कामे काम, कतहूं ना नाम: खेत त बा, बाकिर आपन नइखे (पैनल 3)

इ ‘कामे काम, कतहूं ना नाम’ नाम के फोटो प्रदर्शनी के हिस्सा ह. एकरा में गांव के मेहरारू लोग के अलग-अलग काम दर्ज कईल बा. इ सब फोटो साल 1993 से 2022 के बीच 10 गो राज्य में घूम-घूम के पी-साईनाथ खिंचले बाड़न. पारी एकरा के डिजिटल बना के औरी सुन्नर बना दहलस. एकरा के कई साल ले देस के कई गो हिस्सा में देखावल जात रहल बा

खेत त बा, बाकिर आपन नइखे

जमीन के मालिक के फोटो खिंचावे में बहुत गरब होत रहे. उ उंहें अपना के तान के खड़ियाईल रहलन. जबकि, इतने देर में में उनका खेत में रोपनी करत नौ गो मेहरारू लोग के पांत दुगुना गो गईल रहे. उ हमनी से कहलन कि उ ए लोग के एक दिन के 40 रोपया देलन. मेहरारू लोग हमनी के बाद में बतावल कि उ खाली 25 रोपया देले रहलन. इ सब उड़ीसा के रायगड़ा के भूमिहीन महिला मजूर रहे लोग.

भारत में महिला लोग के जमीन के अधिकार नईखे. इ ओहू परिवार के महिला लोग के नईखे, जेकरा लगे जमीन बा. इ अधिकार ना त नयिहर में मिलेला ना ससुरा में. अकेल, बिधवा चाहे तलाक भईल मेहरारू कुल अपना रिश्तेदार के खेतन में मजूरी करे खातिर बेबस होलीं कुल.

सरकारी आंकड़ा से, भारत में महिला मजूर के गिनती 63 मिलियन (6 करोड़ 30 लाख) बा. एमे से 28 मिलियन (2.8 करोड़) चाहे 45 लाख महिला खेती-किसानी के मजूर ह. बाकिर ईहो आंकड़ा भरमावे वाला बा. एमे उ मेहरारू सामिले नईखे जेकरा साल के छव महीना चाहे ओकरा से बेसी बेरा ले रोजगार ना मिलेला. इ जानकार महत्त के बा. एकर मतलब बा कि इ लखन मेहरारू के राष्ट्रीय अर्थबेवस्था में योगदान देवे वाला मजूर के रूप में गिनले ना जाला. सामने से खेती-किसानी के कार करे के अलावे गांव के मेहरारू लोग दूसर बहुत कार करेला. उ कार के ‘घरेलू कार’ कह के ख़ारिज क दहल जाला.

सरकारी अधिकारी जौना कार के ‘आर्थिक गतिविधि’ मानेला, ओकरा में सबसे कम मजूरी वाला खेती-किसानी के कार बा जौन मेहरारू लोग क सकेला. बाकिर पहिले भूमिहीन मजूरा के जेतना दिन के कार मिल जाय अब ना मिलेला. इ सब नौका आर्थिक नीति के चलते हो रहल बा. मसीन के बढ़त कारो इ संकट के बढ़ा देता. नगद फसल के ओर झुकाव से समस्या औरियो गाढ़ हो रहल बा. नौका अनुबंध प्रणाली एकरा के औरी बिगाड़ता.

आंध्र प्रदेस के अनंतपुर गांव में, दू गो छोट लईकी खेत में कीरा खोजतारी. इनकार गांव में लाल रोआं वाली सुंडी (कीरा, पिलुआ) खोजल मजूरी (पइसा) वाला कार ह. खेत के मालिक एक किलो सुंडी के 10 रोपया देला. एक किलो पूरा करे खातिर ए लोग के एक हजार कीरा खोजे के परेला.

जमीन जइसन साधन प आपन कब्जा ना होखे से, सब गरीब औरी मेहरारू के स्थिति कमजोर होता. मालिकइ और समाज में स्थिति के एक दुसरा से करीबी नाता ह. बहुत कम्मे मेहरारू अइसन होई कि जे जमीन के मालिक होखी. जे जमीन प ए लोग के अधिकार हो जाय त, पंचायती राज में ओ सब के भागीदारी औरियो बढ़िया ढंग से कार करी.

इ कौनो संजोग ना ह कि बिना जमीन वाला मजूर के गिनती में सबसे बेसी दलितन के बा. (जेकरा के जात-पात में अछूत मानल जाला) लमसम 67 परतिसत महिला मजूर दलित बा. दुनिया में सबसे बेसी शोषण बड़का-छोटका, जात औरी मरदाना-मेहरारू के आधार प होला.

जमीन के अधिकार मिलला से गरीब औरी छोटा जात के मेहरारू के स्थिति में सुधार होई. एकरा बाद जे ओ सब के दुसरा के खेत में मजुरियो करे के परल त नीमन मजूरी खातिर मोलभाव करे में मदद मिली. औरी पइसा प ओ सब के पकड़ बनी.

एकरा से खुद ओ लोग के परिवार के गरीबी कम होई. मरदाना आपन आय के अपने उपर खर्चा करेला. जबकि मेहरारू आपन कुल कमाई परिवार प खर्चा करेला. औरी एमे सबसे बेसी फायदा लईकन के होला.

इ खुद ओ सब खातिर अच्छा बा. ओ सब के परिवार खातिर नीमन बा. तनियक में इहे कहल जा सकेला कि जदी भारत में गरीबी हटावे के बा त महिला लोग के भूमि अधिकार देवे के परी. पच्छिम बंगाल जइसन राज्य, पुनर्वितरित भूमि के 400,000 मामला में सामिलात पट्टा दे के एकर सुरुआत कईले बा. बाकिर तब्बो अभहीं बहुत कुछ करे के जरूरत बा.

महिला लोग के खेत जोते प रोक बा, एहिसे पुरान नारा “जे जोते-बोये ओकर खेत” के हटा के इ नारा देवे के जरूरत बा, “खेत ओकर जे ओ पे कार करे.”

अनुवाद: स्मिता वाजपेयी