जब महुए अंतिम सहारा बा

लाजो देवी बड़ा जिज्ञासा से रिपोर्टर के डायरी में लिखत देखत रहस. बाकिर कुछे देर में उनकर जिज्ञासा डर में बदल गइल.

“ई सब लिख के थनवा में देबहू का (का रउआ ई सब लिख के थाना में दे देहम)?” ऊ बिहार के मगध इलाका में बोलल जाए वाला मगही में पूछली. लाजो देवी हमनी के बतावत रहस कि महुआ के गाछ (वैज्ञानिक नाम: मधुका लॉन्गीफोलिया प्रजाति लैटीफोलिया) के फूल से बनल दारू बेच के ऊ आपन जिनगी के गाड़ी कइसे खींच रहल बाड़ी.

पहिले त लाजो चाची कुच्छो बतावे के ना चाहत रहली. बाकिर उनकर कच्चा घर के कोना में धइल दू ठो डिब्बा में सड़ रहल आठ किलो गुड़ सब पोल खोल देलक. रिपोर्टर के नजर जब ओह डिब्बा पर गइल, त ऊ तुरते ओकरा पर करियर पॉलिथीन डाल देली. “हम त बस होली में बेचे खातिर बना रहल बानी,” ऊ तनी घबरात कहली.

लाजो देवी के डर आ चिंता सही बा. घर में दारू बनावे से उनका फंसला के डर बा. बिहार शराबबंदी आ उत्पाद अधिनियम, 2016 के तहत बिहार में शराब पर रोक बा. महुओ के दारू बनावे, राखे, पिए आ बांटे के मनाही बा. जे शराब, चाहे महुआ बनावत पकड़ाई, ओकरा 1 से 10 लाख के जुरमाना आ जेल, संभवत: आजीवन कारावास के सजा हो सकेला.

“जिए के जतन में ई बनावे के पड़ेला,” ऊ कहली. लाजो देवी मुसहर जात (बिहार में अनुसूचित जाति के रूप में पहचानल जाला) से बाड़ी. उनका लागे आपन एको धुर जमीन नइखे. ओह पर से उनका कुष्ठ रोग बा.

साठ बरिस के लाजो चाची आपन अंगुरी देखावत बाड़ी. उहंवा घाव के चिन्हासी बा. ई उहे कुष्ठ रोग के चिन्हा बा जे छव बरिस पहिले उनकर मरद, जानकी मांझी के लील गइल रहे. बिहार सरकार के शताब्दी कुष्ठ कल्याण योजना कुष्ठ रोग से बिगड़ल देह वाला के हर महीना 1,500 रुपइया के आर्थिक मदद करेला. बाकिर अफसोस कि लाजो देवी के अबले एकरा से एगो कौड़ी नइखे मिलल. ऊ कहेली, “हम कवन हाल में बानी, ई देखे अबले कवनो सरकारी बाबू नइखन आइल.”

घाव चलते उनका मिहनत-मजूर करे में बहुते दिक्कत आवेला. कमाई करे खातिर उनका लगे जादे मौका आ साधन नइखे. महुआ के दारू बनावे के काम मुसहर लोग में पुरखन से चलल आ रहल बा. चाची अपने एह काम में चालीस बरिस से जुटल बाड़ी.

आपन खस्ता भइल घर के आगू ठाड़ ऊ कहे लगली, “हमरा हर महीना गुड़ पर 400 आ गोइंठा पर 23 रुपइया खरचा हो जाला. कमाई कोई 1,000 रुपइया ले होला.” एकरा अलावे उनका सरकार के वृद्ध पेंशन योजना से 400 रुपइया मिलेला.

“पैंतालीस बरिस पहिले हमार बियाह भइल. घरवाला के कुष्ठ रोग रहे. ऊ कवनो काम करे से लाचार रहस. ओह घरिया, हम मोहल्ला के लोग के दारू बनावत आ बेचत देखनी. त हमहू ई बनावे के सुरु कर देनी.”

लाजो देवी के कहनाम बा कि उनका इलाका के पुलिस दू बेर धर चुकल बा, बाकिर पुलिस के रिकॉर्ड में उनकर नाम कहूं दरज नइखे. कुछ बरिस पहिले, ऊ दारू बनावल बंद करके बकरी पाले जइसन दोसरो काम में आपन भाग अजमइले रहस. आपन जान-पहिचान वाला से दू ठो बकरी उधार लेके अइली. बाद में दुनो से दू गो बच्चो भइल. बाकिर तकदीर के खेल देखीं, एक दिन चारों बकरी केहू चोरा ले गइल.

बकरी चोरी भइल त लाजो देवी फेरु महुआ के काम सुरु कर देली. “एहो बंद कर देबई त कोंची कर के खैबई (महुआ बनावल छोड़म, त खाएम का)?”

पहचान गुप्त रखे खातिर स्टोरी में लोग के नाम आउर असली ठिकाना बदल देवल गइल बा.

अनुवाद: स्वर्ण कांता