گلہ بانوں کے چلے جانے سے اراولی کا کتنا نقصان ہوگا

بیڑی کا کش لگاتے ہوئے فرید آباد کے مانگر گاؤں کی گوجر برادری کے چرواہے رتن سنگھ اپنی بکریوں پر نظر رکھ رہے ہیں۔ اراولی کی چڑھائی چڑھ کر گھاس والی زمین پر پہنچتے ہی وہ انہیں پانی پلانے کے ارادے سے آواز لگاتے ہیں۔ ’’ٹر، ٹر،‘‘ کی تیز اور بار بار آواز کے ساتھ وہ بلاتے ہیں، اور ان کی ۴۵ بکریاں اکٹھا ہونے لگتی ہیں۔

’’ہر پکار کی آواز، سُر اور لے الگ ہوتی ہے، اور ہر ایک آواز کا مطلب الگ ہوتا ہے۔ ریوڑ کو کنٹرول کرنے کے لیے ایسی درجنوں آوازیں ہوتی ہیں،‘‘ وہ بتاتے ہیں۔

’’آو، آو‘‘ – ایسی نرم آواز سے چرواہے بکریوں کو اپنے پاس بلاتے ہیں۔ پھر ’’لے لے لے‘‘ کرتے ہیں، جو بکریوں کے نمک کھانے کا وقت بتانے والی خاص آواز ہے۔

’’آولے، آولے – اونہہ اونہہ‘‘ یہ دوہرے مطلب والی آواز ہے: ریوڑ کو یہ یقین دلانا کہ چرواہا ان کے قریب ہی ہے، اور امکانی شکاریوں کو آگاہ کرنا کہ ریوڑ تنہا نہیں ہے۔

رتن سنگھ (۶۵) سُر اور تال کے معمولی فرق کو سمجھاتے ہوئے ہر ایک آواز کو ادا کر کے سمجھاتے اور دکھاتے ہیں، اور ساتھ ہی یہ بھی بتاتے ہیں کہ یہ آوازیں کیسے چرواہے اور ریوڑ کے درمیان موجود پرانے رشتے کو برقرار رکھتی ہیں۔

لمبے اور ہلکے بدن کے مالک رتن سنگھ کرتا پائجامہ اور پگڑی پہنتے ہیں۔ ان کے چمڑے کے جوتے وزنی ہیں اور وہ پہاڑیوں کی نکیلی چٹانوں اور کانٹوں پر چلنے کے لیے موزوں ہیں۔

رتن سنگھ کا تعلق دہلی و ہریانہ سرحد پر واقع اراولی سلسلہ کوہ میں آباد مانگر گاؤں سے ہے، جو اپنے بیش بہا حیاتیاتی تنوع کے لیے مشہور ہے۔

اراولی، جو دہلی سے ہریانہ اور راجستھان ہوتے ہوئے گجرات تک، ملک کے شمال مغرب میں پھیلا ہوا ہے، نومبر ۲۰۲۵ کے سپریم کورٹ کے اس فیصلہ کے بعد ملک کے لیے ایک ماحولیاتی بحث کا موضوع بن گیا ہے، جس میں قانونی تحفظ کو صرف اُن حصوں تک محدود کر دیا گیا جو ۱۰۰ میٹر سے زیادہ اونچائی کے ہیں۔ ایک طرف جہاں ماہرین ماحولیات اور سول سوسائٹی کے گروہوں نے اس فیصلہ پر مایوسی کا اظہار کیا، وہیں دوسری طرف رتن سنگھ جیسے کنبے ان زمینوں کی روایتی دیکھ بھال کی ذمہ داری آج بھی پوری کر رہے ہیں۔ گزشتہ ۳۱ دسمبر، ۲۰۲۵ کو سپریم کورٹ نے جب عوامی غم و غصے کا بذات خود نوٹس لیتے ہوئے اراولی پر دیے گئے اپنے پچھلے فیصلہ کو مسترد کر دیا، اور ایک نئی اعلی سطحی کمیٹی قائم کرنے کی تجویز بھی پیش کی جو اس بات کا جائزہ لے گی کہ پچھلے حکم نامہ میں دی گئی اراولی پہاڑیوں کی نئی تعریف سے باہر ہو گئے علاقوں میں کان کنی کی وجہ سے اراولی سلسلہ کوہ کے حیاتیاتی نظام کو خطرہ ہے یا نہیں۔

