ಯುದ್ಧ ಇರಾನಿನಲ್ಲಿ, ಸಾಲ ಪಂಜಾಬಿನಲ್ಲಿ

ಅತ್ತ ಗೋಧಿ ಹೊಲದಲ್ಲಿ ಫಸಲು ಬಂಗಾರದ ಬಣ್ಣಕ್ಕೆ ತಿರುಗುತ್ತಿದ್ದರೆ, ಇತ್ತ ದಲ್ಬಾರ್‌ ಸಿಂಗ್‌ ಅವರ ಆತಂಕ ಹೆಚ್ಚುತ್ತಾ ಸಾಗುತ್ತಿತ್ತು. ಇನ್ನೇನು ಕಟಾವಿನ ಸಮಯ ಬರುವುದಿತ್ತು. ಈ ಸಮಯದಲ್ಲಿ ಡೀಸೆಲ್‌ ಎನ್ನುವುದು ಕೇವಲ ಇಂಧನವಲ್ಲ, ಅದು ಬದುಕಿನ ಅನಿವಾರ್ಯ ಭಾಗವಾಗಿಬಿಡುತ್ತದೆ. ಇದೇ ಕಾರಣಕ್ಕಾಗಿ ಬರ್ನಾಲಾ ಜಿಲ್ಲೆಯ ಪಟ್ಟಿ ಗ್ರಾಮದ ಈ ಭೂಹೀನ ದಲಿತ ರೈತ, ತನ್ನ ಡೀಸೆಲ್ ಡ್ರಮ್ ಸದಾ ತುಂಬಿರುವಂತೆ ನೋಡಿಕೊಳ್ಳಲು ಶೇ. 18ರಷ್ಟು ವಾರ್ಷಿಕ ಬಡ್ಡಿದರದಲ್ಲಿ ಹಣವನ್ನು ಸಾಲವಾಗಿ ಪಡೆಯಲು ಕಿಂಚಿತ್ತೂ ಹಿಂಜರಿಯಲಿಲ್ಲ.

55 ವರ್ಷದ ದಲ್ಬಾರಾ ಸಿಂಗ್‌ ತನ್ನ ಮೂವರು ಒಡಹುಟ್ಟಿದವರೊಂದಿಗೆ ಸೇರಿ, ಅನಿವಾಸಿ ಭಾರತೀಯರೊಬ್ಬರ ಬಳಿ ಗೇಣಿಗೆ ತೆಗೆದುಕೊಂಡಿರುವ 20 ಎಕರೆ ಭೂಮಿಯಲ್ಲಿ ಕೃಷಿ ಮಾಡುತ್ತಿದ್ದಾರೆ. ಅಲ್ಲದೆ ಅವರು ಗೋಧಿ ಕೊಯ್ಲಿನ ಹಂಗಾಮಿನಲ್ಲಿ ಹೈನುಗಾರರಿಗಾಗಿ ಗೋಧಿ ಹುಲ್ಲನ್ನು ಕತ್ತರಿಸಿ ಕೊಡುವ ಕೆಲಸವನ್ನೂ ಮಾಡುತ್ತಾರೆ. ತಮ್ಮ ಟ್ರ್ಯಾಕ್ಟರ್ ಮತ್ತು ರೀಪರ್ ಯಂತ್ರದತ್ತ ಕೈತೋರಿಸುತ್ತಾ ಅವರು ಹೀಗೆಂದರು, "ಇವು ವಿಪರೀತ ಡೀಸೆಲ್‌ ಕುಡಿಯುತ್ತವೆ. ಪೂರ್ಣ ಸಾಮರ್ಥ್ಯದಲ್ಲಿ ಇವುಗಳನ್ನು ನಡೆಸಿದರೆ ಈ ಒಂದು ಡ್ರಮ್‌ ಡೀಸೆಲ್‌ ಎರಡು ದಿನಗಳಿಗಷ್ಟೇ ಬರುತ್ತದೆ."

