جہاں مہوا روزی روٹی کا واحد ذریعہ ہو

لاجو دیوی تجسس بھری نگاہوں سے اس ڈائری کو دیکھ رہی ہیں جس میں یہ رپورٹر تفصیلات نوٹ کر رہا ہے۔ چند منٹوں میں ان کا تجسس خوف میں تبدیل ہو جاتا ہے۔

’’ای سب لکھ کے تھنوا میں دیبہو کا [کیا آپ یہ سب لکھ کر تھانے میں دینے جا رہے ہیں]؟‘‘ وہ مگہی میں پوچھتی ہیں۔ مگہی بہار کے مگدھ علاقہ کی ایک بولی ہے۔ وہ بتا رہی ہیں کہ کس طرح ان کی آمدنی کا واحد ذریعہ مہوا (مدھوکا لانگیفولیا قسم لاٹیفولیا) کے پھولوں سے بنائی گئی شراب ان کی زندگی کا سہارا بنی ہے۔

اگرچہ شروعات میں وہ شراب کی بات کو تسلیم کرنے سے گریزاں تھیں، لیکن ان کے کچے مکان کے ایک کونے میں دو کنستروں میں رکھےآٹھ کلو سڑے ہوئےگڑ ان کا راز فاش کر دیتے ہیں۔ اس رپورٹر کی نگاہیں کنستروں پر جمی دیکھ کرانہوں نے فوراً انہیں سیاہ پولی تھین کی چادروں سے ڈھانپ لیا۔ ’’میں اسے (شراب) صرف ہولی کے دوران فروخت کرنے کے لیے بنا رہی ہوں،‘‘ وہ جلدی جلدی وضاحت کرتی ہیں۔

گھر میں شراب کشید کرنے سے متعلق لاجو دیوی کا خوف اور پریشانی درست ہے۔ بہار پروہیبیشن اینڈ ایکسائز ایکٹ، ۲۰۱۶ شراب، جس میں مہوا سے بنی شراب شامل ہے، یا نشہ آور اشیاء کی تیاری، انہیں اپنی تحویل میں رکھنے، تقسیم یا استعمال کرنے پر پابندی عائد کرتا ہے۔ خلاف ورزی کی سزا قید، جو عمر قید تک بڑھ سکتی ہے، کے علاوہ ایک سے ۱۰ لاکھ روپے تک جرمانہ بھی ہے۔

’’میں اسے صرف زندہ رہنے کے لیے بناتی ہوں،‘‘ وہ کہتی ہیں۔ وہ انتہائی پسماندہ مُسہر (بہار میں درج فہرست ذات کے طور پر درج) برادری کی ایک بے زمین رکن ہیں، اور جذام کے مرض کا اضافی بوجھ اٹھاتی ہیں۔

ساٹھ سالہ بزرگ خاتون اپنی انگلیاں دکھاتی ہیں جس پر زخموں کے نشانات ہیں، جو جذام کی علامت ہیں جس کی وجہ سے چھ سال قبل ان کے شوہر جانکی مانجھی کی موت واقع ہو گئی تھی۔ ریاستی حکومت کی بہار شتابدی لیپر ویلفیئر اسکیم جذام کے مریضوں کو ۱۵۰۰ روپے کی ماہانہ مالی امداد فراہم کرتی ہے۔ لیکن لاجو دیوی کو ابھی تک اس اسکیم کا ایک روپیہ بھی نہیں ملا ہے۔ وہ کہتی ہیں، ’’ابھی تک کسی سرکاری اہلکار نے میری بیماری کے بارے میں جاننے کے لیےمجھے سے رابطہ نہیں کیا ہے۔‘‘

زخموں کی وجہ سے ان کے لیے جسمانی مشقت کرنا مشکل ہو جاتا ہے اور ان کے پاس روزی کمانے کے بہت کم متبادل یا مواقع ہوتے ہیں۔ مہوا سے شراب بنانا مسہروں کا روایتی پیشہ رہا ہے اور لاجو دیوی خود چار دہائیوں سے ایسا کر رہی ہیں۔

وہ اپنے خستہ حال گھر کے سامنے کھڑی ہوکر کہتی ہیں، ’’میں گڑ پر ماہانہ ۴۰۰ روپے اور گائے کے گوبر پر ۲۵ روپے خرچ کرتی ہوں۔ اور تقریباً ۱۰۰۰ روپے کماتی ہوں۔‘‘ اس کے علاوہ وہ ریاست کی بڑھاپا پنشن اسکیم کے تحت حکومت سے ۴۰۰ روپے وصول کرتی ہیں۔

’’۴۵سال پہلے جب میری شادی ہوئی تو میرے شوہر کو جذام کی بیماری تھی۔ وہ کسی قسم کا کام کرنے سے قاصر تھے۔ ان دنوں میں نے دیکھا کہ میرے آس پاس کے لوگ شراب بنا کر فروخت کر رہے ہیں، تو میں نے بھی ایسا کرنا شروع کر دیا۔‘‘

لاجو دیوی کا دعویٰ ہے کہ انہیں مقامی پولیس نے دو بار گرفتار کیا تھا، لیکن پولیس ریکارڈ میں ان کے نام کا کوئی ذکر نہیں ہے۔ کچھ سال پہلے انہوں نے شراب بنانے کا کام بند کر دیا اور بشمول بکری پالنے کے دیگر متبادل آزمانے لگیں۔ انہوں نے اپنے ایک واقف کار سے دو بکریاں ادھار لیں جن سے دو میمنے پیدا ہوئے۔ لیکن قسمت کے ظالمانہ کھیل میں ایک دن کسی نے چاروں کو چرا لیا۔

بکریوں کی چوری کے بعد وہ مہوا کی طرف واپس لوٹ آئیں۔ ’’ایہو بند کر دیبئی تو کونچی کر کے کھئی بئی [یہ بھی بند کر دیں گے، تو کھائیں گے کیسے]؟‘‘

اسٹوری میں لوگوں کے نام اور ان کے صحیح مقام کو ان کی شناخت کے تحفظ کے لیے تبدیل کر دیا گیا ہے۔

ترجمہ نگار: شفیق عالم