जहंवा राजनीतिक भइल सउदा के होसियारी बा

“कुछ साल पहिले, जदि गांव में पोखर बनावे के बात ग्राम सभा में उठावे के होखत रहे, त उहंवा सरपंच, चाहे अध्यक्ष संगे बतियावे खातिर हमनी मेहरारू लोग के बइठे तक के जगह ना होखत रहे,” गोदावरी मरावी बतावत बाड़ी.

बाकिर अब बहुते कुछ बदल गइल बा. एह बदलाव के पाछू बरगांव के मेहरारू लोग के अगाध धीरज, मिहनत आ मजबूत इच्छाशक्ति बा. मध्य प्रदेस के बरगांव में जुलाई 2024 में हमनी के भेंट अइसने कुछ मेहरारू लोग से एगो बरखा वाला दिन भइल.

गोदावरी भोरे-भोरे हलचालित महिला किसान प्रोड्यूसर कंपनी (एचएमकेडब्ल्यूपीसी) के छव ठो आउर मेहरारू लोग संगे पहुंचल रहस. ऊ लोग टीन से छावल आ टीने के देवाल वाला एगो बड़का सेडनुमा दफ्तर में बइठल रहे. दफ्तर डिंडोरी जिला के समनापुर ब्लॉक में पड़ेला. एह छोट दफ्तर में घुसते रउआ एक ओरी कुरसी आ टेबुल देखाई पड़ी, जवना पर एगो कंप्यूटर धइल मिली. दू-चार ठो बिना किवांड़ (दरवाजा) वाला अलमारी आ एगो एयर कुलरो लउकत रहे.

मेहरारू लोग बहुते गर्व से आपन परिचय किसान के रूप में देलक. एह कंपनी के नामो उहे लोग के सोच के धराइल बा. हल चलावे के काम सुरुए से मरद लोग के मानल गइल. बाकिर ई मेहरारू लोग ओह पांरपरिक सोच के चुनौती देलक आउर कंपनी के नाम रखलस- हल चलावे वाला मेहरारू माने ‘हलचालित महिला किसान वूमेन प्रोड्यूसर कंपनी’. आज के दिन एह कंपनी में 1,400 लोग पंजीकृत बा, जे एह में शेयरधारको बा.

कंपनी के दू ठो सदस्य- 44 बरिस के गोदावरी मरावी आ 47 बरिस के देवकी वागले बरगागांव (जेकरा बरगा गांव भी पुकारल जाला) में रहेली. दुनो मेहरारू लोग दफ्तर ले गोड़े-गोड़े चलके आइल रहे. आउर दोसर मेहरारू लोग समनापुर ब्लॉक के आपन घर से ऑटो से, चाहे आपन परिवार संगे मोटरसाइकिल पर पाछू बइठ के आइल रहे.

गोदावरी मरावी अब कंपनी के चेयरपर्सन (अध्यक्षा) बाड़ी. ऊ हमनी के बतावे लगली कि कइसे पहिले इहंवा के किसान लोग खेती में कवनो तरह के रसायनिक खाद आ कीटनासक के इस्तेमाल ना करत रहे. बाकिर धीरे-धीरे परिस्थिति बदलल, आ 2010 से रसायनिक खाद आ कीटनासक के इस्तेमाल बढ़त चल गइल. अब 2022 से डिंडोरी जिला में बहुते किसान लोग दोबारा जैविक आ कुदरती खेती, चाहे दुनो तरीका से मिल के खेती करे के कोसिस में लागल बा. गैर-रसायनिक खेती के बढ़ावा देवे वाला कइएक संगठन एह लोग के मदद कर रहल बा.

“हमनी किसान लोग के जैविक बिया उपलब्ध कराइला. जब खेत घास, खर-पतवार आ ठूंठ संगे जोताला, त ई सब माटी में मिल जाला. सब माटी में सड़ के प्राकृतिक खाद बन जाला,” गोदावरी हमनी के बतइली.

