تھار، جہاں ریت سے برتن صاف کیے جاتے ہیں

وِملا، تھار کی مٹھی بھر ریت اُس جوٹھے برتن میں ڈالتی ہیں، جس میں ہم نے ابھی ابھی کھانا کھایا ہے۔ برتن کو ہاتھوں میں گھماتے ہوئے وہ اس میں لگی جوٹھن اور چکنائی کو صاف کرتی ہیں۔ ’’ریت سے برتن اچھی طرح صاف ہو جاتے ہیں۔ پانی سے صاف نہیں ہوتے،‘‘ وہ اپنے گلابی گھونگھٹ کے اندر سے بولتی ہیں۔

کیوں؟ میں وملا کی ٹوٹی پھوٹی ہندی سمجھ لیتا ہوں، لیکن ان کی منطق کو سمجھ نہیں پاتا۔

’’یہاں کے پانی میں ’این اے سی ایل‘ [سوڈیم کلورائیڈ یعنی نمک] کی مقدار زیادہ ہے،‘‘ میری دوست پشپا چوہان (۲۷) بیچ میں بول پڑتی ہیں۔ وہ وملا کی نند ہیں اور آج کے دن میرے لیے مترجم کی ذمہ داری سنبھال رہی ہیں۔ ’’اگر ہم پانی استعمال کرتے ہیں تو برتنوں پر داغ رہ جاتے ہیں۔ یہاں کا پانی بھاری اور کھارا ہے۔‘‘

دنیا کے نویں سب سے بڑے نیم استوائی ریگستان میں آپ کا خیرمقدم ہے۔ یہاں زیر زمین پانی کے نمکین ذائقہ کی ارضیاتی وضاحت موجود ہے۔ یہاں بخارات کی شدت بارش سے زیادہ ہے۔ یہ عمل ہزاروں سال سے جاری ہے، جس کے نتیجہ میں نمک اور معدنیات یہاں کی مٹی اور پانی میں جمع ہو رہے ہیں۔ یہ ریگستان گجرات، راجستھان اور سرحد کی دوسری جانب پاکستان میں پنجاب اور سندھ کے علاقوں تک پھیلا ہوا ہے۔

اس ریگستان کے وسط میں راجستھان کے نو تشکیل ضلع (۲۰۲۳ میں) پھلودی کا یہ گاؤں، دیا کور واقع ہے۔ وملا کا گھر گاؤں کے کنارے ہے۔ اپنے گھر کے بالکل باہر بیٹھ کر، ۳۲ سالہ وملا دیوی برتن صاف کر رہی ہیں۔

وملا کا تعلق ریاست میں درج فہرست ذات کے طور پر درج میگھوال برادری سے ہے۔ روایتی طور پر میگھوال کاشت کاری کرتے تھے، مویشی پالتے تھے اور کپڑے اور کمبل بُنتے تھے۔ لیکن ذات پات کی صدیوں پرانی تفریق نے اس برادری میں تعلیم کے حصول اور ترقی کو تاریخی طور پر نچلی سطح پر رکھا ہوا ہے۔

وملا کے شوہر کنور لال (۳۶) اور ان کے بھائی بھوجا رام (۳۲) نے اپنے چھوٹے بہن بھائیوں کے لیے اچھے معیار کی تعلیم کو یقینی بنانے کی غرض سے اسکول چھوڑ دیا اور نمک کی کانوں میں مزدور کے طور پر کام کرنے لگے۔ کنور لال ایک بے زمین دلت کسان ہیں، اور اب لیز پر لی گئی ۴۰ بیگھہ زمین پر باجرا، گندم، میتھی اور مونگ پھلی اُگاتے ہیں (یہاں کا ۴ سے ۵ بیگھہ ایک ایکڑ کے برابر ہوتا ہے)۔ کم اور بے ترتیب بارش، بار بار کی خشک سالی، فصل کی ناکامی، اور خراب پیداوار کی وجہ سے پھلودی میں کاشتکاری ایک چیلنج ہے۔

تقریباً ۲۰۰ ملی میٹر اوسط بارش والے اس خشک خطہ میں پانی ایک نایاب اور قیمتی وسیلہ ہے۔ وملا برتنوں پر چپکی سخت ریت کو ہٹانے کے لیے جو چھوٹا سا پانی کا چھینٹا استعمال کرتی ہیں، وہ گھر سے متصل ’ٹنکا‘ یعنی زیر زمین حوض سے نکالا جاتا ہے۔

