अमिता के ‘समुंदर’ के छीन रहल बा?

अरब सागर के पानी फेन्नू ज़मीनी की ओर बढ़ रहल बा आ पालघर जनपद के दहानू क्रीक के लहरदार बालू के पट्टियन आ उथली धारावन के घोंटत बा. अमिता टंडेल निम्मन से सूती ना पावेली. ऊ ऊंच ज्वार (हाई टाइड) के आईला के इंतज़ार करेली आ जागे खातिर हरमेस्सा अलार्म लगावेली. मुड़ी पर बैटरी से चले वाला हेडलाइट लगाकर और कांधे पर दस से पंद्रह किलो के जाली लटकाकर, ऊ आधी रात के अंधार में चलेली. क्रीक (खाड़ी) के ओर लगभग 400 मीटर दूर एक और मेहरारू उनके राही अगोरत बाडी. ऊ कहली, "ई सालन के अनुभव ही हमहन के चांद के कला के समझे के सिखवले बा. एसे हमहन के ऊंच आ नीच ज्वार के समय के पता लागे ला."

"हमनी के समाज में लईका-लईकी आपन आपन माई-बाऊ जी के मछरी पकड़त देखी के बड़ होने. जब हम पनरह बरिस के रहनी त हमार बाऊ जी हमके अपनी साथे ले जां. ऊ हमके ज्वार भाटा, चांद आ ओ जगही के बारे में बतवने जहां खाड़ी में मछरी आवेली." साठ साल के अमिता आपन जीवन के पचास बरिस ज्वार भाटा के सिखला में बिता दीहली जईसे उनकर बाऊ जी करें.

खाड़ी के किनारे पहुंच के अमृता आ दूसर मेहरारू 100×20 फीट के जाल के खोल के पानी में पसारेली. फेर ओके दुनू छोर से पकड़ी के ई लोग पानी में उतरेली आ दुनू ओर से करीब तीस फीट आगे बढ़ेली. जाल के पानी में डुबा आ घिसरा के मछरी पकड़ेली, ई लोग जाली के देखला के बजाय ओके महसूस करेली.

"राती के गोड़ के नीचे का बा, लऊकबे ना करेला. हमनी के मुड़ी पर बैटरी वाला लैंप बांधेनी के. ओही के टिमटिमात रोशनी से हमनी के दिशा के पता लागेला. लहर बड़ा तेज चलेला आ एक्को गलती से आदमी गिर सकेला. एहिजा कब्बो सुरक्षा नईखे. कब्बो-कब्बो त गटई भर पानी में बुडी के खड़ा रहे के पड़ेला. हमनी के काम करत रहे के पड़ेला, काहे से कि अगर मछरी ना पकड़ाई त ओही दिन के दिहाड़ी ना बनी." अमिता मछरी चार घंटा से भी बेसी पानी में रहेली, जबले हाथ में मछरी के अच्छा-खासा वजन ना महसूस होखे.

अमिता जईसन बाकी मरद मेहरारू जेकरी लगे नाव नईखे. ऊ ए 20 किलोमीटर लंबा खाड़ी में हाथे से मछरी पकड़े आवेने. ई खाड़ी दहानू तालुका के वरोर गांव से कुछे मीटर दूर बा. ई इंटरटाइडल जोन के हिस्सा ह जवन समुंदर के पानी अईला से डूबी जाला. "अगर हमनी के समुंदर में ना जाइल जाई, त का खाईल जाई?" अमिता सवाल करेली.

