वायनाड के बिया के पहरुआ

वायनाड के पहाड़ी ढलान पर, जहंवा हरियर घाटी पर नीचे ले कुहासा छाइल रहेला, मखरैली चाहे लेटराइट पहाड़ी से गुजरत पानी के धार मीठ आवाज निकालत रहेला, एगो माटी के घर आजो समय से अडिग ठाड़ बा. ओकर कांच देवाल लागेला कि गरमी में ठंडा सांस छोड़त बा, बांस के बल्ली हवा में सरसर चरमरात रहेला. सीसम के भारी बल्ली सब डेढ़ सौ बरसात के मार सहत आवता. भीतरी लाल माटी के फर्श बा, जे हर हफ्ता गोबर से लिपाला.

केरल के मनन्तवाडी सहर लगे कम्मना गांव में बसल ई घर अइसन ठांव बा जहंवा धान के बिया चुपचाप आपन कहानी दोहरावत रहेला.

राज्य में अनुसूचित जनजाति के रूप में दरज कुरचिया समुदाय के चेरुवयल रामन एह बीज सब के जोगाईदार बाड़न. ई समुदाय कबो मालाबार में धान के खेती में आपन हुनर खातिर जानल जात रहे. तिहत्तर बरिस के ई आदमी लगातार गरीबी, खराब तबियत आ सरकारी-गैरसरकारी बेरुखी के बादो दसकन से देसी बिया सब जोगा के रखे में लागल बाड़न.

“बिया सब जिन्दा पुरखा ह,” रामन कहेलन. उनका लोग स्नेह आ आदर से रामेत्तन भी बोलावेला. केरल के खेती-बाड़ी के आत्मा के रखवाली करे वाला ई आदमी औह दौर के इयाद दिलावेला, जब घर केतना संपन्न बा, कोठरी में धइल धान के किसिम से तय होखत रहे.

हर सीजन में ऊ एह बिया सब के अपने उगावेलन, जोगावेलन आ पारंपरिक खेती के खातिर समर्पित कवनो आदमी, जइसे आदिवासी किसान, अपने उगावे वाला, शोध करे वाला आ संस्था सब के बिना एको पइसा लेले बांट देवेलन. ऊ कहेलन, “हर धान में आत्मा होखेला. ऊ माटी, बरखा, आउर पीढ़ी दर पीढ़ी के छुअन इयाद रखेला. ई हेरा जाई त आपन इतिहासो हेरा जाई.”

रामन के पुरखन के खेती-खरिहान आज जिन्दा अजायबघर बनल बा. उनकर अनाज के कोठरी में वायनाड के 50 आ केरल के अउरी इलाका सब से जुटावल 14 ठो देसी धान के किसिम सब हिफाजत से धइल बा.

उनकर बैठक में धुंधलका उजाला में दुर्लभ धान के किसिम सब से भरल जूट के बोरा एक पर एक धइल बा, इतिहास के पहरेदार बन के. हर बोरा पर मलयालम में नाम टांकल बा. अइसन नाम जे लोरी जेका कान में घुल जाला- चेन्नेलु, तोंडी, चेम्बकम, वेलियन, गंधकसाला, कयामा इत्यादि.

रामन पारी के बतवइलन कि जब गंधकसाला चाउर उसिनल जाला त ओकरा से निकले वाला खुसबू चमेली आ चंदन के इयाद दिलावेला. कयमा, जेकरा जीराकसाला भी पुकारल जाला, हवा में मक्खनिया महक छोड़ेला जवन मालाबार के बिरयानी परंपरा के पहचान बा. उहंई चेम्बकम के स्वाद मीठ आ नरम होखेला. नरियर के दूध में बनल एकर पायसम (मीठ पकवान) मुंह में घुल जाला.

पछिला तीस बरिस में केरल के 70 प्रतिशत से जादे धान के खेत नकदी खेती, रियल एस्टेट आ पत्थर के खदानन के चपेट में आके स्वाहा हो चुकल बा.

