‘हमनी छोट लोग के के पूछेला’

खुमनिया आदिवासी कफार गांव के सरपंच बाड़ी, बाकिर बस कागजे पर.

ऊ बतावेली, “हमरा त एह गांव में केहू नामो के सरपंच ना बूझे.”

खुमनिया के 14 जून 2022 के बिना कवनो बिरोध, सरपंच चुनल गइल रहे. मोटा-मोटी 58 बरिस के खुमनिया आदिवासी के इयाद बा कि कइसे उनका मध्य प्रदेस के कफार गांव में पंचायत के ऑफिस बोलावल गइल रहे. पहिल आउर अंतिम बेरा तबे ऊ ओह ऑफिस के मुंह देखले रहस.

खुमनिया के कहनाम बा, “शुरू में एक बार बुलाओ हतो (सुरु में एक बेरा बोलावल गइल रहे).” तब सरपंच चुने जाए के प्रमाण पत्र देवल गइल रहे. एह के हिसाब से ऊ निर्विरोध सरपंच (गांव के मुखिया) चुनल गइल रहस. ऊ अनपढ़ बाड़ी, एहि से ओह कागज के पढ़ ना सकत रहस.

“हमाई पंचायत में आदिवासी सीट आई हती, तो गांव के बड़न लोगन ने हमाओ नाम दे दओ (हमार पचांयत में आदिवासी सीट आइल रहे, त गांव के बड़ लोग हमार नाम दे देलक. सामने केहू ठाड़ ना भइल),” ऊ आपन बुंदेलखंडी भाषा में कहेली.

खुमनिया के सरपंच चुनाइल दू बरिस से जादे हो चुकल बा. बाकिर गांव के जादेतर लोग ना जाने कि उहे सरपंच बाड़ी. एह जरूरी पद पर चुनल जाए के बावजूद, पंचायतो उनकर अनदेखी करेला.

“हमें न कोऊ बोलात, न कछु बतात, न हम जात (ना हमरा केहू पंचायत में बोलावेला, ना कुछुओ बतावेला, ना हम जाइला),” आपन कांच मकान के सोझे ठाड़ खुमनिया आदिवासी कहली. ऊ हमनी से बतियावे घरिया तनी घबराइल लउकत रहस. उऩकर 65 बरिस के घरवाला नत्थू प्रधान सब बात के जवाब देवे के कोसिस करत रहस. अइसे, पंचायत से जुड़ल सवाल के जवाब नत्थुओ लगे ना रहे.

खुमनिया बतावेली, “सभे इनके (नत्थू आदिवासी) सरपंच समझेला.”

जवन पंचायत चुनाव में खुमनिया चुनल गइली, ऊ संविधान (73वां संशोधन) अधिनियम, 1992 के तहत कराव गइल रहे. एह में पंचायती राज (स्थानीय स्वशासन) में “आबादी के अनुपात में अनुसूचित जाति (एससी) आ अनुसूचित जनजाति (एसटी) खातिर सीट आरक्षित रखल गइल रहे. कुल आरक्षित सीट में से एक तिहाई एससी आ एसटी समुदाय के मेहरारू लोग खातिर आरक्षित रहे. चुनाव के कुल एक तिहाई सीटो मेहरारू लोग खातिर आरक्षित रहे.”

सन् 2022 में, मध्यप्रदेस में 445 मेहरारू लोग निर्विरोध सरपंच चुनल गइल रहे. एह में से मोटा-मोटी 64 प्रतिशत दलित आ आदिवासी रहे.

जवन बरिस पंचायत चुनाव भइल, मध्य प्रदेस के शिवपुरी जिला के एह गांव में सरपंच के सीट अनुसूचित जनजाति खातिर आरक्षित रहे. तबे सहरिया आदिवासी समुदाय से आवे वाली खुमनिया के इहंवा से चुनल गइल. कफार गांव के आबादी 1,935 (जनगणना 2011) बा आ सहरिया आदिवासियन के तादाद कोई 200 बा.

अइसे, दुनो मरद-मेहरारू लोग के पता बा कि उनकर नाम से सील-लाइन (रबर स्टांप) केहू दूसरा कोई कर रहल बा. बाकिर कथित ऊंच जात के लोग के सामने ऊ लोग आपन हक आ बराबरी के बात ना कर पावेला. “हमनी छोट लोग के के पूछेला?” ऊ रिपोर्टर से पूछेली.

