‘लईकिन के परीक्षा में बईठे के अवसर बहुत कम बा’

“परीक्षा के तैयारी कईल हमनी के जिम्मेदारी हवे. प्रश्नपत्र सुरक्षित रहे, ई सुनिश्चित कईल अधिकारियन के जिम्मेदारी हवे,” स्पष्ट रूप से खिसिआईल लउकत अंशु कुमारी कहेली.

अंशु (24) प्रतियोगी परीक्षा के दबाव के बढ़िया से समझेली. उ स्कूल में पढ़ावेली आ संघही एगो मुक्त विश्वविद्यालय से बैचलर ऑफ़ एजुकेशन (बी.एड.) के पढ़ाई कर रहल बाड़ी. एकरी संघे उ राज्य के सरकारी स्कूलन में नौकरी पावे खातिर केन्द्रीय शिक्षक पात्रता परीक्षा (सिटीईटी) के तैयारी भी कर रहल बाड़ी.

अंशु 2023 आ 2024 में सरकारी नौकरी पावे के उम्मीद से बैंक भर्ती परीक्षा दिहले रहली बाकिर उनके सफलता ना मिलल. एकरी बाद उ पढ़ावे के रास्ता चुनली आ रात-रात भर जाग के राज्य स्तरीय शिक्षक भर्ती परीक्षा के तैयारी में जुट गईली.

बिहार के बेगूसराय जिला से अंशु के परिवार 2000 के दशक के शुरुआत में फरीदाबाद आ के बस गईल रहे जहां उनकर पिताजी एगो प्रिंटिंग प्रेस में मजदूर के काम करें.

हाल के सालन में बार-बार पेपर लीक के वजह से अंशु राज्य व्यवस्था के ले के गुस्सा से भर गईल बाड़ी. उ पूछेली, “अगर उ लोग एतनो ना कर सकेला (पेपर लीक भईला पर रोक) त फिर विद्यार्थी लोग कहां जईहें,” अंशु पूछेली.

“आ अगर आपसे नईखे हो पावत त पद छोड़ देईं,” लगहिं खड़ा हमनी के बातचीत सुनत साधना जादौन कहेली.

हरियाणा के एगो निजी स्कूल के प्राचार्य साधना ओ समय जन्तर मंतर पर चल रहल प्रदर्शन में शामिल रहली. ई आन्दोलन सामाजिक कार्यकर्ता सोनम वांगचुक आ कॉकरोच जनता पार्टी (सीजेपी) द्वारा बार-बार होखे वाला पेपर लीक आ सार्वजनिक संस्था, व्यापक व्यवस्था आ शासन में गहरात भरोसा के संकट के खिलाफ शुरू कइल गईल रहे. जंतर मंतर के ई प्रदर्शन आपन पहिला बड़ जीत दर्ज करे में सफल भईल जब 25 जुलाई 2026 के केन्द्रीय शिक्षा मंत्री धर्मेन्द्र प्रधान इस्तीफा दे दिहलें.

शिक्षिका लोग पारी के संवाददाता के बतवली कि ओ लोगन के निम्न-आय वाला परिवारन खातिर सरकारी नौकरी ही उम्मीद के सबसे बड़ किरण बा. औपचारिक रोजगार के क्षेत्र में लईकियन के मिले वाला कुछ गिनल चुनल निष्पक्ष अवसरन में इहो एगो बा.

“कवनो लईकी के परीक्षा में बईठे के एतना मौका कहां मिलेला?” साधना पूछेली जिनकर उत्तर प्रदेश के आगरा के उनकी पैतृक घर में 18 बरिस के उमिर में बियाह करवा दिहल गईल. अब 35 बरिस के हो चुकल साधना कब्बो पारिवारिक जिम्मेदारियन संघे प्रतियोगी परीक्षा के भी गंभीर तैयारी कईले रहली. उ स्टाफ सेलेक्शन कमीशन (एसएससी) के परीक्षा दू बेर देले रहली. “दूनो बेर राज्य में सांप्रदायिक दंगा के वजह से परीक्षा रद्द कर दिहल कईल,” उ याद करेली.

हार न मानत के साधना बैचलर ऑफ़ एजुकेशन (बी.एड.) के डिग्री हासिल कईली आ उत्तर प्रदेश शिक्षक पात्रता परीक्षा (यूपीटेट) के तैयारी शुरू कईली. एगो परीक्षा एही तरह के अशांति के वजह से स्थगित हो गईल जबकि दुसरका प्रश्नपत्र लीक भईला के बाद रद्द कर दिहल गईल.