केरल के उत्तर-पूरबी छोर में पड़े वाला वायनाड खेती-किसानी वाला इलाका ह. एक जमाना में बरसात के पानी से सिंचल जाए वाला एह इलाका के घाटी में 30 हजार हेक्टेयर से ऊपर धान के खेत रहे. एकर चारो ओरी हरियर जंगल वाला पहाड़ ठाड़ रहत रहे. कबो इहंवा 160 देसी धान के किसिम उगावल जात रहे. बाकिर आज हालत ई बा कि ओह में से बस मुट्ठिए भर किसिम सब बचल बा.

चेरुवयल रामन एह तरीका से मिट रहल पहचान के चुपचाप बाकिर ठोस ढंग से बचावे में लागल बाड़न.

“ऊ त एकदम्मे हठी बाड़न. हमनी के त कबो-कबो उनका पर हंसी आवेला. बाकिर आदरो ओतने करिला हमनी. ऊ ना रहतन, त ई नामो सब हमनी भुला जइतीं,” सत्तर बरिस के अप्पुकुटटन कहलन. ऊ आपन धान के खेत बेचके अब कसैली (अरेका) के खेती करेलन.

दोसरो लोग आपन जमीन बेच देले बा. आज अनुमान लगावल जाव, त मुस्किल से 20,000 हेक्टेयर धान के खेत बचल होई, उहो जेने-तेने छितराइल बा. तबो ई इलाका केरल के सबले जादे पारंपरिक धान के किसिम के घर बा. केरल यूनिवर्सिटी के एम. एस. स्वामीनाथन रिसर्च फाउंडेशन के कम्युनिटी एग्रोबायोडायवर्सिटी सेंटर (कल्पेट्टा) आ सीड केयर जइसन किसान समूह एह गंवई किसिम सब के दस्तावजे बनावेलन आउर सुरक्षित रखेलन. ई सभे लोग मिलके वायनाड के धान के जिंदा जीन-भंडार पुकारेला. एकरा में अइसन गुण सब बा जे सूखा आ कीट से बचे के ताकत देवेला, आउर किसान के भावी जलवायु संकट से निपटे में मदद कर सकेला.

कुरचिया आ पनिया किसान के गहिर लाल धान, चेन्नेलु लोहा से भरपूर ऊंच जमीन में उगावल जाला. एकरा में भींजल माटी आ लोहा के सोंधा-सोंधा महक होखेला. खइला पर जीभ पर मेवेदार आ खनिजिया स्वाद देर तक बनल रहेला. तोंडी किसिम के बात कइल जाव, त एकरा से हल्का मीठ, मोलायम आ फुलल फुलल चोरु (भात) बनेला. मछरी के रस्सा संगे खाए में ई बहुते मस्त लालेला. उहंई वेलियन जे बा, आसानी से पचे वाला आ स्वाद में सोंधा आउर नरम मानल जाला. बूढ़ आउर बेमार लोग के जादेतर एकरे गरम-गरम कांजी (दलिया) बनाके खियावल जाला. नजवरा गाढ़ आउर नट जइसन कड़वाहट लेले रहेला. औषधीय गुण वाला ई केरल के अकेला चाउर बा जेकरा दावत ना, बलुक इलाज खातिर उगावल जाला. हर किसिम के आपन काम, आपन अर्थ आउर आपन कहानी बा.

धान के ई सब किसिम कम मिहनत आ कम पइसा मांगे वाला किसिम बा. सूखा आ कीट के डट के सामना करे वाला आ रसायनिक खाद चाहे कीटनाशक के बिना भी खूब फलेला-फुलाला. जहंवा नयका हाइब्रिड किसिम सब बेमौसम बरसात में खराब हो जाला, धान के ई पारंपरिक देसी किसिम टिकल रहेला. ई झुक जाई, बाकिर टूटी ना.

मुट्ठी भर चमकत भुअर धान पर हाथ फेरत चेरुवयल धीमा आवाज में बतावत बाड़न, “ई वाला त बाढ़ो में खराब ना होखे. आउर ई सूखा भी झेल जाला. एकरा पकाएम त ई जीरा जइसन गमकी.”

