वधावन जा मुहाणा आईअ में अची विया

अरब सागर जूं लहरूं हिकु दफ़ो वरी कंधीअ ॾांहुं वधनि पियूं ऐं पाण सां गॾु वारीअ जे भिटनि ऐं तांघे भाङनि खे पाईंदियूं पियूं वञनि। इहे वाहुड़ पालघर ज़िले जे डहाणू खाड़ी जा आहिनि। अमिता तांडेल जी निंड फिटल रहे थी। हूअ वीर जो इंतिज़ारु करे रही आहे ऐं केतरनि ई दफ़े पाण खे जाॻाइण जे लाइ अलार्म पिणु लॻाईंदी आहे। मथे ते बैटरीअ वारी टॉर्च अथसि ऐं कुल्हे ते 10-15 किलें जो ॼारु लटिकाए करे हूअ अधु राति बैदि ऊंदहि में निकरी वेंदी आहे। अटिकल 400 मीटरनि जी दूरी ते कंधीअ ते ॿीं ज़ालि संदसि इंतिज़ारु करे रही हूंदी आहे। “असां केतिरनि ई सालनि जे आज़मूदनि में चंड जे मिज़ाजनि खे पढ़ण सिखियो आहे। इन्हीअ मां ई असांखे वीर ऐं अलुड़ जी समक पवंदी आहे।”

“असां जी बिरादरी में, ॿार पंहिंजे माउ पीउ खे मछियूं मारींदे ॾिसी वॾा थियनि था। मुंहिंजो पीउ मूंखे 15 सालनि जी उमिरि में पाण सां गॾु वठी वेंदो हो। हुन मूंखे लहरुनि जे चढ़ण ऐं लहण खां वठी खाड़ीअ में मछियुनि जी अचु वञ जी जायुनि बाबति ॿुधायो हो।” 60 सालनि जी अमिता तक़रीबनि पंज ॾहाका पंहिंजे पीउ वांगुरु लहरुनि खे समुझण में गुज़ारे छडि॒या।

वाहुड़ जे किनारे ते, हूअ ऐं बि॒यनि औरतुनि 10 x 20 फ़ुट जे ॼार खे सुलझाए करे पाणी में विझी छडि॒यो। जल्दु ई उहे ॼार खे ॿिन्ही पासनि खां झले करे दरियाह में घिड़ण लगि॒यूं। हिक बि॒ए खां अटिकल 30 फ़ुट जी दूरी रखंदे हूअ पाणीअ में ॼारु पोखे थी ऐं उन खे छिकंदी आहे। ॼार में छा पियो फासे, इन जो अंदाज़ो डि॒सी करे न पर महिसूसु करे वधीक थो थिएसि।

“राति जो तव्हां नथा ॾिसी सघो त तव्हां जे पेरनि हेठां छा आहे।आमच्या कपाळाला बॅटरी असते. फक्त लाईटच्या सिग्नलवर चालते [असीं पंहिंजे मथे ते बैटिरी लैम्प ब॒धंदा आहियूं, उन जी टिमटिमाईंदड़ रोशिनी ई वाहिदु शइ आहे जेका असां खे हलण में बराबरि मददु करे थी]।” हिते छोलियुनि में तिख हूंदी आहे ऐं हिकु लापरवाही सां बि तव्हीं थाबि॒ड़जी वेंदा। हिते सलामतीअ जी ख़ातिरी नाहे। केतिरनि ई दफ़े असांजे कंधु ताईं पाणी हूंदो आहे, वरी बि असां कमु कंदा रहंदा आहियूं छाकाणि त जेकॾहिं असां मछीअ खां सवाइ वापसि वियासीं त उन ॾींहुं कमाई न थींदी।” अमीता अक्सरि चार कलाकनि खां बि वधीक वक़्तु पाणीअ में गुज़ारे थी, जेसीं हथनि में मछियुनि जो बारु, तइदाद जी झझाई जो अंदाज़ो न डि॒ए।