تھار ریگستان میں پانی کی کمی سے نبرد آزما ہونے کے لیے ٹنکا ایک مقبول تکنیک رہا ہے، حالانکہ باؤڑی (سیڑھی نما کنویں) اور تالاب کے مقابلے میں یہ پانی حاصل کرنے کا ایک نیا طریقہ ہے۔ سینٹرل ایرڈ زون ریسرچ انسٹی ٹیوٹ کے ذریعہ ۱۹۸۸ میں شائع ہونے والے ایک کتابچہ میں کہا گیا ہے کہ اس خطہ میں ٹنکا کی ابتدائی تعمیر ۱۶۰۷ میں راجہ سُر سنگھ نے گاؤں وادی کا میلان میں کی تھی۔ اور بعد میں، مہاراجہ اُدے سنگھ نے ۱۷۵۹ میں جودھ پور کے مہران گڑھ قلعہ میں بنوایا تھا۔ لیکن ۱۸۹۵-۹۶ کے عظیم قحط کے دوران اس خطہ میں بڑے پیمانے پر ٹنکے تعمیر کیے گئے تھے۔

’’ٹنکوں کا استعمال چھت سے گرنے والے بارش کے پانی کو جمع کرنے کے لیے کیا جاتا ہے، جسے پینے کے پانی کے طور پر استعمال کیا جاتا ہے۔ یہ سیمنٹ، کنکریٹ اور پتھر سے بنائے جاتے ہیں اور عام طور پر مغربی راجستھان میں استعمال ہوتے ہیں۔‘‘ وملا کے بھتیجے بدری نارائن چوہان (۱۹) کہتے ہیں، ’’۱۰ فٹ چوڑی اور ۲۰ فٹ لمبی ٹنکی میں تقریباً ۵۶ ہزار سے ۵۸ ہزار لیٹر پانی جمع کیا جا سکتا ہے۔ اور اس کی تعمیر پر تقریباً ۵۰ سے ۸۰ ہزار روپے کی لاگت آتی ہے۔‘‘

وملا کے گھر کے آنگن میں دو ٹنکے ہیں۔ پرانا ٹنکا ۲۰۰۱ میں بنایا گیا تھا، جس میں بارش کا پانی جمع ہوتا ہے۔ اور ایک بالکل نیا اور بڑا ٹنکا ہے، جس میں ان کی گھریلو ضروریات کے لیے ۶۰ ہزار لیٹر پانی جمع کیا جاتا ہے۔ آج بڑی گنجائش والے ٹنکوں میں ٹینکروں سے خرید کر پانی بھرا جاتا ہے۔ تقریباً ۵۰۰۰ لیٹر پانی ۵۰۰ روپے میں آتا ہے۔ یہ ٹینکرز اپنا پانی قریبی فلٹریشن پلانٹ، اندرا گاندھی کینال سے حاصل کرتے ہیں، جو ہندوستان کی سب سے لمبی نہر ہے۔ اس نہر میں پانی پنجاب کے ہریکے بیراج سے آتا ہے، یہ وہ مقام ہے جہاں ستلج اور بیاس ندیاں آپس میں ملتی ہیں۔

راجستھان کی ۲۰۴ کلومیٹر لمبی فیڈر نہر پھلودی تک تو پہنچتی ہے، لیکن کنور لال کے کھیتوں تک نہیں پہنچتی۔ وہ آبپاشی کے لیے بورویل پر انحصار کرتے ہیں، جس کے متعلق ان کا کہنا ہے کہ نہر کے آنے کے بعد اس میں پانی دوبارہ بھرنا شروع ہو گیا ہے۔ تاہم، زیرِ زمین پانی کا یہ مصنوعی ریچارج وِملا کے پینے کے پانی کے مسئلہ کو حل نہیں کرتا ہے۔ انہیں پانی خریدنا پڑتا ہے۔

