‘छोकिरियुनि खे हर हर इम्तिहान केर थो ॾियण ॾिए?’

ॾमरियल अंदाज़ में अंशु कुमारी चवे थी, “इम्तिहान जे लाइ तयारी करण जी जवाबदारी असांजी आहे। पास थियण जी जवाबदारी असांजी आहे। तव्हांते रुॻो एतिरी ई मयार आहे त इम्तिहान ख़ातिरीअ सां थी वञनि।”

24 सालनि जी अंशु कुमारी खे इहो भलीअ भिति मइलूमु आहे त कॉम्पिटिटिव एग्ज़ाम जो प्रेशर छा हूंदो आहे। स्कूल में कंप्यूटर पाढ़ण सां गॾोगॾु हूअ ओपन यूनिवर्सिटी खां बी. एड. बि करे रही आहे। संदसि मक़्सदु सरकारी स्कूल में मास्तरियाणी थियणु आहे। इन सां गॾोगॾु हूअ सेंट्रल टीचर एलिजिबिलिटी टेस्ट (सीटीईटी) जी बि तयारी करे रही आहे।

2013-14 में अंशु सरकारी सरकारी नौकरी जी उमेद रखंदे बैंक भर्ती जो इम्तिहानु डि॒नो। जड॒हिं सभेई कोशिशूं नाकामु थी वेयूं त हुन पाढ़ण शुरू कयो। बि॒ए पासे संदसि रातियूं मास्तर मुक़ररी जे सरकारी इम्तिहाननि जे लाइ पढ़ाई में गुज़रंदियूं हुयूं।

अंशु ऐं संदसि कुटुंबु बिहार जे बेगूसराय ज़िले जे बरौनी में रहंदो हो। साल 2000 जे आसपासि उहे फ़रीदाबार में अची आबादु थिया, जिते संदसि पीउ खे हिकु प्रिंटिंग प्रेस में मज़ूरीअ जो कमु मिलियो।

हाल ई में थियल पेपर लीक जी थियणियुनि जे करे हूअ रियासत तर्फ़ां मायूस ऐं काविड़ियलु आहे। “जेकड॒हिं इहे पेपर लीक बि न पिया रोके सघनि, त स्टूडेंट्स किथे वेंदा?,” अंशू पुछे थी।

साधना जादौन चवे थी, “जेकड॒हिं तव्हां (सरकार) इहो नथा करे सघो त पासे थी वञो।” हूअ जंतर-मंतर ते असांजी ॻाल्हियुनि खे कन डे॒ई ॿुधी रही हुई।

हरियाणा जे हिकु प्राइवेट स्कूल प्रिंसिपल साधना लॻातार थींदड़ पेपर लीक जे खिलाफ़ु समाजी कार्यकर्ता सोनम वांगचूंक ऐं काक्रोच जनता पार्टी (सीजेपी) पारां शुरू कयल विरोध प्रदर्शन में शामिलु थी। हुन जे मुताबिक़ पेपर लीक जे करे माण्हुनि जो सरकार, निज़ाम ऐं सरकारी इदारनि तां वेसाह घटिंदो पियो वञे। जंतर-मंतर ते हिक महीने खां बि वधीक समे खां हलंदड़ इन विरोध खे पंहिंजी पहिरीं सोभ 25 जुलाई 2026 जो मिली वेई, जॾहिं तइलीम खाते जे मर्कज़ी मंत्री धर्मेंद्र प्रधान इस्तीफ़ा ॾिनी।

मास्तरयाणियुनि पारी जे रिपोर्टरनि खे ॿुधायो त उन्हनि वांगे घटि आमदनी वारनि परीवारनि जे लाइ सरकारी नौकरियूं ई सभ खां वॾी उमेद हूंदी आहे। औरतुनि खे नौकरियुनि जा बराबरि वझ नथा मिलनि, ऐं इहे सरकारी नौकरियूं ई हासुलु थींदड़ कुझु मौक़नि में शामिल आहिनि।

