बदरा बदरा अइह, घीव रोटी खइह!

बिमला हमनी के ताजा-ताजा खाएल जूठ कटोरा सब में थार के रेगिस्तान के एक मुट्ठी रेत डाल देत बारी. बरतन से जूठा आ चिकनई हटावे खातिर ऊ ओकरा हाथ घुमा-घुमा के मांजत बारी. आपन गुलाबी घूंघट के आड़ से ऊ कहतारी, “रेत से बरतन नीमन साफ हो जाला. पानी से ना होखे.”

अइसन काहे? हमरा बिमला के टूटल-फूटल हिंदी समझ त आ गइल, बाकिर ई बात पल्ले ना पड़ल.

हमार दोस्त पुष्पा चौहान (27 बरिस) बिमला के ननदो बारी, आउर ओह दिन ऊ हमरा खातिर दुभाषिया के काम करत रहस. ऊ बीच में समझइली, “इहंवा के पानी में सोडियम क्लोराइड (नून) बहुते बा. एकरा से बरतन धोवला से, ओकरा पर दाग रह जाला. आ इहंवा के पानी भारी आ खारा बा.”

दुनिया के नौवां सबले बड़ उपोष्णकटिबंधीय मरुस्थल में राउर स्वागत बा. इहंवा के भूजल में खारापन होखे के वैज्ञानिक कारण बा. एह इलाका में पानी के भाप बन के उड़ जाए के रफ्तार, बरखा से कहूं जादे बा. हजारन बरिस से अइसन होत आवता. एहि से नून आ खनिज माटी आ पानी में जमत चल गइल. ई मरुस्थल गुजरात, राजस्थान आ सरहद पार पाकिस्तान के पंजाब आ सिंध इलाका ले फइलल बा.

एहि मरुस्थल के बीच राजस्थान के अभी नयका बनल (2023) फलोदी जिला में दया कोर गांव स्थित बा. गांव के एक सिरा पर बिमला के घर बा. आ घर के ठीक बाहर ओसारा पर 32 साल के बिमला देवी उंकड़ू बइठल बरतन मांजत बाड़ी.

बिमला देवी मेघवाल जाति से आवेली, जे राज्य में अनुसूचित जाति में गिनाला. ई लोग पारंपरिक रूप से खेती, मवेसी पालन आ बुनकरी के काम करत रहल बा. बाकिर सदियन से चलल आ रहल जात-पात के भेदभाव एह समाज के एतना पाछू धकेल देले बा कि पढ़ाई-लिखाई, रोजी-रोटी आ सामाजिक तरक्की में ई लोग बहुते पाछू रह गइल बा.

बिमला के घरवाला कंवरलाल (36) बरिस आ उनकर भाई भोजाराम (32) के स्कूल बीचे में छूट गइल रहे. ऊ लोग नून के खान सब में मजूरी करके आपन छोट भाई-बहिन लोग के खूब बनिहा से पढ़वलक. भूमिहीन दलत किसान कंवरलाल पट्टा पर लेवल 40 बीघा जमीन (इहंवा 4 से 5 बीघा जमीन मोटा-मोटी एक एकड़ होखेला) पर बाजरा, गेहूं, मेथी आ चिनिया बदाम उगावेलन. बाकिर फलोदी में खेती कइल आसान नइखे. बरखा कम होखेला, कब होई कब ना एकर भरोसा ना रहे. सूखा बेर-बेर पड़े से फसल बरबाद हो जाला आ उपज ढंग से ना हो पावे. ई सब इहंवा के आम समस्या बा.

एकदम सुखाड़ वाला इळाका में साल भर में औसतन बस 200 मिली बरखा पड़ेला. एही से पानी इहंवा बहुत कम आ बहुत कीमती बा. बिमला बरतन पर लागल जूठ हटावे खातिर जवन पानी के छींटा मारेली, ऊ घर के बगल में बनल टांका से आवेला. एह टांका में जमीन के नीचे के पानी सहेज के रखल रहेला.

थार मरुभूमि में पानी के किल्लत से निपटे में टांका बहुत काम आवेला. अइसे त बावड़ी आ तालाब के बनिस्पत ई नया तरीका जरूर बा, बाकिर बहुते काम के बा. सन् 1988 में केंद्रीय शुष्क क्षेत्र अऩुसंधान संस्थान से छपल एगो किताब में बतावल गइल बा कि एह इलाका के पहिल टांका 1607 में राजा सूरसिंह वाड़ी के मेलना गांव में बनवले रहस. बाद में 1759 में जोधपुर के मेहरानगढ़ किला में महाराजा उदयसिंह भी टांका बनवइलन. बाकिर 1895-96 के भयानक अकाल में एह इलाका में खूब टांका बनावल गइल.