उन्हनि वांगे बि॒या बिना बे॒ड़ीअ वारा मुहाणा डहाणू तालुक़े जे वरोर ॻोठ में कुझ ई मीटरनि जी दूरी ते अटिकल 20 किलोमीटरनि जे पंध ते इन खाड़ी में हथनि सां मछियूं पकड़ण जे लाइ ईंदा आहिनि। इहो वीराएं इलाइक़े जो हिस्सो आहे, जेको वीर जे दौरानि नज़रु अचे थो ऐं अलुड़ महिल ॿुॾी वेंदो आहे। अमिता पुछे थी, “जेकड॒हिं मां समुंड में न वञां, त असीं दाणो पाणी कीअं हलाईंदासीं?”

वधावन बंदरगाह जे मंसूबे जे अचण बैदि इहो हिकु अहिड़ो सुवालु आहे जेको हुन खे इन्हनि ॾींहनि में वधीक परेशानु करे थो। हीअ रिथा इन्ही खाड़ी वारे इलाइक़े में 17,471 हेक्टेयरनि में पखिड़ियल हूंदी। जवाहरलाल नेहरू पोर्ट अथॉरिटी (जैनपीए) ऐं महाराष्ट्र मैरीटाइम बोर्ड (एमएमबी) जे विच अवामी ज़ाती हिस्सेदारी जे तहति ठहिंदड़ ही बंदरगाहु भारत जो 13हों मुख्य बंदरगाहु हूंदो। इहो समुंड जे अंदर जुड़ंदड़ जड़तू ॿेट ते ठहियल सभ खां वॾो मंसूबो हूंदो, जेको अरबी समंड जे 1,448 हेक्टेयरनि जी ज़मीन खे भरे करे ठाहियो वेंदो। इहो दुनिया जे सभ खां ऊन्हे बंदरगाहनि मां हिकु थींदो, जिते वड॒नि मालदारु ग़ोराबनि खे संभाले सघिबो।

मौजूदह अंदाज़नि जे मुताबिक़ि, रिथा जो पहिरियों हिस्सो 2029 ताईं ऐं बि॒यों हिस्सो 2037 ताईं पूरो थियणो आहे। 76,220 किरोड़ रुपयनि जी हीअ रिथा 10 लख खां वधीक ज़ाहिरी ऐं गै़र ज़ाहिरी रोज़गारनि खे पैदा करण ऐं मुहाणनि खे मुआविज़ो ऐं हुनर पिराइण जे वझ जो वाइदो कंदी आहे।

महाराष्ट्र हुकूमत वाइदे खे ॿीहर वरजायो आहे। सूबे जे मुताबिक़ि हू बेघरनि खे नएं सिरि वसाइण, हुनरु पिराइणु, आईटीआई जे अपग्रेडेशन ऐं मछियुनि जे हिकु जवाबदारु इदारे ज़रिए इन जी ख़ातिरी लाइ जवाबदारु आहे त “असांजा मछीमार, असां जा नौजवान, फ़क़नि इन ओसर जा शाहिदु न थियनि पर इन मां सभ खां वधीक फ़ाइदो वठनि।”

मक़ामी माण्हुनि खे इन ते वेसाहु नाहे। बे॒ड़ीअ खां मछियूं झलंदड़ विजय विंडे चवे थो, “जैनपीटी बंदरगाह खे ॾिसो। रिथा जी सरअंजामीअ बैदि मुहाणनि जे परीवारनि जे हिकु बि भातीअ खे नौकरी न मिली। उहे नौकरियुनि ऐं मुआविज़े लाइ अदालत में विढ़ी रहिया आहिनि। सभिनी मेगा प्रोजेक्टनि जो अहिड़ो ई हालु आहे।”

अमिता चवे थी, “असां जा ॿार अॻ में ई बोईसर जे उद्योगी इलाइक़े जे कारख़ानन में मज़ूरी करे रहिया आहिनि पर खेनि मछियूं झलण बि अचे थो। खाधे जूं क़ीमतूं वधी वेयूं आहिनि ऐं तेलु ख़रीदण बि मुश्किलु थी वियो आहे। भाॼियूं असां लाइ महांगियूं आहिनि। समुंड मां जेको नाणो कमायूं था, उन मां ई रोटी टुकर जो बंदोबस्त थिए थो।”

