’ہم جیسے کمزور لوگوں کو کہاں کوئی موقع مل پاتا ہے؟‘

کھومنیا آدیواسی، کفار گاؤں کی سرپنچ ہیں، لیکن صرف کاغذ پر۔

وہ بتاتی ہیں، ’’مجھے تو اس گاؤں میں کوئی نام کا بھی سرپنچ نہیں سمجھتا۔‘‘

کھومنیا ۱۴ جون، ۲۰۲۲ کو یہاں کی بلا مقابلہ سرپنچ منتخب کی گئی تھیں۔ تقریباً ۵۸ سال کی کھومنیا آدیواسی اُس دن کو یاد کرتی ہیں، جب انہیں مدھیہ پردیش کے کفار گاؤں کے پنچایت دفتر بلایا گیا تھا۔ اسی دن انہوں نے پہلی اور آخری بار پنچایت آفس کا منہ دیکھا تھا۔

کھومنیا کہتی ہیں، ’’شروع میں ایک بار بلاؤ ہتو [شروع میں ایک بار بلایا گیا تھا]،‘‘ تبھی سرپنچ بننے کا سرٹیفکیٹ دیا گیا تھا، جس کے مطابق وہ بلا مقابلہ سرپنچ (گاؤں کی مکھیا) منتخب کی گئی تھیں۔ وہ پڑھی لکھی نہیں ہیں، اس لیے اُس کاغذ کو پڑھ نہیں سکتی تھیں۔ ’’ہمائی پنچایت میں آدیواسی سیٹ آئی ہتی، تو گاؤں کے بڑے لوگن نے ہماؤ نام دے دؤ [ہماری پنچایت میں آدیواسی سیٹ آئی تھی، تو گاؤں کے بڑے لوگوں نے ہمارا نام دے دیا]۔ سامنے کوئی کھڑا نہیں ہوا،‘‘ وہ اپنی بندیل کھنڈی زبان میں کہتی ہیں۔

کھومنیا کو بطور سرپنچ منتخب ہوئے دو سال سے زیادہ کا وقت گزر چکا ہے، لیکن گاؤں کے زیادہ تر لوگ یہ نہیں جانتے کہ وہ سرپنچ ہیں۔ اس ضروری عہدہ پر منتخب ہونے کے باوجود، پنچایت بھی ان کی اندیکھی کرتی ہے۔

’’ہمیں نہ کوؤ بولات، نہ کچھو بتات، نہ ہم جات [نہ کوئی ہمیں پنچایت میں بلاتا ہے، نہ کچھ بتاتا ہے، نہ ہم جاتے ہیں]،‘‘ اپنے کچے مکان کے سامنے کھڑی کھومنیا آدیواسی کہتی ہیں۔ وہ ہم سے گفتگو کے دوران گھبرائی ہوئی نظر آتی ہیں۔ ان کے ۶۵ سالہ شوہر نتھو پردھان ہر بات کا جواب دینے کی کوشش کرتے ہیں۔ حالانکہ، پنچایت سے جڑے سوالوں کے جواب نتھو کے پاس بھی نہیں ہیں۔

کھومنیا بتاتی ہیں، ’’سب ان کو [نتھو آدیواسی کو] ہی سرپنچ سمجھتے ہیں۔‘‘

جن پنچایتی انتخابات میں کھومنیا منتخب ہوئیں وہ آئین کے (۷۳ویں ترمیمی) قانون، ۱۹۹۲ کے تحت کرائے گئے ہیں، جس میں پنچایتی راج (مقامی سیلف گورننس) میں ’’آبادی کے تناسب میں درج فہرست ذات (ایس سی) اور درج فہرست قبائل (ایس ٹی) کے لیے سیٹیں محفوظ رکھی گئیں۔ کل محفوظ سیٹوں میں سے ایک تہائی سیٹیں ایس سی اور ایس ٹی برادری کی خواتین کے لیے محفوظ تھیں۔ انتخابات کی کل سیٹوں میں سے بھی خواتین کے لیے ایک تہائی سیٹیں محفوظ رکھی گئی تھیں۔‘‘

سال ۲۰۲۲ میں، مدھیہ پردیش میں ۴۵۵ خواتین سرپنچ بلا مقابلہ منتخب کی گئیں، جن میں سے تقریباً ۶۴ فیصد کا تعلق دلت اور آدیواسی برادریوں سے تھا۔

اس سال پنچایتی انتخابات میں مدھیہ پردیش کے شیو پوری ضلع میں واقع اس گاؤں میں بھی سرپنچ کی سیٹ درج فہرست قبائل کے لیے محفوظ تھی، اور سہریا آدیواسی برادری سے تعلق رکھنے والی کھومنیا کو یہاں سے منتخب کیا گیا۔ کفار گاؤں کی آبادی ۱۹۳۵ (مردم شماری ۲۰۱۱) ہے اور سہریا آدیواسیوں کی تعداد تقریباً ۲۰۰ ہے۔

حالانکہ، میاں بیوی کو اس بات کا احساس ہے کہ ان کے نام سے سیل سائن (ربر اسٹامپ) کوئی دوسرا کر رہا ہے، لیکن مبینہ اونچی ذات کے لوگوں کے سامنے وہ اپنے حق اور برابری کی بات نہیں کہہ پاتے ہیں۔ ’’ہم چھوٹے لوگوں کو کون پوچھتا ہے؟‘‘ وہ رپورٹر سے سوال کرتی ہیں۔

