اخروٹ کی گھٹتی قیمت سے کشمیری تاجر مایوس

سرینگر کے ہروَن محلہ کی پرسکون گلی میں اچانک تیز آواز گونجتی ہے۔ محمد افضل اور ساجد خان اخروٹ کے ایک درخت (جُگلانس ریجیا) کو زور زور سے پیٹ رہے ہیں اور یہ آواز آس پاس ٹین کی چھت والے گھروں پر اخروٹ گرنے سے آ رہی ہے۔

تقریباً سو فٹ اونچے، یعنی کسی دس منزلہ عمارت جتنے بڑے درخت سے اخروٹ توڑنا خطرناک کام ہے۔ اس لیے، اخروٹ توڑنے والے مزدور کافی ماہر ہوتے ہیں، جنہیں ’چھنان وول‘ کہا جاتا ہے۔ جموں کے راجوری میں رہنے والے ۲۴ سالہ محمد افضل گزشتہ چھ برسوں سے اخروٹ توڑنے کا کام کر رہے ہیں۔ ہر سیزن میں وہ اس کام کے لیے کشمیر آتے ہیں۔ وہ کہتے ہیں، ’’مجھے ڈر لگتا ہے، کیوں کہ یہ درخت بہت اونچے ہوتے ہیں۔‘‘ اخروٹ توڑنے کے علاوہ وہ دوسرے سیزن میں درختوں کو کاٹنے اور سیب کی پیکیجنگ کا کام کرتے ہیں۔

اگست سے لے کر اکتوبر تک اخروٹ کی فصل کا موسم ہوتا ہے۔ اس دوران افضل کا دن صبح سات بجے شروع ہوتا ہے اور شام چھ بجے ختم ہوتا ہے۔ وہ درختوں کی لمبائی کے حساب سے ہر دن چار پانچ درختوں پر چڑھتے ہیں، کسی مضبوط لکڑی سے بنی چھڑی یا بید سے درخت کی اوپری شاخوں کو پیٹتے ہیں۔

افضل کو درخت سے اخروٹ توڑنے کا کام بیحد چیلنج بھرا لگتا ہے۔ وہ کہتے ہیں، ’’یہ کافی خطرے والا کام ہے۔ آپ کو نہایت مستعدی کے ساتھ درخت پر توازن بنائے رکھنا پڑتا ہے، جب کہ اسی دوران آپ کو ہاتھوں میں پانچ کلو کا ڈنڈا لیے پوری طاقت کے ساتھ اخروٹ کی شاخوں کو پیٹنا پڑتا ہے۔‘‘

کچھ درخت، خاص کر بڈگام میں، ۱۵۰ فٹ تک اونچے ہوتے ہیں۔ افضل کہتے ہیں، ’’بارش کے دنوں میں ہم درخت پر نہیں چڑھتے، کیوں کہ اس دوران کافی پھسلن ہو جاتی ہے۔ خوش قسمتی سے، میرے ساتھ کبھی کوئی حادثہ نہیں ہوا۔‘‘

لیکن ان کے گھر والوں کو ان کی حفاظت کی فکر لاحق رہتی ہے۔ اسے تسلیم کرتے ہوئے وہ بتاتے ہیں، ’’میری ماں نہیں چاہتی کہ میں یہ کام کروں، کیوں کہ ہمارے گاؤں میں کئی لوگ اخروٹ کے درخت سے گر کر اپنی جان گنوا چکے ہیں۔‘‘

سال ۲۰۲۳ میں سرینگر کے ڈاکٹروں کے ذریعہ کیے گئے ایک مطالعہ کے مطابق، اخروٹ کے درخت اس کی فصل کے موسم میں لوگوں کو چوٹ لگنے کی چوتھی سب سے بڑی وجہ ہیں۔

ایسے ہی ایک افسوس ناک حادثہ میں جاوید غنائی کے والد غلام محمد غنائی کی موت ہو گئی تھی۔ جاوید بتاتے ہیں، ’’والد صاحب کی موت کے بعد سب بدل گیا۔ پیسے کمانے کے لیے ہمیں اسکول چھوڑنا پڑا۔‘‘ جاوید غنائی، پلوامہ ضلع کے ترال مونگھاما گاؤں میں رہتے ہیں، جہاں ۲۰۱۷ میں ان کے والد غلام محمد غنائی ۵۰ فٹ اونچے درخت سے اخروٹ توڑنے کے دوران گر پڑے تھے۔