“कॾहिं असांखे 200 त कॾहिं 300 रूपया मिलंदा हुआ, कॾहिं त इन खां बि घटि मिलंदा हुआ, पण समुद्राने मला माझं बाईपण दिलं, मुक्त केलं [लेकिनि समुंड मूंखे औरत थियण जो अहिसासु करायो। इन मूंखे आज़ादी ॾिनी आहे]।” हुन ॿ शादियूं कयूं पर ॿिन्ही दफ़े शराबी मुड़ुस मिलियसि। नेठि अमिता पंहिंजे पुट खे अकेले पालण जो फ़ैसिलो कयो ऐं आमदनी जे लाइ रुॻो हथनि सां मछियूं पकड़ण जो कमु कयाईं।

“मूं पंहिंजे नंढपिण खां ई समुंड खे ॾिठो आहे। मां ॻोठ जे ॿियनि ॿारनि सां गॾु हुते रांदि करण जे लाइ वेंदी हुयसि। असां हुते तैराकी ऐं खेखिड़ा पकड़ण जे लाइ वेंदा हुआसीं। उन्हनि ॾींहनि में मुहिंजा माउ-पीउ ऐं ॾाॾा-ॾाॾी अधु रात जो जाॻंदा हुआ। उन्हनि मूंखे हथ सां मछी मारण जो हुनरु सेखारियो।”

अमिता जहिड़नि केतिरनि ई हथ सां मछी मारणु वारनि लाइ वाहुड़ु ताईं रसाई जो सुवालु तमामु अहमु आहे। इहो बि ओनो आहे त रिथा जी सरअंजामीअ सां माहौलियाती सिरिश्ते ते छा असरु पवंदो। साहिली माहौलियत जी समुझ उन्हनि खे पीढ़ियुनि जे आज़मूदनि मां हासुलु थी आहे। हूअ चवे थी, “ समुंड में सभेई हिक-बि॒ए ते भाड़नि था। साई काई आहे, उन ते जीवड़ा हूंदा आहिनि, उन्हनि जीवड़नि खे जेकी मछियूं खाइनि थियूं, से असांजे गुज़रान जो वसीलो आहिनि।”

अमिता शंकोधर प्वाइंट जे नाले सां सुञापंदड़ छिपुनि वारे इलाइक़े जे बारे में सवलाई सां ॻाल्हाईंदे चवे थी, “ओला खाली गेला की समुद्राचं पोट दिसतं. खेकडे दिसतात, शिंपले दिसतात, लहान मासे दिसतात. हेच पुढे मोठे होतात. ही त्यांची वाढण्याची जागा आहे [जॾहिं वीरि लहे थो तॾहिं समुंड जो पेट ॾिसण में अचे थो। खेखड़नि जहिड़ियूं सिपूं ॾिसण में ईंदियूं आहिनि, नंढियूं मछियूं हूंदियूं आहिनि। हिते अगि॒ते वॾियूं थी वेंदियूं आहिनि। इहा ई उन्हनि जी अगि॒ते वञण जी जाइ आहे]। असां खे इहो सेखारण जी ज़रूरत नाहे त मछियूं किथे पैदा थियनि थियूं। असां रोज़ानो डि॒सूं था त आना किथे आहिनि, नंढियूं मछियूं किथे वञनि थियूं ऐं खेखिड़ा किथां कढबा। समुंडु पाण असांजो रहिबरु आहे।”