सितंबर में, तीज त्योहार (बरखा में मने वाला एगो धारमिक उत्सव) के बाद जब रोपनी के बेरा आवेला, त ऊ लोग मटका खाद डालेला जे एगो प्राकृतिक खाद बा. मटका खाद में गाय के गोबर फेंटल रहेला. बीया फूटेला आ डंठल तनी बढ़ेला, त फलिया बने घरिया वर्मिवॉश छिड़क जाला. ई वर्मी कंपोस्ट से बनल रहेला.

“हमनी कुटकी (छोटका जवार) के खेती एही तरीका से कइनी. अइसन करे से कुटकी के पैदावार एक से डेढ़ क्विंटल ले बढ़ गइल,” गोदावरी बतइली.

ऊ लोग के ध्यान सबले जादे कोदो जवार आ अरहर पर रहेला. बीया बोआई के मिश्रित विधि के जरिए ऊ लोग पांच किलो कोदो के बीया में आधा किलो अरहर फेंट के एकरा इलाका के तीन ठो किसान के दे देवेला. एकरा कतार विधि से बोअल जाला. बीया छींट के बोआई के तरीका के बनिस्पत एह तरीका में कम बीया खपत होखेला. साढ़े पांच किलो फेंटल बीया से किसान लोग के 10 क्विंटल कोदो आ दू क्विंटल अरहर उगा लेवल जाला.

कुटकी इहंवा के रोज के भोजन बा, अइसन मेहरारू लोग बतइलक. जवार के चार एकड़ के खेत में से आधा हिस्सा एक बरिस खातिर खाली छोड़ देवल जाला आउर आधा में कुटकी लगावल जाला. अगिला बरिस एकर उलटा कइल जाला. माटी के एक सीजन खातिर खाली छोड़े से एकर उगावे के ताकत बढ़ जाला. प्राकृतिक खेती करे के एगो तरीका इहो बा.

गोदावरी बतावेली, “माल-मवेसी सब अइसने खाली पड़ल खेत में चरेला. एकरो से माटी के उपजावे के क्षमता बढ़ेला.”

प्राकृतिक आ जैविक तरीका के बेर-बेर इस्तेमाल करे से बढ़िया नतीजा मिल रहल बा. “पहिले एक एकड़ से 3-4 क्विंटल कुटकी मिलत रहे. अब ई बढ़ के 5-6 क्विंटल हो गइल बा.”

कोदो-कुटकी आ अरहर के अलावे ऊ लोग अलसी, जगनी चाहे रामतिल जइसन तेल वाला बीया भी बोएला. अइसन मिश्रित खेती करे से कीड़ा-मकोड़ा के उपद्रव भी कम होखेला. खेत में एक संगे अलग-अलग किसिम के पौधा पर कीट ओह तरीके से हमला ना कर पावे, जइसे एकल फसल पर करेला.

प्राकृतिक आ जैविक तरीका से खेती के बढ़ावा देके, ऊ लोग के मकसद पैदावार ब़ढ़ावे आ खेती में रसायनिक चीज सब के उपयोग कम से कम कइल बा.

अइसे, धान उगावे खातिर अबहियो दवाई के इस्तेमाल होखेला. बीजापुर गांव के रहे वाली आ एचएमकेडब्ल्यूपीसी के समिति सदस्या ममता श्याम कहेली, “हमनी के परिवार के निचलका (निम्न समतल भूमि) इलाका में साढ़े तीन एकड़ के खेत बा. हमनी खातिर धान उगावे के अलावे आउर कवनो चारा नइखे. नीमन पैदावार खातिर हमनी के केमिकल खाद डाले के मजबूर बानी, ताकि बजार में कुछ बेंच के कमाई कइल जा सको.”

बरखा पर निर्भर खेती वाला एह इलाका में दू तरह के खेत बा. निचला इलाका वाला जेकरा में धान उगावल जाला, काहेकि बरखा में ओह खेत में पानी पूरा भरल रहेला. दोसरका, ऊंच, आ उबड़-खाबड़ इलाका वाला भर्रा खेत (ऊपर के बंजर, चाहे अनउपजाऊ खेत) कोदो आ कुटकी उगावे खातिर जादे बढ़िया रहेला.

