‘असीं हिते आहियूं, छो त असां काविड़ियल आहियूं'

उत्तर 24 परगना ज़िले जे दत्तापुकुर जे वेझे हिकु ॻोठ जो श्यामल मन्नो चवे थो, “छा तव्हांखे ख़बर आहे त असां पंहिंजा मुंहं मास्क सां छो लिकायूं पिया? उन्हनि जे पोयां असीं पंहिंजा सूर लिकाए रहिया आहियूं। असीं हिते आहियूं, छो त असां काविड़ियल आहियूं।

दिल्ली में आंदोलन जी शुरूआति कॉकरोच जनता पार्टी जे सॾु ते थी हुई, जंहिं जी सजे॒ देश में पखेड़ु थी रही आहे। कोलकाता जे इन मुज़ाहिरे में आमु पोस्टरनि ऐं मीम्स सां गॾु झझे तइदाद में नौजवाननि आयरनमैन, सुपरमैन ऐं बुराईअ जो ख़ात्मो कंदड़ फ़िल्मी किरदारनि जा मास्क पहिरियल हुआ।

हिन 24 जुलाई जो लोकनि जो मुज़ाहिरो पोणे टे लगे॒ सियालदह टेशन खां शुरू थियो ऐं इन जी पुॼाणी एस्प्लेनेड ते थी। मक़ामी अख़बारुनि आहिरि इन में हज़ारें माण्हू शामिल हुआ। संझां महिल छह लगे॒ विरोधु कंदड़नि ऐं कोलकाता पुलीस जे विच में मामूली झेड़ो थियो, जंहिं जो अंतु पुलीस पारां पाणीअ जे बौछाड़ सां थियो।

प्रदर्शन में शामिलु थींदड़ केतिरियुनि ई ज़ालुनि मां हिकु सबीना ख़ातून हुई। हू 100 किलोमीटर खां वधीक जो सफ़रु करे हिते पहुती हुई। अटिकल 24 वरिह्यनि जी सबीना ॿुधायो, “मां पंहिंजी अदी जे लाइ हिते आई आहियां। हूअ असांजे परीवार जी पहिरीं उमेद हुई। जड॒हिं नीट जो इम्तिहादु रदि थियो, तड॒हिं हूअ अंदरां बिल्कुलु टुटी वेई।”

हूअ अॻिते चवे थी, “हुन ॿीहरु इम्तिहानु डि॒नो, पर हेलिको सुठियूं मार्कूं न आयूं। मूंखे समुझ में ई न अची रहियो हो त अगि॒ते छा थींदो। मां हुन जी तर्फ़ां आई आहियां, छाकाणि हू नाचाकु लॻी पेई आहे मगरि इन जो वास्तो महज़ि हुन जे न, पर मुंहिंजे आईंदह सां बि आहे।”

हिन रिपोर्टर ॻोठाणे इलाइक़नि मां आयल केतिरनि ई नौजवाननि सां ॻाल्हि कई। पियाली ॻोठ जे सौरव दास ऐं संदसि दोस्तनि जे हथनि में मीम्स वारा केतिरा ई पोस्टर हुआ। हू चवे थो, “असां जे ॻोठ में मीम्स तमामु पसंदि पवनि था। कावड़ या मुहिबत जे इज़हार जो इहो सभ खां सवलो तरीक़ो हूंदो आहे। इन करे असां मीम्स वारा एतिरा वधीक पोस्टर आंदा आहिनि।”

लॻभॻि 19 सालनि जी रूहीअ पारी खे चयो, “दहिलीअ में पुलीस शागिर्दनि सां जहिड़ी कारि कई, उन खे ॾिसी दिलि मांदी थी आहे। थी सघे थो त मां डॉक्टरियाणी न थी सघां, पर मां शागिर्दनि सां गॾु आहियां, इनकरे मां पंहिंजे दोस्तनि सां गॾु आई आहियां।”

अटिकल 21 सालनि जो ऋषभ भौमिक पेपर लीक थियण जे करे हिन सालु नीट में मौक़ो विञाए वेठो आहे। हाणे हुन खे ईंदड़ साल वरी इम्तिहानु डि॒यणो पवंदो। हू चवे थो, “मुंहिंजे वडे॒ भाउ खे अॻूणी सरकार जे दौरानि उस्तादनि जी मुक़ररी में घोटाले जे करे इब्तिदाई उस्ताद जी नौकरी हासुल न थी। हाणे मुंहिंजो वारो अची वियो। मुंहिंजो बि हिकु सालु बर्बाद थी वियो ऐं हाणे मूंखे वरी इम्तिहानु डि॒यणो पवंदो।”

दोस्तनि सां गॾु मार्च कंदे ऋषभ चवे थो, “सूबाई सरकार ऐं भारत सरकार बि॒न्ही मिली मुंहिंजे परीवार जा ख़्वाब भञी पूरा कया आहिनि।”