कस्मीरी अखरोट: न दाम मिलता, न मान

श्रीनगर के हारवन इलाका के सून गली में अचके जोर-जोर से फटफट के आवाज गूंजे लागता. मोहम्मद अफजल आ साजिद खान अखरोट के गाछ (जुग्लन्स रेजिया) हिला रहल बाड़न. गाछ हिले से नीचे घर सब के टीना वाला छत पर अखरोट झर-झर गिर रहल बा.

सौ फीट, माने दस मंजिल जेतना ऊंच गाछ पर चढ़ के अखरोट झारल बड़ा जोखिम वाला काम बा. एहि से ई काम करे वाला मरद लोग खास माहिर होखेला. ऊ लोग के ‘छानन वोल’ (अखरोट झारे वाला) कहल जाला. जम्मू के रजौरी से आवे वाला मोहम्मद अफजल छव बरिस से अखरोट झारे के काम करत बाड़न. बकरवाल समुदाय (जेकरा राज्य में अनुसूचित जनजाति मानल जाला) से आवे वाला चौबीस बरिस के अफजल हर साल अखरोट के मौसम में एहि काम खातिर कश्मीर आवेलन. ऊ बतावत बाड़न, “हम नर्भस हो जाइला. काहेकि गाछ सब बहुते लमहर-लमहर बा.” अखरोट झारे के अलावे ऊ अक्टूबर आ नवंबर में रोज के 500 से 700 रुपइया के दिहाड़ी मजूरी पर सेब के पैकिंग आ गाछ काटे जइसन दोसरो काम करेलन. एह घरिया अफजल आ अखरोट झारे वाला लोग बगइचा, जहंवा ऊ लोग काम करेला, के लगे तम्बू गाड़ लेवेला.

अगस्त से अक्टूबर के बीच जब अखरोट तइयार हो जाला, अफजल के काम सुरु हो जाला. ऊ भोरे सात बजे से सांझ के छव बजे ले अखरोट झारे के काम करेलन. ऊंचाई के हिसाब से, एक दिन में ऊ चार से पांच गाछ पूरा कर लेवेलन. गाछ पर चढ़नाई, बेंत चाहे दोसर बरियार लकड़ी वाला लाठी से ऊपर अखरोट के डाढ़ सब के झरनाई दिन भर चलत रहेला.

अफजल के अखरोट झारे के काम बहुते साहस आ सावधानी वाला काम बुझाला. ऊ कहेलन, “ई काम बड़ा जोखिम वाला बा. पांच किलो के लाठी लेके गाछ पर चढ़ आउर ताकत लगा के झाड़, एह में बहुते संतुलन आ चुस्ती चाहीं.”

अखरोट के कुछ गाछ सब, खासकरके बडगाम के, 150 फीट ले लमहर होखेला. अफजल के कहनाम बा, “पानी-बुन्नी के दिन में त हमनी गाछ पर चढ़े से बचिला, काहे कि डाढ़ बहुते फिसलेला. भाग के बात बा कि हमरा संगे अबले कवनो ऊंच-नीच ना भइल.”

बाकिर परिवार के लोग के उनकर सलामती के चिंता लागल रहेला. ऊ मानेलन, “माई हमरा ई काम करे ना देवे के चाहस. हमनी के गांव के केतना लोग इहे अखरोट के गाछ से गिर के मर चुकल बा.”

सन् 2023 में श्रीनगर के डॉक्टर लोग के कइल एगो शोध के हिसाब से गाछ कटाई के मौसम में अखरोट के गाछ चोट लागे के चउथा सबले बड़ कारण बा.

स्वर्गीय गुलाम मोहम्मद गनाई संगे अइसने जानलेवा हादसा भइल रहे. आपन कोठरी में बइठल जावेद गनाई कहलन, “बाऊजी के मरला के बाद, बहुत कुछ बदल गइल. हमनी के पढ़ाई छूट गइल, कमाए जाए पड़ल.” सन् 2017 में उनकर बाऊजी, गुलाम मोहम्मद गनाई, पुलवामा जिला के त्राल मोघामा गांव में अखरोट तुड़े घरिया पचास फुट ऊंच अखरोट के गाछ से गिर पड़ल रहस.

जावेद बतावेलन, “जवन गाछ से गिरलन, ऊ अबले बा, बाकिर अब एकरा पर चढ़े के हिम्मत ना होखे. ई गाछ हमनी के परिवार के ओह दुखद घटना के इयाद दिलावेला.” अब जावेद सेल्समैन के काम करेलन.

अखरोट के ब्यापारी मोहम्मद मकबूल शेख मजूरन के नीचे झरल अखरोट बटोरत देखत बाड़न. उनका लगे अखरोट के तीन ठो गाछ बा. अखरोट झारे के काम करे वाला जादेतर मजूर लोग रजौरी आ पुंछ जइसन कस्मीर के सीमावर्ती इलाका से आवेला. अखरोट तुड़निहार के एक दिन के 1500 रुपइया मिलेला. पइसा के अलावे ओह लोग के रहे आ खाए के भी सुविधा देवल जाला. बाकिर तबो ई काम करे में जादे लोग के दिलचस्पी ना होखे.

गाछ से निकलल अखरोट सब के बटोरे आ फेरु ओकरा छांटे के काम होखेला. ई काम अखरोट ब्योपारी के परिवार आ मजूर लोग करेला. अखरोट के बाहरी हरियर छिलका के छील के, नीमन से धोवल जाला. फेरु कुछ दिन घाम में सुखावल जाला. अइसन करे से अखरोट के उमिर आ स्वाद दुनो बढ़ेला.

