سیاسی ہونا تجارت کے لیے اچھا ہے

گوداوری مَراوی کہتی ہیں، ’’چند سال قبل اگر ہم گاؤں میں تالاب کھودنے یا کسی اور مسئلے پر گرام سبھا میں بات کرنا چاہتے تھے، تو ہم خواتین کو سرپنچ یا گاؤں کی کونسل کے ادھیکش [صدر] کے ساتھ بیٹھنے اور بات کرنے کے لیے کوئی جگہ نہیں تھی۔‘‘

اس کے بعد سے حالات میں کافی حد تک تبدیلی آئی ہے۔ لیکن یہ تبدیلی ان خواتین کی ہمت اور استقامت کی وجہ سے آئی ہے، جن سے پاری نے جولائی۲۰۲۴ میں برسات کے موسم میں ایک دن مدھیہ پردیش کے برگا گاؤں میں ملاقات کی تھی۔

گوداوری اور کلی طور پر خواتین ممبران پر مشتمل ہلچلیت مہیلا کسان ویمن پروڈیوسر کمپنی لمیٹڈ (ایچ ایم کے ڈبلو پی سی) کی چھ دیگراراکین یہاں صبح صبح پہنچی تھیں۔ انہیں ٹین کی چھت اور دیواروں والے ایک بڑے شیڈ نما گودام میں بنے دفتر میں بیٹھایا گیا تھا۔ یہ جگہ ڈنڈوری ضلع کے سمناپور بلاک میں واقع ہے۔ گودام کے داخلی دروازہ کی ایک جانب ایک کرسی رکھی ہے اور وہیں ایک میز بھی ہے جس پر کمپوٹر رکھا ہوا ہے، چند الماریاں ہیں اور ایک ایئر کولر بھی موجود ہے۔ یہ چیزیں بتاتی ہیں کہ یہاں کوئی دفتر ہے۔

پروڈیوسر کمپنی کا نام خواتین کی بطور کسان اپنی فخریہ شناخت سے وجود میں آیا۔ چونکہ ہل چلانا روایتی طور پر مردوں کا کام سمجھا جاتا ہے، اس لیے انہوں نے خود کو ہل چلانے (ہل چلت) والی خواتین کے طور پر ظاہر کر کے اس عقیدہ کو چیلنج کیا۔ اس طرح ہلچلیت مہیلا کسان ویمن پروڈیوسر کمپنی وجود میں آئی۔ آج ان کی ۱۴۰۰ رجسٹرڈ اراکین ہیں جو کمپنی کی شیئر ہولڈر بھی ہیں۔

کمیٹی کی دو اراکین، ۴۴ سالہ گوداوری مراوی اور ۴۷ سالہ دیوکی واگلے، برگا گاؤں (جسے برگا ولیج بھی کہا جاتا ہے) میں رہتی ہیں اور پیدل چل کر دفتر آئی ہیں۔ دیگر خواتین نے سمناپور بلاک میں واقع اپنے گھروں سے آٹو رکشہ کے ذریعہ یہاں تک کا سفر کیا ہے، یا اپنی فیملی کے کسی فرد کے ساتھ موٹرسائیکل پر سوار ہوکر آئی ہیں۔

گوداوری مراوی اب چیئرپرسن ہیں۔ وہ ہمیں یہ بتاتے ہوئے اپنی بات شروع کرتی ہیں کہ روایتی طور پر یہاں کے کسانوں نے کیمیکل ان پٹ کا استعمال نہیں کیا ہے، لیکن۲۰۱۰ کے بعد سے آہستہ آہستہ زراعت میں کیمیائی کھادوں اور کیڑے مار ادویات کا استعمال معمول بنتا گیا۔ تاہم ۲۰۲۲ سے ڈنڈوری ضلع میں بہت سے کسان نامیاتی یا قدرتی کاشتکاری، یا دونوں کے امتزاج کو اپنانے کی کوشش کر رہے ہیں۔ غیرکیمیائی زراعت کو فروغ دینے کے لیے کام کرنے والی تنظیموں کی طرف سے ان کی حمایت اور حوصلہ افزائی کی جاتی ہے۔

’’ہم کسانوں کو نامیاتی بیج فراہم کرتے ہیں۔ جب کھیت کو گھاس، خس و خاشاک اور کھر پتوار کے ساتھ جوتا جاتا ہے، تو یہ مٹی میں مل جاتے ہیں اور اولین قدرتی کھاد بنتے ہیں،‘‘ گوداوری ہمیں بتاتی ہیں۔