सभे मेहरारू लोग आगू चलके धान उगावे में अइसने जैविक आ प्राकृतिक तरीका अपनावे के ठान लेले बा. कुटकी आ कोदो त ओह लोग खातिर बस सुरुआत बा. अइसे त जवन गोदाम में हमनी के भेंट भइल, ऊ बस एके बरिस पुरान बा. बाकिर इहंवा ढेरे किसान लोग ई देखे आवेला कि ई औरत लोग जैविक खेती करके कवना तरह से कमा रहल बा. गोदावरी बतावेली, “अब त किसान भाई लोग भी सोच रहल बा धीरे-धीरे दवाई वाला खेती छोड़ के जैविक खेती सुरु कइल जाव.”

घर के रोज के काम-धंधा निपटा के मेहरारू किसान लोग उत्पादक संगठन के हिस्सा के रूप में आपन खेत में कमरतुड़ मिहनत करेला. खर-पतवार के बेर-बेर साफ कड़े जइसन झंझटिया मिहनत के अलावे एचएमकेडब्ल्यूपीसी भी चलावेला. ओह लोग के एगो दिक्कत इहो रहल कि बजार में दाम कम होखे से कोदो आ कुटकी के पैदावार घट गइल. एकरा से निपटे खातिर ऊ लोग दाम बढ़ावे के सोचलक. बीस-पच्चीस रुपइया से बढ़ा के दाम सैंतीस-बयालिस रुपइए किलो कर देवल गइल. बढ़िया बात ई भइल कि ओह लोग के मुकाबला करे खातिर प्रतिद्वंद्वी उत्पादक कंपनी सब भी दाम बढ़ा देहल. सरकार के 2023 के अंतरराष्ट्रीय रागी वर्ष के मौका पर रागी के खपत के बढ़ावा देवे जइसन प्रयासो से बहुते राहत मिलल.

प्राकृतिक खेती के बात कइल जाव, त एचएमकेडब्ल्यूपीसी खातिर कुटकी बहुते जरूरी फसल बा. ऊ लोग कुटकी खातिर वैल्यू चेन (उत्पादन से बिकाई तक के जुगाड़) तइयार करे के कोसिस कर रहल बा. जदि किसान एक एकड़ में चार क्विंटल कुटकी उपजावे आ ओकरा में से दू क्विंटल के बेचल जाव, त कुल कमाई में औसतन 8,000 रुपइया के इजाफा होई. कंपनी किसान लोग से रागी कीनेला आ आपन प्रोसेसिंग मसीन में ओकर भुअर छिल्का हटा के, ओकरा पॉलिश कर तनी भुअर चमकदार रागी तइयार करेला. प्रोसेस कइल कुटकी के दाम 100 रुपइया किलो होखेला. बहुते लोग के ई किसिम पसंद बा काहेकि एकरा में तनी फाइबर बचल रहेला आ ई पूरा तरह से पॉलिश कइल उज्जर किसिम के तुलना से नीमन होखेला. ई कंपनी सन् 2022 में आपन काम सुरु कइलक. तब से कुटकी के पैदावार में 30 से 40 प्रतिशत तक के इजाफा भइल बा. एह लोग के मकसद हर साल 100 से 150 मैट्रिक टन कुटकी उगावल बा.

बाकिर एचएमकेडब्ल्यूपीसी खातिर धान उगावल बहुते बड़ा चुनौती बा. एचएमकेडब्ल्यूपीसी के सहजोग करे वाला संस्था, प्रदान के हर्षित चौहान के कहनाम बा, “धान उगावे खातिर कमो ना त 25 लाख रुपइया चाहीं आ फरवरी से पहिले बुक करावे के पड़ेला. तब जाके जून में रोपाई करे खातिर बीया मिल पावेला. पहिले से बुक करावे खातिर 50 प्रतिशत एडवांस देवे के होखेला. ई करीब 12 लाख रुपइया पड़ी. तब जाके हमनी के धान के खेती कर सकिला.”

बरखा ना होखे आउर पर्याप्त उपज ना होखे से सन् 2023 में एचएमकेडब्ल्यूपीसी के खासा नुकसान भइल. पछिला वित्तीय बर्ष (2023-24) में एकर कमाई 70.5 लाख से घट के कोई 25 लाख रह गइल. ई बहुते बड़ झटका बा. काहेकि 2020-21 से 2022-23 ले इनकर कमाई लगातार बढ़त रहल.