बिमला के भतीजा, उऩ्नीस बरिस के बद्रीनारायण चौहान बतावेलन, “बरखा के पानी छत से बह के टांका में जमा हो जाला. आ इहे पानी पिए के काम आऴेला. सीमेंट, कंक्रीट आ पत्थर से बनल ई टांका पस्चिमी राजस्थान में खूब देखे के मिलेला. 10 फीट चौड़ आ 20 फीट लमहर टांका में कोई 56 से 58 लीटर पानी जमा हो सकेला. एकरा बनावे में 50 से 80 हजार रुपइया के खरचा आवेला.”

बिमला के घर में अंगना में दू-दू ठो टांका बा. पुरनका टांका 2001 में बनल रहे, जवना में बरखा के पानी जमा कइल जाला. दोसर नयका आ बड़का टांका घर के जरूरत खातिर कोई 60 हजार लीटर पानी रख सकेला. आजकाल ई बड़ टांका टैंकर से कीन के लावल पानी से भरल जाला. 5 हजार लीटर पानी खातिर कोई 500 रुपइया खरचा करे पड़ेला. ई टैंकर वाला पानी लगे के इंदिरा गांधी नहर के फिल्टर प्लांट से आवेला. भारत के सबले लमहर, इंदिरा गांधी नहर, में पंजाब के हरिके बांध से पानी आवेला, जहंवा सतलुज आ ब्यास नदी मिलेला.

कोई 204 किमी लमहर राजस्थान फीडर नहर फलोदी ले त पहुंच इल बा, बाकिर कंवरलाल के खेत ले नइखे पहुंचल. उनका अबहियो बोरवेल पर ही निर्भर रहे के पड़ेला. उनकर कहनाम बा कि नहर बने के बाद से बोरवेल के जलस्तर फिर से बढ़े लागल बा. अइसे, त भूजल बढ़ावे खातिर कइल जा रहल एह जुगाड़ से बिमला के पिए वाला पानी के दिक्कत दूर नइखे हो पावत. पिए खातिर पानी आजो खरीदहीं के पड़ेला.

बाकिर 2000 के दसक के सुरु में स्थिति आउर खराब रहे. मेहरारू लोग के लगे के तलाब, चाहे ईनार से पानी भर के लावे पड़त रहे. पुष्पा के इयाद आवता, “माई पानी लावे खातिर बहुते भोर में उठ जात रहस. स्कूल जाए से पहिले हमनी के घर के काम में हाथ बंटावे पड़त रहे. पहिलका कक्षा में पढ़त रहीं, त इहे सोंची कि काश घर लगे, चाहे घरे पानी मिल जाइत, त हमनी के एतना दूर ना जाए के पड़ित. ओह बचल समय में हम कुछ आउरो अक्षर पढ़ लेतीं.”

आज समुदाय में बनल टांका चलते बरखा के पानी जमा भइल संभव हो गइल बा. आउर पहिल बेर लोग खातिर पिए के पानी पहिले से सुलभ भइल बा. बाकिर गांव में दलित होखे के चलते, मेघवाल लोग के अबहियो साझा संसाधन, इहंवा ले कि गांव के ईनार सब से पानी लेवे से सुनियोजित तरीका से वंचित रखल जाला. राजस्थान में अनुसूचित जाति के बीच सबसे बड़ आबादी (2011 के जनगणना) होखला के बावजूद, मेघवाल लोग आजो दबंग जाति के लोग के अत्याचार, भेदभाव आ हिंसा सबले जादे झेलेला.

हम जब 2010 में इहंवा प्रशिक्षण लेत रहीं, त दया कोर कुछ अउरिए रहे. ओह घरिया कमरा के कोना में कालिख लागल किरासन तेल वाला ढिबरी जरत रहत रहे, बिजली के स्विच बोर्ड ना रहे. हमनी के मोबाइल के स्क्रीन से चिपकल ना रहत रहीं. अबकी बेर अइनी त देखनी, बात करत-करत लोग बीच में मोबाइल चलावे लागता. हमनी के बीच चरचा भी उहे विषय पर होखेला, जेकरा मोबाइल के एल्गोरिदम हमनी के परोसत रहेला.