مانگر کے کل ۴۲۶۲ ایکڑ رقبہ کا تقریباً ۹۰ فیصد حصہ جنگلات سے ڈھکا ہوا ہے، جن میں استوائی خشک برگ ریز اور استوائی کانٹے دار درخت پائے جاتے ہیں۔ یہاں کم از کم ۴۰ قسم کے درخت اور ۳۰ قسم کی جھاڑیاں ہیں، اور رتن سنگھ ہر ایک کو پہچانتے ہیں۔ دَھو (اینوجائیسَس پینڈولا) درخت کی سب سے اہم قسم ہے، جو بڑے پیمانے پر مویشیوں کے چرنے کی وجہ سے اب اکثر جھاڑی جیسا نظر آتا ہے؛ اس کے علاوہ گنگیر (گریویا ٹینیکس)، آٹن (گریویا فلیویسنس)، رونجھ (ویکیلیا لیوکوفلوئیا) اور جھڑبیر (زیزیفس نُمیُولاریا) ہیں، جو سبھی چرنے والے ریوڑ کے لیے عام چارہ ہیں۔

’’یہاں پہلے لوگ بہت زیادہ مویشی رکھتے تھے۔ ہر گھر میں کم از کم ۱۰۰ بکریاں ہوتی تھیں،‘‘ رتن سنگھ کہتے ہیں۔ خود ان کے پاس دو بڑی گائیں، دو چھوٹی گائیں اور ایک بھینس ہے، ساتھ میں اس کے دو بچھڑے بھی ہیں۔ ’’اب اپنے آپ ہی تیزی سے پھیلنے والی انواع نے اُن دیسی درختوں اور جھاڑیوں کی جگہ لے لی ہے، جو روایتی طور پر چارہ دیتی تھیں۔‘‘

ان میں پروسوپِس جولی فلورا بھی ہے۔ یہ ایک خطرناک، غیر دیسی درخت کی قسم ہے، جو کئی بحیروں میں پھیل چکی ہے اور جس کے سنگین نتائج ہیں۔ حکومت ہریانہ نے ۲۰۱۷ میں اسے پنجاب کے تحفظ اراضی قانون (پی ایل پی اے)، جسے ۱۹۰۰ میں انگریزوں کے ذریعہ مٹی کا کٹاؤ روکنے کے لیے بنایا گیا تھا) کے تحت محفوظ کردہ درختوں کی فہرست سے یہ کہتے ہوئے ہٹانے کی کوشش کی تھی کہ یہ ایک ’بیرونی حملہ آور قسم‘ ہے۔ لیکن سچ یہ ہے کہ دو دہائی قبل خود ریاستی حکومت نے ہی اراولی میں اس قسم کے درخت لگائے تھے۔

اراولی کو ’اوپن اسکرب فاریسٹ‘ یعنی کھلا جھاڑی دار جنگل مانا جاتا ہے۔ یہ ایسے جنگل ہوتے ہیں، جن میں درختوں کا رقبہ سب سے کم (۱۰ سے ۴۰ فیصد) ہوتا ہے۔ سرکاری اندراجات میں انہیں اکثر ’بنجر زمین‘ کے طور پر درج کیا جاتا ہے، اور جنگلاتی منصوبوں کے ذریعہ انہیں ’بہتر کرنے‘ یا اقتصادی طور پر پیداوار کے قابل بنانے کی کوششیں ہوتی ہیں۔ لیکن رتن سنگھ جیسے مقامی چرواہے ہمیشہ سے جانتے ہیں کہ پروسوپِس جولی فلورا، جسے یہاں ’ولایتی کیکر‘ کہا جاتا ہے، چارہ کے طور پر کم مفید ہے، حالانکہ اب مویشی اس کی پھلیاں کھانے لگے ہیں، اور یہ درخت اس علاقہ میں ایندھن کی لکڑی کا بنیادی ذریعہ بن گیا ہے۔

’’اب پہاڑ میں پرانے دیسی درختوں کی جگہ ولایتی کیکر جیسی انواع نے لے لی ہے۔ جن دیسی درختوں اور جھاڑیوں پر پہلے جانور منحصر تھے، وہ زیادہ تر چارے کے کام آتے تھے،‘‘ رتن سنگھ اُداسی سے کہتے ہیں۔

پروسوپِس جولی فلورا کو ۱۹۹۰ کی دہائی میں اراولی خطہ کی تقریباً ۳۸ ہزار ۵۰۰ ہیکٹیئر عوامی زمین پر لگایا گیا تھا۔ یہ شجر کاری یوروپی یونین کی اُس عطیہ جاتی رقم سے کی گئی تھی، جس کا مقصد عالمی سطح پر ایندھن کے بحران سے نمٹنا بتایا گیا تھا۔