ستمبر میں تیج تیوہار (مانسون کے دوران منایا جانے والا ایک مذہبی تہوار) کے بعد بوائی کے وقت وہ کھیت میں مٹکا کھاد ڈالتی ہیں، جو ایک قدرتی کھاد ہے جس میں گائے کے گوبر کو بنیادی جزو کے طور پر استعمال کیا جاتا ہے۔ بیج کے اگنے اور ڈنٹھل کے ذرا اوپر آنے کے بعد جب پھلیاں بنتی ہیں، تو وہ کھیت میں ورمی واش (ورمی کمپوسٹ سے حاصل کردہ مائع کھاد) ڈالتے ہیں۔

گوداوری کہتی ہیں، ’’ہم نے کُٹکی [چھوٹی جوار] کی فصل کے لیے اس طریقہ کار پر عمل کیا ہے اور اس سے ہماری پیداوار میں ایک سے ڈیڑھ کوئنٹل کا اضافہ ہوا ہے۔

وہ کودو اور ارہر کی کھیتی پر توجہ دیتی ہیں، اور بوائی کے لیے مخلوط بیج کے طریقہ کار کا استعمال کرتی ہیں۔ پانچ کلو کودو کے بیجوں میں تقریباً آدھا کلو ارہر کے بیج ملائے جاتے ہیں اور انہیں علاقہ کے تین کسانوں کو فراہم کیا جاتا ہے۔ ان بیجوں کو قطار یا لائن کا طریقہ اپناتے ہوئے بویا جاتا تھا۔ اس میں چھڑکاؤ کے طریقہ کے مقابلے بیج کی کم کھپت ہوتی تھی۔ کسانوں کو ساڑھے پانچ کلو مخلوط بیج سے ۱۰ کوئنٹل کودو اور دو کوئنٹل ارہر کی پیداوار حاصل ہوتی تھی۔

خواتین ہمیں بتاتی ہیں کہ کُٹکی یہاں کی ایک اہم خوراک ہے۔ یہاں جوار کی کھیتی کے لیے دستیاب چار ایکڑ کے پلاٹ میں سے آدھے حصہ میں بیج بوتے ہیں اور آدھا حصہ خالی چھوڑ دیتے ہیں اگلے سال کے لیے۔ اگلے سال وہ اس عمل کو الٹ دیتے ہیں۔ ایک موسم کے لیے زمین کو غیرکاشت چھوڑنے سے مٹی کی بازیافت کے لیے اور اس کی زرخیزی کی بحالی کے لیے وقت مل جاتا ہے۔ یہ بھی قدرتی کھیتی کے اصولوں میں سے ایک اصول ہے۔ گوداوری کہتی ہیں، ’’مویشی ان زمینوں پر چرتے ہیں جس کی وجہ سے بھی مٹی کی زرخیزی میں اضافہ ہوتا ہے۔‘‘

قدرتی اور نامیاتی طریقوں کے مسلسل استعمال کا مثبت نتیجہ برآمد ہوا ہے۔ ’’پہلے ہم ایک ایکڑ سے ۳-۴ کوئنٹل باجرہ حاصل کرتے تھے، اب یہ پیداوار بڑھ کر ۵-۶ کوئنٹل ہو گئی ہے۔‘‘

کودو کٹکی اور ارہر کے ساتھ ساتھ اپنے کھیتوں میں وہ تلہن کے بیج بھی ڈالتی ہیں جیسے السی، جگنی یا رام تل (نائجر سیڈ)۔ مخلوط کاشت کی یہ تکنیک کیڑوں کے حملوں کو روکنے میں بھی مددگار ثابت ہوتی ہے۔ کھیت میں مختلف قسم کے پودوں کی موجودگی میں کیڑے انہیں اس طرح نہیں کھا سکتے جس طرح وہ ایک فصلی فصل کا صفایا کرسکتے ہیں۔

قدرتی اور نامیاتی طریقوں کی حوصلہ افزائی کے پس پشت ان کا مقصد فصل کی پیداوار میں اضافہ اور زراعت میں کیمیائی ان پٹ کی حوصلہ شکنی کرنا ہے۔