तीसरा कोशिश उनकी खातिर सबसे अधिक पीड़ा देवे वाला रहे. साधना आधा पेपर हल कर चुकल रहली तबले अधिकारी लोग परीक्षा कक्ष में अइलें आ उत्तर पुस्तिका इकठ्ठा करे लगलें.

“पेपर फिर से लीक हो गईल रहे,” उ भरल आवाज में कहेली. “ओ दर्द के हम शब्द में बयान ना कर सकेनी,” एतना कहत के उनकी आंख से आंसू छलक जाला. लगहिं खड़ा एगो युवा प्रदर्शनकारी, जे चुपचाप उनकर बात सुनत रहे, उनके पानी के एगो बोतल थमा देवेला.

बार-बार मिले वाला ए असफलता के दर्द एकरी वजह से औरी बढ़त रहे काहें कि बियाह के बाद पढ़ाई जारी राखल अपने आप में एगो संघर्ष होला.

“भारत में लईकियन के ढेर पढ़े खातिर प्रोत्साहित ना कईल जा. हम केहू तरह से टिकल रहनी...आपन जान ना लिहनी. बाकिर ए बात के कवनो गारंटी नईखे कि अगिला पीढ़ी, या हमर आपन बच्चा भी ए तरह के दबाव के सामना कर पईहें सन,” उ पारी से बतावेली.

संध्या, साधना, अंशु आ प्रियंका जंतर मंतर के आसपास सार्वजानिक वाहन बंद होखला के कारण फरीदाबाद से ऑटो रिक्शा ले के प्रदर्शन में शामिल होखे पहुंचल रहली.

उ लोग सीधे ओ स्कूल से आईल रहे जहां उ लोग पढ़ावेला आ अपनी परिवारन के भी एकरी विषय में ना बतवले रहे. अंशु कहेली, “जब परिवार के लोग लईकियन के पुलिस द्वारा घसीटल प्रदर्शन के दौरान उनकी संघे दुर्व्यवहार के विडिओ देखल त भला के अपनी घर के लईकियन के एइजा आवे देई? हमनी के परिवार एकर इजाजत नईखे देले बाकिर हमनी के विचार बा कि शिक्षा के बिना केहू आपन भविष्य ना बना सकेला.”

प्राचार्य साधना ए सब लोगन के एकजुट कईली. उ पारी से बतवली, “हमनी के लागल कि अगर हमनी के आज ना खड़ा होखब जा त जीवन भर ई अपराधबोध रही कि एतना दर्द के बावजूद हमनी के कबो ए विषय में खुल के आवाज ले ना उठवनी जा. कम-से-कम हमनी के अपनी भीतर जमा पीड़ा आ हताशा के व्यक्त कईल चाहत रहनी हं जा.”

सरकारी नौकरी हासिल कईल संध्या सागर आ उनकरी परिवार खातिर गरीबी से बाहर निकले के सबसे बड़ मौका हवे. संध्या (23) चार भाई बहिन में से एक हई आ सरकारी नौकरी आ प्रतियोगी परीक्षा पास करे खातिर दृढ़ संकल्पित बाड़ी. उ कहेली, “हमार परिवार के सारा उम्मीद हमरे पर टिकल बा. उनकर सपना बा कि हम आपन पढ़ाई पूरा कहीं आ सरकारी नौकरी हासिल करीं.”

संध्या उत्तर प्रदेश के इटावा जिला के तुलसीपुर गांव के एगो गरीब किसान परिवार से आवेली. उनकरी परिवार के लगे दू बीघा (लगभग 1.2 एकड़) से भी कम जमीन बा जेपर उ लोग घर के जरूरत भर गेंहू आ धान उगावेला. गरीबी के वजह से उनकी छोट भाई के कम उमिर में ही परिवार के मदद खातिर काम करे के पड़ल, जबकि संध्या आपन पढ़ाई जारी रख पवली. उनकी बड़ बहिनिन के बियाह कर दिहल गईल.

उनकर परिवार दू बरिस पहिले इटावा से हरियाणा के फरीदाबाद में किराया के एगो कमरा में आ के रहे लागल. वर्तमान में संध्या एगो निजी स्कूल में पढ़ावेली जबकि उनकर भाई एगो फार्मास्युटिकल कंपनी खातिर दवाई डिलीवरी के काम करेला. दुनो के मिला के मासिक आमदनी लगभग 22,000 रुपया बा जेमे से लगभग एक चौथाई हिस्सा किराया में खर्च हो जाला.

