وایناڈ میں چاول کے دیسی بیجوں کا محافظ

وایناڈ کی ڈھلانوں پر، جہاں سرسبز وادیوں میں بہت نیچے تک کہرا چھایا رہتا ہے اور پانی کے چشمے مکھریلی یا لیٹرائٹ پہاڑیوں سے گزرتے ہوئے میٹھی آوازیں پیدا کرتے ہیں، ایک مٹی کا گھر وقت کے مخالف مضبوطی سے کھڑا ہے۔ اس کی کچّی دیواریں گرمیوں میں گویا ٹھنڈی ہوا سے بھری سانسیں لیتی ہیں، بانس کے شہتیر ہوا میں ہلکے سے چرمراتے ہیں، اور بھاری بھرکم روز ووڈ کی بلّیاں ۱۵۰ مانسونوں کا وزن ڈھوتی ہیں۔ گھر کا فرش لال مٹی کا ہے، جسے ہر ہفتے گوبر سے لیپا جاتا ہے۔

کیرالہ کے مننت واڈی شہر کے پاس کمّنا گاؤں میں واقع یہ گھر وہ جگہ ہے، جہاں دھان کے بیج اپنے قصے خود سناتے ہیں۔

کُریچیا برادری (جسے ریاست میں درج فہرست قبیلہ کا درجہ حاصل ہے) کے چیرو وئل رامن ان بیجوں کے محافظ ہیں۔ کُریچیا برادری کبھی مالابار میں دھان کی کھیتی کی اپنی مہارت کے لیے مشہور تھی۔ تقریباً ۷۳ سال کے رامن نے مالی پریشانیوں، گرتی صحت اور حکومت اور دیگر اداروں کی اندیکھی کے باوجود کئی دہائیوں تک روایتی بیجوں کو محفوظ رکھا ہے۔

’’یہ [بیج] ہمارے زندہ اجداد ہیں،‘‘ رامن کہتے ہیں، جنہیں پیار اور عزت سے لوگ رامیٹّن بھی بلاتے ہیں۔ رامن، کیرالہ کی زرعی روح کے محافظ کے طور پر مشہور ہیں۔ یہ ایک ایسا علاقہ ہے، جہاں کسی فیملی کی خوشحالی کی پیمائش اس کے اناج گھر میں ذخیرہ کی گئی دھان کی قسموں سے کی جاتی تھی۔

رامن نے اپنی پُشتینی زمین کو تنوع کے ایک زندہ میوزیم میں تبدیل کر دیا ہے۔ ان کے اناج گھر میں وایناڈ کی ۵۰ روایتی قسمیں اور کیرالہ کے دیگر حصوں سے جمع کی گئی ۱۴ قسمیں محفوظ ہیں۔ وہ ہر موسم میں انہیں اُگاتے ہیں، بیجوں کو بحفاظت رکھتے ہیں، اور روایتی کھیتی کرنے والے کسی بھی شخص – آدیواسی، کسانوں، ذاتی طور پر اناج اُگانے والوں، محققین، اور اداروں – کو مفت تقسیم کر دیتے ہیں۔ ’’ہر چاول کی ایک روح ہوتی ہے،‘‘ وہ کہتے ہیں۔ ’’وہ مٹی، بارش، اور نسلوں کے لمس کو یاد رکھتا ہے۔ اگر ہم نے اسے کھو دیا، تو سمجھو اپنی تاریخ کھو دی۔‘‘

ان کے دیوان خانہ کی مدھم روشنی میں دھان کی نایاب قسموں سے بھری بوریاں ایک کے اوپر ایک کر کے رکھی ہوئی ہیں – جو دھان کی تاریخ کی پہریدار ہیں۔ ہر بوری پر ملیالم میں ایسے نام لکھے ہیں، جو لوریوں جیسے میٹھے لگتے ہیں: مثلاً چینّیلو، تونڈی، چیمبکم، ویلیئن، گندھک سالا، کئیما وغیرہ۔

