മായി മാസം അവസാനിക്കുന്നതോടെ, ഷിംഗ ഉത്സവം വന്നെത്താൻ ഞങ്ങൾ ആകാംക്ഷയോടെ കാത്തിരിക്കും. ചൈത്, വൈശാഖ്, ജേട്ട്, ആഖാർ, ശ്രാവൺ, ബാദ്വാ, അശ്വിൻ, കാർത്തിക്, മക്ഷീർ, പൂസ്, മായി, ഫാൽഗുൻ എന്നിങ്ങനെയാണ് വർളി ഭാഷയിൽ പന്ത്രണ്ട് കലണ്ടർ മാസങ്ങൾക്ക് പേര് നൽകിയിരിക്കുന്നത്.
ഷിംഗ ഉത്സവദിനത്തിന്റെ ഒന്നോ രണ്ടോ ആഴ്ച്ച മുൻപ്, കാട്ടിൽനിന്ന് വിറക് ശേഖരിച്ച്, ഹോളി എന്ന് പേരായ ചെറിയ ആഴികൾ ഉണ്ടാക്കി, കത്തിക്കുന്ന ഒരു ചടങ്ങുണ്ട്. അന്നേദിവസം രാത്രി മുഴുവൻ ഞങ്ങൾ ആട്യ പാട്യ പോലുള്ള പരമ്പരാഗത കളികളിൽ മുഴുകുകയാണ് പതിവ്. ഫാൽഗുന മാസത്തിലെ പതിനഞ്ചാമത്തെ ദിനമായ പൗർണ്ണമി രാത്രിയിൽ ഞങ്ങൾ വിറകും ചുള്ളികളുമെല്ലാം ഉപയോഗിച്ച് വലിയ ഒരു ആഴി തീർക്കും. സമുദായത്തിലെ പുരുഷന്മാർ മാത്രമേ ഈ അനുഷ്ഠാനത്തിൽ പങ്കെടുക്കുകയുള്ളൂ. ഈ ചടങ്ങിനുവേണ്ടി കാട്ടിൽനിന്ന് ഇലയോട് കൂടിയ ഒരു വലിയ മുള കൊണ്ടുവരും. അതിൽ പൂക്കൾ, ഗാട്ടി എന്നറിയപ്പെടുന്ന പഞ്ചസാരത്തുണ്ടുകൾ, അരി ബിസ്ക്കറ്റുകൾ എന്നിവകൊണ്ട് തീർത്ത ഒരു മാല ചാർത്തി, അതിന്റെ തുമ്പത്തായി ഒരു കരിങ്കോഴിക്കുഞ്ഞിനെ കെട്ടിയിട്ടിരിക്കും. ഈ മുള പിന്നീട് നെടുകെ സ്ഥാപിച്ച് അതിനുചുറ്റും സമീപത്തെ വനങ്ങളിൽനിന്ന് ശേഖരിച്ച വിറകെല്ലാം അടുക്കും. ഈ ഘടനയെയാണ് ഹോളി എന്ന് വിളിക്കുന്നത്. ജനങ്ങൾ നാളികേരമുടച്ചാണ് ഹോളിയെ ആരാധിക്കുക. ഇതിനു പിന്നാലെ, പുഡാർഖി എന്നറിയപ്പെടുന്ന, ഗ്രാമത്തിലെ മുതിർന്ന അംഗം, ഗ്രാമത്തിലുടനീളം വിളംബരം (ദാവണ്ഡി) നടത്തിയതിനുശേഷം ഹോളിയ്ക്ക് തീ പകരുന്നു.
പണ്ടുകാലത്ത്, ഗ്രാമത്തിലും സമീപപ്രദേശങ്ങളിലും താമസിക്കുന്ന ജനങ്ങൾ എല്ലാവരും ചേർന്ന് ഒരു ഹോളി ദഹിപ്പിച്ച് ഒരുമിച്ച് ആഘോഷിക്കുകയായിരുന്നു പതിവ്. ഷിംഗയ്ക്ക് മുൻപ് വിവാഹിതരായവർ, കത്തിയെരിയുന്ന ഹോളിയ്ക്ക് ചുറ്റും അഞ്ച് വലംവെച്ച് പ്രാർത്ഥിക്കും. യഥാർത്ഥ ആഘോഷപരിപാടികൾ രാത്രി തുടങ്ങുന്നതോടെ അന്തരീക്ഷം ആവേശഭരിതമാകും. എല്ലാ പ്രായത്തിലുമുള്ള സ്ത്രീപുരുഷന്മാർ തമാശകൾ പറഞ്ഞും കുസൃതികൾ കാണിച്ചും രാത്രി ചിലവിടും. ഏറെ സന്തോഷകരമായ ഷിംഗ ഉത്സവദിനം ഞങ്ങൾ ഇങ്ങനെയാണ് ആഘോഷിക്കുന്നത്. ചെറിയ കുട്ടികൾ പലതരം വേഷങ്ങളണിഞ്ഞ് വീടുകൾ കയറിയിറങ്ങി ആളുകളെ രസിപ്പിക്കും. ഇതിന് പ്രതിഫലമായി സമ്മാനങ്ങളോ പണമോ കുട്ടികൾക്ക് കൊടുക്കുകയും വേണം. എല്ലാവരിലും സന്തോഷവും ഉത്സാഹവും പടർത്തിക്കൊണ്ടാണ് ഷിംഗ ആഘോഷം കടന്നുപോകുന്നത്.