साधना पुछे थी, “छोकिरी खे हर हर इम्तिहान केर थो ॾियणु ॾिए?” आगरा, उत्तर प्रदेश जी रहंदड़ साधना पुछे थी, जंहिं जी शादी 18 सालनि जी उमिरि में ई थी वेई। अॼु हूअ 35 सालनि जी आहे। हिक दफ़े हुन घर जी जवाबदारियुनि खे मुंहुं ॾींदे कॉम्पिटिटिव इम्तिहाननि जे लाइ जफ़ाकशी कई। हुन ब॒ दफ़े स्टाफ़ सिलेक्शन कमीशन (एसएससी) जो बि इम्तिहानु पिणु डि॒नो। उन दौर जूं ॻाल्हियूं यादि कंदे हूअ चवे थी, “ॿिन्ही दफ़े सूबे में थियल सांप्रदायिक हिंसा जे करे इम्तिहानु रदि थी वियो हो।”

हुन हार मञणु क़बूलु न कयो। साधना पहिरीं पंहिंजी बी. एड. जी पढ़ाई पूरी कई। इन बैदि उत्तर प्रदेश टीचर एलिजिबिलिटी टेस्ट (यूपीटीईटी) जी तयारी शुरू कई। अॻु वांगे इम्तिहानु सांप्रदायिक हिंसा जे करे कैंसिल कयो वियो। वरी ॿिए दफ़े पेपर लीक थी वियो हो।

टीहर उन जे लाइ कोशिश करणु, इम्तिहानु डि॒यण ॾाढो मायूसु कंदड़ हो। साधना पंहिंजो अध खां वधीक पर्चो पूरो करे वरितो हो, तड॒हिं ई अधिकारी इम्तिहान हॉल में अचे थो ऐं पर्चा गॾु करण लॻी वेंदो आहे।

पेपर ॿीहर लीक थी वियो, हूअ दिलिसोज़ आवाज़ में चवे थी। अखियुनि मां आब वहाईंदे चयाईं, “इन सूर लाइ वाई नथी लभिजे।” एतिरे में हिकु विरोधी जेको माठि में हुन जूं ॻाल्हियूं ॿुधी रहियो हो, हू खेसि पाणी आछे थो।

अहिड़नि लोॾनि ज़िंदगीअ जे सफ़र खे ॾाढो ॾुखियो बणाए छॾियो, छाकाणि त विहांउ बैदि तइलीम खे जारी रखण, पाण में हिकड़ी जदोजहदु आहे।

हूअ पारी खे ॿुधाए थी, “छोकिरियुनि खे अक्सरि वधीक तइलीम जे लाइ हिमथायो नथो वञे। मां बची वियसि, मूं आपघाति न कयो। पर इहो ज़रूरी नाहे त मुंहिंजा ॿार बि इन्हीअ वाट ते हलनि, ईंदड़ टही इहो बर्दाश्त करे न सघिंदी।”

संध्या, साधना, अंशु ऐं प्रियंका फ़रीदाबाद ऑटो करे विरोध में शामिल थियण जे लाइ पहुतियूं हुयूं। मुज़ाहिरे जे दौरान जंतर-मंतर जे सभिनी नज़दीकी वाहणनि खे बंद कयो वियो हो।

इन्हनि मां कंहिं बि इन बाबति पंहिंजे परीवार वारनि खे न ॿुधायो हो। सभेई जिनि स्कूल में पाढ़ंदियूं हुयूं, हुतां सिधो हिते पहुतियूं हुयूं। अंशु चवे थी,“छोकिरियुनि सां चङी न पिया कनि। सथ वारा उन्हनि खे बचाइण जी कोशिश करे रहिया आहिनि त बि पुलीस छोकिरियुनि खे घिल्हे पेई। इहो डि॒सी घरवारा छा तव्हांखे अचण जी मोकल ॾींदा?” फ़ैमिली वारनि अचण जी मोकल न डि॒नी पर असांजे मुताबिक़ि तइलीम जे बिना तव्हीं कुझु नथा करे सघो।”