तिहत्तर बरिस के रामन के आवाज में एगो वैज्ञानिक के गर्ब आ अभिभावक के नरमी दुनो सुनाई दीही. “बिया सब हमार संतान बा, आवे वाला पीढ़ी खातिर हम एकरा जोगा के रखले बानी.”

रामन के घर के सामने चालीस एकड़ के खेत पसरल बा. साफ-सुथ्थर चरखुट आकार में बांटल. सब अलग-अलग हरियर रंग में चमक रहल बा. कवनो में पौधा लमहर आ सुनहला रंग के बा, त कवनो में छोट आ बैंगनी झलक लेले. कुछ में त पौधा सब बाली के भार से झुक गइल बा. हवा में ड्रैगनफ्लाई, बेंग आ चिरई सब के आवाज गूंज रहल. ई सब जीव 1970 के दसक में खेती में रसायन के प्रयोग के बाद से वायनाड के जादेतर खेत से बिला गइल रहे.

रामन इयाद करत बाड़न, “हम खेत में दवाई डालल बंद कर देनी. माटी मर गइल रहे. ना त मछरी बचल रहे, ना चेरा. बाकिर जब देसी तरीका से खेती करे लगनी, माटी में जान आ आइल. हमरा खातिर ई बहुते बड़ सबक रहे कि खेती माटी के पोसे वाला होखे के चाहीं, मारे वाला ना.”

चालीस साल से जादे हो गइल, उनकर खेत उनकर प्रयोगशाला बन गइल बा. ठेहुना भर पानी वाला खेत के एगो टुकड़ा ओरी देखावत ऊ कहलन, “ई चेन्नेलु बा, 500 बरिस से भी पुरान किसिम. ओकरा लगे जीराकसला बा, आउर उहंवा कयमा लागल बा जे बिना दवाई कीट से मुक्त रहेला.” ऊ बतइलन कि हर दाना आपन भूगोल आ परिवेश के हिसाब से अपना के ढाले में समर्थ बा. गंधकसाला आ कयमा के दलदली खेत के स्थिर पानी नीमन लागेला. ठंडा, शांत रात में एकर सुंगध आउर गाढ़ हो जाला. चेन्नेलु आ वेलियन बरसात से सींचल ढलान आ जैविक रूप से संपन्न ऊपरी माटी से ताकत लेवेला.

चाउर के दाना सब पहाड़ी खानपान के नक्सा जइसन बा. आदिवासी घर में चेन्नेलु आ वेलियन आजो रोज के खाना बा. माटी के हांड़ी में एकरा धीरे-धीरे पकावल जाला आ जंगली साग, धुआंदार मांस आ कटहल के तरकारी संगे खाइल जाला. ऊंच घाटी आ छोट बजार वाला कस्बा सब में गंधकसाला आ कयमा परब आ त्योहार में पके वाला खास चाउर बा. बियाहो-सादी में एकरा परोसल जाला. चेम्बकम दावत आ अनुष्ठान में बनेला. उहंई नजवरा से औषधि आ मंदिर के प्रसादी बनेला.

रामन जवन समाज से आवेलन, कुरचिया समाज, एकर नाम कुरी (निसान) आ चियुका (खींचल/बनावल) से निकलल बा. ई नाम तब के गौरव के निसानी बा जब पलसी राजा होखत रहस आउर ओह घरिया ऊ लोग तीरंदाज के रूप में खेत आ जंगल के रखवाली करत रहे. आज तीरंदाजी के प्रथा समाप्त हो चुकल बा, आउर ओही तरहा धान के जादेतर खेत भी.

“आज धान के भरोसे के जियत रह सकत बा?” रामन के पड़ोस में रहे वाला कृष्णनकुट्टी पूछेलन. “धान के खेती से परिवार के पेट मुस्किल से भर पावत रहीं. ओकरा बनिस्पत गोल मिरिच आ कॉफी से जल्दी पइसा आ जाला. सरकार धान के दाम नइखे बढ़ावत, एहि से हमनी एकरा उगावल छोड़ देनी.”