एचएमकेडब्ल्यूपीसी एगो गैर-बैंकिंग फाइनेंस कंपनी (एनबीएफसी) से उंच दर पर करजा लेले रहे. समुचित लेखांकन प्रणाली आ प्रक्रिया के अभाव में कंपनी सरकारियो अनुदान ना पा सकल. चूक, चाहे इंसानी गलती- जेकरा ऑडिटर के सामने समझावल कठिन रहे, चलते मैनुअल रिकॉर्ड में अंतर आ गइल, जे बहुते बड़ रहे. आउर एकरा से उबरल मुस्किल रहे.

बाकिर कंपनी हिम्मत ना हारलक आ समस्या के सुलझावे में पूरा दम लगा देलक. मेहरारू लोग जिला से एगो मेहरारू के पगार पर नियुक्त कइलक ताकि ऊ कंप्यूटर वाला लेखांकन प्रणाली के संचालन कर सको. ऊ कंपनी के प्रणाली के मैनुअल रजिस्टर सब के बदल के डिजिटल रिकॉर्ड में बदल देली. समनापुर के लगे अंगवार गांव के रहे वाली कीर्ति तालिया जीवविज्ञान से बीएससी कइला के बाद फिलहाल एगो ऑनलाइन एमबीए कोर्स कर रहल बाड़ी. ऊ बेसिक अकाउंटिंग सीख चुकल बाड़ी. फिलहाल उहे एचएमकेडब्ल्यूपीसी के सभे प्रणाली के संचालन देखेली.

उम्मीद बा कि संगठन में 2023-24 में जवन आर्थिक गिरावट आइल रहे, ओकरा से ऊ 2024-25 में उबरे में सफल रही. समूह के खास करके ओह चुनौती सब से निपटे के जरूरत बा जेकरा से मेहरारू किसान लोग के सामना हर जगहा होखेला. एह में डाक्टरी सुविधा आ घर आ खेत के देखभाल सबले जरूरी चीज बा.

ममता बतइली कि इहंवा एगो प्राथमिक स्वास्थ्य केंद्र त बा, बाकिर बस “देखावे खातिर बा”. आसा (एएसएचए यानी स्वास्थ्य कार्यकर्ता) लोग गांव में काम करेला आ आंगनबाड़ी गरभ वाला मेहरारू लोग आउर नयका जनमल बच्चा खातिर चालू बा. बाकिर ऊ कहेली, “केहू के अस्पताल जाए के नौबत आवेला, त जिला पहुंचे खातिर मोटरसाइकिल के अलावे आउर कवनो साधन ना भेंटाए.”

मेहरारू लोग लगे घर के काम-धंधा अपने संभारे के अलावे आउर कवनो चारा नइखे. एकरा बादो ऊ लोग खेत में कड़ा मिहनत करे के समय निकाल लेवेला. गोदावरी बतावत बाड़ी. “जदि पांच जन मिलके खेत पर काम करत बानी, त हमनी आपन-आपन काम बांट लेविला. जइसे केहू रोपाई करेला, त केहू नीड़ाई, त केहू कटाई. मतलब एक खेत में रोपाई कइला के कुछ दिन बाद दोसरका खेत में रोपाई कइल जाला. आपसी सहयोग और अदला-बदली से हो जाता है (आपसी सहजोग आ अदला-बदली से हो काम हो जाला). एह तरह से काम करे से हमनी भाड़ा पर मजूर बोलावे आ पइसा खरचा करे से बच जाइला.”

रागी के प्रसंस्करण कइल मुस्किल काम बा. बाकिर नासिक के प्रोसेसिंग मसीन निर्माता से प्रशिक्षण लेवे के बाद अब ई काम आसान हो गइल बा.

गोदावरी कहेली, “प्रदान (पीआरएडीएचएएन) से मिलल ट्रेनिंग आ मदद के बाद हमनी कुछ हद ले कारोबार के तरीका सिखनी.” बाकिर जवन रागी हमनी के यूनिट में आवेला, ओकरा प्रोसेसिंग करे से जादे मुस्किल ओकर बेचनाई बा.