प्रिंसिपल साधना उन्हनि सभिनी खे गॾु कयो। साधना पारी खे ॿुधाए थी, “असांखे लॻो त जेकॾहिं असीं अॼु हिते न बीठीयूंसीं त असांखे सदाईं इन ॻाल्हि जो अफ़सोसु रहंदो त जिनि सूरनि खे सांढे असीं हलंदियूं पियूं अचूं उन जे बारे में असीं कुछियो ई कीन। असां जी चाहना आहे त घटि में घटि असीं पंहिंजो साड़ कढूं।

कॉम्पिटिटिव एग्ज़ास जे ज़रिए सरकारी नौकरी हासुलु करणु ई संध्या ऐं संदसि परिवार जे लाइ ग़रीबीअ मां आजो थियण जो हिकिड़ो रस्तो आहे। मुंहिंजे परिवार जूं सभेई उमेदूं मूं में ई आहिनि। “मुंहिंजे परीवार जो ख़्वाबु आहे त मां पंहिंजी पढ़ाई पूरी कयां ऐं मूंखे का सरकारी नौकरी मिली वञे। मुंहिंजो मक़्सदु फ़क़ति सरकारी नौकिरी वठणु आहे,” 23 सालनि जी संध्या चवे थी। चार भावरनि भेनरुनि में हूअ अकेली आहे जेका कॉम्पिटेटिव एग्ज़ाम पास करे सरकारी नौकरी पाइण जी डि॒स में कशाला कढे रही आहे।

संध्या उत्तर प्रदेश जे इटावा ज़िले जे तुलसीपुर ॻोठ जे हारियुनि जे हिकिड़े नंढड़े परिवार सां तालुक़ु रखे थी। परिवार वटि तक़रीबनि ब॒ बीघनि (लॻभॻि 1.2 एकड़) खां बि घटि ज़मीन आहे जंहिं ते उहे कणिक ऐं सारियुनि जी पोख कंदा आहिनि। इन उपति सां ई संदनि घर हले थो। ग़रीबी ऐं घर हलाइण जे लाइ नंढड़े भाउ घटि उमरि में ई कमु करणु शुरू कयो ऐं संध्या पंहिंजी पढ़ाई जारी रखी। हुते सभिनी वॾियुनि भेनरुनि जी शादी थी वेई।

ॿ साल पहिरीं संध्या जो परीवारु हरियाणा जे फ़रीदाबाद में हिक मसिवाड़ जे घर में शिफ़्ट थी वियो। अॼु संध्या हिकु प्राइवेट स्कूल में प्राइमरी जे ॿारनि खे पाढ़े थी। हुते भाउ दवाउनि जी डिलीवरी करण जो कमु कंदो आहे। ॿेई मिली महीने जा अटिकल 22 हज़ार रुपया कमाईंदा आहिनि, जंहिंजो चोथों हिसो घर जी मसिवाड़ में ख़र्चु थी वेंदो आहे।

संध्या ॿुधाए थी त प्राइवेट नौकरी करणु संदसि मक़्सदु नाहे। इहो कमु हूअ फ़क़ति पाण ते भाड़ण ऐं ख़र्च पखे जे लाइ करे थी। इन सां गॾोगॾु हूअ सांदहि सरकारी नौकरी जा इम्तिहान ॾींदी पेई अचे।

हूअ ॿुधाए थी, “साल 2022 में यूपी पुलीस जो इम्तिहानु ॾिनमि। मुंहिंजो उहो पेपर क्लियर बि थी वियो हो पर पेपर लीक थी वियो। इहो मुंहिंजो पहिरियों क़दमु हो। मुंहिंजे परीवार वारनि मूंखे दिलासो ॾिनो ऐं मूंखे हिमथाईंदा रहिया।”

