‘रिस के मारे हमन इहां आय हवन’

उत्तर 24 परगना जिला के दत्तापुकुर के तीर के गाँव ले आय श्यामल मन्ना कहिथे, “काय तुमन ला पता हवय हमन अपन चेहरा मं मास्क काबर लगाय हवन? ओकर पाछू हमन अपन दुख-पीरा ला छिपावत हवन. हमन इहाँ एकर सेती आय हवन काबर के हमन गुस्साय हवन.”

दिल्ली मं आंदोलन के सुरुआत कॉकरोच जनता पार्टी के अपील के मं होइस, जेन अब जम्मो देस भर मं बगरत हवय. कोलकाता के ये प्रदर्सन मं पोस्टर अऊ मीम मन के संग भारी तादाद मं नवा पीढ़ी के लइका मन आयरनमैन, सुपरमैन अऊ बुराई ला खतम करेइय्या दूसर फ़िल्मी किरदार मन के मास्क लगाय रहिन.

ये 24 जुलाई के दिन ये रैली मंझनिया पौने तीन बजे सियालदह टेसन ले सुरू होइस अऊ एस्प्लेनेड मं जाके खतम होइस. इहाँ के कतको अखबार के मुताबिक ये मं हजारों लोगन मन जुरिन. संझा करीबन छै बजे प्रदर्सनकरेइय्या अऊ कोलकाता पुलिस के बीच हल्का झड़प होइस, जेकर बाद पुलिस ह पानी के बौछार करिस.

प्रदर्सन करेइय्या कतको माइलोगन मन ले के रहिस सबीना ख़ातून. वो ह 33 कोस (100 कमी) ले जियादा दूरिहा रद्दा तय करके इहाँ आय रहिस. करीबन 24 बछर के सबीना ह बताइस, “मंय अपन दीदी बर इहाँ आय हवंव. वो ह हमर परिवार के पहिली आस रहिस. जब नीट परीक्षा रद्द होइस, त वो ह पूरा टूट गे रहिस.”

वो ह बतावत जाथे, “वो ह दुबारा परीक्षा दिस, फेर ये दारी ओकर नंबर बने नइ आइस. हमन ला समझ नइ आवत रहिस के आगू काय होही. मंय इहाँ ओकर कोती ले इहाँ आय हवंय, काबर के ओकर तबीयत ठीक नइ ये. फेर ये ह सिरिफ ओकरेच नइ, मोर भविस्य ले घलो जुड़े हवय.”

ये रिपोर्टर ह गाँव-देहात ले आय नव पीढ़ी के कतको लइका ले बात करिस. पियाली गांव के सौरव दास ह अपन संगवारी मन के संग मीम्स वाले कतको पोस्टर धरे रहिस. वो ह कहिथे, “हमर इलाका मं मीम्स बनेच लोकप्रिय हवंय. गुस्सा होय धन मया, अपन बात राखे के ये ह सबले आसान तरीका आय. ते पायके हमन अतक सारा मीम्स लेके आय हवन.”

करीबन 19 बछर के रूही ह पारी ले कहिस, “दिल्ली पुलिस ह पढ़ेइय्या लइका मन संग जइसने सुलूक करिस, ओकर ले भारी दुख पहुंचे हवय. हो सकथे के मंय डॉक्टर झन बने सकों, फेर मंय नवा पीढ़ी के संग ठाढ़े हवंव. ते पायके मंय अपन संगी-सहेली मन के संग इहाँ आय हवंव.”

करीबन 21 बछर के ऋषभ भौमिक ह पेपर लीक सेती ये बछर नीट मं मौका गंवा दे हवय. अब वोला अवेइय्या बछर दुबारा परीक्षा दे ला परही. वो ह कहिथे, “ मोर भैया ह पाछू सरकर के बखत होय शिक्षक भर्ती घोटाला के सेती प्राथमिक शिक्षक के नउकरी गंवा दे रहिस. अब मोर पारी आ गे. मोर घलो एक बछर बर बाद हो गे अऊ मोला फिर ले परीक्षा देय ला परही.”

संगवारी मन के संग रैली मं उतरे ऋषभ कहिथे, “राज सरकार अऊ भारत सरकार दूनों मिलके मोर परिवार के सपन ला टोरे हवंय.”