ऊ आगू कहे लगली, “हमरा तनिको आइडिया ना रहे बजार में माल बेचे खातिर का सब जरूरत बा. हम जब जबलपुर ब्यापारी लोग से बतकही करे गइलनी, त ‘पता नहीं था कि प्रोडक्ट की गुणवत्तायें बतानी पड़ती हैं (बुझल ना रहे कि माल के खासियत आ ओकर गुण बतावे के पड़ेला)’.”

दरल (प्रोसेस) माल बेचे खातिर एफएसएसएआई (भारतीय खाद्य सुरक्षा मानक प्राधिकरण) से लाइसेंस लेवे पड़ेला आउर लाइसेंस लेवे खातिर प्रोडक्ट के बारे में बतावल जरूरी रहेला. ई जानकारी पैकेट पर लागल लेबल में छपल जरूरी बा.

“हमनी ना बता सकीं कि जवन कुटकी चाउर के हमनी बजार में बेचे के चाहत बानी ओह में केतना प्रोटीन, कार्बोहाइड्रेट आउर एह तरह के दोसर तत्व रहेला.” ऊ जबलपुर के एगो ब्यापारी से सीखली कि एफएसएसआई कवनो विक्रेता के प्रोडक्ट पैकेज पर ई जानकारी देकर ओह लोग के मदद कर सकेला.

हर्षिता बतावेली कि उनका मालूम रहे कि एफएसएसएआई के मानदंड के हिसाब से प्रोडक्ट पैकेज पर कवनो खास लोगो देखावल जरूरी रहे. “बाकिर हमनी के पता ना रहे कि एतना काफी नइखे. पैकेजिंग पर प्रोटीन, आयरन, सुगर, कार्बोहाइड्रेट आदि के पोषण मात्रा के भी जिकिर कइल जरूरी रहे. एह तरह के जानकारी पावे खातिर पहिले प्रयोगशाला में एकरा जांचल जरूरी रहे. आउर ऊ लोग जानकारी के साबित करे के मकसद से हर छव महीना बाद हमनी लगे आई. एकरा बादे हमनी वैझ रूप से आपन उत्पाद के बजार में बेच सकम.”

हलचालित के टीम एफएसएसएआई तक पहुंचे खातिर मदद करेला भारतीय अन्न अनुसंधान संस्था (आईआईएमआर), हैदराबाद से संपर्क कइलक. मंडी लाइसेंस हासिल करे खातिर ऊ लोग सीधा कृषि विभाग से भी संपर्क कइलक, काहेकि एकरा बिना बजार में केहू कवनो उत्पाद ना बेच सकेला.

“हर नयका उत्पाद खातिर लाइसेंस के जरूरत पड़ेला. अबही त हमनी कोदो, कुटकी, धान आ तरकारी सब बेच रहल बानी. मतलब हमनी के एहू सब खातिर लाइसेंस आ दोसर जानकारी सब के जरूरत बा. जदि कवनो नया उत्पाद शामिल कइल जाई त हमनी के इहे प्रक्रिया दोहरावे के होई. धीरे-धीरे हमनी समझत बानी कि ब्यापार के विस्तार कइसे कइल जा सकेला,” गोदावरी कहेली.

एचएमकेडब्ल्यूपीसी के 1,400 रजिस्टर्ड सदस्य लोग एकर शेयरधारको बा. एगो शेयर के दाम 500 रुपइया बा. बोर्ड में 12 लोग बा. पारी के भेंट जवन मेहरारू लोग से भइल, ओह में 44 बरिस के गोदावरी, 52 के भुवनेश्वरी, 42 के ममता, 52 के द्रोपती आ 45 के रामकली लोग बोर्ड के मेंबर बा. सैंतालीस बरिस के देवकी आ कीर्ति प्रोड्यूसर कंपनी के सामान्य सदस्य लोग बा. सभे सदस्य लोग मेहरारू किसान बा. एफपीसी के मतलब फार्मर प्रोड्यूसर ऑर्गनाइजेशन (एफपीओ) बा. ई कंपनी अधिनियम (52) के अंतर्गत एगो कंपनी के रूप में रजिस्टर्ड बा. एफपीओ के एगो कोऑपरेटिव सोसाइटी के रूप में भी रजिस्टर कइल जा सकेला.