ಆದರೆ ಇಷ್ಟು ಬಡ್ಡಿ ದರದಲ್ಲಿ ಸಾಲ ತೆಗೆದುಕೊಳ್ಳುವುದು? “ಬೇರೆ ದಾರಿ ಏನಿದೆ? ವಾರದ ನಂತರ ಡೀಸೆಲ್‌ ಸಿಗದೆ ಹೋದರೆ ಏನು ಮಾಡೋದು? ಫಸಲು ಪೂರ್ತಿ ಕೊಳೆತು ಹೋಗುತ್ತದೆ. ಮಗು ನೋಡಿಕೊಂಡ ಹಾಗೆ ನೋಡಿಕೊಂಡಿದ್ದೇನೆ ಬೆಳೆಯನ್ನು” ಎಂದು ಅವರು ಹೇಳುತ್ತಾರೆ. ಕಳೆದ ಒಂದು ವರ್ಷದಿಂದ ಅವರಿಗೆ ಯಾವುದೇ ಸಂಪಾದನೆ ಇರದ ಕಾರಣ ಅವರ ಆದಾಯ ಇಷ್ಟೇ ಎಂದು ಲೆಕ್ಕ ಹಾಕುವುದು ಕಷ್ಟ. ಅವರ ನಷ್ಟ ಮತ್ತು ಸಾಲದ ಬಾಬ್ತು ಏರುತ್ತಲೇ ಸಾಗುತ್ತಿದೆ.

ಪಂಜಾಬ್‌ ರೈತರ ಪಾಲಿಗೆ ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧವೆನ್ನುವುದು ಕೇವಲ ಸುದ್ದಿಯಲ್ಲ. ಅದು ಅವರ ಸಾಲದ ಹೊರೆಯನ್ನು ಇನ್ನಷ್ಟು ಹೆಚ್ಚಿಸುವ ಪಿಡುಗು. ಇನ್ನು ದಲ್ಬಾರಾ ಸಿಂಗ್ ಮತ್ತು ಅವರಂತಹ ಅನೇಕರ ಪಾಲಿಗೆ ಈ ಯುದ್ಧ ಇನ್ನೂ ದೊಡ್ಡ ಬಿಕ್ಕಟ್ಟು. ಇವರ ಮಕ್ಕಳು ಗಲ್ಫ್ ರಾಷ್ಟ್ರಗಳಲ್ಲಿ ಕಾರ್ಮಿಕರಾಗಿ ಮತ್ತು ಅರೆಕುಶಲ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದು, ಈ ಯುದ್ಧ ಅವರ ಭವಿಷ್ಯವನ್ನೇ ಡೋಲಾಯಮಾನ ಸ್ಥಿತಿಗೆ ತಂದಿಟ್ಟಿದೆ.ದಲ್ಬಾರಾ ಸಿಂಗ್ ಕಳೆದ ತಿಂಗಳಷ್ಟೇ 4 ಲಕ್ಷ ರೂಪಾಯಿ ಸಾಲ ಮಾಡಿ ಮಗನನ್ನು ಸೈಪ್ರಸ್‌ಗೆ ಕಳುಹಿಸಿದ್ದರು. ಇದೀಗ ಯುದ್ಧದಿಂದಾಗಿ ಅಲ್ಲಿನ ಪ್ರವಾಸೋದ್ಯಮ ಮತ್ತು ಸಾರಿಗೆ ವಲಯ ಕುಸಿದಿದ್ದು, ಅವರ ಮಗ ಕೆಲಸ ಸಿಗದೆ ಮನೆಗೆ ಮರಳುತ್ತಿದ್ದಾರೆ. ಇದು ದಲ್ಬಾರ್‌ ಸಿಂಗ್‌ ಅವರನ್ನು ಚಿಂತೆಗೆ ದೂಡಿದೆ. ಜಾಗತಿಕ ಮಟ್ಟದ ಈ ಯುದ್ಧ ತನ್ನ ಬದುಕಿನ ಬೀರುತ್ತಿರುವ ಪರಿಣಾಮದ ಅರಿವಿಲ್ಲದ ಅವರು, ನಮ್ಮ ಮಾತುಕತೆಯ ನಡುವೆ ಒಮ್ಮೆಯೂ ಯುದ್ಧದ ಕುರಿತು ಚರ್ಚಿಸಲಿಲ್ಲ. ಇದೆಲ್ಲದಕ್ಕೂ ತನ್ನ ಹಣೆಬರೆಹವೇ ಕಾರಣ ಎಂದ ಅವರ ಮಾತಿನಲ್ಲಿ ಮುಗ್ಧತೆ ಎದ್ದು ಕಾಣುತ್ತಿತ್ತು.