تاہم، دھان اگانے کے لیے اب بھی کیمیائی اشیاء کا استعمال کیا جاتا ہے۔ بیجاپور گاؤں سے تعلق رکھنے والی،ایچ ایم کے ڈبلو پی سی کی بورڈ ممبر ممتا شیام کہتی ہیں، ’’میری فیملی کے پاس کھیتی کے لیے ۵ء۳ ایکڑ نشیبی زمین ہے، جس میں دھان اگانے کے سوا کوئی دوسرا متبادل نہیں ہے۔ ہمیں اچھی پیداوار حاصل کرنے اور بازار میں فروخت کرنے کے لیے کیمیائی کھادوں کا استعمال کرنا پڑتا ہے۔‘‘

اس بارانی زرعی علاقہ میں دو قسم کی زمینیں ہیں۔ نشیبی زمینوں کو دھان کے لیے استعمال کیا جاتا ہے کیونکہ وہ مانسون میں بارش کے پانی سے بھر جاتی ہیں۔ اونچائی پر موجود بھرّہ زمینیں (بنجر اور اوبڑ کھابڑ) کودو اور کٹکی کی کاشت کے لیے موزوں ہوتی ہیں۔

تمام خواتین اس بات سے متفق ہیں کہ مستقبل میں وہ دھان کے لیے اسی طرح کے قدرتی اور نامیاتی کاشتکاری کے طریقوں پر عمل کرنا چاہتی ہیں، اور باجرہ کی کھیتی محض ایک شروعات ہے۔ اگرچہ یہ گودام جہاں ہم ان خواتین سے ملاقات کر رہے ہیں صرف ایک سال پرانا ہے، بہت سے کسان یہاں یہ جاننے کے لیے آتے ہیں کہ نامیاتی پیداوار سے ان خواتین کو کتنی آمدنی حاصل ہوتی ہے۔ گوداوری کہتی ہیں،’’یہاں تک کہ مرد کسان بھی سوچنے لگے ہیں کہ وہ کس طرح آہستہ آہستہ کیمیکل سے پاک زراعت کی طرف بڑھ سکتے ہیں۔‘‘

اپنے روزمرہ کے گھریلو کاموں کے علاوہ، پروڈیوسر آرگنائزیشن کے جزو کے طور پر ان خواتین کسانوں کو اپنے کھیتوں میں مشقت کرنی پڑتی ہے، جس میں بار بار گھاس کی نکائی گڑائی شامل ہے۔ اس کے ساتھ ساتھ انہیں ایچ ایم کے ڈبلو پی سی کے انتظام کے دوہرے چیلنج کا بھی سامنا ہے۔ ان میں سے ایک چیلنج مارکیٹ میں کم نرخوں کی وجہ سے کودو اور کٹکی کی پیداوار میں آئی کمی ہے۔ اس مسئلے کا مقابلہ کرنے کے لیے انہوں نے فروخت کی شرح ۲۰-۲۵ روپے فی کلوگرام سے بڑھا کر ۳۷-۴۰ روپے فی کلوگرام کرنے کا فیصلہ کیا ہے۔ انہیں اس حقیقت سے بھی مدد ملی کہ ان کی حریف پروڈیوسر کمپنیوں نے بھی نرخوں میں اضافہ کیا ہے۔ ان کے لیے یہ امر اور بھی زیادہ مددگار رہا کہ حکومت نے ۲۰۲۳ میں جوار کے بین الاقوامی سال میں جوار کی کھپت کو فروغ دیا۔

قدرتی کاشتکاری کے لحاظ سے کٹکی ایچ ایم کے ڈبلو پی سی کی ایک اہم فصل ہے۔ وہ اس چھوٹے جوار پر ویلیو چین بڑھانے کی بھی کوشش کر رہے ہیں۔ اگر کوئی کسان ایک ایکڑ کھیت سے چار کوئنٹل پیداوار حاصل کرتا ہے اور اس میں سے ایک سال میں دو کوئنٹل فروخت کرتا ہے، تو مجموعی آمدنی میں اوسطاً اضافہ ۸۰۰۰ روپے ہوگا۔ کمپنی کسانوں سے اناج خریدتی ہے اور ہلکے بھورے رنگ کا پالش شدہ اناج حاصل کرنے کے لیے مشین پر ان کی پروسیسنگ کرکے بھوری جلد کو ہٹاتی ہے۔ ایک کلو پروسیس شدہ کٹکی تقریباً۱۰۰ روپے میں فروخت ہوتی ہے۔ بہت سے لوگ اس قسم کو ترجیح دیتے ہیں کیونکہ یہ کچھ فائبر کو برقرار رکھتی ہے اور مکمل طور پر پالش شدہ سفید اناج سے زیادہ صحت بخش ہوتی ہے۔ سال ۲۰۲۲ میں اپنے کام کی شروعات کے بعد سے پروڈیوسر کمپنی کٹکی کی پیداوار میں ۳۰ سے ۴۰ فیصد تک اضافہ حاصل کرنے میں کامیاب رہی ہے۔ اس کا طویل مدتی ہدف ہرسال تقریباً ۱۰۰ سے ۱۵۰ میٹرک ٹن پیدا وار حاصل کرنا ہے۔

