अमरित कस पानी अब जहर होगे

“मंय 12 वीं क्लास के स्टेट बोर्ड परिच्छा दे रहेंय. कला संकाय के नतीजा जून मं निकरेइय्या रहिस. मोला बने करके पता नइ रहिस के आगू काय करना हे, फेर मंय सीनियर कॉलेज में पढ़े ला चाहत रहेंय, डिग्री लेय ला चाहत रहेंय,” संकेत लोखंडे उदास होके कहिथे. ये ह साल 2021 के बात आय, जब वो ह कोनो घलो आने 18 बछर के लइका जइसने, जोस अऊ उछाह ले भरे रहिस. अब जब वो ह गोठियाथे, त मन टूटे रहिथे, अऊ बस अतकेच मं थक जाथे. अंगना मं परे खटिया मं बइठे, कोहनी ला अपन माड़ी मं डारे, ओकर जम्मो देह मं थकान साफ झलकथे. ये हफ्ता के डायलिसिस ला होय करीबन चार दिन पहा चुके हवय.

“बोर्ड परीक्षा के कुछेक हफ्ताच बीते मोला साँस ले मं दिक्कत होय लगिस. बस एक दू कदम चले के बाद मंय पूरा तक जावत रहेंय,” वो ह कहिथे. ओकर दाई-ददा ह वोला सबले बढ़िया इलाज कराय बर, वोला अहिल्यानगर (पहिली अहमदनगर) के एक ठन निजी अस्पताल मं भर्ती कराइन, जेन ह ओकर गाँव निमगाँव भोगी ले करीबन 21 कोस दूरिहा रहिस. फेर जब तक के संकेत के परिच्छा के नतीजा आइस, तब तक ले किडनी पूरा फेल हो जाय सेती वो ह घरेच मं रहे बर मजबूर होफे रहिस.

“डॉक्टर मन कहिन के जेन पानी हमन बउरथन, वो ह येकर वजा हो सकथे. हमन सब्बो तरिया के पानी पियत रहेन जेन ह जरुर गंदा रहे होही. हमन ला ये बात के गम तब तक ले नइ होइस, जब तक के हमर बेटा बीमार नइ पर गीस,” संकेत के 47 बछर के दाई मनीषा कहिथे.

वो ह पाझर तलाव (पझरे तरिया धन झरिया तरिया )के बात करत रहिस – जेन ह एक ठन डबरी आय; ये ह पानी जमा करके राखे बर बनाय गे माटी के डबरी आय जेन ला 50 बछर पहिली एक ठन पानी के धार के रद्दा मं बनाय गे रहिस. फेर बीते 12 ले 15 बछर मं, गाँव भर मं कैंसर अऊ किडनी फेल होय के मामला बढ़े, देखे गे हवय.

“ लंबा बखत तक ले गन्दा पानी पिये ले किडनी खराब हो जाथे, डाक्टर मन हमन ला चेताय रहिन. मनीषा कहिथे, “हमर गाँव मं कतको लोगन मन किडनी फेल होय के दिक्कत ले जूझत हवंय.” अपन एकेच रिपोर्टिंग करे जाय बखत, मं करीबन पांच ठन अइसने परिवार ले मिलेंय, जेन परिवार मं कम से कम एक परानी डायलिसिस मं रहिस.

ज्ञानेश्वर बोरगे के परिवार घलो अइसनेच परिवार मन ले एक आय. 46 बछर के ज्ञानेश्वर अपन सुवारी माया बोरगे के बारे मं बात करत कहिथे, “ माजा पार प्रपंचच बुदालाय (मोर त सरा घर-संसार बरबाद होगे हवय.” 34 बछर के उमर मं माया ला किडनी फेल होय (गुर्दा खराब होय) के बड़े बीमारी के पता चले रहिस, अऊ साल 2022 लेच ओकर डायलिसिस चलत हवय – जेन ह हफ्ता मं तीन बेर होथे. लकठाच के औद्योगिक केंद्र रांजणगांव के एक ठन फ़ैक्टरी मं ठेका मं काम करे सेती, ज्ञानेश्वर ला माया के देखभाल करे अऊ वोला बखत मं अस्पताल ले जय बर बनेच कम बखत मिला पाथे.

