’ہم غصے میں ہیں، اس لیے یہاں آئے ہیں‘

’’آپ کو معلوم ہے کہ ہم نے ماسک کے پیچھے اپنے چہرے کیوں چھپا رکھے ہیں؟ دراصل، ہم اس کے پیچھے اپنا درد چھپا رہے ہیں،‘‘ شیامل مَنّا کہتے ہیں، جن کا تعلق شمالی ۲۴ پرگنہ میں دتّہ پُکور کے قریب واقع ایک گاؤں سے ہے۔ ’’ہم غصے میں ہیں، اس لیے یہاں آئے ہیں۔‘‘

کاکروچ جنتا پارٹی (سی جے پی) کی اپیل پر دہلی میں چل رہے احتجاج نے اب پورے ملک میں ایک تحریک کی صورت اختیار کر لی ہے۔ کولکاتا کے احتجاج میں میم اور پوسٹرز کے علاوہ، بہت سے نوجوان آئرن مین، سپرمین اور فلموں کے برے کرداروں کا ماسک پہن کر آئے تھے۔

کولکاتا میں ۲۴ جولائی کو یہ ریلی دوپہر میں ۲:۴۵ بجے سیالدہ اسٹیشن سے شروع ہوئی اور ایسپلنیڈ تک نکالی گئی۔ مقامی اخباروں کے مطابق، اس ریلی میں دسیوں ہزار افراد اکٹھا ہوئے تھے۔ شام کو تقریباً ۶ بجے مظاہرین اور کولکاتا پولیس کے درمیان تھوڑی سی جھڑپ بھی ہوئی، جسے پانی کی بوچھار سے روکا گیا۔

کولکاتا کے اس احتجاج میں شامل بہت سی خواتین میں سے ایک شبینہ خاتون بھی ہیں۔ وہ ۱۰۰ کلومیٹر سے زیادہ کا سفر کر کے یہاں پہنچی ہیں۔ ’’میں اپنی بڑی بہن کے لیے آئی ہوں۔ وہ ہماری پہلی امید تھی۔ این ای ای ٹی (نیٹ) ردّ ہونے کے بعد وہ پوری طرح ٹوٹ گئی تھی،‘‘ ۲۴ سالہ شبینہ کہتی ہیں۔

’’وہ امتحان میں دوبارہ بیٹھی، لیکن اسے اچھا نمبر نہیں ملا۔ ہمیں نہیں معلوم کہ اب آگے کیا کرنا ہے،‘‘ مغربی بنگال کے بنگاؤں قصبہ سے تعلق رکھنے والی یہ نوجوان لڑکی کہتی ہے۔ ’’وہ بیمار ہے اس لیے اس کی جگہ میں یہاں آئی ہوں، لیکن یہ میرا بھی مستقبل ہے۔‘‘

اس رپورٹر نے ایسے کئی نوجوانوں سے بات کی جو دیہی علاقوں سے آئے تھے۔ سورَو داس، پیالی نام کے گاؤں میں رہتے ہیں، وہ اور ان کا دوست متعدد میم والے پوسٹر اٹھائے ہوئے ہیں۔ ’’میرے [دیہی] علاقہ میں میم کافی مقبول ہیں۔ غصہ یا محبت کے اظہار کا یہ ایک آسان طریقہ ہے۔ اس لیے، ہم کئی قسم کے میم بنا کر لائے ہیں۔‘‘

اور، ۱۹ سال کی روحی نے پاری سے کہا، ’’دہلی پولیس نے طلباء کے ساتھ جس طرح کا برتاؤ کیا، اسے دیکھ کر بہت برا لگا تھا۔ میں شاید ڈاکٹر نہ بنوں، لیکن طلباء کو سپورٹ کرتی رہوں گی۔ اسی لیے اپنے دوستوں کے ساتھ یہاں آئی ہوں۔‘‘

رشبھ بھومک ۲۱ سال کے ہیں اور پیپر لیک کی وجہ سے نیٹ کا ایک موقع کھو چکے ہیں، یہ امتحان دوبارہ دینے کے لیے انہیں اگلے سال کا انتظار کرنا پڑے گا۔ ’’میرے بڑے بھائی پرائمری اسکول کے ٹیچر تھے، لیکن پچھلی سرکار میں ہوئے ٹیچنگ گھوٹالے کی وجہ سے ان کی نوکری چلی گئی۔ اب میرے ہاتھ سے بھی ایک موقع نکل گیا ہے، مجھے یہ امتحان اگلے سال دوبارہ دینا پڑے گا۔‘‘

اپنے دوست کے ساتھ چلتے ہوئے وہ کہتے ہیں: ’’ریاستی اور ہندوستانی حکومت، دونوں نے میری فیملی کے خواب کو توڑنے کا کام کیا ہے۔‘‘