சுந்தரவனக் கிராமத்தில் வாக்களித்தல்

"இந்த அரசின் கண்களுக்கு சுந்தரவனத்தின் காடுகள் மட்டுமே தெரிகின்றன. அங்கு வாழும் மக்கள் அவர்களின் கண்களுக்குப் புலப்படுவதில்லை," என்கிறார் கீதா ம்ரிதா. மீனவரான அவரின் கணவர் பிப்ரவரி 2012ல் புலியால் தாக்கப்பட்டு உயிரிழந்தார். இழப்பீடுக்கான சாத்தியம் இருந்தும் தனக்கு எதுவும் வழங்கப்படவில்லை என்கிறார் கீதா. புலிகளின் தாக்குதலில் கணவர்களை இழந்த பல பெண்களும் அந்த கிராமத்தில் இழப்பீடு பெறவில்லை என்கிறார்.

“ஆனால் வாக்கு கேட்க மட்டும் தவற மாட்டார்கள்," என்கிறார். தேர்தலில் வாக்களித்துள்ள அவர், "ஒரு குடிமகளாக என் கடமையைச் செய்தேன்," என்கிறார். அவர் சுந்தரவனத்தில் உள்ள ரஜத் ஜூப்ளி என்னும் கிராமத்தில் வசிக்கிறார்.

ரஜத் ஜூப்ளி, தெற்கு 24 பர்கானாஸ் மாவட்டத்தின் கோசாபா தொகுதியிலுள்ள லஹிரிபூர் கிராமப் பஞ்சாயத்தின் கீழ் உள்ள 22 கிராமங்களில் ஒன்றாகும். அங்கு வசிப்பவர்களில் பெரும்பாலானோர் பட்டியலினத்தைச் சேர்ந்தவர்கள்.

ஏப்ரல் 30 அன்று கோசாபாவின் கிராம மக்கள் மேற்கு வங்கச் சட்டமன்றத் தேர்தலில் வாக்களித்தனர். அவர்களில் பலர், ரஜத் ஜூப்ளிக்கு அருகாமைப் பகுதிகளில் வசிக்கின்றனர். கிட்டத்தட்ட 1.5-2 கிலோமீட்டர் தூரத்தில் இருக்கும் வாக்குச்சாவடிக்கு அவர்கள் நடந்துதான் செல்கிறார்கள். சிலர் நெடுந்தூரம் கடந்து, கொல்கத்தா மற்றும் அம்மாநிலத்தின் பிற பகுதிகளில் இருந்து ரயில், படகு மற்றும் பிற வாகனங்களில் வந்து சேர்ந்தனர்.

காலை 7 மணிக்குத் தொடங்கி மாலை 6 மணி வரை வாக்குப்பதிவு நடைபெற்றது. 95 வயதான பூல் பஷி மற்றும் அவரது மருமகள், கல்பனா மொண்டோல் உள்ளிட்ட சிலர் பிற்பகலில் வெப்பத்தைத் தவிர்ப்பதற்காக அதிகாலையிலேயே வாக்களித்தனர்.

ரஜத் ஜூப்ளியில் வசிக்கும் பீனா ம்ரிதா தனது கிராமத்தின் சிக்கல்களை சுருங்கக் கூறுகிறார்: "இங்கு மருத்துவமனைகள் இல்லை. கோசபாவில் மட்டுமே ஒரு பெரிய மருத்துவமனை உள்ளது. அங்கே சென்று சேர, இரண்டு படகுகள் மற்றும் வாகனங்கள் மாறி செல்லவேண்டும். புலிகள் மற்றும் முதலைகள் பிரச்சினை இருக்கிறது. எங்கள் மக்களையும், கால்நடைகளையும், அவை தொடர்ந்துதாக்கிக் கொல்கின்றன. நாங்கள் விளைவிக்கும் அரிசிக்கு எங்களுக்கு நல்ல விலை கிடைப்பதில்லை. 100 கிலோகிராம் அரிசிக்கு வெறும் 650 ருபாய் அளவே கிடைக்கிறது. ஆனால் சந்தை விலை 100 கிலோகிராம் அரிசிக்கு 800 ரூபாய் ஆகும். அரசாங்கம் எங்களிடமிருந்து தானியங்களை வாங்குவதாக இருந்தது. ஆனால் அது நின்றுவிட்டது. எங்கள் உணவுப் பாதுகாப்பு அட்டைகளில் நிறைய பிழைகள் இருக்கின்றன. அதனால் எங்களில் பலருக்குக் கிடைக்கவேண்டிய உணவுப் பொருட்கள் கூட கிடைப்பதில்லை. எங்களது சாலைகள் அகலப்படுத்தப்பட்டு ஆற்றுமட்டத்திற்கு மேல் உயர்த்தப்பட வேண்டும்."

தன் கிராமத்திற்கு அருகில் உயர்கல்விக்கான நிறுவனங்கள் இல்லாதது குறித்து பீனா வருந்துகிறார். "என் மகள் கொல்கத்தாவில் படிக்கிறாள். நாங்கள் அவளை அங்கு அதிக செலவில் சேர்த்துள்ளோம். மீன்பிடித்தல், தேன் சேகரித்தல் தவிர வேறு வேலைகள் இங்கு இல்லை."