لیکن ۲۰۰۰ کی دہائی کے اوائل تک حالات اس سے بھی بدتر تھے، جب خواتین کو پاس کے تالابوں یا کنووں سے پانی لانا پڑتا تھا۔ ’’ماں پانی لانے کے لیے صبح جلدی اٹھ جایا کرتی تھیں۔ اسکول جانے سے پہلے ہمیں گھر کے کام کاج میں ہاتھ بٹانا پڑتا تھا،‘‘ پُشپا یاد کرتی ہیں۔ ’’میں سوچا کرتی تھی کہ کاش ہمارے گھر کے پاس یا ہمارے گھر ہی میں پانی کی سپلائی ہوتی تو ہمیں اتنی دور پیدل نہ جانا پڑتا۔ اور میں اس میں صرف ہونے والے وقت کا استعمال حروفِ تہجی سیکھنے کے لیے کرسکتی تھی۔ یہ تب کی بات ہے جب میں پہلی جماعت میں پڑھتی تھی۔‘‘

آج برادری میں موجود ٹنکوں نے بارش کے پانی کو جمع کرنا ممکن بنا دیا ہے، جس سے لوگوں کو پہلی بار پینے کا پانی آسانی سے دستیاب ہوا ہے۔ گاؤں میں دلت ہونے کی وجہ سے میگھوالوں کو منظم طریقے سے تمام مشترکہ وسائل، بشمول گاؤں کے کنوؤں کے پانی، سے محروم رکھا جاتا ہے۔ اگرچہ وہ راجستھان میں درج فہرست ذاتوں میں سب سے بڑی آبادی ہیں (۲۰۱۱ کی مردم شماری کے مطابق)، اس کے باوجود میگھوال غالب ذاتوں کے استحصال اور تشدد کا سب سے زیادہ شکار ہیں۔

جب میں دیا کور میں ۲۰۱۰ میں بطور انٹرن آیا تھا، تب یہ بالکل الگ دنیا تھی۔ اس وقت تک سوئچ بورڈوں نے کمروں کے کونوں میں رکھے سیاہ دھوئیں والے مٹی کے تیل کے بوتل نما لیمپوں کی جگہ نہیں لی تھی۔ ہم اپنے موبائل کی اسکرینوں سے چپکے ہوئے نہیں رہتے تھے۔ ابھی حال ہی میں، میں نے خود کو چند ایسی بحثوں میں الجھا ہوا پایا جو ہمارے فون دیکھنے یا ان موضوعات کی جانب مڑ گئیں جو ان الگورِدم کے طے کردہ تھے، اور جنہوں نے ہمارے وقت کو اپنی گرفت میں لے رکھا ہے۔

کم از کم میگھوال برادری میں گوشت کھانے پر پرانی پابندی پچھلے کچھ سالوں میں ختم ہو گئی ہے۔ میرے ایک حالیہ دورہ کے دوران، ہم نے دوپہر کے کھانے میں مٹن کری اور باجرے کی روٹی کھائی۔ ہماری فیملی کے سربراہ گھیور رام نے ایک پلیٹ میں کھانا کھایا اور ہم باقی مردوں نے پرانے وقتوں کی طرح دوسری پلیٹ میں ساتھ مل کر کھایا۔ وملا کو سب سے آخر میں کھانا ملا۔ فیملی کے تمام مردوں کے کھانے کے بعد ہی عورتیں کھاتی ہیں۔ کچھ چیزیں نہیں بدلی ہیں۔

نہروں، ٹنکوں اور ٹینکروں نے بھلے ہی آج خواتین کی زندگیوں میں آسانی پیدا کر دی ہو، لیکن پانی کی کمی اور ریگستان کے سخت موسم کے خطرات ہنوز اس بات کا تعین کرتے ہیں کہ زندوں کو کیسے زندہ رہنا ہے۔ تھار کے علاقہ کو مروستھلی یعنی ’موت کی سرزمین‘ کہنے کی ایک وجہ ہے: ریگستان کے مہلک بخار، یعنی لو، کا اب بھی یہاں غلبہ ہے۔

سال ۲۰۲۲ میں پھلودی کا درجۂ حرارت ۵۱ ڈگری سیلسیس ریکارڈ کیا گیا تھا، جو ملک میں باضابطہ طور پر تصدیق شدہ سب سے اونچا درجۂ حرارت تھا۔ اس سے کچھ عرصہ قبل اس خطہ میں دھوپ کی شدت کی وجہ سے ونڈ ملز میں آگ لگنے کے مناظر سوشل میڈیا پر وائرل ہوئے تھے۔

