‘અમે રોષે ભરાયા છીએ, માટે અહીં છીએ’

ઉત્તર 24 પરગણા જિલ્લાના દત્તાપુકુર પાસેના એક ગામના શ્યામલ મન્ના કહે છે, “તમને ખબર છે અમે મહોરાં પાછળ અમારા ચહેરા કેમ છુપાવીએ છીએ? આ મહોરાં પાછળ અમે અમારી વેદના છુપાવી રહ્યા છીએ. અમે રોષે ભરાયા છીએ, માટે અહીં છીએ.”

કોકરોચ જનતા પાર્ટી (CJP)ના એલાનથી દિલ્હીમાં જે ઘટનાઓ શરૂ થઈ, તેણે હવે આખા દેશમાં જોર પકડ્યું છે. કોલકાતાના વિરોધ પ્રદર્શનમાં, સામાન્ય મીમ્સ અને પોસ્ટરોની સાથે સાથે, ઘણા યુવાનોએ આયર્નમેન, સુપરમેન, અને ફિલ્મોમાં દુષ્ટોનો નાશ કરતા બીજા ઘણા પાત્રોનાં મહોરાં પહેર્યાં હતાં.

24 જુલાઈના રોજ કોલકાતામાં યોજાયેલી આ રેલી બપોરે લગભગ પોણા ત્રણ વાગ્યે શિયાલદહ સ્ટેશનથી શરૂ થઈ અને તેનું ગંતવ્ય સ્થાન એસ્પ્લેનેડ હતું. સ્થાનિક અખબારોના અહેવાલ મુજબ દસેક હજારથી વધુ સંખ્યામાં લોકો એકઠા થયા હતા. સાંજે લગભગ 6 વાગ્યાની આસપાસ, પ્રદર્શનકારીઓ અને કોલકાતા પોલીસ વચ્ચે સામાન્ય બોલાચાલી થઈ, જેનો અંત પાણીની તોપોના મારા સાથે થયો.

સબીના ખાતૂન પણ કોલકાતાના આ વિરોધ પ્રદર્શનમાં સામેલ છે, તેઓ અહીં આવેલી ઘણી સ્ત્રીઓઓમાંનાં એક છે. આ રેલીમાં એકજૂટતા બતાવવા માટે તેઓ 100 કિલોમીટરથી પણ વધુની મુસાફરી કરીને આવ્યાં છે. 24 વર્ષીય સબીના કહે છે, “હું મારી મોટી બહેન માટે આવી છું. તે અમારા ઘરની પહેલી આશા હતી. જ્યારે NEETની પરીક્ષા રદ થઈ, ત્યારે તે સાવ ભાંગી પડી હતી.”

પશ્ચિમ બંગાળના બનગાંવ શહેરનાં આ યુવતી આગળ કહે છે, “તેણે ફરીથી પરીક્ષા આપી, પણ ધાર્યા મુજબ પરિણામ ન આવ્યું. હવે આગળ શું થશે એની અમને કોઈ ખબર નથી. તેની તબિયત સારી નથી એટલે હું તેના વતી અહીં આવી છું, પણ આ મારા ભવિષ્યનો પણ સવાલ છે.”

આ પત્રકારે ગ્રામીણ વિસ્તારોમાંથી આવેલા ઘણા યુવાનો સાથે વાત કરી હતી. સૌરવ દાસ પિયાલી નામના એક ગામમાં રહે છે. તેઓ અને તેમના મિત્રો જાતજાતનાં મીમ્સવાળાં પોસ્ટર લઈને ઊભા હતા. તેઓ કહે છે, “અમારા ગામડાના વિસ્તારમાં મીમ્સ ખૂબ જ લોકપ્રિય છે. ગુસ્સો હોય કે પ્રેમ, એને વ્યક્ત કરવાનો આ એક સરળ રસ્તો છે. એટલે અમે ઘણાં બધાં પોસ્ટર સાથે લાવ્યા છીએ.”

અને 19 વર્ષીય રૂહી પારીને કહે છે, “દિલ્હી પોલીસે વિદ્યાર્થીઓ સાથે જેવો વ્યવહાર કર્યો એ જોઈને ખૂબ જ દુઃખ થયું. ભલે હું ડૉક્ટર ન બનું, પણ હું આ વિદ્યાર્થીઓને મારો પૂરો ટેકો આપીશ. એટલે જ હું મારા મિત્રો સાથે અહીં આવી છું.”

રિષભ ભૌમિક 21 વર્ષના છે. પેપર ફૂટી જવાને કારણે તેઓ NEETની પરીક્ષા આપવાની તક ગુમાવી ચૂક્યા છે અને હવે તેમણે આવતા વર્ષે ફરીથી પરીક્ષા આપવા માટે રાહ જોવી પડશે. તેઓ કહે છે, “અગાઉની સરકારે કરેલા શિક્ષક ભરતી કૌભાંડને કારણે મારા મોટા ભાઈએ પ્રાથમિક શિક્ષકની નોકરી ગુમાવી હતી. અને હવે મેં મારી તક ગુમાવી છે અને આવતા વર્ષે મારે ફરીથી પરીક્ષા આપવી પડશે.”

પોતાના મિત્રો સાથે ચાલતાં ચાલતાં તેઓ કહે છે, “રાજ્ય સરકાર અને ભારત સરકાર, બંનેએ મારા પરિવારના સપનાને ચકનાચૂર કરી નાખ્યું છે.”

અનુવાદ સમીક્ષા: પ્રતિષ્ઠા પંડ્યા