डहाणू जा खोजिनिकु भूषण भोईर इन खे “हिकु पेचीदो माहौलियाती निज़ामु” सॾीनि था। ही सतही छिपुनि, वीरि अलुड़ु वारनि हिस्सनि, तिमिर (मैंग्रोव) ऐं वैतरणा जहिड़ियुनि मिठे पाणी वारियुनि नदियुनि जे अरब सागर में मेलाप वारो हिक निज़ामु आहे। हू चवे थो, “नदी जो पाणी सामूंडी पाणी जी खाराणि खे घटाए थो। इनकरे हिते ज़मीन खां कुझु फ़ुटि हेठि मिठे पाणी जो ज़ख़ीरो आहे। इनजे करे हिते अहिड़ो निज़ामु ठहियो आहे, जंहिं में वडे॒ पैमाने ते सूख्यमु जीवड़नि [प्लैंकटन] ऐं मछियुनि जी पैदाइश थिए थी।

इन आबी सिलसिले डहाणू साहिल जी हयातियाती गूनागूनियत ऐं मछियुनि ते ॿधल माली निज़ाम खे बरक़रारु रखियो आहे, जंहिं खे वधावन बंदरगाह जे ठहिण सां ख़तरो आहे। इन जे लाइ लहरुनि वारनि इलाइक़नि में 1,448 हेक्टेयर सामूंडी इलाइक़े खे मिटी सां भरे करे ज़मीन तयारु कई वेंदी ऐं सामूंडी लहरुनि खे रोकण जे लाइ 10.14 किमी ऊची भिति बि ठाही वेंदी।

सीएसआईआर ऐं नेशनल इंस्टीट्यूट ऑफ़ ओशनोग्राफ़ी जे हिक गडि॒यल अभ्यास जे मुताबिक़ि, समुंड में ज़मीन जी बाज़याबी ऐं ड्रेजिंग जहिड़ियुनि सरगर्मियुनि खे वडे॒ पैमाने ते अमल में आणण सां अणिसोचियल तबाही त पक आहे। इन सां मछियुनि जी पैदावार जे सिलसिले ते नफ़ी असरु पवंदो ऐं साहिली इलाइक़नि ते सामूंडी जानदारनि जी चुर पुर बि मुतासिर थी सघे थी।

अमिता ऐं डहाणू जे नाखूअनि जे लाइ इहो माहौलियात जो को अहिसासी मसइलो नाहे। इहे साहिली किनारा आहिनि जिते नसुलनि खां माण्हू हथनि सां मछियूं झलंदे गुज़रान कंदा पिया अचनि। एनवायरमेंट इम्पैक्ट असेसमेंट (ईआईए) रिपोर्ट जी दावा आहे त 5,333 घरनि मां लॻभॻि 20,809 मुहाणा माहौलियाती तौर ते शाहूकारु इन सामूंडी इलाइक़े ते भाड़ीनि था। बाक़ी अमिता जहिड़ा हथनि सां मछियूं पकड़ंदड़ इन पड़ताल में शामिल आहिनि या कोन्हनि,इन बाबति कुझु चई नथो सघिजे।

अमिता सिधो चवे थी, “को बि अधिकारी असां जहिड़नि हथ सां मछियूं झलण वारनि वटि न आयो। पुछण जी कोशिश बि न कयाऊं त असीं छा करियूं था। उन्हनि पक बे॒ड़ियुनि वारनि मुहाणनि सां ॻाल्हि कई हूंदी।” वधावन बंदर विरोधी संघर्ष समिति बि तस्दीक़ करे थी त डहाणू जे इन्हनि ॻोठनि जे चौधारी 200 खां वधीक हथ सां मछी मारणु वारा थी सघनि था। अमिता चवे थी, “लेकिनि बंदरगाह जे ठहणु बैदि सभेई मुहाणा मछियूं मारण जे लाइ सामूंडी इलाइक़ो विञाइ वेहंदा, तंहिंकरे असां खे हिते ही बंदरगाह न घुरिजे।”