رتن سنگھ کا تعلق ہرسانا (گوجر) برادری سے ہے۔ یہ ایک ایسی مویشی پرور برادری ہے، جو اونٹ، گائے، بکری، بھینس اور بھیڑ پالتی ہے۔ صدیوں سے یہ لوگ اپنے معاش کے لیے ان جنگلوں پر منحصر رہے ہیں اور ان کے تحفظ میں اہم کردار نبھاتے ہیں۔ برادری کے ذریعہ اپنے دیوتا گُدڑیا بابا کی یاد میں محفوظ کردہ مقدس باغ ’مانگر بنی‘ تحفظ کی ایک اہم مثال ہے۔

مانگر بنی، قومی راجدھانی خطہ دہلی کی سرحد پر واقع آخری بچا ہوا قدرتی جنگل ہے۔ اراولی کے دیگر حصوں میں جنگلاتی اور غیر جنگلاتی سرگرمیوں کے سبب جہاں دیسی انواع معدومیت کے دہانے پر ہیں، وہیں یہاں وہ آج بھی پھل پھول رہی ہیں۔ دَھو (ٹرمنیلیا پینڈولا) اراولی خطہ کی درختوں کی ایک اہم قسم ہے، جو کبھی پتھریلی ڈھلانوں پر عام طور پر پائی جاتی تھی، آج چرائی کے زبردست دباؤ میں ہے۔ قومی راجدھانی کے آس پاس مانگر بنی ہی واحد ایسا خطہ ہے، جہاں سینکڑوں برسوں پرانے ہزاروں دَھو کے درخت آج بھی بہت اچھی حالت میں موجود ہیں۔ اس کی ایک بڑی وجہ مقامی گوجر برادری کا سَنت گدڑیا بابا کے تئیں عقیدہ ہے، جن کے بارے میں مانا جاتا ہے کہ انہوں نے اسی جنگل میں عبادت و ریاضت کی تھی اور آخرکار جنگل میں ضم ہو کر اس کے پیڑ پودوں میں سکونت پذیر ہو گئے۔

رتن سنگھ بتاتے ہیں کہ مقامی لوگوں کی کوششوں کی بدولت ہی یہ علاقہ آج بھی پرندوں کی ۲۴۵ انواع کا مسکن ہے، جن میں بحران زدہ مصری گدھ اور لال سر والا گدھ شامل ہیں، ساتھ ہی دودھ راج (فلائی کیچر) اور نورنگ (انڈین پِٹّا) پرندہ جیسی مہاجر انواع بھی ہیں، جو یہاں افزائش کا کام انجام دیتی ہیں۔ ان جنگلات میں کم ازکم ۲۰ پستانیے (ممالیے) بھی پائے جاتے ہیں، جن میں تیندوا، دھاری دار لکڑ بگھا، جنگلی بلی، جنگلی گیدڑ، ہندوستانی سنہرا گیدڑ، چھوٹا ہندوستانی سیویٹ (گندھ بلاؤ)، ایشیائی پام سیویٹ اور ہندوستانی سرمئی نیولا شامل ہیں۔

رتن سنگھ کا دن سورج طلوع ہونے سے پہلے ہی شروع ہو جاتا ہے۔ صبح پانچ بجے وہ اپنی دیسی بکریوں کے ریوڑ کے چھوٹے بچوں کے لیے سبز ٹہنیاں کاٹتے ہیں۔ یہ میمنے اتنے چھوٹے ہوتے ہیں کہ چرائی پر نہیں جا سکتے۔ یہ ریواڑہ (بکریوں کے لیے گھیرا ہوا باڑہ) میں ہی رہیں گے۔

اس کے بعد وہ انتہائی مہارت سے ننھی بکریوں کا دودھ نکالتے ہیں اور گرم، مقوی دودھ کو ایک اسٹیل کی بالٹی میں جمع کرتے ہیں۔ سب سے چھوٹے میمنے ممیاتے ہوئے پاس اکٹھا ہو جاتے ہیں، اور رتن سنگھ اس بات پر نظر رکھتے ہیں کہ انہیں اپنی ماں کے تھنوں سے پیار سے دودھ پلایا جائے۔