ಗೋಧಿ ಕೊಯ್ಲಿನ ದಿನ ಹತ್ತಿರವಾಗುತ್ತಿದ್ದಂತೆ ಯುದ್ಧವೂ ಆರಂಭಗೊಂಡಿತು. ಇದರಿಂದ ಸೃಷ್ಟಿಯಾದ ಅನಿಶ್ಚಿತತೆಗೆ ಅಂಜಿದ ರೈತರು ಹದಿನೈದು ದಿನಗಳ ಹಿಂದೆ ಮುಂಚಿತವಾಗಿ ಡೀಸೆಲ್‌ ಸಂಗ್ರಹಿಸಿಡಲು ಬಂಕುಗಳತ್ತ ದೌಡಾಯಿಸಿದರು. ಡೀಸೆಲ್‌ ಬಂಕುಗಳಲ್ಲಿ ಹಿಂದಿನ ಟ್ರಾಲಿಯಲ್ಲಿ ಡ್ರಮ್ಮುಗಳನ್ನಿರಿಸಿಕೊಂಡ ಟ್ರಾಕ್ಟರುಗಳ ಸಾಲು ತೀರಾ ಸಾಮಾನ್ಯವಾಗಿತ್ತು ಈ ಸಮಯದಲ್ಲಿ. “ಅವರೆಲ್ಲರೂ ವಿಪರೀತ ಬಡ್ಡಿ ಕೊಟ್ಟು ಸಾಲ ತರುತ್ತಿದ್ದಾರೆ” ಎನ್ನುತ್ತಾರೆ ಪಟಿಯಾಲ ಜಿಲ್ಲೆಯ ಭಾರತಿ ಕಿಸಾನ್ ಯೂನಿಯನ್ (ಡಕೌಂಡಾ) ನಾಯಕರಘಬೀರ್ ಸಿಂಗ್ ದಕಾಲಾ.

ಬಾಡಿಗೆ ಆಧಾರಿತ ಕಟಾವು ಯಂತ್ರದ ಮಾಲೀಕರು ಪ್ರಸ್ತುತ ದೊಡ್ಡ ಸವಾಲನ್ನು ಎದುರಿಸುತ್ತಿದ್ದಾರೆ. ಗ್ರಾಮದಲ್ಲಿ ಐದು ಎಕರೆ ಭೂಮಿಯನ್ನು ಹೊಂದಿರುವ 31 ವರ್ಷದ ಲಖ್ವಿಂದರ್ ಸಿಂಗ್ ಅವರಿಗೆ ಕೇವಲ ತಮ್ಮ ಜಮೀನನ್ನು ನಂಬಿಕೊಂಡು ಜೀವನ ಸಾಗಿಸಲು ಸಾಧ್ಯವಿಲ್ಲ ಎನ್ನಿಸಿತು. ಹೀಗಾಗಿ ಅವರು ಕಳೆದ ವರ್ಷ ಕಂಬೈನ್ ಹಾರ್ವೆಸ್ಟರ್ ಯಂತ್ರವನ್ನು - ಶೇ. 100ರಷ್ಟು ಸಾಲದ ಹಣವನ್ನು ಹಾಕಿ - 12 ಲಕ್ಷಕ್ಕೆ ಖರೀದಿಸಿದರು. ಕಳೆದ ವರ್ಷ ಎರಡೂ ಹಂಗಾಮಿನ ಬೆಳೆ ಕೊಯ್ಲಿನಿಂದ ಕೇವಲ 1.5 ಲಕ್ಷ ರೂಪಾಯಿ ಮಾತ್ರವೇ ಗಳಿಸಿದ್ದ ಅವರ ಪಾಲಿಗೆ ಇದೊಂದು ಬಹಳ ಅಪಾಯಕಾರಿ ನಿರ್ಧಾರವಾಗಿತ್ತು. ಇದಲ್ಲದೆ ಊರಿನ ಸಹಕಾರಿ ಬ್ಯಾಂಕಿಗೆ ಅವರು 3 ಲಕ್ಷ ರೂಪಾಯಿ ಸಾಲ ಕಟ್ಟಬೇಕಿದೆ. ಪ್ರತಿ ಆರು ತಿಂಗಳಿಗೊಮ್ಮೆ ಹಣಕಾಸು ಸಂಸ್ಥೆಗೆ 1 ಲಕ್ಷ ರೂಪಾಯಿ ಕಂತು ಕಟ್ಟಬೇಕು. ಇದರ ಜೊತೆಗೆ ಈಗ ಡೀಸೆಲ್ ಖರೀದಿಸಲು ಅವರು ತಮ್ಮ ಆರ್ತಿಯಾ (ಕಮಿಷನ್ ಏಜೆಂಟ್ ಮತ್ತು ಸಾಲದಾತ) ಬಳಿ 20,000 ರೂಪಾಯಿ ಸಾಲ ಕೇಳಿದ್ದಾರೆ. "ಈ ಕೊಯ್ಲು ಕೇವಲ 20 ದಿನಗಳ ತನಕವಷ್ಟೇ ಇರುತ್ತದೆ. ಈ ಮೂರು ವಾರಗಳಲ್ಲಿ ಒಂದು ದಿನ ಯಂತ್ರ ಕೆಲಸವಿಲ್ಲದೆ ನಿಂತರ ಅದನ್ನು ನಾನು ಭರಿಸುವುದು ಕಷ್ಟ. ಒಂದು ವೇಳೆ ಕಂತು ಕಟ್ಟದೆ ಹೋದರೆ ಹಾರ್ವೆಸ್ಟರ್‌ ಯಂತ್ರವನ್ನೇ ಕಳೆದುಕೊಳ್ಳಬೇಕಾಗುತ್ತದೆ" ಎಂದು ಅವರು ಹೇಳುತ್ತಾರೆ.