کھومنیا اور ان کے شوہر نتھو دہاڑی مزدور کے طور پر گاؤں کے کھیتوں میں کام کرتے ہیں۔ ان کا گھر ۱۵ ضرب ۱۵ میں بنا ہوا ہے، جس کی چھت پلاسٹک کی ترپال اور پلاش کے خشک پتوں سے ڈھکی ہے۔ دروازہ کے پاس چولہا ہے، اور گھر کے سامان ادھر ادھر بکھرے پڑے ہیں۔ ان کا چھوٹا بیٹا مہاجر مزدور ہے اور ان کے ساتھ رہتا ہے۔ ان کے بقیہ دو بیٹے الگ رہتے ہیں، اور دہاڑی مزدوری کرتے ہیں۔

کھومنیا اس رپورٹر سے کہتی ہیں، ’’شادی بیاہ میں ہمیں اور ہماری ذات کے لوگوں کو مدعو تو کیا جاتا ہے، مگر دوسری ذات کے لوگوں سے دور اور زمین پر بیٹھایا جاتا ہے۔ ہمایے ساتھ ابھہی چلو کونئوں کے بھی گھر، آپ کو ساکشات دیک مل جے [آپ ہمارے ساتھ ابھی چلیں، آپ کو اپنی آنکھوں سے دیکھنے کو مل جائے گا]۔‘‘

نتھو کے مطابق، پنچایت کی میٹنگوں میں بھی ان کے ساتھ بھید بھاؤ ہوتا ہے۔ وہ بتاتے ہیں، ’’وہ جو کہتے ہیں ہمیں ماننا پڑتا ہے۔‘‘ آدیواسیوں کے ساتھ ہوئے صدیوں کے جبر و استحصال اور بھید بھاؤ کے بارے میں بتاتے ہوئے کھومنیا کہتی ہیں، ’’ہم جیسے کمزور لوگوں کو کہاں کوئی موقع مل پاتا ہے، وہ تو سرکار نے ہمیں موقع دیا۔ ہم تو پیسے سے، خاندان سے، ذات سے، جسم سے، ہر جگہ سے کمزور ہیں، ہم کب بن پات سرپنچ برپنچ؟‘‘

کَفّار سے ۲۰ کلومیٹر دور کھرکٹ پنچایت ہے، جہاں کی پنچایت کا حال کفار کی طرح ہی نظر آتا ہے۔ نام شائع نہ کرنے کی شرط پر اس گاؤں کے لوگ بتاتے ہیں کہ یہاں پنچایتی انتخاب میں لاکھوں روپے خرچ ہوئے، اتنا خرچ کرنا آدیواسی امیدواروں کی حیثیت سے باہر تھا۔

یہاں کی سیٹ بھی درج فہرست قبیلہ کی خاتون کے لیے محفوظ تھی اور رادھا آدیواسی کو سرپنچ منتخب کیا گیا۔ رادھا اور ان کے شوہر میہی پڑھے لکھے نہیں ہیں، اور تقریباً پانچ بیگھہ زمین کے چھوٹے کسان ہیں۔ وہ گیہوں اور مونگ پھلی کی کھیتی کرتے ہیں اور سالانہ ۵۰-۶۰ ہزار روپے کما لیتے ہیں۔ رادھا کے سرپنچ بننے سے پہلے وہ گاؤں کے دوسرے لوگوں کے کھیت میں مزدوری بھی کرتے تھے۔

اپنے گھر کے چبوترے پر بیٹھیں تقریباً ۴۰ سال کی سہریا آدیواسی رادھا کہتی ہیں، ہمایے لرکا نے نشان بنابو سیکھا دؤ [ہمارے بیٹے نے دستخط کرنا سکھا دیا]۔‘‘

میہی کہتے ہیں، ’’گاؤں کا ایک آدمی پنچایت کا کام دیکھتا ہے، وہ پہلے سرپنچ رہ چکا ہے۔ اسی نے ہمیں چناؤ لڑایا اور چناؤ میں مدد کی۔‘‘

جب اس رپورٹر نے بعد میں ان دونوں خواتین سرپنچ سے ان کے گھر جا کر لگاتار دو دونوں تک ملاقات کرنے کی کوشش کی، تو انہیں ملنے کی اجازت نہیں دی گئی۔ یہاں تک کہ ان سے فون پر بھی بات کرنے سے منع کر دیا گیا۔

دریں اثنا، سرکار نے پنچایتی انتخابات میں منتخب کی گئیں خواتین سرپنچوں کی تعداد کی مبالغہ آرائی کے ساتھ تشہیر کرنے کا موقع نہیں گنوایا ہے۔ مئی ۲۰۲۴ میں نیویارک میں منعقد ایک پروگرام – ’مقامی نظام حکومت میں حصہ داری کے ذریعہ آگے کی راہ دکھاتیں عورتیں‘ – میں ہندوستان کی پنچایتی راج کی وزارت نے اقوام متحدہ کے پاپولیشن فنڈ کے اشتراک سے اپنے کام کے بارے میں بتایا اور ’’زمینی سطح پر سیاسی قیادت فراہم کرتیں خواتین‘‘ کے بارے میں بات رکھی۔

کاش کہ کھومنیا اور رادھا کو یہ بات کسی نے بتائی ہوتی۔

یہ اسٹوری بنیادی طور پر ہندی زبان میں لکھی گئی تھی۔

ترجمہ نگار: قمر صدیقی