ओकर करा येकर छोड़ कोनो उपाय नइ ये के वो ह वोला वडगाँव शेरी मं ओकर दाई ददा करा रहे देवय, फेर ओकर किसोर उमर के दूनों लइका एक ठन हॉस्टल मं रहिथें. “फैक्ट्री मं मोर तनखा 9,000 रूपिया हवय. मंय जेन घलो कुछु कमाथों, वो सब ओकर इलाज मं खरचा हो जाथे,” वो ह कहिथे.

ये परिवार मन ला देह अऊ दिमागी भारी तनाव ले जूझे ला परथे, संगे संग पइसा के तंगी घलो तरी कोती ले जावत हवय. संकेत घलो अपन ददा अऊ भाई के संग फटफटी मं बइठके, हफ्ता मं दू बेर शिरूर तालुका के एक ठन निजी अस्पताल मं करीबन 5 कोस दूरिहा जाथे. हरेक बेर के खरचा 3,000 रूपिया आथे. ये मं दवई के खरचा घलो जोड़ ले जाय, त ओकर इलाज मं हरेक महीना 34,000 ले 40,000 रूपिया खरचा हो जाथे.

मनीषा कहिथे, “खरचा बर हमन अब तक ले आधा दरजन गाय अऊ भंइसी बेच दे हवन. हरेक जानवर बेचे ले 50,000 ले 60,000 रूपिया मिलथे. हमर करा सिरिफ सात धन आठ ठन बांचे हवंय. अमि कायच करू सकतोय. जे समोर आहे त्याला सामोरे जातोय फकत (हमन काय करे सकथन? हमन बस येकर ले निपटत हवन).”

ये ह सिरिफ लोगन मन के सेहतेच के बात नो हे, तरिया मं बढ़त गंदगी ह गाँव के मवेसी अऊ खेत के घलो हालत खराब कर दे हवय. “एवध्या चिंचा, कैर्या, पेरू, जम्भुल खालीत ना तलाववार की खाऊं खाऊं कंटाला यायाचा. इटकी भरभारती होती जमीनीला या तलावमुले [इहां कतक अमली, आमा, जाम अऊ जामुन के रुख जामत रहिस! हमन ओकर फर खा खाके बीमार हो गेन. ये तरिया सेती जमीन धनहा रहिस],” तरिया तीर मं किंजरत 40 बछर के सुप्रिया पावशे कहिथे. येकर पार तीर मं सफेद झाग के परत देखे जा सकथे. अधिकतर रुख करिया अऊ सूखागे हवंय. करिया माटी चिक्कन हवय अऊ हमर पनही मं चिपक जाथे. हवा बास मारथे.

गाँव उदवस्त करूं तकले पुराना त्या कंपनी (वो कंपनी ह हमर पूरा गाँव ला बरबाद कर दे हवय,’ ज्ञानेश्वर कहिथे, अऊ हमन ला समस्या के मूल तक ले जाथे: ये निजी कंपनी महाराष्ट्र एनवायरो पावर लिमिटेड (एमइपीएल) ला साल 2005 मं, महाराष्ट्र प्रदूषण नियंत्रण बोर्ड (एमपीसीबी) ले पुणे के तीर, रांजणगाँव मं ‘सामान्य खतरनाक अपशिष्ट उपचार, भंडारण अऊ निपटान सुविधा’ संचालित करे बर लाइसेंस अऊ जगा मिले रहिस. येकर संचालन साल 2007 मं सुरु होइस. निमगाँव भोगी ले कुछेक कोस दूरिहा उपर कोती, ये प्लांट के पाछू के भिथि दिखथे.

“कंपनी ह हमन ला गुमराह करिस,” 45 बछर के गुलाब जाधव कहिथे. “वो मन हमन ले कहे रहिन के वो मन बिजली बनाहीं.” गांव के लोगन मन ला एको कनि घलो अंताज नइ रहिस के ये प्लांट कतको अलग-अलग कारखाना ले निकरेइय्या जहरीला कचरा ला प्रोसेस करे बर बनाया जावत हवय. वो ह कहिथे, येकर छोड़ जेन जमीन मं ये प्लांट बंट रहिस, वो ह रंजनगांव महाराष्ट्र इंडस्ट्रियल डेवलपमेंट कॉर्पोरेशन के रहिस, येकरे सेती ओकर काम काज मं हमर कोनो राय काम नइ आवत रहिस. फेर अवेइय्या कुछेक बछर मं गुलाब ह देखिस के कंपनी के रोज के छोड़े जवेइय्या गंदा पानी सेती ओकर 150 ठन सीताफल अऊ 45 जाम के रुख वाले बगीचा बर्बाद हो गीस.