अटिकल 17,471 हेक्टेयरनि ताईं पखिड़ियल इन ठहिरायल परियोजिना जे तहति उन जे 571 हेक्टेयरनि जे इलाइक़े में सड़कूं ऐं रेलवे लाइनूं तयारु थींदियूं जेके वरोर, अगर, नारपाड ऐं तारापुर समेति 16 ॻोठनि मां लंघंदियूं। रिथा मुताबिक़ि अंजामु डि॒नो वियो आहे त ज़ाबिते में वरितल ज़मीनुनि जे बदिले में माण्हुनि खे मुआविज़ो मिलंदो ऐं बेघर माण्हुनि खे आबादु करण जी जवाबदारी सरकार ते हूंदी। लेकिनि समुंड खे कंहिं बि रवायती मुआविज़े जे तहति शामिलु करे नथो सघिजे।

ऐं घातूअनि जो असुली नुक़्सानु इहो ई आहे। नाराज़ु विजय पुछे थो, “आमची शेती समुद्रच. आता समुद्राचा काही सातबारा आहे का? [असांजी पोख त समुंड में ई थिए। छा समुंड जे लाइ बि को सातबारो थिए थो]?”

हू चवे थो, “असां नसुलनि खां हिते रहंदा पिया अचूं। हिते ई घोल मछियूं ऐं केतिरनि ई क़िस्मनि जा गांगट बि मिलनि था, जेके महांगनि अघनि में विकामंदा आहिनि। इहो बंदरगाहु कंहिं लाइ आहे? वॾनि कारख़ानेवारनि जे लाइ ऐं ग़रीब जनता खे नटायो वेंदो।”

ईआईए रिपोर्ट बि तस्लीमु करे थी त बंदरगाहु मौजूदह मछी मारण जे इलाइक़नि ताईं पहुच खे घटाए छडं॒दो। इन में मुहाणनि जे कुटुंबनि, मलाहनि, ॿेड़ियुन जे अमिलनि ऐं मज़ूरनि खे मुतासिर माण्हुनि में शामिलु कयो वियो आहे, जेके यकमुश्तु मुआविज़े ऐं पैसनि जे मामले में आरिज़ी मदद जा हक़दार हूंदा। लेकिनि जेके ॿेड़ियुन खां सवाइ मछी मारींदा आहिनि, जीअं त अमिता आहे, से कंहिं बि सूरत में मुआविज़े जा हक़दारु न थींदा। इनकरे हैरानी जी ॻाल्हि नाहे त अमिता खे कंहिं बि ठहिरायल मुआविज़े बाबति कुझु बि मालूमु नाहे।

इन साहिल खे वठी डहाणू जे माहीगीरनि ऐं हारियुन जी जदोजहद साढा टे ॾहाका अॻु 1990 जे ॾहाके में शुरू थी हुई, जॾहिं उन्हनि पहिरियों भेरो बंदरगाह जे मंसूबे जो विरोधु कयो हो। उन्हनि जी तवील जदोजहद जे नतीजे में सुप्रीम कोर्ट मुदाख़िलत कई ऐं हिक ख़ासि पर्यावरणु प्राधिकरण खे क़ाइमु कयो वियो।

वधावन बंदर विरोधी संघर्ष समिति जो अध्यक्षु नारायण पाटिल (70) चवे थो, “असां 1996 में सुप्रीम कोर्ट विया हुआसीं ऐं न्याउ मूर्ति सी.एस. धर्माधिकारी जी अग॒वानी में डहाणू तालुका पर्यावरण संरक्षण प्राधिकरणु (डीटीईपीए) क़ाइमु थियो। पोइ बंदरगाह जे विरोध में असांजो केसु नईं ठहियल अथार्टी वटि वियो ऐं सालनि ताईं अटिकयल मामले ते नेठि 1998 में बंदरगाह जोड़ण जे ठहिराउ खे मुकमिल तौर ते ख़ारिजु कयो वियो। अॼु 25 सालनि खां पोइ वधावन बंदरगाह खे मंज़ूरी मिली आहे, त इन जो सबबि इहो नाहे त मक़ामी मुख़ालिफ़त घटि थी वेई आहे, पर इनकरे त मंसूबे सां लाॻापियल नियम तब्दीलु थी विया हुआ।

