‘नोनी मन ला वइसने घलो कोन पढ़ाथे?’

परिच्छा के तियारी करे के जिम्मेदारी हमर आय. पास होय के जिम्मेदारी हमर आय. बस तुमन (अफसर मन) के जिम्मेदारी हवय के पेपर ला संभाल के राखव,” बगियावत अंशु कुमारी कहिथे.

24 बछर के अंशु कुमारी जानथे के कॉम्पिटिटिव एग्जाम के प्रेशर काय होथे. स्कूल मं कंप्यूटर पढ़ाय के संगे संग वो ह ओपन यूनिवर्सिटी ले बी. एड. घलो पढ़त हवय. वो ह सरकारी स्कूल मं टीचर बने ला चाहत हवय. संग मं वो ह सेंट्रल टीचर एलिजिबिलिटी टेस्ट (सीटीईटी) के घलो तियारी करत हवय.

साल 2013-14 मं अंशु ह सरकारी नउकरी के आस मं बैंक भर्ती परिच्छा दे रहिस. जब कोनो मं पास नइ हो सकिस त वो ह पढ़ाय के काम डहर चले गे. ओकर सरी रतिहा राज्य शिक्षक भर्ती परिच्छा के तियारी मं गुजर जावय.

अंशु अऊ ओकर परिवार बिहार के बेगूसराय जिला के बरौनी ले हवय. साल 2000 के लगालगी ओकर परिवार फरीदाबाद आ गिस, जिहां ओकर ददा ला एक ठन प्रिंटिंग प्रेस मं मजूरीके काम मिल गिस.

हालेच मं होय पेपर लीक के घटना मन ले वो ह सरकार ले निरास अऊ बगियाय हवय. “तुमन ये (पेपर लीक नइ होय देय) घलो करे करे नइ पावत हवव, त लइका मन कहाँ जाहीं?,” अंशु सवाल करथे.

“गर तुमन (सरकार) ये नइ करे सकव त साइड हो जाओ,” साधना जादौन कहिथे, जउन ह जंतर-मंतर मं हमर गोठ-बात ला चेत धरके सुनत रहिस.

हरियाणा के एक ठन प्राइवेट स्कूल के प्रिंसिपल साधना, घेरी-बेरी होवेइय्या पेपर लीक के खिलाफ सामाजिक कार्यकर्ता सोनम वांगचुक अऊ कॉकरोच जनता पार्टी (सीजेपी) के सुरु करे गे विरोध प्रदर्सन मं सामिल होय रहिस. ओकर कहना रहिस के येकर ले लोगन मन के सरकार, सिस्टम अऊ सरकारी संस्थान मन ले भरोसा उठत जावत हवत. जंतर-मंतर मं महीना भर ले घलो जियादा बखत ले चलत ये प्रदर्सन ला अपन पहिला जीत 25 जुलाई 2026 के दिन मिलिस, जब केंद्रीय शिक्षा मंत्री धर्मेन्द्र प्रधान ह अपन इस्तीफा दिस.

मैडम टीचर मन पारी रिपोर्टर मन ला बताइन के ओकर मन के जइसने कम आमदनी वाले परिवार मन बर सरकारी नउकरी ह सबले बड़े आस आय. अऊ माइलोगन मन ला नउकरी अऊ हासिल करे के बनेच कम मउका मिलथे, जेन मं वो ह घलो हवय.

“देस (भारत) मं नोनी मन ला वइसने घलो कोन पढ़ाथे. पांच बेर नोनी मन ला एग्जाम मं बइठे कोनो देथे?,” उत्तर प्रदेश के आगरा के बासिंदा साधना पूछथे, जेकर बिहाव 18 बछर के उमर मं होगे रहिस. आज वो 35 बछर के हवय. वो ह घर अऊ बहिर दूनों ला संभालत प्रतियोगी परिच्छा बर भारी मिहनत करे रहिस. वो ह दू बेर स्टाफ सिलेक्शन कमीशन (एसएससी) के घलो पेपर दे रहिस. “दूनों बखत राज मं होय दंगा-फसाद सेती पेपर रद्द कर दे गिस,” वो ह वो बखत ला सुरता करत बताथे.

ओला हार माने मंजूर नइ रहिस. साधना ह पहिली अपन बी. एड. के पढ़ई पूरा कारिस. येकर बाद उत्तर प्रदेश टीचर एलिजिबिलिटी टेस्ट (यूपीटीईटी) के तियारी सुरु करिस. पहिली जइसने एक पेपर ला दंगा फसाद सेती निरस्त कर दे गिस. उहिंचे दूसर बेर मं पेपर लीक हो गे.