رامن پاری کو بتاتے ہیں کہ کیسے بھاپ میں پکتے گندھک سالا کی خوشبو چینبیلی اور چندن کی یاد دلاتی ہے؛ کئیما، جسے جیرک سالا بھی کہا جاتا ہے، ہوا میں مکھن جیسی خوشبو بکھیر دیتا ہے جو مالابار بریانی کی پہچان ہے؛ اور چیمبکم کا ذائقہ میٹھا اور گداز ہوتا ہے، جو پائیسَم (ایک میٹھا پکوان) بناتے وقت ناریل کے دودھ میں گھُل جاتا ہے۔

گزشہ تین دہائیوں میں کیرالہ کے ۷۰ فیصد سے زیادہ دھان کے کھیت غائب ہو چکے ہیں۔ نقدی فصلوں، ریئل اسٹیٹ اور پتھر کی کانوں نے انہیں نگل لیا ہے۔

زراعت کے لیے مشہور وایناڈ ضلع کیرالہ کے شمال مشرقی سرے پر واقع ہے۔ زراعت کے لیے بارش کے پانی پر منحصر یہ علاقہ کبھی اپنی وادیوں میں ۳۰ ہزار ہیکٹیئر سے زیادہ دھان کی فصل سے بھرپور تھا، جسے چاروں طرف سے جنگلات سے ڈھکی پہاڑیاں گھیرے ہوئی تھیں۔ کبھی یہ علاقہ ۱۶۰ دیسی دھان کی قسمیں اُگاتا تھا، لیکن آج ان میں سے صرف کچھ ہی قسمیں بچی ہیں۔

چیرو وئل رامن اپنی سطح پر اسے روکنے کی کوشش کرتے ہیں۔ ان کی کوشش خاموش رہتے ہوئے بھی کافی مضبوط ہے۔

’’وہ ضدی ہیں۔ ہم کبھی کبھی ان کے اوپر ہنستے ہیں، لیکن ان کی عزت بھی کرتے ہیں۔ ان کے بغیر ہم ان ناموں کو یاد بھی نہیں رکھ پاتے،‘‘ ۷۰ سالہ اپّو کُٹّن کہتے ہیں، جنہوں نے دھان کا اپنا کھیت بیچ کر سُپاری (اریکا) کے پیڑ لگا دیے ہیں۔

دیگر کئی لوگوں نے بھی اپنی زمینیں بیچ دیں، اور آج وایناڈ میں مشکل سے ۲۰ ہزار ہیکٹیئر دھان کی کھیتی بچی ہے، اور وہ بھی یہاں وہاں بکھری ہوئی ہے۔ پھر بھی یہ علاقہ کیرالہ میں سب سے زیادہ روایتی دھان کی قسموں کو محفوظ کیے ہوئے ہے۔ کیرالہ ایگریکلچرل یونیورسٹی، ایم ایس سوامی ناتھن ریسرچ فاؤنڈیشن کا کمیونٹی ایگرو بائیو ڈائیورسٹی سنٹر (کلپیٹّا)، اور سیڈ کیئر جیسے کسان گروپ ان دیسی قسموں کی دستاویز کاری اور تحفظ کا کام کرتے ہیں۔ یہ سبھی مل کر وایناڈ کے دھان کو ایک زندہ جینیاتی خزانہ بتاتے ہیں۔ یہ ایک ایسی خصوصیات کا ذریعہ ہیں جو خشک سالی اور حشرات کا سامنا کرنے کی طاقت فراہم کرتی ہیں، اور ماحولیاتی بحران سے نبرد آزما کاشتکاروں کے لیے مستقبل میں کافی کارآمد ثابت ہو سکتی ہیں۔