सुप्रिया कहिथे, “हमर तीर सब्बो कुछु रहिस. तरिया के सेती जमीन धनहा रहिस,” ओकर बीते कुछेक बछर मं तीन एकड़ जमीन घलो चले गीस. “पानी होता, ज़मीन होती, मजा के बात ये आय के तरियाच ह ये सूखा गाँव ला बदल दे रहिस.

साल 1972 के अकाल बखत, सरकार के ‘पानी अडवा, पानी जिरवा [पानी रोको, पानी भूंइय्या मं समाय दो] अभियान के तहत ये तरिया बनाय गे रहिस. वो बखत हमर गाँव उपर भारी खराब असर परे रहिस,” सुप्रिया बताथे. फेर बखत के संग “ ये तरिया ह ज़मीन खाल्हे पानी फिर ले भर दीस अऊ लोगन मन अपन खेत मन मं चुंवा कोड़ा लिन. साल 2000 मं, मोर ददा ह अपन जमा करके राखे तीन लाख रूइया खरचा करके 5-पारस [35 फ़ीट] गहिर एक ठन चुंवा कोड़वाइस.” वो अपन खेत के वो हिस्सा कोती आरो करथे, जेन ह अब गंदा पानी, कांटा वाले झाड़ी अऊ ऊँच-ऊँच घास मं लुकाय हवय.

पाझर तलाव वो गाँव बर जिनगी कस रहिस जेन ह अकास भरोसे खेती करत रहिस – ठऊका वइसनेच जइसने महाराष्ट्र के अधिकतर हिस्सा, जिहां खेती के कुल 163 लाख हेक्टेयर के 76 फीसदी जमीन अकास भरोसे रहिथे.

“हमन बछर भर कतको फसल कमावत रहेन – गोंदली, मूंगफली, जुवार, बाजरा, इहाँ तक के कुसियार घलो. उहां संतरा, जाम अऊ आमा के बगीचा रहिस. हमन ले कुछेक लोगन मन तो मोटर अऊ पाइपलाइन घलो लगवा ले रहेन, जिहां ले चूँआ के पानी हमर घर तक ले आवत रहिस,” सुप्रिया एक जमाना ले सुरता करत कहिथे. “हमन अपन अंजुरी मं भरके ये पानी पिये हवन. फेर अब त गर येला छू घलो लेहू, त चमड़ी खजवाय लगही अऊ वो ह करिया पर जाही. उपर बने फेक्टरी ले निकरेइय्या खतरनाक कचरा ह येला जहरीला बना दे हवय.”

फ़ैक्टरी ले तरी कोती बोहावत गंदा पानी, बरसा के पानी के संग मिलके भूंइय्या मं रिसत हवय. “खेती के उपज कम होगे हवय, बगीचा मं फूल नइ धरत हवय अऊ पानी ले रसायन के बास आथे.ठऊका सरे मुर्दा जइसने.संझा के बखत भारी बस्साय लगथे,” वो ह आगू कहिथे.

“पहिली ये ‘डाकली’ (डबरी) मं पानी साफ होवत रहिस, अऊ गाय-गरुआ मन इहींचे पियत रहिन.” 65 बछर के बापू दशरथ जाधव तरिया के तीर मं डोंगरी के उतरोल मं बने कुछेक डबरी मन ला दिखावत कहिथे, जिहां वो ह अपन मवेसी मन ला चराय बर जाथे. अब वो फेक्टरी ले निकरेइय्या जहरीला पानी वो डबरी मं समा जाथे, जेकर ले उहाँ के माटी के रंग बीट लाल होगे हवय.

“तरिया मं घलो तेल के एक ठन परत जम गे हवय. ये बखत हमन ला पिये के पानी बिसोय ला परथे.” बापू मोला गाँव भर मं पंचायत के लगाय पांच ठन ‘फिल्टर खोली’ ला बताथे. वो ह सवाल करथे, “हमन 10 लीटर पानी बर पांच रूपिया देथन. ये हमन ला महंगा परथे. हमन साफ पानी बर आखिर कब तक ले पइसा खरचा करत रहिबो?”

