‘প্ৰচণ্ড খং উঠা বাবেই আমি ইয়ালৈ আহিছো’

“আমি যে এই মুখ ঢাকি আছো কিয় জানেনে? আমাৰ মনৰ দুখ-যন্ত্ৰণা যাতে ওলাই নপৰে, তাৰ বাবে,” শাওণ মাহৰ ডাৱৰীয়া আকাশখনৰ তলত থিয় দিয়া শ্যামল মান্নাই কয়। উত্তৰ চৌব্বিছ পৰগনাৰ দত্তপুকুৰৰ সমীপৰে গাঁও এখনত তেওঁৰ ঘৰ। “প্ৰচণ্ড ক্ষোভ আৰু হতাশা মনত গুজৰি-গুমৰি থকাৰ বাবেই আমি ইয়ালৈ আহিছো।”

দিল্লীত ককৰোচ্চ জনতা পাৰ্টি চমুকৈ চিজেপিৰ আহ্বানত আৰম্ভ হোৱা প্ৰতিবাদী কাৰ্যসূচী আজি সমগ্ৰ দেশতে শিপাইছে। দেশৰ বিভিন্ন প্ৰান্তৰ দৰে আজি কলকাতাতো যুৱসমাজে প্ৰতিবাদী কাৰ্য্যসূচী গ্ৰহণ কৰিছে। এই প্ৰতিবাদী মিচিলত অংশ লোৱা যুৱ-প্ৰজন্মৰ বহু লোকেই চিনেমাৰ পৰ্দাৰ আইৰনমেন আৰু ছুপাৰমেনৰ দৰে দুষ্ট-দমনকাৰী চৰিত্ৰৰ মুখা পিন্ধি আহিছিল। তাৰ লগতে আকৌ শেহতীয়া মীম আৰু পোষ্টাৰবোৰতো আছিলেই।

২৪ জুলাইৰ আবেলি প্ৰায় তিনি বাজি পঞ্চলিচ মিনিটত শিয়ালদহ ষ্টেচনৰ পৰা এই মহামিচিল ৰাওনা হয়, লক্ষ্য আছিল এছপ্লেনেড। স্থানীয় বাতৰি কাকত অনুসৰি সেইদিনা হাজাৰ হাজাৰ লোক এই প্ৰতিবাদত সমবেত হৈছিল। গধূলি প্ৰায় ৬ বজাত প্ৰতিবাদকাৰী আৰু কলকাতা পুলিচৰ মাজত সৰু-সুৰা সংঘৰ্ষ দেখা দিয়াত আৰক্ষীয়ে ৱাটাৰ কেনন প্ৰয়োগ কৰে।

কলকাতাৰ প্ৰতিবাদলৈ অহা অসংখ্য যুৱতীৰ মাজৰ এগৰাকী চাবিনা খাতুন (২৪)। দিল্লীৰ আন্দোলনত সমৰ্থন জাহিৰ কৰিবলৈ ১০০ কিলোমিটাৰতকৈও অধিক বাট অতিক্ৰম কৰি এই পদযাত্ৰাত তেওঁ অংশ লৈছে। “মই মোৰ বাইদেউৰ বাবে আহিছো। তেওঁক লৈ আমাৰ পৰিয়ালটোৱে বহুত আশা কৰিছিল। নীট পৰীক্ষা যেতিয়া বাতিল হ’ল, তেতিয়া তেওঁ একেবাৰে ভাঙি পৰিছিল,” তেওঁ কয়।

বনগাঁৱৰ পৰা অহা যুৱতীগৰাকীয়ে কয়, “বাইদেউ আকৌ পৰীক্ষাত বহিল ঠিকেই, কিন্তু আশানুৰূপ নম্বৰ নাপালে। এইবাৰ যে কি হ’ব কোনে জানে! বাইদেউৰ গা বেয়া, সেয়ে তেওঁৰ ঠাইত মই আহিছো। ইয়াত মোৰ ভৱিষ্যতৰ কথাও জৰিত হৈ আছে।”

পশ্চিমবংগৰ গ্ৰামাঞ্চলৰ পৰা অহা বহু বহু যুৱক-যুৱতীৰ সৈতে এই প্ৰতিবেদকে কথা পাতে। পিয়ালী নামৰ গাওঁখনৰ সৌৰভ দাস নামৰ এজন যুৱকে বন্ধুবৰ্গৰ সৈতে বৰ উৎসাহেৰে বিভিন্ন ব্যংগাত্মক মীমেৰে ভৰা পোষ্টাৰ প্ৰতিবাদী মিচিলত দাঙি ধৰিছিল। “আমাৰ (গাঁও) অঞ্চলত মীম বস্তুটো বৰ জনপ্ৰিয়। খং-ৰাগ বা মৰম আদি বৰ সহজে ইয়াৰ জৰিয়তে প্ৰকাশ কৰিব পাৰি। সেয়ে ভালেকেইখন মীম পোষ্টাৰ লৈ আহিছো।”

১৯ বছৰীয়া ৰুহিয়ে কয়, “দিল্লী আৰক্ষীয়ে ছাত্ৰ-ছাত্ৰীসকলৰ সৈতে যি নিষ্ঠুৰ আচৰণ কৰিলে, বৰ দুখ পালো। মই হয়তো ডাক্তৰ নহ’ম, কিন্তু ছাত্ৰ-ছাত্ৰীসকলৰ কাষত খাটাং থিয় দিম। সেয়ে বন্ধু-বান্ধৱীসকলক লগত লৈ আহিছো।”

প্ৰশ্নকাকত ফাদিল হোৱাৰ ফলত নীট পৰীক্ষাত বহাৰ এটা সুযোগ হেৰুৱাইছে ২১ বছৰীয়া ঋষভ ভৌমিকে। পুনৰ পৰীক্ষাত বহিবলৈ তেওঁ অহা বছৰলৈকে বাট চাই থাকিব লাগিব। “পূৰ্বৰ চৰকাৰে শিক্ষক নিযুক্তিৰ ক্ষেত্রত কৰা দুৰ্নীতিৰ বাবে মোৰ ককাইদেউৰ প্ৰাথমিক বিদ্যালয়ৰ শিক্ষকৰ চাকৰিটো গ'ল। এইবাৰ মোৰো এটা সুযোগ গ'ল, অহা বছৰ আকৌ পৰীক্ষাত বহিব লাগিব।”

বন্ধুবৰ্গৰ সৈতে খোজ কাঢ়ি গৈ থকাৰ মাজতে ঋষভে কয়, “ৰাজ্য আৰু কেন্দ্ৰ চৰকাৰ মিলি মোৰ পৰিয়ালটোৰ সকলো সপোন ভাঙি চূৰমাৰ কৰি পেলালে।”