रामकली आ कीर्ति लोग जहंवा पनिका समुदाय (अन्य पिछड़ा वर्ग) से आवेला, उहंई गोदावरी आ ममता लोग प्रधान आदिवासी बा. ई गोंड जनजाति समुदाय के एगो उपसमूह बा. जबकि द्रोपती, देवकी आ भुवनेश्वरी गोंड जनजाति के मेहरारू लोग बा.

भारत सरकार जुलाई 2024 में ऐलान कइलक कि देस भर में 10,000 एफपीओ के 14 क्रियान्वयन एजेंसी सब के आबंटित कइल गइल. एकरा में से 8,780 एफपीओ के रजिस्टर करे के काम पूरा हो चुकल बा. एह में 614 मध्य प्रदेस में बा. पूरा देस में 810 एफपीओ अइसन बा जेकर सभे सदस्य लोग मेहरारू बा.

गोदावरी पुरान दिन सब इयाद करत बाड़ी. तब ग्राम सभा में पुरुखलोग मेहरारू लोग के उठावल मुद्दा के महत्व ना देत रहे. “सरपंच हमनी के आवेदन तक ना लेत रहस. हमनी के भाव ना देवल जात रहे. तब लागल कि राजनैतिक रूप से बरियार भइल केतना जरूरी बा.”

वर्तमान में गोदावरी मरावी हलचालित महिला किसान वूमेन प्रोड्यूसर कंपनी लिमिटेड के अध्यक्षा बानी. एह किसान खातिर इहंवा ले पहुंचल कोई आसान ना रहे. उनका आपन परिवार आ समाज के बिस्वास अर्जित करे के साथे-साथे अड़ंगा लगावे वाला लोग के खिलाफ भी तन के ठाड़ होखे के पड़ल. जरूरत पड़ला पर ग्राम आ जिला स्तर के चुनाव में उनका भाग लेवे पड़ल. उहां के डिंडोरी जिला परिषद के जनपद सदस्य भी रह चुकल बानी.

गोदावरी जब पहिल बेर एसएचजी (स्वयं सहायता समूह) से जुड़ली, उनकर मुसीबत तबे से सुरु हो गइल रहे. “हम कहंवा जातानी, केकरा से मिलत बानी जइसन चीज लेके हमार घरवाला के मन में तनी संदेह रहे लागल रहे. बाकिर बाद में जब हमनी प्राकृतिक खेती के जरिए तरकारी उगावे सुरु कर देनी आ पहिलके साल 10 से 15 हजार के कमाई हो गइल, त एकरा सब से बहुते फरक पड़ल.”

तब जाके गांव के लोग के लागल कि हमनी नीमन काम कर रहल बानी. “ओकरा बाद हम जबो एसएचजी के काम से कहूं जाईं, चाहे जब बाद में एफपीओ सुरु कइनी त घरवाला ओरी से कवनो आपत्ति ना भइल, चाहे हमरा से कवनो तरह के सवाल ना कइल गइल.”

मेहरारू लोग एक बेरा डिंडोरी शहर ट्रेनिंग करे गइल. तीन दिन के ट्रेनिंग चलते घर से गायब रहे के कारण हमनी के मजाक बनावल गइल, ताना कसल गइल. अब ओही में से गांव के केतना लोग हमनी के दफ्तर आवेला आउर फसल आ बीया कीने के बारे में पूछेला.

हमनी ओह लोग से विदा मांगे लगनी, त गोदावरी हमनी के बतइली कि ऊ लोग मरद लोग के फब्ती कसला पर का सब कहत रहे. ऊ लोग सभे हवा में आपन मुट्ठी लहरइलक, आ एक संगे कहलक, “हमनी भारत के नारी हईं, फूल ना चिंगारी हईं.”

अनुवाद: स्वर्ण कांता