संध्या निजी नौकरी के आपन अंतिम लक्ष्य ना मानेली. उ स्पष्ट कहेली कि फ़िलहाल ई काम उ खाली आपन खर्चा उठावे खातिर कर रहल बाड़ी. एकरी संघे उ नियमित रूप से सरकारी भर्तियन के प्रतियोगी परीक्षा में भी शामिल होत रहेली.

संध्या 2022 में उत्तर प्रदेश पुलिस भर्ती परीक्षा पास कर लेले रहली. ई उनका खातिर एगो बड़ उपलब्धी निहर रहे. बाकिर पेपर लीक भईला के वजह से परीक्षा रद्द कर दिहल गईल. संध्या कहेली, “ई हमारा पहिला प्रयास रहे. हमार माता पिता हमार पूरा साथ दिहलें आ हमार हिम्मत बनवले रहलें.”

एकरी बाद उ स्टाफ सेलेक्शन कमीशन (एसएससी) के परीक्षा दिहली बाकिर उनकर अंक कटऑफ़ से कम रहि गईल. ए साल उ उत्तर प्रदेश पुलिस कॉन्स्टेबल भर्ती परीक्षा देले बाड़ी आ अब क्लर्क जईसन ग्रुप-सी सरकारी नौकरी खातिर आयोजित होखे वाला प्रारम्भिक अर्हता परीक्षा (पीईटी) के तैयारी कर रहल बाड़ी.

बिहार के वैशाली जिला के रहे वाली 31 साल के प्रियंका यादव 2015 में बियाह के बाद फरीदाबाद आ गईली आ ओइजे से बैचलर ऑफ़ एजुकेशन (बी.एड.) के पढ़ाई पूरा कईली. उ कई बेर केन्द्रीय शिक्षक पात्रता परीक्षा (सीटीईटी) दिहली आ आखिरकार पिछला साल ओके पास कईली. बिहार सरकार द्वारा सरकारी स्कूलन में शिक्षक भर्ती खातिर रिक्ति निकाले के घोषणा के बाद उनके आवेदन करे के उम्मीद जागल रहले बाकिर भर्ती प्रक्रिया अभी ले शुरू नईखे भईल.

प्रियंका यादव कहेली, “हमनी के लगातार तैयारी करत रहेनी जा आ इंतजार करेनी जा बाकिर भर्ती ही नईखे निकलत.” प्राथमिक विद्यालय में शिक्षिका प्रियंका ओ परिवारन के नजदीक से देख रहल बाड़ी जवन दूसरी राज्यन से दिल्ली -राष्ट्रीय राजधानी क्षेत्र (एनसीआर) में ए उम्मीद से आवेला कि उनकरी बच्चन के बेहतर शिक्षा मिली आ प्रतियोगी परीक्षा में सफल होखे के बेहतर अवसर भी मिली.

“जब सरकार आ व्यवस्था हमके मौका ना दिहलस त हम अपनी खातिर अपने से अवसर बनावे के फैसला कईनी,” साधना कहेली. “हम ई साबित कईल चाहत रहनी कि हमरी में प्रतिभा बा, भले ओके केहू चीन्हे या ओकर सम्मान ना करे. एसे हम आपन खुद के स्कूल खोल लिहनी.”

जब साधना प्रदर्शन में बाकी लोगन संघे एकजुटता देखावे पहुंचली तब स्कूल के जिम्मेदारी उनकर सहयोगी लोग संभरले रहे. निकले से पहले उ ओ लोगन से कहली, “आप लोग स्कूल संभारी, हम मोर्चा संभारे जातानी.”

केन्द्रीय मंत्री के इस्तीफा के बाद उनकर सहयोगी संध्या के कहनाम रहे, “ई एगो जीत हवे बाकिर हम एकर जश्न नईखी मनावत.” फोन पर बातचीत के दौरान उ पुछली, “ए बात के कवन गारंटी बा कि आगे फिर से पेपर लीक ना होखी? पूरा शिक्षा व्यवस्था में सुधार के जरूरत बा.”

स्टोरी मूल रूप से अंग्रेजी आ हिंदी में लिखल गइल बा.