खुमनिया आउर उनकर घरवाला नत्थू गांव के खेत में दिहाड़ी मजूरी करेलन. उनकर घर पंद्रह X पंद्रह में बनल बा जेकर छत पिलास्टिक के तिरपाल आ पलास के सूखल पत्ता सब से छावल बा. दरवाजा लगे चूल्हा बनल बा आउर घर के सामान सब एने-ओने छितराइल बा. उनकर छोट लइका प्रवासी मजूर बाड़न आउर उनके संगे रहेलन. बाकिर उनकर आउरी दू गो लइका लोग अलगे रहेला आ दिहाड़ी मजूरी करेला.

खुमनिया एह रिपोर्टर से कहली, “सादी-बियाह में हमनी आउर हमनी के जात वाला लोग के बोलावल त जाला, बाकिर दोसर जात के लोग से दूर आ भुइंया में बइठावल जाला. हमाये साथ अभही चलो कौनउओं के भी घर, आपको सक्षात देख मिल जे (रउआ अबहिए हमनी संगे चलीं, साक्षात देखे मिल जाई).”

नत्थू के कहनाम बा कि पंचायत के बैठकी सब में उनका संगे भेदभाव होखेला. ऊ बतावेन, “ऊ लोग जे कहेला, हमनी के मानही पड़ेला.” आदिवासी लोग संगे भइल सदियन के उत्पीड़न आ अन्याय के बारे में बतावत खुमनिया कहेली, “हमनी जइसन कमजोर लोग के कहंवा कवनो मौका भेंटाला. ऊ त सरकार हमनी के मौका दे देलक. हमनी त पइसा से, परिवार से, जात से, देह से, सब चीज से कमजोर बानी, लाचार बानी. हमनी कहंवा बन पइतीं सरपंच-बरपंच?”

कफार से कोई 20 किमी दूर खिरकिट पंचायत बा. इहंवो के पंचायत के दसा कफारे जइसन लउकत बा. नाम ना छापे के शर्त पर एह गांव के लोग बतइलक कि इहंवा पंचायत चुनाव में लाखन रुपइया बहावल गइल. एतना खरचा कइल कवनो आदिवासी प्रत्याशी के बूता के बाहर रहे.

इहंवो के सीट अनुसूचित जनजाति के मेहरारू लोग खातिर आरक्षित रहे. राधा आदिवासी के इहंवा के सरपंच चुनल गइल. राधा आउर उनकर घरवाला मीही लोग पढ़ल-लिखल नइखे. ऊ लोग कोई 5 बीघा जमीन वाला छोट खेतिहर बा. गेहूं आ मूंगफली के खेती करेला आ साल के 50 से 60 हजार रुपइया कमा लेवेला. राधा के सरपंच बने से पहिले दुनो प्राणी लोग गांव के दोसर लोगन के खेत में मजूरी करत रहे.

आपन घर के चबूतरा पर बइठल मोटा-मोटी 40 बरिस के सहरिया आदिवासी राधा कहेली, “हमार लइका निसान (हस्ताक्षर) करे के सीखा देलन.”

मीही कहेली, “गांव के एगो आदमी पंचायत के काम-काज देखेला. ऊ पहिलहूं सरपंच रह चुकल बा. उहे हमनी के चुनाव लड़वइलक आ चुनाव में सहजोग कइलक.”

खुमनिया आ राधा से रिपोर्टर अचके भेंटा गइलन, एह से मुलाकात संभव भइल. बाकिर एकरा बाद जब रिपोर्टर दुनो मेहरारू सरपंच से उनका घरे जाके भेंट करे के कोसिस कइलन, त भेंट करे ना देवल गइल. फोनो पर बात करे ना देवल गइल.

एह बीच, सरकार पंचायत चुनाव में चुनल गइल मेहरारू सरपंच के गिनती बढ़ा-चढ़ा के प्रचारित करे के मौका ना गंवइलक. मई 2024 में न्यूयॉर्क में भइल एगो कार्यक्रम- ‘स्थानीय निकाय सब में भागीदारी के जरिए आगू के रस्ता देखावत मेहरारू लोग’- में भारत के पंचायती राज मंत्रालय, संयुक्त राष्ट्र जनसंख्या कोष संगे मिलके आपन काम के बारे में बतइलक आ “जमीनी स्तर पर राजनीतिक नेतृत्व प्रदान करे वाला मेहरारू” के बारे में बात रखलक.

केतना नीमन रहित जदि केहू खुमनिया आ राधा के भी ई बात बता देले रहित.

कहानी मूल रूप से हिंदी में लिखल गइल रहे.

अनुवाद: स्वर्ण कांता