چینّیلو، جو کُریچیا اور پنیا کسانوں کا سرخ لال رنگ کا اناج ہے، لوہے سے مالا مال اوپر کے علاقوں میں اُگایا جاتا ہے۔ اس میں بھیگی مٹی اور لوہے کی خوشبو ہوتی ہے، اس کا ذائقہ میوہ دار اور معدنیاتی ہوتا ہے جو زبان پر دیر تک بنا رہتا ہے۔ تونڈی، ہلکا ہوتا ہے اور ہلکی مٹھاس لیے ہوئے، پکنے پر پھولا پھولا اور ملائم ہو جاتا ہے، جسے وہ روزمرہ کے کھانے میں مچھلی کے شوربے کے ساتھ پیش کیے جانے والے چیرو (چاول) کے لیے بالکل موزوں ہوتا ہے۔ ویلئن چاول کا ذائقہ متوازن اور سوندھا ہوتا ہے اور یہ آسانی سے ہضم ہو جانے کے لیے مشہور ہے۔ بزرگوں اور معذور لوگوں کے لیے اسے اکثر گرم کَنجی (دلیا) بنا کر دیا جاتا ہے۔ نَوجارا، جس میں میوہ دار کڑواہٹ اور گاڑھا ٹیکسچر ہوتا ہے، اپنے آپ میں خاص ہے۔ یہ کیرالہ کا واحد ادویاتی چاول ہے، جسے دعوتوں کے لیے نہیں، بلکہ علاج کے لیے اُگایا جاتا ہے۔ ہر قسم کا اپنا رول، اپنی اہمیت، اور اپنی کہانی ہے۔

یہ کم لاگت والی فصلیں ہیں، جو خشکیوں میں بھی زندہ رہتی ہیں، حشرات کا سامنا کر سکتی ہیں، اور کیمیائی کھاد یا حشرہ کش کے بغیر بھی اچھی طرح لہلہاتی ہیں۔ جب جدید ہائبرڈ قسمیں بے موسم کی بارش میں مرجھا جاتی ہیں، تب یہ روایتی دیسی دھان کی قسمیں بچی رہتی ہیں۔ یہ جھکتی ہیں، لیکن ٹوٹتی نہیں ہیں۔

چمکتے بھورے دھان کی ایک مٹھی پر اپنی ہتیھلی پھیرتے ہوئے دھیمی آواز میں چیرو وئل رامن بتاتے ہیں، ’’یہ والی قسم سیلاب میں بچ جاتی ہے۔ یہ والی خشکی کا سامنا کر سکتی ہے۔ اسے پکاؤ تو زیرہ جیسی خوشبو آتی ہے۔‘‘

تقریباً ۷۳ سال کے رامن کی آواز میں ایک سائنس داں کا فخر اور والدین جیسی ممتا دونوں جھلکتی ہیں۔ ’’بیج میرے بچے ہیں۔ میں انہیں اگلی نسل کے لیے زندہ رکھتا ہوں۔‘‘

رامن کے گھر کے اُس پار ۴۰ ایکڑ کھیت پھیلے ہیں، جنہیں قرینے سے مستطیل حصوں میں تقسیم کیا گیا ہے، اور ہر حصہ سبز رنگ کی الگ الگ شکلوں میں چمکتا ہے۔ کچھ پودے لمبے اور سنہرے ہیں، کچھ چھوٹے سائز کے اور بینگنی جھلک لیے ہوئے، کچھ پودے بالیوں کے بوجھ سے جھکے ہوئے ہیں۔ ہوا میں ڈریگن فلائی، مینڈک اور پرندوں کی گونج ہے۔ یہ جاندار ۱۹۷۰ کی دہائی میں زراعت میں کیمیکل کے استعمال کے بعد وایناڈ کے زیادہ تر کھیتوں سے غائب ہو گئے تھے۔

’’میں نے ۱۹۷۸ میں کھاد ڈالنا بند کر دیا،‘‘ رامن یاد کرتے ہیں۔ ’’مٹی مر چکی تھی۔ نہ مچھلیاں بچیں، نہ کینچوے۔ لیکن جب میں قدرتی کھیتی کی طرف لوٹا، تو اس میں زندگی واپس لوٹ آئی۔ یہ میرا سب سے بڑا سبق تھا: کھیتی میں مٹی کو مضبوط کرنا چاہیے، مارنا نہیں۔‘‘