لیکن ایچ ایم کے ڈبلو پی سی کے زیرانتظام دھان کی کاشت ایک بہت بڑا چیلنج ہے۔ ’’دھان کی کاشت کے لیے آپ کو کم از کم ۲۵ لاکھ روپے کی سرمایہ کاری کی ضرورت ہوگی اور آپ کو فروری میں بیجوں کی پہلے سے بکنگ کرنی ہوگی۔ تب ہی آپ انہیں بوائی کے لیے جون میں حاصل کرسکتے ہیں۔ پری بکنگ کے لیےآپ کو ۵۰ فیصد رقم ایڈوانس میں ادا کرنی ہوگی جو کہ تقریباً ۱۲ لاکھ روپے ہوگی۔ تب ہی ہم دھان کا کاروبار کرسکتے ہیں،‘‘ ایچ ایم کے ڈبلو پی سی کی حمایت کرنے والی تنظیم ’پردان‘ کے ہرشت چوہان کہتے ہیں۔

سال ۲۰۲۳ میں ایچ ایم کے ڈبلو پی سی کو بارش نہ ہونے اور مناسب پیداوار نہ حاصل کرنے کی وجہ سے نقصان اٹھانا پڑا تھا۔ گزشتہ مالی سال (۲۰۲۳-۲۴) میں ان کی آمدنی ۵ء۷۰ لاکھ روپے سے کم ہو کر ۲۵ لاکھ سے کچھ کم پر آ گئی تھی۔ اس بات کے مدنظر کہ ۲۰۲۰-۲۱ سے ۲۰۲۲-۲۳ تک آمدنی میں مسلسل اضافہ ہوتا رہا، یہ ایک بہت بڑا نقصان تھا۔ نقصان کی کئی وجوہات تھیں۔ ان میں سے ایک بھاری بارش کی وجہ سے پیداوار میں آئی کمی کے نتیجہ میں فصلوں پر کی جانے والی سرمایہ کاری کا خراب ہونا تھا۔ بارش کی وجہ سے کسان اپنی توقع کے مطابق پیداوارحاصل نہیں کر سکے تھے۔

ایچ ایم کے ڈبلو پی سی نے ایک غیر بینکنگ فنانس کمپنی (این پی ایف سی) کے ذریعہ اونچی شرح سود پر قرض لیا تھا (۱۴ فیصد سود کے علاوہ ایک فیصد ٹرانزیکشن چارجز)۔ کھاتہ بہی کا مناسب نظام اور طریقہ نہ ہونے کے سبب وہ سرکاری گرانٹ حاصل کرنے کے اہل نہیں تھے۔ دستی طور پر رکھے گئے ریکارڈ میں ناہمواری (انسانی غلطیاں جن کی وضاحت وہ آڈیٹروں کو نہیں کرسکتے تھے) پریشان کن تھے اور ان پر قابو پانا مشکل تھا۔

لیکن انہوں نے اس کمی کو فعالیت کے ساتھ دور کیا۔ انہوں نے کمپیوٹرائزڈ اکاؤنٹنگ نظام کو سنبھالنے کے لیے اپنے ہی ضلع سے ایک خاتون کی خدمات حاصل کیں اور ان کی تربیت کا انتظام کیا اور اپنے کھاتہ بہی کو دستی رجسٹر کے بجائے ڈیجیٹائزڈ ریکارڈ میں رکھنا شروع کیا۔ سمنا پور کے قریب انگوار گاؤں کی رہنے والی کیرتی تالیہ نے بی ایس سی تک تعلیم حاصل کی ہے۔ وہ بائیولوجی گریجویٹ ہیں اور آن لائن ایم بی اے کورس کر رہی ہیں۔ انہوں نے بنیادی اکاؤنٹنگ سیکھی ہے اور ایچ ایم کے ڈبلو پی سی کے آپریشن کے لیے تمام ضروری طریقہ کار کو منظم کرنے کے لیے ذمہ دار ہیں۔