ಈಗಾಗಲೇ ಸಾಲದ ಸುಳಿಯಲ್ಲಿ ಸಿಲುಕಿಕೊಂಡಿರುವ ಪಂಜಾಬ್‌ ರಾಜ್ಯದ ಗ್ರಾಮೀಣ ಭಾಗದ ರೈತರು ಇದೀಗ ಇನ್ನಷ್ಟು ಆಳದ ಸಾಲದ ಬಲೆಯತ್ತ ಸಾಗತೊಡಗಿದ್ದಾರೆ. ಪಂಜಾಬ್ ರಾಜ್ಯ ರೈತರು ಮತ್ತು ಕೃಷಿ ಕಾರ್ಮಿಕರ ಆಯೋಗವು ಡಿಸೆಂಬರ್ 2025ರಲ್ಲಿ ನಡೆಸಿದ ಅಧ್ಯಯನದ ಪ್ರಕಾರ, ರಾಜ್ಯದ ಕೃಷಿಕರು ಬ್ಯಾಂಕುಗಳಿಗೆ ಸುಮಾರು ರೂಪಾಯಿ 1.04 ಲಕ್ಷ ಕೋಟಿ ಮತ್ತು ಲೇವಾದೇವಿಗಾರರಿಗೆ ಸುಮಾರು ರೂಪಾಯಿ 20,000 ಕೋಟಿ ಸಾಲ ಬಾಕಿ ಉಳಿಸಿಕೊಂಡಿದ್ದಾರೆ. ಕಳೆದ ಎರಡು ದಶಕಗಳಲ್ಲಿ ಗ್ರಾಮೀಣ ಸಾಲದ ಪ್ರಮಾಣವು ಐದು ಪಟ್ಟು ಹೆಚ್ಚಾಗಿದೆ. ಪ್ರಸ್ತುತ ನಡೆಯುತ್ತಿರುವ ಯುದ್ಧವು ಈಗಲೇ ಊಹೆಗೆ ನಿಲುಕದಂತಿರುವ ಸಾಲದ ಲೆಕ್ಕವನ್ನು ಇನ್ನಷ್ಟು ಹೆಚ್ಚಿಸುವ ಮುನ್ಸೂಚನೆಯನ್ನು ನೀಡಿದೆ.

ಸಾಲಸೋಲ ಮಾಡಿ ಡೀಸೆಲ್‌ ತಂದಿಟ್ಟುಕೊಂಡಿದ್ದರೂ ಮುಂದಿನ ದಾರಿ ಇನ್ನಷ್ಟು ಕಟ್ಟದ್ದು ಎನ್ನುವುದು ದಲ್ಬಾರಾ ಸಿಂಗ್‌ ಅವರಿಗೆ ಗೊತ್ತಿದೆ. ಜೊತೆಗೆ ಮಗನೂ ಸೈಪ್ರಸ್‌ ದೇಶದಿಂದ ಮರಳಿ ಬರಲಿದ್ದಾನೆ. ಒಂದು ವೇಳೆ ಕೊಯ್ಲು ಸುಸೂತ್ರವಾಗಿ ನಡೆದರೂ, ಅದರ ಬೆನ್ನಲ್ಲೇ ಬಿತ್ತನೆ ಹಂಗಾಮು ಆರಂಭಗೊಳ್ಳಲಿದೆ. "ಡೀಸೆಲ್ಲಿನ ಹಾಗೆ ಗೊಬ್ಬರ ಕೂಡಾ ಇದೇ ಮಾರ್ಗದಲ್ಲಿ [ಸಮುದ್ರ ಮಾರ್ಗವಾಗಿ] ಬರುತ್ತದೆ ಎನ್ನುತ್ತಾರೆ, ನಿಜವೇ?" ಎಂದು ಅವರು ಕೇಳಿದರು. ಸದ್ಯಕ್ಕೆ ಇದು ಸರ್ಕಾರವು ಖಂಡಿತ ಉತ್ತರಿಸಲೇಬೇಕಾದ ಪ್ರಶ್ನೆ.

ಅನುವಾದ: ಶಂಕರ. ಎನ್. ಕೆಂಚನೂರು