چار دہائیوں سے زیادہ عرصے سے ان کا کھیت ہی ان کی تجربہ گاہ رہا ہے۔ گھٹنے بھر پانی والے ایک ٹکڑے کی طرف اشارہ کرتے ہوئے وہ کہتے ہیں، ’’یہاں چینّیلو لگا ہوا ہے، جو ۵۰۰ سال سے بھی پرانی قسم ہے۔ اس کے بعد جیراک سالا ہے، اور وہاں کئیما ہے، جو بغیر کسی چھڑکاؤ کے حشرات کا سامنا کر لیتا ہے۔‘‘ وہ بتاتے ہیں کہ ہر دانہ اپنے جغرافیہ اور ماحول کے مطابق خود کو ڈھال لینے کی صلاحیت رکھتا ہے: گندھک سالا اور کئیما کو دلدلی کھیتوں کا ٹھہرا ہوا پانی پسند ہے، جہاں ٹھنڈی، خاموش راتیں ان کی خوشبو کو تیز کرتی ہیں۔ چینّیلو اور ویلیئن برسات سے سینچے گئے ڈھلانوں اور اوپری مٹی کی نامیاتی ذخیرہ سے اپنی قوت حاصل کرتے ہیں۔

چاول کے یہ دانے پہاڑی علاقہ میں کھانے پینے کی عادتوں پر بھی روشنی ڈالتے ہیں۔ آدیواسی گھروں میں چینّیلو اور ویلیئن آج بھی لذیذ کھانا ہے، جنہیں دھیمی آنچ پر مٹی کے برتنوں میں پکا کر دیسی ساگ، دھوئیں میں تیار گوشت یا کٹہل کے ساتھ کھایا جاتا ہے۔ اوپری وادیوں اور چھوٹے بازار قصبوں میں گندھک سالا اور کئیما تہواروں کے چاول ہیں، جو شادیوں اور تہواروں میں کھلائے جاتے ہیں۔ چیمبکم دعوتوں اور مذہبی تقریبات میں استعمال ہوتا ہے، جب کہ نجوارا آیوروید اور مندر کے پرساد میں اپنی جگہ پاتا ہے۔

کُریچیا برادری، جس سے رامن کا تعلق ہے، کا نام کُری (نشان) اور چیئوکا (کھینچنا/بنانا) سے اخذ کیا گیا ہے۔ یہ ان کے اس شاندار ماضی کی یاد دلاتا ہے، جب پلسی راجا کے دور میں وہ تیر اندازوں کے طور پر کھیتوں اور جنگلات کی حفاظت کرتے تھے۔ آج تیر اندازی کی روایت بھی ختم ہو چکی ہے، اور دھان کے زیادہ تر کھیت بھی۔

’’اب دھان پر کون زندہ رہ سکتا ہے؟‘‘ رامن کے پڑوسی ۵۵ سالہ کرشنن کُٹّی سوال کرتے ہیں۔ ’’دھان کی کھیتی سے میں اپنی فیملی کا پیٹ مشکل سے بھر پاتا تھا۔ کالی مرچ اور کافی میں جلدی پیسہ مل جاتا ہے۔ حکومت دھان کی قیمت نہیں بڑھاتی۔ اس لیے ہم نے اسے اُگانا چھوڑ دیا۔‘‘

وایناڈ میں دھان کی کھیتی سے ہونے والی آمدنی، کالی مرچ کے مقابلے بہت کم ہے۔ ایک ہیکٹیئر دھان سے تقریباً ڈیڑھ ٹن چاول پیدا ہوتا ہے، جس کے بعد ۲۳ روپے کلو کی ایم ایس پی (کم از کم امدادی قیمت) اور چھوٹے سے سرکاری بونس کو ملا کر ایک سیزن میں کسان کو تقریباً ۵۰ ہزار روپے سے بھی کم روپے ملتے ہیں۔ یہ رقم اکثر ۷۵ ہزار روپے سے ایک لاکھ روپے کی لاگت خرچ سے بھی کم ہوتی ہے۔

دوسری جانب، ایک سائز کی زمین پر تقریباً ۵ء۱ سے ۷ء۱ ٹن تک سوکھی کالی مرچ مل جاتی ہے، جس کی موجودہ قیمت ۶۵۰-۷۰۰ روپے کلو ہے۔ اس سے سالانہ ۱۰ لاکھ روپے سے زیادہ کی آمدنی ہو سکتی ہے، اور تمام خرچوں کے بعد کسان کے ہاتھ میں ۶-۷ لاکھ تک بچ جاتے ہیں۔

اس لیے جہاں دھان غذائی تحفظ اور حیاتیاتی توازن کو برقرار رکھتا ہے، وہیں کالی مرچ وایناڈ کے اوپری علاقوں کے کسانوں کی معیشتی شہ رگ بنی ہوئی ہے، جس کی قسمت عالمی مسالہ بازاروں اور مانسون کے مزاج پر منحصر ہے۔