वायनाड में धान के खेती से होखे वाला कमाई गोल मिरिच के बनिस्पत बहुते कम बा. एक हेक्टेयर खेत से कोई 1.5 टन धान निकलेला. एकर एमएसपी (न्यूनतम समर्थन मूल्य) आ छोट सरकारी बोनस मिलाके कोई 23 रुपइया प्रति किलो भाव मिलेला. मतलब ई भइल कि एक सीजन में किसान के मोटा-मोटी 50,000 से भी कम मिलेला. उगावे में आवे वाला 75,000 रुपइया के खरचा से ई बहुत कम बा.

दोसरा ओरी, ओतने जमीन पर जदि गोल मिरिच उगावल जाव, त कोई 1.5 से 1.7 टन सूख्खल गोल मिरिच निकली. एकर मौजूदा भाव 650-700 रुपइया किलो बा. एकरा से सलाना 10 लाख से जादे कमाई हो सकेला. आउर खरचा निकलला के बाद किसान के हाथ में 6 से 7 लाख बच सकेला.

एही से जहंवा धान खाद्य सुरक्षा आ पारिस्थितिक संतुलन बनवले रखेला, उहंई गोल मिरिच वायनाड के ऊपरी इलाका में रहे वाला किसान लोग के आर्थिक जीवन के प्राण बनल बा. एकर किस्मत वैश्विक मसाला बजार आ बरखा के मिजाज पर टिकल बा.

“हम एगो छोट हिस्सा धान खातिर रखे के चाहत रहीं. बाकिर बच्चा लोग अदरक आ गोल मिरिच उगावे पर जोर देलक. ऊ लोग कहलक कि धान के कवनो भविष्य नइखे,” बासठ बरिस के राधामणि कहेली. उनका इयाद बा, कबो उनकर परिवार के खेत गंधकसाला धान से भरपूर रहत रहे. “अब त धान खाली रामन के खेत पर उगेला.”

रामन के माटी के घर में बिया से भरल बोरी सब ठंडा आ अन्हार जगह में सजा के रखल रहेला. इहंवा ना त पंखा बा, न गरमी-सरदी कंट्रोल करे वाला कवनो मसीन. सिरिफ सांस लेत माटी के देवाल आउर दिया के हलुक रोसनी. “बिया सब के संभार के रखे में हर साल हमार 70,000 रुपइया खरचा हो जाला. लोग पुरस्कार त देवेला, बाकिर केहू हमरा खातिर स्थायी भंडारण के ब्यवस्था ना करे. बिया भाषण के इंतजार ना कर सके.”

विडंबना देखीं, कि उनका साल 2023 में पद्मश्री, 2016 में जीनोम सेवियर अवॉर्ड आ 2012 में केरल ग्रीन अवॉर्ड मिल चुकल बा. यूनिवर्सिटीज सब उनका लेक्चर देवे खातिर न्योतेला. केरल कृषि विश्वविद्यालय उनका ‘प्रोफेसर ऑफ प्रैक्टिस’ बनवलक. राहुल गांधी से लेके मुख्यमंत्री पिनरई विजयन ले, केतना नेता लोग उनका खेत तक चल के आइल.

तबो रामन परिवार के पेट भरे खातिर रासन से मिले वाला चाउर के भरोसे बाड़न.

“हमनी के अक्सरहा पेट भरे खातिर रासन के चाउर के भरोसे रहे पड़ेला,” अंगना में धान के घाम में सुखावत उनकर घरवाली गीता कहेली. “हमनी के खेत प्रयोग खातिर काम में लावल जाला. हमनी आपन भूख के बारे में भुला जाइले.”