வாக்குப்பதிவு ரஜத் ஜூப்ளி உயர்நிலைப் பள்ளியில் நடைபெற்றது. பள்ளிக்குள், கோசாபா மருத்துவமனையைச் சேர்ந்த சுகாதாரப் பணியாளர்களாகிய லோகி ஹவ்லி மோண்டோல் மற்றும் இலா சர்க்கார் மோண்டோல் ஆகியோர் மருத்துவக் குழுவாகத் தேர்தல் பணியில் ஈடுபட்டிருந்தனர். “நாங்கள் அனைத்து வாக்காளர்களுக்கும் ORS-ம் [உடலில் நீர் தன்மையை அதிகரிப்பதற்கான பானம்] மற்றும் உடல்நிலை சரியில்லாதவர்களுக்கு மருந்துகளையும் வழங்குகிறோம். சிலர் தங்கள் வீடுகளிலுள்ள உடல்நலம் குறைந்தவர்களுக்கும் மருந்துகளை எடுத்துச் செல்கிறார்கள்,” என்கிறார் லோகி.

இரு பெண்களும் வாக்குப்பதிவு நடக்கும் இடத்தில் காலை 7 மணி முதல் மாலை 6 மணி வரை இருந்தனர். இந்த வேலைக்கு அவர்களுக்கு ஊதியம் கிடைத்ததா? "எங்களுக்கு இன்னும் [எவ்வளவு கிடைக்கும் என்று] தெரியவில்லை. எங்கள் வேலை முடிந்ததும் எங்களுக்குத் தெரியும்,” என்று லோகி கூறினார்.

வினோத் மற்றும் சபிதா சர்தார் தம்பதியினரும் தேர்தல் பணியில் ஈடுபட்டிருந்தனர். தேர்தல் அதிகாரிகளின் தேவைகளைக் கவனிப்பதே அவர்களின் பணியாக இருந்தது. வினோத் தங்கள் பணி குறித்துக் கூறுகையில், “அதிகாரிகளுக்கு உணவு மற்றும் சிற்றுண்டி தேவைப்படும். நாங்கள் அவர்களுக்குத் தேநீர், காபி மற்றும் சிகரெட்டுகளைக் கொண்டு வருகிறோம்," என்கிறார். சர்தார் குடும்பத்தைச் சேர்ந்தவர்கள் பட்டியல் பழங்குடியினர் (ST) சமூகத்தைச் சேர்ந்தவர்கள். அவர்களுக்குச் சொந்தமாக எந்த நிலமும் இல்லை. அவர்களின் தேர்தல் பணிப் பதவி, விசித்திரமாக, ‘திறன்சாரா தற்காலிக தொழிலாளர்’ என்று இருந்தது.

வெப்பமும் ஈரப்பதமும் மிக்க சுந்தரவனக் காடுகளில் வாக்களிக்க வெளியே வருவது எளிதான காரியமல்ல. வெப்பத்தின் தாக்கத்தைக் குறைக்க உள்ளூர் மக்களும் பல்வேறு கட்சியினரும், வாக்காளர்களுக்குக் கரும்பிலிருந்து தயாரிக்கப்பட்ட பட்டாஷா பானங்களையும், கடலையும் வழங்கினர். பான் மற்றும் பீடியும் வாக்காளர்களுக்கு வழங்கப்பட்டன.

அத்தேர்தலில் போட்டியிட்ட புரட்சிகர சோசலிஸ்ட் கட்சி, திரிணாமுல் காங்கிரஸ் மற்றும் பாரதிய ஜனதா கட்சி போன்ற அரசியல் கட்சிகள், வாக்குச்சாவடி அருகில் சிறிய கூடாரங்களை அமைத்திருந்தன. அங்கு அக்கட்சிகளைச் சேர்ந்தவர்கள், வாக்காளர்கள் தங்கள் வாக்காளர் அடையாள அட்டை எண்களை சரிபார்க்க உதவினர். மேலும் முதல் முறையாக வாக்களிப்பவர்களுக்கு, வாக்களிக்கும் செயல்முறை குறித்து வழிகாட்டினர். இக்கூடாரங்கள் வாக்குச் சாவடியிலிருந்து குறைந்தது 200 மீட்டர் தொலைவில் இருக்க வேண்டும்.

மத்திய ரிசர்வ் காவல் படைவீரர்கள் கிராமத்தில் எல்லா இடங்களிலும் நிறைந்திருந்தனர். ரோந்து சென்றனர். வாக்குச்சாவடியில் நின்றிருந்தனர். தங்களைப் புகைப்படம் எடுக்க அவர்கள் அனுமதிக்கவில்லை. அவர்களில் ஒருவர், "நாங்கள் இப்போது தான் தேநீர் அருந்த வெளியே வந்தோம். நாங்கள் மரத்தின் கீழ் அமர்ந்து ஓய்வெடுப்பதை நீங்கள் புகைப்படம் எடுத்தால், நாங்கள் எங்கள் கடமையைச் செய்யவில்லை என்று மக்கள் நினைப்பார்கள்," என்று கூறினார்.

இந்தக் கட்டுரை பாரி இதழியல் பயிற்சித்திட்டத்தின் ஒரு பகுதியாக எழுதப்பட்டது.

தமிழில்: ஸ்ரீமதி