’’میں نے ایک چھوٹا حصہ دھان کے لیے رکھنا چاہا تھا، لیکن بچوں نے ادرک اور کالی مرچ لگانے پر زور دیا۔ انہوں نے کہا کہ دھان کا کوئی مستقبل نہیں ہے،‘‘ ۶۲ سالہ رادھا منی کہتی ہیں۔ انہیں یاد ہے کہ کبھی ان کی فیملی کے کھیت گندھک سالا دھان سے لہلہاتے تھے، ’’اب صرف رامن کے کھیتوں میں اُگائے جاتے ہیں،‘‘ وہ مزید کہتی ہیں۔

رامن کے مٹی کے گھر کے اندر، بیجوں سے بھری بوریاں ٹھنڈی اندھیری جگہ میں سجی رہتی ہیں۔ یہاں نہ پنکھا ہے، نہ درجہ حرارت کو کنٹرول کرنے والا آلہ۔ صرف مٹی کی دیواروں سے چھن کر آتی ہوئی ہوا اور تیل سے جلنے والے چراغ کی مدھم روشنی۔ ’’ہر سال مجھے ۷۰ ہزار روپے کا نقصان صرف ان بیجوں کو زندہ رکھنے میں ہوتا ہے،‘‘ وہ کہتے ہیں۔ ’’انعامات ملتے رہتے ہیں، لیکن کوئی بھی میرے لیے مستقل طور پر ذخیرہ کرنے کی سہولت مہیا نہیں کراتا۔ بیج ان کی تقریروں کا انتظار نہیں کر سکتے۔‘‘

یہ المیہ ہے کہ انہیں ۲۰۲۳ میں پدم شری، ۲۰۱۶ میں جینوم سیویئر ایوارڈ اور ۲۰۱۲ میں کیرالہ کا گرین ایوارڈ ملا۔ یونیورسٹیاں انہیں لکچر دینے کے لیے بلاتی ہیں۔ کیرالہ ایگریکلچرل یونیورسٹی نے انہیں ’پروفیسر آف پریکٹس‘ بنایا۔ راہل گاندھی سے لے کر وزیر اعلیٰ پنارائی وجین تک، کئی لیڈر ان کے کھیتوں میں چل کر آئے ہیں۔

پھر بھی، رامن اپنی فیملی کا پیٹ بھرنے کے لیے مقامی راشن کی دکان سے ملنے والے چاول پر منحصر ہیں۔

’’ہمیں اکثر زندہ رہنے کے لیے راشن والا چاول کھانا پڑتا ہے،‘‘ آنگن میں دھان سُکھاتے ہوئے ان کی بیوی گیتا کہتی ہیں۔ ’’ہمارے کھیت تجربات کے لیے استعمال ہوتے ہیں۔ ہم اپنی بھوک کے بارے میں بھول جاتے ہیں۔‘‘

رامن کو اس بات کی فکر ہے کہ ان کے جانے کے بعد کیا ہوگا۔ کُریچیا برادری میں مادری وراثت کی تعمیل ہوتی ہے۔ ان کی موت کے بعد زمین بچوں کو نہیں، بلکہ دور کے رشتہ داروں کو چلی جائے گی، جن میں سے کئی کھیتی میں دلچسپی نہیں رکھتے۔ ’’تب سب کچھ ختم ہو جائے گا،‘‘ وہ کہتے ہیں۔ وہ ایک ایسے بیج بینک کا خواب دیکھتے ہیں، جسے عوامی سطح پر حمایت حاصل ہو۔ ’’کانچ کی بوتلوں میں نہیں، مٹی میں بچیں گے۔ بیج تبھی زندہ رہتے ہیں جب انہیں اُگایا جائے۔ یونیورسٹی، تحقیقی مراکز، این جی او وغیرہ جو بھی سنجیدہ ہو، وہ یہ کام کر سکتا ہے۔ ورنہ ۱۰ سال میں یہ بوریاں صرف یادیں بن کر رہ جائیں گی۔‘‘