नारायण पाटिल चवे थो,“ 2014 खां पोइ सरकार इंतिज़ामु रखंदे पाण क़ानून खे कमज़ोरु करणु शुरू कयो। सुप्रीम कोर्ट द्वारां मुक़ररु डीटीईपीए जे मेम्बरनि खे 2023 में हटायो वियो जेके घणे अरिसे खां जुड़ियल हुआ। अलमियो इहो आहे त परियोजिना खे साॻे इक़्तिदार खां मंज़ूरी मिली, जंहिं कंहिं दौर में इन खे मुस्तक़िल तौर ते रदि कयो हो। फ़रवरी 2024 में, पर्यावरण, वन ऐं जलवायु परिवर्तन मंत्रालय परियोजिना खे माहौलियाती मंज़ूरी ॾिनी।

जेतोणीकि 2023 जी ईआईए रिपोर्ट जे मुताबिक़ि बंदरगाह जी अॾावत सां वधावन जी सामूंडी पटी ते बुरो असरु पवंदो, जिते माहीगीरनि खे झझे अंदाज़ में मछियूं मिलंदियूं आहिनि ऐं उहे लॉब्स्टर पालण जी सरगर्मियुनि में शामिल हूंदा आहिनि। सरकार जे पेशि कयल ठहिराउ जो मक़सदु गुज़रान में गूनागूनियत आणणु आहे, जंहिं में जवान मुहाणनि खे खुलियल समुंड में केज कल्चर जो हुनरु पिराइण शामिलु आहे।

कल्पेश आकरे (32) चवे थो, “इथं हा पोर्ट आला, आम्ही काय करायचं, पिंजऱ्यात मच्छी कशा पकडणार, समुद्र आपणहून तयार करतो सगळं [जेकॾहिं हिते बंदरगाह ठही वियो त पोइ असीं मछियूं कीअं पकड़ंदासीं? पिञरे में मछियूं कीअं झलबियूं?]समुंडु त असांजे लाइ सभु कुझु तयारु रखे थो।” कल्पेश उन्हनि नौजवाननि मां आहे जंहिं जे लाइ अहिड़ी गै़र रवायती मंसूबो ठाहियो पियो वञे। हू शाम जो समंड मां छहनि कलाकनि ताईं मछी मारण में गुज़ारण खां पोइ वापसि आयो आहे। संदसि बदनु पाणीअ जे करे आलो आहे, कपड़नि ते वारीअ जा कणा आहिनि, हिक हथ में त ॼारु आहे ऐं ॿिए में लकुणु। केज फिशिंग ते हुन खे घणो भरोसो नाहे।

गुज़िरियल कुझु अरिसे में बंदरगाह जो निर्माणु मुकमिलु रफ़्तार सां शुरू थी चुको आहे। इन जी शुरूआति समुंड खे भरे ज़मीन तयारु करण ऐं सड़कुनि जी अॾावत सां थी आहे। अलमियो ही आहे त अॾावती जाइ खां 500 मीटर जे दायरे में कंहिं बि ग़ैरक़ानूनी मेड़ खे, जीअं ॻोठाणनि जे एहितिजाज जहिड़ियुनि सरगर्मियुनि खे रोकण जे लाइ भारतीय नागरिक सुरक्षा संहिता जी धारा 163 लाॻू कई वई आहे। ही पाबंदी सेप्टेम्बरु जे महीने ताईं लाॻू रहंदी।

थोरनि ई ॾींहनि में कल्पेश ऐं अमिता वरी मछियूं पकड़ण जे कम ते मोटी वेंदा। भले ई सामूंडी पटीअ में तब्दीली अचे पेई, पर लहरुनि जे चाढे़ ते उन्हनि खे को शकु नाहे। ऐं वधावन जी पटी ते लहरुनि जे गोड़ में अमिता पंहिंजी ख़्वाहिश जो इज़हारु करे थी, “मां हिकु ॾींहुं पंहिंजी बे॒ड़ी ख़रीद करण चाहियां थी।”