سال ۲۰۲۳-۲۴ کے خسارہ کی بازیافت کی شروعات ۲۰۲۴-۲۵ کے بعد سے ہونے کا امکان ہے۔ گروپ کو جن بنیادی مسائل کا سامنا ہے ان میں صحت کی نگہداشت تک رسائی اور گھروں اور کھیتوں کے انتظام شامل ہیں۔ یہ ایسے مسائل ہیں جن کا سامنا ہر جگہ خواتین کسانوں کو کرنا پڑتا ہے۔

ممتا کہتی ہیں کہ یہاں ایک ابتدائی صحت کی نگہداشت کا مرکز ہے، لیکن ’’صرف دکھاوے کے لیے ہے۔‘‘ آشا (تسلیم شدہ سماجی صحت کارکن) گاؤں میں اپنا کام کرتی ہیں اور آنگن واڑی حاملہ خواتین اور چھوٹے بچوں کی دیکھ بھال کرتی ہیں۔ ’’لیکن جب کسی کو ہسپتال لے جانے کی ضرورت ہوتی ہے، تو ضلع ہسپتال تک جانے کے لیے ان کی اپنی موٹر سائیکلوں کے علاوہ کوئی دوسرا ذریعہ ٹرانسپورٹ دستیاب نہیں ہوتا،‘‘ وہ مزید کہتی ہیں۔

گوداوری ہمیں بتاتی ہیں کہ اپنے روزانہ کے گھریلو کام خود کرنے کے علاوہ ان خواتین کے پاس کوئی چارہ کار نہیں ہے، لیکن وہ کاشتکاری کے محنت طلب کام کا بوجھ آپس میں بانٹ لیتی ہیں۔ ’’اگر ہم میں سے پانچ کسی کام کا اشتراک کر رہی ہیں، تو ہم روپائی، نرائی، کٹائی کی سرگرمیوں میں وقفہ دیتے ہیں۔ ہم ایک کھیت سے دوسرے کھیت میں بوائی کے درمیان کچھ دنوں کا وقفہ رکھتے ہیں۔ آپسی سہیوگ (تعاون) اور ادلا بدلی سے ہو جاتا ہے۔ اس طرح ہم کو مزدور رکھنے لیے پیسے خرچ کرنے کی ضرورت نہیں پڑتی ہے۔‘‘

ناسک کے پروسیسنگ مشین مینوفیکچررز سے جو تربیت حاصل کی گئی تھی اس کے بغیر باجرے کو پروسیس کرنا مشکل ہوتا۔

گوداوری کہتی ہیں، ’’ہم نے پردان کی تربیت اور مدد کے بعد کچھ حد تک کاروبار کرنے کا طریقہ سیکھ لیا ہے۔‘‘ لیکن پیداوار کو فروخت کرنا ان کی یونٹ میں پہنچنے والے باجرے کی پروسسنگ سے بھی زیادہ مشکل کام ہے۔

وہ مزید کہتی ہیں، ’’مجھے اس کے متعلق کوئی اندازہ نہیں تھا کہ مارکیٹ میں کسی پروڈکٹ کو بیچنے کے لیے کیا ضروری ہے۔ جب میں جبل پور میں تاجروں سے بات کرنے گئی تو پتہ نہیں تھا کہ پروڈکٹ کی خصوصیات بتانی پڑتی ہیں۔‘‘

پروسیسڈ مصنوعات کی فروخت کے لیے ایف ایس ایس اے آئی (فوڈ سیفٹی اینڈ اسٹینڈرڈز اتھارٹی آف انڈیا) کا لائسنس حاصل کرنے کے لیے مصنوعات کی ساخت کی شناخت ضروری ہوتی ہے۔ ترکیب (کمپوزیشن) کو پیکیج کے لیبل پر شائع کرنا ضروری ہوتا ہے۔