रामन के एह बात के चिंता सतावेला, कि उनका गइला के बाद का होई. कुरचिया समाज मातृवंशीय उत्तराधिकार नियम मानेला. उनका गइला के बाद जमीन उनकर बच्चा लोग के ना, बलुक दूर के रिस्तेदार में बंट जाई, जेकरा में से केहू खेती के काम में दिलचस्पी ना रखे. “तब सब खतम हो जाई,” ऊ कहेलन. बीज बैंक बनावे के उनकर सपना बा, जेकरा सार्वजनिक रूप से समर्थन प्राप्त होखो. “बिया सीसा के बोतल में ना, माटी में डाले से बची. ई तबे जिंदा रही, जब उगावल जाई. यूनिवर्सिटीज, शोध केंद्र, एनजीओ जे भी गंभीर होखे, ऊ ई काम कर सकता. ना त 10 बरिस बाद ई बोरा सब खाली याद बनके रह जाई.”

“हमरा नायक मत बोलाईं,” ऊ कहलन. “बिया सब के बचा लीहीं, हमरा खातिर उहे काफी बा.”

रामन के उनकर गांव के लोग बहुत मानेला. बाकिर कबो-कबो इहे बात से ऊ उदास हो जालन. “हर हफ्ता हमरा कहूं उद्घाटन खातिर बोलावल जाला. हमरा संगे ऊ लोग एगो खास आदमी जेका व्यवहार करेला. बाकिर धान के बिया माला आ तस्वीर के सहारे ना बची. ई सब चलते खेत खातिर हमरा समय ना मिले.” बीमारी के बावजूद ऊ रुके के नाम नइखन लेत. सन् 2019 में दुबई में उनका दिल के दौरा पड़ल. फेरु केतना बेरा ह्रदय संबंधी डर आ कोविड-19 के चलते ऊ तनी कमजोर जरूर देखाई पड़लन, बाकिर आपन काम जारी ऱखलन.

रोज भोरे ऊ खालिए गोड़ मेड़ पर चलेलन. पौधा सब के निहारेलन, दाना सब चीखेलन आउर पत्ता सब के सरसराहट सुनेलन.

नीति पर चरचा आवते उनकर गोस्सा देखाई देवे लागेला. “किसान लोग पर्यावरण के दुस्मन नइखे.” ऊ कहेलन, “एकरा बचावे के बा, त किसान लोग के साथे लावे के होई. सरकार के पुरस्कार देवल बंद करके सही दाम तय करे के काम करे के चाहीं. किसान के मान चाहीं, दया ना.”

स्थानीय इतिहासकार ओ. के. जॉन मानेलन कि रामन ‘वायनाड के ओह अंतिम पीढ़ी के आदिवासी बाड़न जे चाउर के फायदा खातिर ना, बलुक मानव जीवन खातिर बचइलक. ऊ खाली किसान नइखन, ऊ पर्यावरण बिनाश के खिलाफ ठाड़ एगो राजनीतिक व्यक्तित्व बाड़न.” बाकिर रामन अइसन बड़ाई पर जादे ध्यान ना देवस.

गीता आ उनकर बच्चा लोग आजो छोट-छोट क्यारी में हर किसिम के उगावे में उनका संगे लागल रहेला. कबो-कबो त किसिम खातिर कुछे सेंट जमीन उपलब्ध रहेला. बाकी काम होखे के चलते, कुछ बिया के बोवे घरिया खास ध्यान चाहीं, कुछ के काटे घरिया. “बूढ़-पुरनिया के सेहत ठीक रहत रहे, काहेकि ऊ लोग अनाज खात रहे,” गीता कहेली. “अब त जादेतर कुरचिया लोग कॉफी चाहे गोल मिरिच उगावेला. खाली रमने धान पर टिकल बाड़न.”

सांझ उतरे लागल बा, खेत पर उड़त ड्रैगनफ्लाई के पंख के नीचे चमक धउड़ जाला. चौका से उसना रहल भात के माटी जइसन सोंध महक आवता. माटी के घर के भीतरी बोरा में बंद पड़ल दाना सब चुपचाप बा, सैंकड़न बरिस के संघर्ष के कहानी समेटले, एह धरती पर जेकरा पहिले वायल नाडु, मतलब “धान के देस” कहल जात रहे

एगो जियत-जागत अजायबघर. इहंवा हर धाना के आपन नाम, आपन कहानी आउर आपन आत्मा बा.

अनुवाद: स्वर्ण कांता