तीसर बेर ओकर बर दुबारा कोसिस करे, पेपर देय अऊ घलो जादा निरास करेइय्या रहिस. साधना ह अपन आधा ले जादा पेपर लिख ले रहिस, तभिचे अफसर मन परीक्षा हॉल मं आथें अऊ परीक्षा पत्र संकेले लागथें.

“पेपर दुबारा लीक हो गे,” ये कहत ओकर आवाज रुंवासी हो जाथे. आंसू ढरत वो ह कहिथे, “मंय ये पीरा ला समझा नइ सकंव,” अतक मं लकठा मं खड़े एक झिन प्रदर्सन करेइय्या जेन ह लकठा मं ठाढ़े ओकर बात ला सुनत रहिस, ओला पीये बर पानी देथे.

घेरी-बेरी अइसने किसम के बिघन मन ले ओकर दिक्कत सिरोवत नइ रहिस काबर के बिहाव के बाद पढ़ई करत रहे, अपन आप मं एक ठन बड़े लड़ई आय.

“आज हमन सिरिफ एकर सेती ठाढ़े हवन काबर के हमन दुख पीरा ला देखे अऊ भोगे हवन. मंय मरे ला नइ सोचेंय.फेर ये जरूरी नो हे के मोर लइका मन अइसने नइ करहीं, अवेइय्या पीढ़ी अइसने नइ करही,” वो ह पारी ला बताथे.

संध्या, साधना, अंशु अऊ प्रियंका फ़रीदाबाद ले ऑटो रिक्शा करके विरोध प्रदर्सन मं सामिल होय बर आय रहिन. प्रदर्सन के बखत जंतर-मंतर के तीर-तखार के सब्बो सरकारी गाड़ी मन ला बंद कर दे गे रहिस.

ये मन ले कोनो घलो अपन घर के लोगन मन ला बताय नइ रहिन. वो सब्बो झिन अपन स्कूल ले सीधा हबरे रहिन, जिहां वो मन पढ़ाथें, “ नोनी मन ला गलत तरीका ले उठाय जावत हवय. ओ मन ला ग्रुप मन बचावत हवंय ओकर बाद घलो पुलिस वो मन ला घसीटत हवय. ये ला देखे के बाद काकर घर के लोगन मन आय ला दिहीं?” अंशु कहिथे. “घर के लोगन मन जाय के इजाजत नइ दिन काबर के हमर सुरच्छा सबले पहिली जिनिस आय, फेर हमर कहना ये आय के पढ़ई बगेर कुछु करे नइ जाय सकय,” वो ह कहिथे.

साधना सब्बो झिन ला लेके आय रहिस. “हमन ला लगिस के गर आज हमन खड़े नइ होबो, त हमन ला सदा के दुख रइही के जेन पीरा ला लेके हमन चलत हवन, हमन ओकर बारे मं कभू नइ बोलेन, कुछु त सही त ले घलो हमन बस अपन भीतर के रिस ला बहिर निकारे ला चाहत हवन,” साधना पारी ला बताथे.

कॉम्पिटिटिव एग्जाम देके सरकारी नउकरी हासिल करे संध्या अऊ ओकर घर बर ग़रीबी ले छुटकारा के एकच रद्दा हवय. “ मोर घर के सब्बो आस मोर उपर हवय. ओकर मन के सपना हवय के मंय अपन पढ़ई पूरा करों अऊ मोला कोनो सरकारी नउकरी मिलय. मोर मकसद सिरिफ सरकारी नउकरी पाय आय, 23 बछर के संध्या कहिथे. चार भाई-बहिनी मन मं वो ह अकेल्ला हवय जेन ह कॉम्पिटिटिव एग्जाम पास करके सरकारी नउकरी हासिल करे बर डटके मिहनत करत हवय.

संध्या उत्तर प्रदेश के इटावा जिला के तुलसीपुर गाँव के छोटे किसान परिवार ले हवय. परिवार करा तक़रीबन दू बीघा (करीबन 1.2 एकड़) ले घलो कम जमीन हवय, जेन मं वो मन गहूं अऊ धान कमाथें. ये उपज घर के खाय के काम आथे. गरीबी अऊ घर चलाय बर छोटे भाई ह कम उमर ले काम करे सुरु कर दिस, अऊ संध्या ह अपन पढ़ई करत रहिस. ओकर सब्बो दीदी मन के बिहाव होगे हवय.