अक्टूबर आ चुकल बा, सीजन पूरा होखे वाला बा. पैंसठ बरिस के शेख मात्रा के फाइनल हिसाब-किताब में लागल बाड़न. तेलबल के ब्योपारी मौजूदा हालात से नाखुस बाड़न. “अखरोट के आयात से टैक्स हटइला चलते एकर बाजार पर खराब असर पड़ल बा.” उनकर कहनाम बा कि पछिला दस बरिस में बजार चौपट हो चुकल बा. “सेब होखे, अखरोट, चाहे कवनो दोसर मेवा, सब के दाम गिर गइल बा.” एह नुकसान के भरपाई करे खातिर अब शेख बदाम आ मध (शहद) भी बेचे के सुरु कर देले बाड़न.

देस के कुल उपज के मोटा-मोटी 98 फीसदी अखरोट जम्मू-कश्मीर से आवेला. एहिजा के कोई 15 प्रतिशत खेती जोग जमीन पर अखरोट उगावल जाला. एह से सलाना उत्पादन कोई 2.66 लाख मीट्रिक टन होला. सबले जरूरी बात ई बा कि नौकरी के कमी वाला एह इलाका में अखरोट के खेती हजारन लोग के रोजी-रोटी बन गइल बा, ओह लोग खातिर जे पीढ़ी दर पीढ़ी इहे करत आइल.

बेर-बेर बदलत मौसम पहिलहीं अखरोट पर भारी पड़ल बा. सलाना कोई पांच हजार किलो अखरोट के ब्यापार करे वाला मोहम्मद शेख कहेलन, “ओला आ अंधड़ चलते बहुते अखरोट खराब हो जाला. सूखो पड़ला से अखरोट खराब होखे लागेला.”

अब त एह पहाड़ी इलाका के मौसम एकदम बदल गइल बा. खेती बारी होखे, फल-फूल के बगइचा होखे, चाहे मवेशी चरावे के होखे, सभ पर असर पड़ेला. आईएनसीसीए (इंडियन नेटवर्क ऑन क्लाइमेट चेंज असेसमेंट) के हिसाब से 2030 के आसपास हिमालय में पानी कम पड़े वाला बा. बगइचावाला खेती पर एकर खराब असर होई. खुद राज्य के रिपोर्ट कहत बा कि सत्तर के दसक से अबले तापमान एक डिग्री सेल्सियस बढ़ चुकल बा.

राजा मुजफ्फर कश्मीर में पर्यावरण के जानकार बाड़न. ऊ चेतावत बाड़न, “अंधाधुंध हो रहल बिकास, सड़क के बिस्तार आ लगातार सुखाड़ से ना सिरिफ कुछ बगइचा बरबाद होता, बलुक कस्मीरी अखरोट के मूल्यवान बिरासत भी समाप्ति के कगार पर पहुंच गइल बा.”

कस्मीरी वॉलनट ग्रोवर्स एसोसिएशन के अध्यक्ष के अनुमान के हिसाब से सस्ता आयात चलते बजार अखरोट से पट जाला. आउर एहि चलते कस्मीरी अखरोट के दाम हर सीजन में मोटा-मोटी आधा गिर जाला.

मोहम्मद शेख कहले, “साल दर साल जरूरी चीज के दाम बढ़ल जाता, बाकिर अखरोट के भाव गिरल जाता. गुजरल साल (2023) हमनी सूखल अखरोट 95 से 100 रुपइया किलो बेचनी. पहिले इहे चीज 240-250 रुपइया किलो बिकात रहे. ई साल के भाव का रही, कुछ नइखे पता. बाकिर बुझाता कि ओतने रही.” ऊ एह संकट खातिर सरकारी नीति के दोष देवेलन.

अब त बहुते लोग ई धंधा छोड़े लागल बा. फिरदौस अहमद के खानदान बरसन से अखरोट बेचत रहल. बाकिर अब हाले में 26 बरिस के फिरदौस श्रीनगर में एगो किराना दोकान सुरु कर देले बाड़न. फिरदौस के सरकार से बहुते उम्मीद बा. ऊ कहेलन, “जदि सरकार बाहर से अखरोट मंगावल बंद कर देवे आ कस्मीरी अखरोट के बढ़ावा देवे, त हमनी के फायदा होई.”

मोहम्मद रमजान डार पचास बरिस से अखरोट बेचत बाड़न. पहिले त ब्योपारी लोग उनका घरे पहुंच जात रहे, बाकिर अब हालत अइसन बा कि 65 बरिस के रमजान के निसांत गार्डन लगे सड़क किनारे तिरपाल लगा के बइठे पड़ेला. भोरे से सांझ ले तिरपाल के नीचे बइठ के, प्लास्टिक के टोकरी आ गत्ता के डब्बा में अखरोट सजवले, हर महीना ऊ अखरोट बेच के 15-20 हजार रुपइया कमा लेवेलन.

हर तरह के मुसीबत आ घाटा के बादो रमजान के घर गिरस्ती इहे ब्योपार से चल रहल बा. रमजान कहले, “इहे अखरोट के कमाई से हम आपन बेटी लोग के हाथ पियर कइनी आ बचवन के पढ़ा रहल बानी,” उनकर बोली से तनी गुमान छलकत रहे.

अऩुवादक: स्वर्ण कांता