ਲਾਜੋ ਦੇਵੀ ਉਤਸੁਕਤਾ ਨਾਲ਼ ਦੇਖ ਰਹੇ ਸਨ ਕਿਉਂਕਿ ਇਸ ਰਿਪੋਰਟਰ ਨੇ ਆਪਣੀ ਡਾਇਰੀ ਵਿੱਚ ਕੁਝ ਵੇਰਵੇ ਝਰੀਟੇ। ਵੇਖਦੇ ਹੀ ਵੇਖਦੇ ਉਨ੍ਹਾਂ ਦੀ ਇਹ ਉਤਸੁਕਤਾ ਦਹਿਸ਼ਤ ਵਿੱਚ ਬਦਲ ਗਈ।
"ਇਹ ਸਭ ਲਿਖ ਕੇ ਥਾਨਾਵਾ ਮੇਂ ਦੇਬਹੂ ਕਾ?" ਉਨ੍ਹਾਂ ਨੇ ਮਗਾਹੀ ਵਿੱਚ ਪੁੱਛਿਆ, ਜੋ ਬਿਹਾਰ ਦੇ ਮਗਧ ਖੇਤਰ ਵਿੱਚ ਬੋਲੀ ਜਾਣ ਵਾਲ਼ੀ ਇੱਕ ਭਾਸ਼ਾ ਹੈ। ਉਹ ਮੈਨੂੰ ਦੱਸ ਰਹੇ ਸਨ ਕਿ ਮਹੂਆ ਰੁੱਖ (ਮਧੂਕਾ ਲੌਂਗੀਫੋਲੀਆ ਵਰ ਲਤੀਫੋਲੀਆ) ਦੇ ਫੁੱਲਾਂ ਤੋਂ ਸ਼ਰਾਬ ਕਿਵੇਂ ਬਣਦੀ ਹੈ। ਇਹੀ ਤਾਂ ਉਨ੍ਹਾਂ ਦੀ ਆਮਦਨੀ ਦਾ ਇੱਕੋ ਇੱਕ ਸਰੋਤ ਰਿਹਾ ਜਿਸ ਨਾਲ਼ ਉਨ੍ਹਾਂ ਦਾ ਗੁਜ਼ਾਰਾ ਚੱਲਦਾ ਹੈ।
ਹਾਲਾਂਕਿ ਸ਼ੁਰੂ-ਸ਼ੁਰੂ ਵਿੱਚ ਉਹ ਇਹ ਮੰਨਣ ਤੋਂ ਝਿਜਕ ਰਹੇ ਸਨ ਕਿ ਉਹ ਸ਼ਰਾਬ ਬਣਾਉਂਦੇ ਹਨ, ਪਰ ਉਨ੍ਹਾਂ ਦੇ ਕੱਚੇ ਘਰ ਦੇ ਕੋਨੇ ਵਿੱਚ ਪਏ ਦੋ ਪੀਪਿਆਂ ਵਿੱਚੋਂ ਗੁੜ ਦੀ ਉੱਠ ਰਹੀ ਸੜਾਂਦ ਨੇ ਸਭ ਬਿਆਨ ਕਰ ਦਿੱਤਾ। ਜਿਵੇਂ ਹੀ ਇਸ ਰਿਪੋਰਟਰ ਦੀ ਨਜ਼ਰ ਕੈਨਿਸਟਰਾਂ ਵੱਲ ਗਈ, ਔਰਤ ਨੇ ਤੁਰੰਤ ਉਨ੍ਹਾਂ ਨੂੰ ਕਾਲ਼ੀ ਪੰਨੀ (ਪੋਲੀਥੀਨ ਸ਼ੀਟ) ਨਾਲ਼ ਢੱਕ ਦਿੱਤਾ। "ਮੈਂ ਇਹ (ਸ਼ਰਾਬ) ਸਿਰਫ਼ ਹੋਲੀ 'ਤੇ ਵੇਚਣ ਲਈ ਬਣਾ ਰਹੀ ਹਾਂ," ਉਨ੍ਹਾਂ ਨੇ ਤੁਰੰਤ ਸਫ਼ਾਈ ਦਿੱਤੀ।
ਇਹ ਸੌਖਿਆਂ ਹੀ ਸਮਝਿਆ ਜਾ ਸਕਦਾ ਹੈ ਕਿ ਘਰ ਵਿੱਚ ਸ਼ਰਾਬ ਬਣਾਉਣ ਨੂੰ ਲੈ ਕੇ ਲਾਜੋ ਦੇਵੀ ਦਾ ਡਰ ਤੇ ਚਿੰਤਾ ਜਾਇਜ਼ ਹੀ ਹੈ। ਬਿਹਾਰ ਮਨਾਹੀ ਅਤੇ ਆਬਕਾਰੀ ਐਕਟ, 2016 ਮਹੂਆ ਸ਼ਰਾਬ ਸਮੇਤ ਸ਼ਰਾਬ ਜਾਂ ਨਸ਼ਿਆਂ ਦੇ ਨਿਰਮਾਣ, ਰੱਖਣ, ਵੰਡਣ ਜਾਂ ਖਪਤ 'ਤੇ ਪਾਬੰਦੀ ਲਗਾਉਂਦਾ ਹੈ। ਅਜਿਹਾ ਕਰਨ 'ਤੇ ਉਮਰ ਕੈਦ ਅਤੇ 1 ਲੱਖ ਰੁਪਏ ਤੋਂ ਲੈ ਕੇ 10 ਲੱਖ ਰੁਪਏ ਤੱਕ ਦਾ ਜੁਰਮਾਨਾ ਹੋ ਸਕਦਾ ਹੈ।