جاوید، جو اب سیلز مین کا کام کرتے ہیں، بتاتے ہیں، ’’جس درخت سے وہ گرے، وہ آج بھی کھڑا ہے، لیکن اب کوئی اس پر چڑھنے کی ہمت نہیں کرتا۔ وہ ہماری فیملی میں ہوئے حادثہ کی یاد دلاتا ہے۔‘‘ وہ درخت ان کے گھر سے محض ۱۰۰ میٹر کے فاصلہ پر ہے، جو گھر کی دوسری منزل سے صاف دکھائی دیتا ہے۔

اخروٹ کے تاجر محمد مقبول شیخ مزدوروں کو گرے ہوئے اخروٹ جمع کرتے ہوئے دیکھ رہے ہیں۔ یہ مزدور راجوری اور پونچھ جیسے کشمیر کے سرحدی علاقوں سے آتے ہیں۔ درخت سے اخروٹ گرانے کے کام کے لیے ان مزدوروں کو روزانہ ۱۵۰۰ روپے، کھانا اور رہنے کی سہولت دی جاتی ہے۔ لیکن اب بہت کم لوگ اس کام کو کرنا چاہتے ہیں۔ مقبول شیخ کہتے ہیں، ’’کم آمدنی اور خطرے کی وجہ سے مقامی نوجوان اس کام سے منہ پھیر رہے ہیں۔ یہی حال رہا تو پتہ نہیں یہ کاروبار کب تک چل پائے گا۔‘‘

اخروٹ جمع کرنے اور چھانٹنے کا کام اخروٹ کے تاجر اور مزدوروں کی فیملی کے لوگ ہی کرتے ہیں۔ وہ اخروٹ کے ہرے چھلکے اتارتے ہیں، انہیں اچھی طرح دھوتے ہیں، پھر کئی دنوں تک دھوپ میں سُکھاتے ہیں۔ اس سے اخروٹ جلدی خراب نہیں ہوتا اور اس کا ذائقہ بھی بہترین ہوتا ہے۔

اکتوبر کے مہینہ میں جب اخروٹ کا سیزن ختم ہونے کو ہے، ۶۵ سالہ محمد مقبول شیخ اخروٹ کی کل پیداوار کا اندازہ لگانے میں مصروف ہیں۔ مقبول، تیل بل کے اخروٹ کاروباری ہیں جو موجودہ حالات سے ناخوش ہیں، ’’درآمد شدہ اخروٹ پر ایکسائز ڈیوٹی ہٹانے سے ہمارا بازار بری طرح متاثر ہوا ہے۔‘‘ وہ بتاتے ہیں کہ پچھلے ۱۰ سالوں میں معیشت میں کافی گراوٹ آئی ہے، ’’چاہے سیب ہو، اخروٹ یا دیگر میوہ جات، سبھی بحران میں ہیں۔‘‘ مقبول نے خسارہ کی تلافی کے لیے اب بادام اور شہد کا کاروبار بھی شروع کر دیا ہے۔

ملک میں اخروٹ کی تقریباً ۹۸ فیصد پیداوار جموں و کشمیر میں ہوتی ہے۔ یہاں کی تقریباً ۱۵ فیصد قابل کاشت زمین پر اخروٹ کی کھیتی کی جاتی ہے، جس کی سالانہ پیداوار تقریباً ۶۶ء۲ لاکھ میٹرک ٹن ہے۔ لیکن سب سے اہم بات یہ ہے کہ اقتصادی سطح پر روزگار کی کمی کا سامنا کر رہی اس ریاست میں اخروٹ کی پیداوار نے ہزاروں نوجوانوں کو سالانہ روزگار مہیا کرایا ہے، جو نسلوں سے چلا آ رہا ہے۔

ماحولیاتی تبدیلی کا بھی اخروٹ کی فصل پر برا اثر پڑ رہا ہے۔ محمد مقبول شیخ، جو سالانہ تقریباً ۵۰۰۰ کلو اخروٹ کی تجارت کرتے ہیں، ان کا کہنا ہے، ’’ژالہ باری اور تیز ہوائیں ہماری فصل کو نقصان پہنچاتی ہیں۔ خشک سالی نے بھی اخروٹ کے معیار پر اثر ڈالا ہے۔‘‘