“कतको बछर ले वो मन पानी छोड़त हवंय. ये जमीन भीतरी मं घलो मिलत जावत होही. येकरे सेती वो जमीन बंजर होगे हवय.” एक बखत बापू छै एकड़ जमीन मं खेती करत रहिस, जेन मं जाम के एक ठन बारी घलो रहिस. “अब मोर करा सिरिफ ये मवेसीच मन बांचे हवय,” वो ह कहिथे. फेर जब ये मन इहाँ चरथें धन पानी पीथें, त वो मन घलो बीमार पर जाथें.

वो मन ला चमड़ी अऊ आंसू निकरे के दिक्कत हो जाथे. इलाज ले थोकन बने लागथे, फेर येकर सब्बो दिन के कोनो अज नइ ये. इहाँ तक के मोर गरुआ मन जब तलाव (तरिया) के पानी पीथें, त वो मन घलो कम गोरस देथें.” बापू कहिथे के गोरस बेच के होय आमदनी ले ओकर महिना के चारा के खरचा नइ निकरय. “कतको लोगन मन के मवेसी घलो मर गीन. फेर वो मन करा जाय बर आने जगा घलो नइ ये. अब काय करे जाय?”

ढोर डाक्टर विजय कास्कर, जेकर ले गाँव वाले सलाह लेथें, वो ह बीते सात बछर ले कतको मवेसी ला मरत देखे हवय.”बाँझपन, पेट अऊ आंखी के इन्फेक्शन, मूत्राशय के बीमारी अऊ चमड़ी मं घाव जियादा आम बात आय. जब मवेसी गंदा पानी मं जाथें त वो मन ला दाद अऊ चमड़ी मं घाव हो जाथे, जेन ह बाद मं गैंग्रीन बन जाथे.”

ये गाँव मं अब तक ले कोनो वैज्ञानिक अध्ययन करे नइ गे हवय, जेकर ले ये पता चले के गन्दा पानी पीये अऊ लोगन मन ला होवेइय्या समस्या मं कोनो नाता हवय धन नई. फेर देस अऊ बिदेस मं करे गे कतको अध्ययन मं जानवर अऊ मइनखे मन के उपर जहरीला पानी के असर के पुष्टि होय हवय. देस मं माटी अऊ पानी के गंदा होय एक ठन बड़े समस्या आय. साल 2024 के एक ठन रिपोर्ट मं 440 जिला के लिस्ट जारी करे गे रहिस – जेन मं महाराष्ट्र के 32 ठन जिला मन ले पुणे घलो हवय – जिहां नाइट्रेट के मात्रा तय सीमा ले जियादा मिलिस, जेकर ले पीये के पानी अऊ खेती-बारी बर खतरा पैदा होगे हवय.

निमगाँव भोगी के लोगन मन बीते 10 बछर मं कतको बेर विरोध प्रदर्सन करे हवंय. गाँव के पूर्व उप-सरपंच लक्ष्मण सांबरे कहिथे, “हमन कंपनी के गेट के आगू भूख हड़ताल मं बइठे रहेन. एमपीसीबी दफ़्तर के आगू प्रदर्सन करे रहेन. रांजणगाँव मं ‘रास्ता रोको’ आंदोलन करेन. मंय अऊ कतक बतावंव? हमन कंपनी के खिलाफ कार्रवाई अऊ तन्दुरुस्त जिनगी के अपन हक सेती लड़त हवन.”

साल 2024 मं, शिरूर के सांसद अमोल कोल्हे ह संसद मं ‘शून्य काल’ बखत ये मुद्दा ला उठाइस, जेकर ले केंद्रीय प्रदूषण नियंत्रण बोर्ड (सीपीसीबी) हरकत मं आइस. जाँच करे के बाद बोर्ड ह अपन रिपोर्ट मं जेन सार निकारिस, वो मन मं मवेसी, माटी अऊ पानी गंदा होय होय के गाँव के लोगन मन के बात सही साबित होइस. वो मन देखिन के घेरा के भिथि तरी ले बने नाली ले निकरेइय्या पानी ‘पाझर तलाव’ कोती बोहावत हवय, जेकर साफ साफ चिन्हा दिखत हवय. तरिया के तीर कोड़े गे एक ठन चुंवा के पानी के नमूना मं सल्फाइड अऊ साइनाइड जइसने जानलेवा जिनिस पाये गीस.