पछिला कुछ बरिस में मेघवाल बिरादरी में मांश खाए पर रहल पुरान रोक-टोक अब बहत हद ले हट गइल बा. हाल में जब हम उहंवा गइल रहीं, त दुपहरिया में मटन आ बाजरा के रोटी बनल रहे. घर के मुखिया घेवरराम आपन अलग थरिया में खइलन आउर हमनी बाकी मरद लोग एके थारी में संगे-संगे खइनी, जइसन पहिले के समाज में होत रहे. बाकिर बिमला सब के खइला के बाद खइली. आजो घर के औरत लोग मर्द लोग के खइला के बादे खाएला. कुछ रिवाज अबहियो नइखे बदलल.

नहर, टांका आ टैंकर चलते मेहरारू लोग के जिनगी त आसान भइल बा. बाकिर पानी के कमी आ रेगिस्तान के कठोर मौसम के खतरा से अबहियो लोग के जिनगी नियंत्रित होखेला. इहे कारण बा कि थार क्षेत्र के मरुस्थली, माने मृत्यु के भूमि पुकारल जाला. घातक रेगिस्तानी बुखार ‘लू’ आजो आपन असर बनवले रहेला.

सन् 2022 में फलोदी में देश के आधिकारिक रूप से सत्यापित सबले जादे गरमी, 51 डिग्री दर्ज कइल गइल रहे. एकरा से कुछ समय पहिले इहे इलाका में तेज घाम चलते पवन चक्की सब में आग लगे के बात भी खूब वायरल भइल रहे.

गांव के लोग अइसे, एह बदलाव के अलग तरीका से देखेला. भोजाराम उम्मीद भरल आवाज में कहेलन, “पहिले एक आदमी के एक समय के खाना ना जुटत रहे. बाकिर अब अइसन नइखे. हमनी लगभग हर चीज अपना हाथ से पैदा करत बानी. इहंई आपन घर पर. गेहूं, मरिचाई, धनिया, जीरा... सब खेत से आवेला. हमनी एकदम शुद्ध चीज खाइला.”

बाकिर एतना गरमी के का?

“हमनी के इहंवा के गरम हवा-पानी के आदत बा. हमनी एकर एतना परवाह ना करीं,” ऊ कहेलन. “ई जगह बहुते नीमन बा. वातावरण साफ बा. पहिले बहुते संघर्ष रहे. पानी ना रहे, ई पौदा सब ना रहे. मवेसी के रखे के जगह ना रहत रहे. एतना जादे गरमी आखिर केतना दिन टिकी? 5 दिन, चाहे 7 दिन. एतना से हमनी के कवनो खास फरक ना पड़े.”

बाकिर न्यूयॉर्क टाइम्स के इंटरैक्टिव कैलकुलेटर के हिसाब से जवन साल भोजाराम के जनम भइल, दया कोर गांव में कोई 240 दिन गरम होखत रहे. अब हर साल ई बढ़के 253 दिन हो गइल बा. भोजाराम जबले 80 साल के होखिहन, एह गांव में मोटा-मोटी 260 से 277 दिन झुलसा देवे वाला होखी.

हमनी के गपशप के बीच में सोनू आ पूजा हमार नोटपैड पर आड़ा-तिरछा आकृति आ अक्षर बनावे में लागल बाड़न. सबले बड़ लइका, प्रदीप स्कूल में सीखल अंगरेजी के वाक्य लिख के देखावत बाड़न. ऊ लिखलन, “हमार नाम प्रदीप बा. हम एक भाई, एक बहिन बानी. हम पचमा में पढ़िला. हम नयका सर्वोदय माध्यमिक विद्यालय, दया कोर में पढ़त बानी. हमार बाऊजी किसान बाड़न आ माई घर संभारेली.”

तनी दूर, खेत में विमला काम में जुटल बाड़ी. जाड़ा के मोलायम धूप उनकर माथा पर चमक रहल बा.

पांच महीना बाद एह आसमान में बरखा वाला बदरा मंडरात लउकी. ‘मेघवाल’ शब्द, संस्कि के दू गो शब्द- मेघ आ वाल से बनल बा. माने बदरा के लोग. हमरा आजो इयाद बा. बरखा के पहिल बूंद जइसहीं लइका सब के देह पर गिरल, ऊ लोग आपन दादा घेवरराम के सिखावल एगो तुकबंदी वाला गीत गावे लागल.

मेघ मेघ आजा, घीव रोटी खाजा
मेघ मेघ आजा, घीव रोटी खाजा