اب اس چرواہے کے پاس ریوالی (چرائی) پر نکلنے سے پہلے مشکل سے ایک گھنٹہ بچتا ہے۔ وہ جلدی سے نہا دھو کر گیہوں کی روٹیوں پر مبنی پیٹ بھر کھانا کھاتے ہیں، جو لہسن اور لال مرچ کی چٹنی کے ساتھ پیش کی جاتی ہیں، اور اوپر سے ایک بڑا گلاس چھاچھ پیتے ہیں۔ پھر دن بھر کے لیے ضروری سامان – ایک صافی (سوتی کپڑا)، ایک لاٹھی اور پانی کی بوتل لیتے ہیں، اور لمبے دن کے لیے نکل پڑتے ہیں۔

چرائی کے راستے کی شروعات مانگر گاؤں کے باہری حصہ سے ہوتی ہے۔ یہاں سے ریوڑ گویا چرواہے کی رہنمائی کرتا ہے۔ راستے اور روزمرہ کے معمول سے بکریوں کی شناسائی صاف دکھائی دیتی ہے۔ جانور آگے آگے اچھلتے کودتے چلتے ہیں، لیکن رتن سنگھ پوری طرح محتاط رہتے ہیں۔ مانگر بنی کا آس پاس کا علاقہ ہریانہ اراولی کا گھنا جنگلاتی علاقہ ہے، جہاں تیندوے سمیت بڑی تعداد میں دوسرے جنگلی جانور رہتے ہیں۔

’’پہلے زمانے میں بہت سے لوگ مویشی پالتے تھے، اس لیے نقصان تقسیم ہو جاتا تھا،‘‘ رتن سنگھ کہتے ہیں۔ ’’آج جو تھوڑے بہت مویشی پرور بچے ہیں، انہیں اس نقصان کا کہیں زیادہ بوجھ اکیلے اٹھانا پڑتا ہے۔‘‘

سورج سر پر چڑھنے کے ساتھ، رتن سنگھ ایک چٹان پر بیٹھ جاتے ہیں اور ایک بیڑی جلاتے ہوئے اپنے مویشیوں پر نظر رکھتے ہیں۔ تبھی اچانک خوشی کا ماحول بن جاتا ہے۔ ریوڑ کی ایک بکری بچے کو جنم دیتی ہے اور کچھ ہی منٹوں میں دوسرا میمنہ بھی پیدا ہو جاتا ہے۔ ماں بکری دوپہر کا بقیہ وقت اپنے بچوں کو چاٹنے اور انہیں دودھ پلانے میں گزارتی ہے۔ جلد ہی، نئی ماں اور اس کے بچے آپس میں آوازوں کے ذریعہ باہم گفتگو کرنے لگتے ہیں۔

یہ غیر معمولی واقعہ ایک چنوتی کھڑی کر دیتا ہے، کیوں کہ نوزائیدہ میمنے کم از کم چھ سات گھنٹے تک اپنے پیروں پر چل نہیں سکتے۔ سورج ڈھلنے لگتا ہے اور گھر لوٹنے کا وقت ہو جاتا ہے۔ رتن سنگھ خاص آوازیں نکال کر ریوڑ کو بلاتے ہیں۔ وہ دونوں ہاتھوں میں نوزائیدہ کو اٹھائے رہتے ہیں اور اب ریوڑ کے درمیان میں نہیں، بلکہ کنارے کنارے چلتے ہیں۔

واپسی کے راستے میں رتن سنگھ گرے ہوئے خشک پتوں کے ڈھیر میں پوری طرح چھپا ایک اجگر (اژدہا) دیکھتے ہیں، ’’دیکھو، کیسے انتظار کر رہا ہے! اگر میں نے اسے نہیں دیکھا ہوتا اور اپنی بکریوں سے تھوڑا آگے یا پیچھے چلا گیا ہوتا تو وہ کسی بکری کو دبوچ لیتا،‘‘ وہ کہتے ہیں۔ وہ بتاتے ہیں کہ انہیں حملے کا علم بہت بعد میں ہوتا، کیوں کہ اجگر جانوروں کو گردن سے اس طرح پکڑتے ہیں کہ کوئی آواز نہیں نکلتی۔