प्लांट के तीर-तखार के इलाका के हालत देखके, कचरा प्रबंधन बर साल 2016 के नियम अऊ सीपीपीबी के दिशा-निर्देश मन के पालन ला लेके सवाल उठे लगिस. ये नियम मन के मुताबिक प्लांट के डिज़ाइन अऊ लेआउट मं बरसाती पानी के निकासी बर नाली, आय जाय के रद्दा, अऊ लीचेट मतलब कचरा ले रिस के निकरेइय्या गंदा पानी के सफई के सिस्टम होय जरूरी रहिस. सीपीपीबी ह भूंइय्या भीतर के पानी के जांच बर चुंवा, घेरा अऊ फाटक जइसन अउ कतको चीज मन के मांग करे रहिस. खतरनाक कचरा ले मइनखे अऊ पर्यावरन ला बचाय बर ये नियम मन के पालन बहुते जरूरी आय. बोर्ड के जांच के बाद मजबूरी में एमईपीएल ला प्लांट के चरों मुड़ा रिटेनिंग वाल (बचाव वाले भिथि) बनाय बर परिस.

“फेर गंदा पानी के रिसाव अभू घलो होवत हवय. हमन त कंपनी के काम करेइय्या मन ला भिथि के खुल्ला जगा ला, जेन ला ये बखत ईंटा सीमेंट ढाल के बंद कर दे गे हवय, उहाँ ले पानी निकरत फिलिम घलो बनाय हवन,” सरपंच ज्योति संभारे कहिथे. “हमन चाहत हवन के एक ठन स्वतंत्र समिति वो नुकसान के जाँच करे जेन ला कंपनी ह हमन ला पहुंचाय हवय,” वो ह कहिथे.

ये मामला 2025 ले नेशनल ग्रीन ट्रिब्यूनल (एनजीटी) करा हवय. गाँव वाले ये खतरनाक पानी ला बहिर निकरे ले पूरा रोक के मांग करत हवंय. फरवरी 2026 मं होय एक ठन सुनवाई बखत, एनजीटी ह एक ठन छह-सदस्यीय समिति के गठन करिस, जेन ह 16-17 मार्च दो दिन मौका मं जाके जाँच करही.ये समिति एनजीटी के अगला सुनवाई मं अपन रिपोर्ट राखही.

कंपनी ले सीधा बात करे के हमर कतको कोसिस अब तक ले काम नइ आय हवय. वइसे, कंपनी के अफसर मन बीबीसी मराठी के आगू सरकारी बयान देवत, ये इलाका मं पानी अऊ माटी के प्रदूसन बर अपन कोनो घलो जिम्मेवारी लेगे ले साफ इंकार कार दे हवंय. फेर निमगाँव भोगी ले आगू के गाँव – करडेलवाड़ी,अन्नापुर अऊ अहमदाबाद – घलो बंजर खेत,बीमार लोगन अऊ मवेसी मन के शिकायत करथें.

"हमन लोगन मन बर आर्थिक मुआवजा चाहत हवन. अऊ हमन ये कंपनी ला इहाँ रहे नइ चाहत हवन,” ज्योति कहिथे. “हमर जमीन मन ला ला कोकरो बिसोय के कोनो आसेच नइ ये. परिया जमीन धन कोनो गंदगी वाले गाँव मं बने घर ला कों बिसोही? ओकर बाद घलो, जब हमन वोला बजार भाव ले कम दाम मं बेचबो. हमन खून दीगर जगा जाके बसे नइ सकन. हमन इहींचे रहे बर मजबूर हवन.”

फेर संकेत इहाँ ले जाय ला चाहत हवय. “मंय कॉलेज जाके पढ़े ला चाहत हवं. फेर मोर देह मोला पढ़े जाय बर नइ देवय.” वो ह आजादी ले साँस लेय ला चाहथे. पाझर तलाव घलो इहीच चाहथे.

अनुवाद: निर्मल कुमार साहू