اس پہاڑی علاقہ کی آب و ہوا میں بھی تبدیلی آئی ہے، جس کی وجہ سے زراعت، باغبانی اور مویشی پروری پر منفی اثر دیکھنے کو ملے گا۔ انڈین نیٹ ورک آن کلائمیٹ چینج اسیسمنٹ (آئی این سی سی اے) کے تخمینہ کے مطابق، ۲۰۳۰ کی دہائی میں ہمالیائی علاقہ میں باغبانی فصلوں پر بارش کے دنوں کی تعداد کا اثر دیکھنے کو ملے گا۔ ریاست کی ایک رپورٹ کے مطابق، ستّر کی دہائی کے بعد سے اس علاقہ کا درجہ حرارت ایک ڈگری سیلسیس تک بڑھ گیا ہے۔

کشمیر کے ماہر ماحولیات راجا مظفر کہتے ہیں، ’’بے ضابطہ ترقیاتی پالیسیاں، سڑک کو چوڑا کرنے کے منصوبے اور لگاتار خشک سالی کا مسئلہ نہ صرف یہاں کے باغات کے لیے خطرہ بن رہا ہے، بلکہ اس سے کشمیر کا شاندار اخروٹ کا کاروبار بھی تباہ ہو سکتا ہے۔‘‘

سستی درآمد کے سبب کشمیری اخروٹ کی قیمتوں میں زبردست کمی آئی ہے۔ کشمیر میں اخروٹ اُگانے والوں کی تنظیم کے صدر، حاجی بہادر خان کا اندازہ ہے کہ اخروٹ کی قیمتیں ہر سیزن میں تقریباً ۵۰ فیصد تک گر رہی ہیں۔

محمد مقبول شیخ اس بحران کے لیے سرکاری پالیسیوں کو بھی ذمہ دار ٹھہراتے ہیں، ’’ہر سال ضروری اشیاء کی قیمتیں بڑھتی ہیں، لیکن ہمارے اخروٹ کی قیمت گرتی جا رہی ہے۔ پچھلے سال [۲۰۲۳] ہم نے خشک اخروٹ ۹۵ سے ۱۰۰ روپے کلو بیچے تھے، جب کہ اس سے پہلے اس کی قیمت ۲۴۰ سے ۲۵۰ روپے فی کلو تھی۔ اس سال کیا قیمت ملے گی، معلوم نہیں، لیکن لگتا ہے یہی رہے گی۔‘‘

کئی لوگ اب اس کاروبار کو چھوڑ رہے ہیں۔ فردوس احمد کی فیملی کئی دہائیوں سے اخروٹ بیچتی رہی ہے، لیکن حال ہی میں ۲۶ سالہ فردوس نے پنساری کی دکان کھول لی ہے۔ وہ مانتے ہیں کہ اگر حکومت دخل دے، تو تاجروں کی مدد ہو سکتی ہے۔ وہ کہتے ہیں، ’’اگر وہ [حکومت] اخروٹ کی درآمد روک دیں اور کشمیری پیداوار کو ترجیح دیں، تو ہمیں فائدہ ہوگا۔‘‘

محمد رمضان ڈار گزشتہ ۵۰ برسوں سے اخروٹ فروخت کر رہے ہیں۔ اب تاجر ان کے گھر نہیں آتے، بلکہ ۶۵ سالہ رمضان روزانہ نشاط باغ کے پاس سڑک کے کنارے اسٹال لگاتے ہیں۔ وہ پلاسٹک کی ٹوکریوں اور ڈبوں میں اخروٹ سجاتے ہیں، جس سے مہینہ میں ۱۵-۲۰ ہزار روپے کی کمائی ہو جاتی ہے۔ وہ کہتے ہیں، ’’وقت پر بارش نہ ہونے کے سبب اخروٹ کے سائز پر سیدھا اثر پڑا ہے اور مانگ میں بھی کمی آئی ہے۔‘‘

ان تمام چیلنجز کے باوجود، رمضان کا کاروبار ان کی فیملی کا سہارا رہا ہے۔ وہ فخر سے کہتے ہیں، ’’اخروٹ کے کاروبار کی بدولت ہی میں نے اپنی بیٹیوں کی شادی کرائی اور اپنے بچوں کو پڑھایا ہے۔‘‘

ترجمہ نگار: قمر صدیقی