साल 2023 में हुन एसएससी जीडी (एसएससी जनरल ड्यूटी) जो टेस्ट ॾिनो पर कटऑफ़ वधीक हुअण जे करे हूअ इम्तिहान में कामयाबु न थी सघी। हिन साल हुन यूपी पुलिस कॉन्स्टेबल जो इम्तिहान ॾिनो ऐं हाणे हूअ क्लर्क जहिड़ी ग्रूप सी सरकारी नौकरियुनि जे लाइ प्रिलिमिनरी एलिजिबिलिटी टेस्ट (पेट एग्ज़ाम) जी तयारी करे रही आहे।

ककि थी करे वैशाली ज़िले जी 31 सालनि जी प्रियंका यादव साल 2015 में परिणिजी फ़रीदाबाद अची वेई। हिते अची करे हुन सभ खां पहिरियों पंहिंजी बीएड जी पढ़ाई पूरी कई। हिन बैदि केतिरनि ई दफ़े हुन सेन्टर टीचर एलिजिबिल्टी टेस्ट (सीटीईटी) जो पेपर ॾिनो ऐं आख़िरि में गुज़िरियल साल हूअ पास बि थी वेई। बिहार सरकार जॾहिं उस्तादनि जे उहिदनि जी वैकेंसीअ जो ऐलानु कयो त हूअ बि सरकारी स्कूल में मास्तरियाणीअ जे लाइ अर्ज़ी विझण जी उमेद पाले वेठी हुई। लेकिनि मुक़ररियुनि जी कारवाई अञा शुरू थींदियूं।

प्रियंका चवे थी, “असां तयारी कंदा रहूं था, इंतज़ारु कंदा रहूं था लेकिन वैकेंसी नथी अचे।” प्राइमरी स्कूल जी मास्तरियाणी हुअण जे नाते केतिरो कुझु हुन जो अखियुनि ॾिठल आहे। केतरा ई परिवार जेके बिहार खां प्रवासु करे दिल्ली एनसीआर में अची करे आबादु थियनि था, हुननि खे रुॻो इहा ई उमीद हूंदी आहे त हुननि जे ॿारनि खे तइलीम जा चङा वझ मिली सघनि।

साधना चवे थी, “जॾहिं मूंखे सरकार ऐं हिन सिस्टम वटां वझु न मिली सघियो त मूं पाण पंहिंजे लाइ इम्कान पैदा कया। मां इहो ॾेखारणु चाहींदी आहियां त मुंहिंजे अंदरि बि टैलेंट आहे जंहिंजो क़दुरु न कयो वियो। इनकरे मूं पंहिंजे पाण जो स्कूल खोलियो।”

हिक पासे साधना सभिनी जी पुठिभराई कंदी आहे त हुते स्कूलु उन्हनि मास्तरयाणियुनि पारां संभालियो वियो जिनि पासो खणण खां इंकारु कयो। स्कूलु छड॒ण खां अॻु साधना हुन खे चयो, “आप यहां स्कूल संभाल लीजिए, हम मोर्चा संभाल लेते हैं [तव्हां स्कूलु संभालो वठो, मां हलचल में बहिरो वठंदसि।]”

जॾहिं तइलीम खाते जे मर्कज़ी मंत्री पंहिंजे उहिदे खां इस्तीफ़ा डि॒नी त संदसि सहकर्मी संध्या जो रुॻो एतिरो ई चवण हो, “इहा सोभ आहे पर मां इन जूं खुशियूं नथी मल्हाए सघां।” पारीअ सां फ़ोन ते ॻाल्हाईंदे हूअ अॻिते चवे थी, “इन ॻाल्हि जी छा गारंटी आहे त अॻिते बि॒या पेपर लीक न थींदा। सॼे तइलीमी निज़ाम खे दुरुस्त करण जी ज़रूरत आहे।”

इहा कहाणी अंग्रेज़ी ऐं हिंदी में लिखी वेई।