‘ഞങ്ങൾക്ക് ദേഷ്യം വരുന്നു, അതുകൊണ്ടാണ് ഇവിടെ വന്നത്’

“ഞങ്ങൾ മുഖംമൂടി ധരിച്ചിരിക്കുന്നത് എന്തിനാണെന്ന് അറിയാമോ? ഞങ്ങളുടെ വേദന മറച്ചുപിടിക്കാനാണ്, നോർത്ത് 24 പർഗാനയിലെ ദത്താപുകുറിനടുത്തുള്ള ഒരു ഗ്രാമത്തിൽനിന്നുള്ള ശ്യാമൾ മന്ന അറയുന്നു. “ഞങ്ങൾക്ക് ദേഷ്യം വരുന്നു, അതുകൊണ്ടാണ് ഇവിടെ വന്നത്.”

കൊക്രോച്ച് ജനതാ പാർട്ടി (സി.ജെ.പി.) ആഹ്വാനം ചെയ്തതോടെ ദില്ലിയിൽ അരങ്ങേറിയ സംഭവങ്ങൾക്ക് രാജ്യമൊട്ടാകെ അനുരണനമുണ്ടായി. കൊൽക്കൊത്തയിൽ നടന്ന പ്രതിഷേധത്തിൽ, പതിവുള്ള പോസ്റ്ററുകൾക്കും മീമുകൾക്കുമൊപ്പം, ധാരാളംപേർ അയേൺമാനിൻ്റേയും സൂപ്പർമാനിൻ്റേയും ദുഷ്ടനിഗ്രഹകരായ മറ്റ് കഥാപാത്രങ്ങളുടേയും മുഖംമൂടി ധരിച്ച് വന്നിരുന്നു.

ജൂലായ് 24-ന് ഉച്ചയ്ക്ക് 2.45-നാണ് റാലി ആരംഭിച്ചത്. സിയാൾഡ സ്റ്റേഷനിൽനിന്ന് എസ്പ്ലനേഡുവരെ. പതിനായിരങ്ങൾ പങ്കെടുത്തതായി പ്രാദേശിക പത്രങ്ങൾ റിപ്പോർട്ട് ചെയ്തു. 6 മണിയോടെ, പ്രതിഷേധക്കാരും കൊൽക്കൊത്ത പൊലീസും തമ്മിൽ നേരിയ സംഘർഷമുണ്ടായി. പൊലീസ് കണ്ണീർവാതകം പ്രയോഗിച്ചു.

പ്രതിഷേധത്തിൽ പങ്കെടുത്ത നിരവധി സ്ത്രീകളിൽ ഒരാളാണ് സബിന ഖത്തൂൻ. 100 കിലോമീറ്റർ സഞ്ചരിച്ചാണ് അവരെത്തിയത്. “എൻ്റെ മൂത്ത സഹോദരിക്കുവേണ്ടിയാണ് ഞാനെത്തിയത്. അവളായിരുന്നു ഞങ്ങളുടെ ആദ്യത്തെ പ്രതീക്ഷ. നീറ്റ് റദ്ദാക്കിയതോടെ അവളാകെ തകർന്നു,” 24 വയസ്സുള്ള സബീന പറയുന്നു.

“അവൾ വീണ്ടും പരീക്ഷയ്ക്ക് ഇരുന്നുവെങ്കിലും, സ്കോർ അത്രയ്ക്ക് നന്നായില്ല. ഇനി എന്ത് ചെയ്യുമെന്ന് ഞങ്ങൾക്കറിയില്ല,” പശ്ചിമ ബംഗാളീലെ ബംഗാംവ് പട്ടണത്തിൽനിന്നുള്ള ആ ചെറുപ്പക്കാരി പറയുന്നു.

ഗ്രാമപ്രദേശങ്ങളിൽനിന്ന് വന്ന ധാരാളം ചെറുപ്പക്കാരോട് ഈ റിപ്പോർട്ടർ സംസാരിക്കുകയുണ്ടായി. പിയാലി എന്ന ഗ്രാമത്തിൽനിന്നാണ് സൗരവ് ദാസ് വരുന്നത്. അവനും കൂട്ടുകാരും വിവിധ മീമുകളുള്ള പോസ്റ്ററുകളുയർത്തിപ്പിടിച്ചു. “ഞങ്ങളുടെ നാട്ടിൽ മീമുകൾക്ക് നല്ല പ്രചാരമാണ്. ദേഷ്യവും സ്നേഹവും പ്രകടിപ്പിക്കാനുള്ള എളുപ്പവഴിയാണത്. അതുകൊണ്ടാണ് ഇത്രയധികം ഞങ്ങൾ കൊണ്ടുവന്നത്.”

19 വയസ്സുള്ള റൂഹി പാരിയോട് പറയുന്നു: “ദില്ലി പൊലീസ് കുട്ടികളെ കൈകാര്യം ചെയ്ത വിധം കഷ്ടമായിരുന്നു. ഞാൻ ഒരു ഡോക്ടറാവില്ലായിരിക്കാം. എന്നാലും ഞാൻ വിദ്യാർത്ഥികളെ പിന്തുണയ്ക്കും. അതിനാണ് ഞാൻ കൂട്ടുകാരൊത്ത് വന്നത്.”

21 വയസ്സുള്ള റിഷഭ് ഭൗമിക്കിന് നീറ്റ് ചോദ്യപ്പേപ്പർ ചോർച്ച കാരണം ഒരവസരം നഷ്ടമായി. ഇനി അടുത്ത വർഷംവരെ കാത്തിരിക്കണം, വീണ്ടും എഴുതാൻ. “മുൻ സർക്കാർ വരുത്തിവെച്ച അദ്ധ്യാപക അഴിമതിയിൽ എൻ്റെ മൂത്ത സഹോദരന് പ്രൈമറി ടീച്ചർ ജോലി നഷ്ടപ്പെട്ടു. ഇപ്പോൾ എനിക്കും അവസരം നഷ്ടമായി. ഇനി അടുത്ത വർഷം വീണ്ടും എഴുതണം.”

“രാജ്യവും സർക്കാരും ചേർന്ന് എൻ്റെ കുടുംബത്തിൻ്റെ സ്വപ്നം തകർത്തു,” കൂട്ടുകാരൊത്ത് നടന്നുകൊണ്ട് അവൻ പറയുന്നു.