم اپنی مایوسی اور غصے کا اظہار کرنا چاہتے تھے،‘‘ سادھنا نے پاری کو بتایا۔

سرکاری ملازمت حاصل کرنا ہی سندھیا ساگر اور ان کے خاندان کے لیے غربت سے نکلنے کا سب سے بڑا موقع ہے۔ ۲۳ سالہ سندھیا، جو چار بہن بھائیوں میں سے ایک ہیں اور ریاستی ملازمتوں کے لیے مسابقتی امتحانات پاس کرنے کے عزم کے ساتھ تیاری کر رہی ہیں، کہتی ہیں،’’"میرے گھر والوں نے اپنی تمام امیدیں مجھ سے وابستہ کر رکھی ہیں۔ ان کا خواب ہے کہ میں اپنی تعلیم مکمل کروں اور سرکاری ملازمت حاصل کروں۔‘‘

سندھیا کا تعلق اتر پردیش کے اٹاوہ ضلع کے تلسی پور گاؤں میں رہنے والے ایک معمولی کسان خاندان سے ہے۔ ان کی فیملی کے پاس دو بیگھہ سے بھی کم (تقریباً ۲ء۱ ایکڑ) زمین ہے، جہاں وہ گھر کے استعمال کے لیے گندم اور چاول اگاتے ہیں۔ غربت کے باعث ان کے چھوٹے بھائی کو گھر کے اخراجات میں مدد کے لیے کم عمری میں ہی کام شروع کرنا پڑا، حالانکہ سندھیا نے اپنی تعلیم جاری رکھی۔ ان کی بڑی بہنوں کی شادیاں کر دی گئیں۔

دو سال قبل اٹاوہ سے یہ خاندان ہریانہ کے فرید آباد منتقل ہو گیا، جہاں وہ کرائے کے ایک کمرے میں رہتے ہیں۔ اس وقت سندھیا ایک پرائیویٹ اسکول میں پرائمری کے بچوں کو پڑھاتی ہیں، جبکہ ان کا بھائی ادویات کی ترسیل کا کام کرتا ہے۔ دونوں مل کر تقریباً ۲۲ ہزار روپے ماہانہ کماتے ہیں، جس کا تقریباً ایک چوتھائی حصہ کرائے کی مد میں خرچ ہو جاتا ہے۔

سندھیا نجی ملازمت کو اپنا آخری مقصد نہیں سمجھتیں۔ وہ واضح طور پر کہتی ہیں کہ وہ یہ کام صرف اپنے اخراجات خود پورے کرنے کے لیے کر رہی ہیں۔ اس دوران وہ مسلسل سرکاری بھرتی کے امتحانات میں شرکت کر رہی ہیں۔

وہ بتاتی ہیں، ’’سال ۲۰۲۲ میں، میں نے سب سے پہلے یو پی پولیس کا پیپر دیا تھا۔ میرا وہ پیپر کلیئر بھی ہو گیا تھا، لیکن پیپر لیک ہو گیا۔ وہ میری پہلی کوشش تھی۔ میری فیملی نے مجھے سنبھالا، سہارا دیا اور کہا کہ اگلی بار ہو جائے گا، اگلی بار کوشش کرنا۔‘‘

اس کے بعد سال ۲۰۲۳ میں ان کی اسٹاف سلیکشن کمیشن (ایس ایس سی) کے امتحان میں دوسری کوشش، کٹ آف نمبر سے کم اسکور کے باعث کامیاب نہ ہو سکی۔ اس سال انہوں نے اتر پردیش پولیس کانسٹیبل کا امتحان دیا اور اب وہ گروپ سی کی سرکاری ملازمتوں، جیسے کلرک کے عہدوں، کے لیے ابتدائی اہلیتی امتحان (پی ای ٹی) کی تیاری کر رہی ہیں۔

بنیادی طور پر بہار کے ویشالی ضلع سے تعلق رکھنے والی ۳۱ سالہ پرینکا یادو ۲۰۱۵ میں شادی کے بعد فرید آباد منتقل ہوئیں اور انہوں نے بی ایڈ مکمل کیا۔ انہوں نے کئی مرتبہ سینٹرل ٹیچر ایلیجیبلٹی ٹیسٹ (سی ٹیٹ) دیا، یہاں تک کہ گزشتہ سال آخرکار اسے پاس کر لیا۔ جب بہار حکومت نے اعلان کیا کہ اساتذہ کی خالی آسامیوں کا اعلان کیا جائے گا، تو وہ سرکاری اسکول میں استاد کی ملازمت کے لیے درخواست دینے کی امید کرنے لگیں۔ لیکن بھرتی کا عمل ابھی تک شروع نہیں ہوا ہے۔

’’ہم مسلسل تیاری کرتے رہتے ہیں اور انتظار کرتے ہیں، لیکن آسامیاں ہی نہیں آتیں،‘‘ پریانکا یادو کہتی ہیں۔ وہ ایک پرائمری اسکول ٹیچر ہیں اور ان خاندانوں کو قریب سے دیکھتی ہیں جو بہار اور دیگر ریاستوں سے دہلی این سی آر کا رخ کرتے ہیں، اس امید میں کہ ان کے بچوں کو بہتر تعلیمی مواقع ملیں گے اور مسابقتی داخلہ امتحانات میں کامیابی کے بہتر امکانات حاصل ہوں گے۔

’’جب حکومت اور نظام نے مجھے موقع نہیں دیا، تو میں نے فیصلہ کیا کہ میں خود اپنے لیے ایک موقع پیدا کروں گی،‘‘ سادھنا کہتی ہیں۔ ’’میں یہ ثابت کرنا چاہتی تھی کہ میرے اندر صلاحیت ہے، چاہے کسی نے اسے پہچانا ہو یا اس کی قدر کی ہو یا نہیں۔ اسی لیے میں نے خود اپنا اسکول کھول لیا۔‘‘

ایک طرف سادھنا یہاں دوسروں کے ساتھ اظہارِ یکجہتی کے لیے کھڑی ہیں، اور اسکول ان اساتذہ کے ذریعے سنبھالا جا رہا ہے جو یہاں نہیں آئے۔ احتجاج میں آنے سے پہلے سادھنا نے ان سے کہا تھا، ’’آپ یہاں اسکول سنبھال لیجیے، ہم مورچہ سنبھال لیتے ہیں۔‘‘

جب مرکزی وزیر نے استعفیٰ دیا تو ان کی ساتھی سندھیا کا بس یہی کہنا تھا، ’’یہ کامیابی ضرور ہے، لیکن میں اس کا جشن نہیں منا رہی۔‘‘ پاری سے فون پر بات کرتے ہوئے انہوں نے مزید کہا، ’’اس بات کی کیا گارنٹی ہے کہ اب مزید پرچے لیک نہیں ہوں گے؟ پورے تعلیمی نظام کو درست کرنے کی ضرورت ہے۔‘‘

یہ اسٹوری پہلے انگریزی اور ہندی میں لکھی گئی تھی۔