’’مجھے ہیرو مت کہئے،‘‘ وہ کہتے ہیں۔ ’’بیجوں کو بچا لیجئے۔ وہی کافی ہے۔‘‘

رامن لوگوں کی توجہ کا مرکز ہیں، لیکن کبھی کبھی یہ بات انہیں مایوس کرتی ہے۔ ’’ہر ہفتے وہ مجھے کئی افتتاح کرنے کے لیے بلاتے ہیں۔ وہ میرے ساتھ کسی اہم شخصیت جیسا برتاؤ کرتے ہیں۔ لیکن دھان کے یہ بیج اُن مالاؤں اور تصویروں کے سہارے نہیں بچیں گے۔ اس سے میرے کھیت کا وقت برباد ہوتا ہے،‘‘ وہ کہتے ہیں۔ بیماری بھی انہیں روک نہیں پائی ہے۔ سال ۲۰۱۹ میں، دبئی میں دل کا دورہ پڑنے، اور پھر کئی بار دل سے متعلق خطرات اور کووڈ۔۱۹ کے سبب وہ ضرور تھوڑا کمزور دکھائی دیتے ہیں، لیکن اپنا کام جاری رکھتے ہیں۔

ہر صبح وہ ننگے پیر مٹی کی مینڈوں (بند) پر چلتے ہیں، پودے کو دیکھتے ہیں، دانے چکھتے ہیں، اور پتّوں کی سرسراہٹ سنتے ہیں۔

زرعی پالیسی کی بات سنتے ہی ان کا غصہ پھوٹ پڑتا ہے۔ ’’کسان ماحولیات کے دشمن نہیں ہیں،‘‘ وہ کہتے ہیں۔ ’’اسے بچانا ہے تو کسانوں کو ساتھ لانا ہی ہوگا۔ حکومت کو انعام دینا بند کرنا چاہیے اور مناسب قیمت دینا شروع کرنا چاہیے۔ کسانوں کو عزت چاہیے، خیرات نہیں۔‘‘

مقامی مؤرخ او کے جانی کا ماننا ہے کہ رامن ’’وایناڈ کے اُن آخری نسل کے آدیسواسیوں میں ہیں جنہوں نے چاول کو فائدے کے لیے نہیں، بلکہ انسانوں کے لیے محفوظ کیا۔ وہ صرف کسان نہیں، ماحولیات کی بربادی کے خلاف کھڑی ایک سیاسی شخصیت ہیں۔‘‘ لیکن رامن ایسی تعریف کو درکنار کر دیتے ہیں۔

گیتا اور ان کے بچے آج بھی چھوٹی چھوٹی قطاروں میں ہر قسم کے دھان اُگانے میں ان کی مدد کرتے ہیں۔ کبھی کبھی ہر قسم کے لیے بہت تھوڑی سی زمین چاہیے ہوتی ہے۔ یہ کام باریک ہے؛ کچھ بیجوں کو بونے کے وقت اضافی دیکھ بھال چاہیے، کچھ کو کٹائی کے وقت۔ ’’ہمارے بزرگ صحت مند رہتے تھے، کیوں کہ وہ یہ اناج کھاتے تھے،‘‘ گیتا کہتی ہیں۔ ’’اب زیادہ تر کُریچیا کافی یا کالی مرچ اُگاتے ہیں۔ صرف رامن ہی دھان کی کھیتی کرتے ہیں۔‘‘

شام ڈھلتے ہی کھیتوں پر پتنگے اڑتے نظر آتے ہیں۔ باورچی خانہ سے ابلتے چاول کی سوندھی خوشبو آتی ہے۔ مٹی کے گھر کے اندر، بند بوریوں میں پڑے یہ دانے خاموشی سے انتظار کرتے ہیں، اور اس سرزمین پر صدیوں کے عزم کی سانس لیتے ہیں جسے کبھی دھان کے کھیتوں کی وجہ سے وائل ناڈو کہا جاتا تھا، یعنی ’’دھان کے کھیتوں کی سرزمین‘‘۔

یہ گھر ایک جیتا جاگتا میوزیم ہے – جہاں اناج کے ہر دانہ کا ایک نام ہے، ایک کہانی ہے، اور روح ہے۔

ترجمہ نگار: قمر صدیقی