تاہم، گاؤں میں چیزوں کو دیکھنے کا بہت سے لوگوں کا نظریہ مختلف ہے۔ بھوجا رام (۳۲) ان تبدیلیوں سے متعلق مثبت خیال رکھتے ہیں۔ ’’پہلے کسی شخص کو صرف ایک وقت کے مناسب کھانے کا انتظام کرنے کے لیے سخت جدوجہد کرنی پڑتی تھی۔ اب ایسا نہیں ہے۔ ہم تقریباً ہر چیز اپنے یہاں پیدا کرتے ہیں۔ یہیں اپنے گھر پر۔ جیسے گندم، مرچ، دھنیا اور زیرہ، سب کچھ کھیت سے آتا ہے۔ اور جو کچھ ہم کھاتے ہیں وہ خالص ہوتا ہے۔‘‘

لیکن گرمی کا کیا؟

’’ہم موسم کے عادی ہو چکے ہیں۔ ہم یہاں گرمی کو لے کر زیادہ فکرمند نہیں رہتے،‘‘ وہ کہتے ہیں۔ ’’یہ واقعی اچھا ہے۔ علاقہ اچھا ہے، ماحول صاف ستھرا ہے۔ پہلے بہت جدوجہد کرنی پڑتی تھی۔ یہ پانی نہیں تھا، پودے نہیں تھے، جانوروں کو رکھنے کی جگہ نہیں تھی۔ اتنا اونچا درجۂ حرارت کب تک رہتا ہے؟ صرف ۵ سے ۷ دن تک۔ لیکن یہ چند دن زیادہ فرق نہیں ڈالتے۔‘‘

حالانکہ نیویارک ٹائمز کے انٹریکٹو کیلکولیٹر کے مطابق، بھوجا رام کی پیدائش کے سال دیا کور میں تقریباً ۲۴۰ گرم دن درج کیے گئے تھے۔ جبکہ آج اس گاؤں میں سال کے ۲۵۳ دن اونچے درجۂ حرارت والے ہوتے ہیں۔ اور جب وہ ۸۰ سال کے ہو جائیں گے، تو اس گاؤں کے تقریباً ۲۶۰ سے ۲۷۷ دن شدید گرمی والے دن ہوں گے۔

جب ہم بات کر تے ہیں، تو وِملا کے بچے سونو اور پوجا میرے نوٹ پیڈ پر مختلف قسم کی شکلیں اور حروفِ تہجی بنا رہے ہیں۔ سب سے بڑا بیٹا، پردیپ، انگریزی کے وہ جملے لکھتا ہے، جو اس نے اسکول میں سیکھے ہیں۔ ’’میرا نام پردیپ ہے۔ میری ایک بہن ہے۔ میرا ایک بھائی ہے۔ میں پانچویں جماعت میں پڑھتا ہوں۔ میں نئے سروودیہ سیکنڈری اسکول دیا کور (میں پڑھتا ہوں)۔ میرے والد ایک کسان ہیں۔ میری والدہ ایک گھریلو خاتون ہیں۔‘‘

میں کچھ فاصلہ پر وملا کو کھیت میں کام کرتے ہوئے دیکھتا ہوں، سردیوں کی دھوپ ان کے سر پر چمک رہی ہے۔

پانچ مہینے بعد بارش کے وہ نایاب بادل اوپر آسمان میں دوڑیں گے۔ لفظ ’میگھوال‘ سنسکرت کے دو الفاظ ’میگھ‘ اور ’وال‘ سے ماخوذ ہے، جس کا مطلب ہے بادلوں کے لوگ۔ میری یادوں میں وہ منظر محفوظ ہے، جب بارش کی ابتدائی چند بوندیں بچوں کی جلد پر پڑتی تھیں، تو وہ اپنے دادا گھیور رام سے سیکھے ہوئے بول گنگنانے لگتے تھے۔

میئی میئی آوے، گھی روٹی کھاوے
میئی میئی آوے، گھی روٹی کھاوے

[آ جا بارش جلدی آ، گھی روٹی کھانے آ
آ جا بارش جلدی آ، گھی روٹی کھانے آ]