‘हमनी के भीतरी गुस्सा बा, एसे एइजा आईल बानी जा’

“आपके मालूम बा हमनी के चेहरा मास्क के पीछे काहे छिपवले बानी जा? ओकरी पीछे हमनी के आपन दर्द छिपवले बानी जा,” उत्तर 24 परगना जिला के दत्तापुकुर के लगे के गांव से आईल श्यामल मन्ना कहेलन. “हमनी के एइजा एकरी खातिर बानी जा काहें कि हमनी में गुस्सा बा.”

कॉकरोच जनता पार्टी (सीजेपी) के आह्वान पर शुरू भई प्रदर्शन अब पूरा देश में गति पकड़ चुकल बा. कोलकाता के ए प्रदर्शन में आम मीम आ पोस्टरन के अलावा बड़ी संख्या में युवा लोग आयरनमैन, सुपरमैन आ बुराई के अंत करे वाला अन्य फ़िल्मी किरदारन के मास्क पहिनले रहें.

कोलकाता रैली 24 जुलाई के दुपहर लगभगर 2.45 बजे सियालदह स्टेशन से शुरू भईल आ एकर गंतव्य स्थल एस्प्लेनेड रहे. स्थानीय अखबारन के अनुसार, एमे दसियों हजार लोगन के भागीदारी रहे. सांझी के करीब 6 बजे प्रदर्शनकारी आ कोलकाता पुलिस के बीच भईल मामूली झड़प के बाद पानी के बौछार (वाटर कैनन) चलावल गईल.

सबीना खातून कोलकाता के ए प्रदर्शन में मौजूद कई गो महिला में से एक बाड़ी. उ एकजुटता के साथ मार्च में शामिल होखे खातिर 100 किलोमीटर से अधिक के दूरी तय कर के आईल बाड़ी. “हम अपनी बड़ बहिन खातिर आईल बानी. उ हमनी के पहिला उम्मीद रहे. नीट रद्द भईल त उ पूरा तरह से टूट गईल रहली,” 24 बरिस के सबीना कहेली.

“उ दोबारा परीक्षा दिहली बाकिर अंक उम्मीद के हिसाब से ना आईल. हम हमनी के पता नईखे आगे का होई,” पश्चिम बंगाल के बनगांव क़स्बा के ए लईकी के कहनाम बा. “हम उनकरी ओर से एइजा आईल बानी काहें कि उनके तबीयत ठीक नईखे बाकिर इ हमरो भविष्य से जुड़ल मुद्दा बा.”

ई संवाददाता ग्रामीण इलाका से आईल कई गो युवा लोगन से बात कईलस. सौरव दास पियाली नाम के गांव से आईल बाड़ें. ऊ आ उनकर दोस्त लोग मीम्स वाला पोस्टर लेले बा. सौरव कहेलन, “हमरी इलाका (ग्रामीण) में मीम्स बहुत लोकप्रिय बा. गुस्सा या प्यार जतावे के ई एगो आसान तरीका हवे एही से हमनी के बहुत सारा मीम्स संघे ले के आईल बानी जा.”

रूही (19) पारी से कहली, “दिल्ली पुलिस विद्यार्थियन संघे जईसन व्यवहार कईलस उ गलत रहे. हो सकेला हम डॉक्टर ना बन पाईं बाकिर हम विद्यार्थियन के समर्थन करब. एही खातिर हम दोस्तन संघे एइजा आईल बानी.”

रिषभ भौमिक (21) नीट पेपर लीक के वजह से एगो मौका गंवा चुकल बाड़ें आ अब उनके अगिला साल फिर से परीक्षा देवे के पड़ी. उ बतावेलन, “पिछला सरकार के समय भईल शिक्षक भर्ती घोटाला के वजह से हमार बड़ भाई के प्राथमिक शिक्षक के नौकरी चल गईल. अब हमरो मौका चल गईल आ अगिला साल फिर से परीक्षा देवे के पड़ी.

दोस्तन संघे चलत के उ कहेलन, “राज्य सरकार आ भारत सरकार दुनो मिल के हमरी परिवार के सपना तार तार कर देले बा.”