’’ہم یہ نہیں کہہ سکتے تھے کہ کٹکی چاول، جسے ہم بازار میں فروخت کرنا چاہتے تھے، میں کتنا فیصد پروٹین، کاربوہائیڈریٹ اور اسی قبیل کی دوسری تراکیب شامل ہیں۔‘‘ انہیں جبل پور کے ایک تاجر سے معلوم ہوا کہ ایف ایس ایس اے آئی ان معلومات کو مصنوعات کے پیکج پر شائع کرنے کے عمل میں بیچنے والے کی مدد کر سکتا ہے۔

ہرشت نے وضاحت کی کہ انہیں اس بات کا علم تھا کہ ایف ایس ایس اے آئی کی تقاضوں کے مطابق مصنوع کے پیکج پر کچھ لوگو دکھائے جانے چاہئیں۔ ’’لیکن ہم نہیں جانتے تھے کہ اس کے علاوہ بھی کچھ ہے۔ ہمیں معلوم نہیں تھا کہ پیکیجنگ پر غذائیت کے مواد جیسے پروٹین، آئرن، شوگر، کاربوہائیڈریٹس وغیرہ کا بھی ذکر ہونا ضروری ہے۔ ان معلومات کو حاصل کرنے کے لیے ہمیں سب سے پہلے اپنے پروڈکٹ کا لیبارٹری میں ٹیسٹ کرانا ہوگا۔ اور اس کے بعد وہ ان معلومات کی تصدیق کے لیے ہر چھ ماہ بعد ہمارے پاس آئیں گے۔ اس کے بعد ہی ہم قانونی طور پر اپنی مصنوعات کو مارکیٹ میں فروخت کر سکتے ہیں۔‘‘

ہلچت ٹیم نے ایف ایس ایس اے آئی تک رسائی میں مدد کے لیے انڈین انسٹی ٹیوٹ آف ملیٹس ریسرچ (آئی آئی ایم آر) حیدرآباد سے رابطہ قائم کیا۔ انہوں نے منڈی (بازار) کا لائسنس حاصل کرنے کے لیے براہ راست کرشی وبھاگ (محکمہ زراعت) سے بھی رابطہ کیا، جس کے بغیر کوئی اپنی پیداوار بازار میں فروخت نہیں کر سکتا۔

’’ہر نئی پروڈکٹ کے لیے اس [لائسنس] کی ضرورت ہوتی ہے۔ اس وقت، ہم کودو، کٹکی، دھان اور سبزیاں فروخت کر رہے ہیں۔ جس کا مطلب یہ ہے کہ ہمیں ان کے لیے لائسنس اور دیگر معلومات کی ضرورت ہے۔ اگر ہم کوئی نئی پیداوار یا پروڈکٹ شامل کرتے ہیں، تو ہمیں اس کے لیے بھی ایسا ہی کرنا پڑے گا۔ آہستہ آہستہ ہم نے یہ چیزیں سمجھنا شروع کیں کہ اپنے کاروبار کو کیسے بڑھایا جائے۔‘‘ گوداوری کہتی ہیں۔

ایچ ایم کے ڈبلو پی سی کے ۱۴۰۰ رجسٹرڈ ممبران اس کے شیئر ہولڈر بھی ہیں۔ ہر شیئر کی قیمت ۵۰۰ روپے ہے۔ اس کے بورڈ کے ۱۲ ارکان ہیں۔ جن خواتین سے پاری کی ملاقات ہوئی ان میں ۴۴ سالہ گوداوری، ۵۲ سالہ بھونیشوری، ۴۲ سالہ ممتا، ۵۲ سالہ دروپتی، اور ۴۵ سالہ رام کلی بورڈ کی ممبر ہیں۔ دیوکی (۴۷ سالہ) اور کیرتی (۲۶ سالہ) پروڈیوسر کمپنی کی عام رکن ہیں۔ تمام رکن خواتین کسان ہیں۔ ایف پی سی ایک فارمر پروڈیوسر آرگنائزیشن (ایف پی او) ہے جو کمپنیز ایکٹ ۲۰۱۳ کے تحت ایک کمپنی کے طور پر رجسٹرڈ ہے۔ کسی ایف پی او کو کوآپریٹو سوسائٹی کے طور پر بھی رجسٹر کیا جا سکتا ہے۔