दू बछर पहिली संध्या के परिवार ह हरियाणा के फरीदाबाद मं भाड़ा के एक ठन घर मं रहे लगिस. जिहां आज संध्या एक ठन प्राइवेट स्कूल मं प्राइमरी के लइका मन ला पढ़ाथे. उहीं ओकर भाई दवाई डिलीवरी के काम करथे. दूनों मिलके महीना के करीबन 22 हजार रूपिया कमाथें, जेकर एक चौथाई सिरिफ घर के भाड़ा मं चले जाथे.

संध्या बर प्राइवेट नउकरी करे ओकर मकसद नो हे. ये काम वो ह सिरिफ अपन गोड़ मं खड़े होय अऊ घर के खरचा बर करत हवय, वो ह बताथे. संगे संग वो ह सरलग सरकारी नउकरी बर कतको परीक्षा देवत आवत हवय.

साल 2022 मं, वो ह उत्तर प्रदेश पुलिस भरती परीक्षा पास कर ले रहिस. अइसन लगिस के कोनो बड़े सफलता मिल गे हवय. फेर पेपर लीक होय सेरी परीक्षा रद्द कर ददे गिस. ये ह मोर पहिली कोसिस रहिस. मोर दाई-ददा मन मोर संग दिन अऊ हिम्मत देवत रहिन,’ संध्या कहिथे.

स्टाफ सेलेक्शन कमीशन (एसएससी) के परीक्षा मं ओकर अगला कोसिस मं घलो कट-ऑफ ले कम नंबर आइस. ये बछर,वो ह उत्तर प्रदेश पुलिस कांस्टेबल के परीक्षा मं बइठिस. अऊ अब वोहा ग्रुप सी के सरकारी नउकरी जइसने के क्लर्क मन बर प्रारंभिक पात्रता परीक्षा (पीईटी) के तियारी करत हवय.

मूल रूप ले बिहार के वैशाली जिला के 31 बछर के प्रियंका यादव साल 2015 मं बिहाव के बाद फ़रीदाबाद आ गिस. इहाँ आके सबले पहिली वो ह अपन बी. एड. के पढ़ई पूरा करिस. येकर बाद कतको बेर वो ह केंद्रीय शिक्षक पात्रता परीक्षा (सीटीईटी) के पेपर दिस अऊ आखिर मं बीते बछर वो ह पास होगे. बिहार सरकार ह जब शिक्षक भर्ती के घोसना करिस त वो ह सरकारी स्कूल मं टीचर बर आवेदन करे के आस मं रहिस, फेर अब तक ले भर्ती के काम सुरू नइ होय हवय.

“हमन तियारी करत रहिथन, अगोरत रहिथन फेर वैकेंसी नइ निकरय,” प्रियंका कहिथे. प्राइमरी स्कूल के टीचर होय के सेती, प्रियंका ह कतको नव जिनिस मन ला लकठा ले देखे हवय. कतको परिवार जेन मन बिहार ले आके दिल्ली एनसीआर मं बसथें, ओकर मन के बस इहीच आस रहिथे के ओकर मन के लइका मन ला पढ़े-लिखे के बढ़िया मउका मिलय.

“जब मोला सरकार अऊ ये सिस्टम ह मउका नइ दिस त मंय अपन बर खुदेच रोजगार बनायेंव. मंय ये दिखाय ला चाहत हवंव के मोर मं घलो प्रतिभा हवय, जेन ला आंके नइ गिस, ते पायके मंय अपन खुद के स्कूल खोलेंय,” साधना कहिथे.

एक कोती साधना सब्बो संग समर्थन मं खड़े हवय त उहिंचे स्कूल के टीचर मन ओकर पाछू रहिन. स्कूल छोड़े के पहिली साधना ह ओकर मन ले कहिस,”आप यहां स्कूल संभाल लीजिए, हम मोर्चा संभाल लेते हैं.”

जब केंद्रीय शिक्षा मंत्री ह अपन पद से इस्तीफ़ा दिस त ओकर संग काम करेइय्या संध्या के बस इही कहना रहिस,” ये ह जीत आय फेर मंय येकर खुसी मनावत नइ ओं,” पारी ले फ़ोन मं गोठियावत वो ह कहिथे, ये बात के काय गारंटी आय के अब आगू अऊ पेपर लीक नइ होवय? पूरा शिक्षा व्यवस्था ला सही करे के जरूरत हवय.”

ये कहिनी अंगरेजी अऊ हिंदी मं लिखे गे रहिस.