یہ اُن متعدد خطروں میں سے ایک ہے، جن کا سامنا چرواہوں کو جنگل میں مویشی چراتے وقت کرنا پڑتا ہے۔ رتن سنگھ تیندوؤں کے حملوں کی کہانیاں بھی سناتے ہیں۔ وہ بتاتے ہیں کہ کیسے شکاری جانور بغیر آواز کیے شکار کا دم گھونٹ دیتا ہے اور پھر اسے درخت پر لے جا کر وہیں کھاتا ہے۔ ’’مویشیوں کو محفوظ رکھنے کا ایک ہی طریقہ ہے کہ ہمیشہ ان کے ساتھ رہو،‘‘ وہ کہتے ہیں۔ ’’اور یہ بھی ہمیشہ اچھے انجام کی ضمانت نہیں دیتا۔‘‘

ہریانہ کے اراولی میں وہ کنبے، جو پوری طرح مویشی پروری پر منحصر ہو کر زندگی بسر کرتے ہیں، اب کم ہوتے جا رہے ہیں۔ یہ بات رتن سنگھ بھی مانتے ہیں۔ بڑھتی شہر کاری اور روایتی معاش سے ہونے والا کم مالی فائدہ اس کی بڑی وجہیں ہیں۔

اس علاقہ میں ماضی میں معاش کا بنیادی ذریعہ مویشی پروری ہی تھا، چیتن اگروال کہتے ہیں۔ وہ سنٹر فار ایکولوجی ڈیولپمنٹ اینڈ ریسرچ (سیڈر) میں سینئر فیلو ہیں اور گزشتہ ایک دہائی سے زیادہ عرصے سے یہاں تحقیق کر رہے ہیں۔ ’’گائے اور بکری پالنے والے چرواہوں نے مانگر میں اراولی کی پہاڑی جنگلاتی زمین کے باشعور انتظام کے لیے ضابطے بنائے تھے، جیسے ایندھن کی لکڑی اور چارے کا ذخیرہ صرف پتلی تیسرے درجے کی شاخوں تک محدود رکھنا تھا، تاکہ طویل عرصے تک چارے دستیاب رہیں۔ باہری لوگوں کے ذریعہ چرائی اور کٹائی پر بھی پابندی تھی۔‘‘

یہ زمین چراگاہ، ادویاتی نباتات اور قدرتی پناہ گاہ مہیا کرتے ہیں، جس سے موسم در موسم ریوڑوں کی پرورش ہوتی ہے۔ بدلے میں چرواہے اور ان کے مویشی حیاتیاتی نظام کے توازن کو برقرار رکھنے میں مدد کرتے ہیں۔ چرائی حد سے زیادہ جھاڑیوں کو بڑھنے سے روکتی ہے۔ نئی نباتات میں اضافہ کرتی ہے، بیجوں کے پھیلنے میں مدد کرتی ہے اور جنگل کی افزائش کو یقینی بناتی ہے۔

’’عوامی زمینوں کی نجکاری اور کان کنی اور ریئل اسٹیٹ کے کاروبار کی آمد کے ساتھ یہ نظام درہم برہم ہو گیا،‘‘ اگروال کہتے ہیں۔

رتن سنگھ کے واپس ریواڑ لوٹنے تک سورج اراولی کی پہاڑیوں کے پیچھے تقریباً ڈوب چکا ہوتا ہے۔ تھکی ہوئی بکریاں خاموشی کے ساتھ پیچھے پیچھے چلتی ہیں، بس ان کی گردنوں میں بندھی گھنٹیوں کی ہلکی سی ٹنٹناہٹ سنائی دیتی ہے۔

گھر پہنچ کر وہ بکریوں کی گنتی کرتے ہیں، ان کے زخموں کی جانچ کرتے ہیں اور اس بات کی بھی تسلی کرتے ہیں کہ سب سے چھوٹے میمنوں کو دودھ ملا یا نہیں۔ مویشیوں کی حفاظت سے متعلق پوری تسلی ہو جانے کے بعد وہ رات کے کھانے میں سادہ کھانا کھاتے ہیں، جن میں پھر سے چپاتیاں (روٹیاں)، سرسوں کی ساگ اور بکری کا ایک گلاس گرم دودھ ہوتا ہے۔

کل وہ پھر پہاڑوں کی جانب لوٹیں گے – انھیں راستوں پر، اسی آواز کے ساتھ، انھیں اشاروں کو پڑھتے ہوئے۔ جنگل بدل گیا ہے، کام مشکل ہو گیا ہے اور اسے اپنانے والے لوگ کم ہوتے جا رہے ہیں۔ لیکن فی الحال چرواہا اور جنگل اب بھی ایک دوسرے کو پہچانتے ہیں۔

ترجمہ نگار: قمر صدیقی