رام کلی اور کیرتی کا تعلق پَنِک (دیگر پسماندہ طبقہ) ذات سے ہے، جبکہ گوداوری اور ممتا کا تعلق پردان آدیواسی ذات سے ہے، جو گونڈ قبائلی برادری کی ایک ذیلی شاخ ہے جبکہ دروپتی، دیوکی اور بھونیشوری گونڈ آدیواسی خواتین ہیں۔

جولائی ۲۰۲۴ میں حکومت ہند نے اعلان کیا کہ نافذ کرنے والی ۱۴ ایجنسیوں کو ۱۰ ہزار ایف پی او مختص کیے گئے تھے، جن میں سے ۸۷۸۰ ایف پی او پورے ملک میں رجسٹر کیے گئے ہیں۔ ان میں سے ۶۱۴ کا تعلق مدھیہ پردیش سے ہے۔ ملک بھر میں۸۱۰ ایف پی او ایسے ہیں جو کلی طور پر خواتین ممبران پر مشتمل ہیں۔

پرانے وقتوں میں جب گرام سبھا میں خواتین کی جانب سے اٹھائے گئے مسائل کو مرد نظر انداز کر دیا کرتے تھے، انہیں یاد کرتے ہوئے گوداوری کہتی ہیں، ’’سرپنچ ہم سے ایک آویدن [درخواست] بھی نہیں لیتے تھے۔ ہمیں صرف نظر انداز کر دیا جاتا تھا! یہ وہی وقت تھا جب ہمیں احساس ہوا کہ ہمیں سیاسی طور پر مضبوط ہونا پڑے گا۔‘‘

گوداوری مراوی اب ہلچلیت مہیلا کسان ویمن پروڈیوسر کمپنی لمیٹڈ کی چیئرپرسن ہیں۔ اس خاتون کسان کے لیے یہاں تک کا سفر کوئی آسان نہیں رہا ہے۔ اس عمل میں خاندانی اور کمیونٹی سطح پر اعتماد پیدا کرنے کے ساتھ ساتھ مسائل پیدا کرنے والوں سے نمٹنا اور گاؤں اور ضلعی سطح کے انتخابات میں حصہ لینا شامل تھا۔ وہ جَنپَد (ڈنڈوری ضلع میں ضلع پریشد) کی رکن بھی رہی ہیں۔

جب گوداوری نے پہلی بار ایک ایس ایچ جی (سیلف ہیلپ گروپ) میں شمولیت اختیار کی، تو انہیں کئی مسائل کا سامنا کرنا پڑا تھا: ’’میرے شوہر کو شک تھا کہ میں کہاں جا رہی ہوں، کس سے مل رہی ہوں، وغیرہ۔ لیکن پھر جب ہم نے سبزیوں کی کاشت شروع کی تو پہلے ہی سال قدرتی کاشتکاری کی تکنیک کا استعمال کرتے ہوئے ہم ۱۰-۱۵ ہزار روپے کمانے میں کامیاب ہو گئے۔ اس سے فرق پڑا۔‘‘

اور پھر گاؤں کے لوگوں کو احساس ہوا کہ وہ اچھا کام کر رہی ہیں۔ ’’اس کے بعد میرے شوہر نے مجھے نہیں روکا اور نہ ہی مجھ سے سوال کیا کہ آیا میں ایس ایچ جی کے سلسلے میں باہر گئی تھی یا بعد میں جب ہم نے ایف پی او بنایا تھا اس کے لیے۔‘‘

جب خواتین تین روزہ ٹریننگ کے لیے ڈنڈوری شہر گئیں تو گاؤں کے کچھ مردوں نے ان کی تذلیل کی اور گھروں سے ان کی تین دن تک غیرحاضری کے بارے میں نازیبا فقرے کسے۔ اب ان کے گاؤں کے انہی مردوں میں سے کچھ مرد کاشت کاری کے چکروں کے بارے میں معلومات حاصل کرنے اور بیج خریدنے ان کے دفتر میں آتے ہیں۔

جیسے ہی ہم نے الوداع کہا، گوداوری نے ہمیں بتایا کہ وہ مردوں کے نازیبا فقروں کے جواب میں کیا کہیں گی۔ اپنی مٹھی ہوا میں لہراتے ہوئے، انہوں نے ایک ساتھ کہا، ’’ہم بھارت کی ناری (خواتین) ہیں، پھول نہیں چنگاری ہیں۔‘‘

ترجمہ نگار: شفیق عالم