बाकिर अब वाधवन बंदरगाह के बड़हन योजना चलते ई सवाल अमिता के आजकल बेर-बेर सतावे लागल बा. बंदरगाह के ई परियोजना ओही ज्वार-भाटा वाला इलाका में 17,471 हेक्टेयर में फइलल बा. बता दीहीं कि जवाहरलाल नेहरू बंदरगाह प्राधिकरण (जेएनपीए) आ महाराष्ट्र समुद्री बोर्ड (एमएमबी) मिलके ई बंदरगाह बनाई लोग, जे देस के 13वां बड़हन बंदरगाह होई. ई समुंदर के बीच बनत कृत्रिम टापू पर देस के सभसे बड़ कंटेनर परियोजना होई. एह खातिर अरब सागर के 1,448 हेक्टेयर जमीन पाट के नया जमीन बनावल जाई. एकरा अलावा ई दुनिया के सबसे गहिर बंदरगाह में से एगो होखे वाला बा, जहंवा बहुते बड़ मालवाहक जहाजो आसानी से आ-जा सके.

अभी के हिसाब से परियोजना के पहिल चरण 2029 तक आ दूसर 2037 तक पूरा होखे वाला बा. 76,220 करोड़ के इ परियोजना से 10 लाख से जादे लोग के सीधा आ परोत्र रोजगार मिले के दावा बा. मछुआरा लोग के मुआवजा देवे आ उनकर हुनर बढ़ावे खातिर ट्रेनिगों देवे के बात कहल गइल बा.

महाराष्ट्र सरकार आपन वादा दोहरवले बिया. सरकार के कहल बा कि पुनर्वास, कौशल प्रशिक्षण, आईटीआई के बेहतर बनावल आ मछली पानल खातिर अलग संस्थान के जरिए ऊ ई पक्का करी कि “हमार मछुआरा आ हमार युवा, एह तरक्की के खाली देखे वाला ना, बलुक एकर सबसे बड़ फायदा पावे वाला होखे.”

स्थानीय लोग के संदेह बा. 45 साल के नाव वाला मछुआरा विजय विंडे कहेने कि, "जेएनपीटी बंदरगाह में देखीं, मछरी मारे वाला परिवार के एको सदस्य के ए परियोजना के बाद कवनो काम नईखे मिलल. ऊ लोग नौकरी आ मुआवजा खातीर कोर्ट में लड़ाई लड़त आईल बाड़े. हर मेगा परियोजना के इहे कहानी बा."

हमहन के लइका पहिलहीं से बोइसर औद्योगिक क्षेत्र के फैक्ट्री में मजदूरी करत बाने. बाकिर ऊ लोग मछरी मारे के भी जानेने. राशन के दाम एतना ढेर बा, तेल जूरत नईखे. हमनी खातिर सब्जी महंग बा. हमनी के समुद्र से जवन भी कमाई करेनीके, ओही से चूल्हा चौकी चलत बा.'' अमिता कहेली.

"कवनो कवनो दिन हमके 200 से 300 रुपिया मिलेला, कुछ दिन ओहू से कम, बाकिर ए समुंदर से हमके आपन नारीत्व वापिस मिलल बा. ऐसे हमके आज़ादी मिलल बा." दूगो पियक्कड़ मरदन से बियाह कईला के बाद, अमिता अपना बेटा के खुद से पोसत बाड़ी, आ आमदनी के जरिया बा बस हाथे से मछरी पकड़ल.

"हम ए समुंदर के बचपन से देखत बानी. हम एहिजा खेलीं, नहाई आ पानी में पंवरी, दूसरे गांव के लईकन संगे केकड़ा पकड़ी. ओ दिन में हमार माई बाप आ दादा दादी राती के उठी जा लोग. ओ सबसे हम जाली से मछरी पकड़े के सीखनी.

अमिता नियर कई गो हाथ से मछरी पकड़े वाला मछुआरा लोग खातिर खाड़ी में गईला के सवाल सभसे महत्व के बाटे, समुंद्री इकोसिस्टम में भी बदलाव बाटे जे कौनों प्रोजेक्ट के ले आवे के खातिर जरूरी बा.तटीय पारिस्थितिकी के बारे में उनकर आपन समझ पीढ़ियन के जीयल अनुभव में जड़ जमा लेले बा. जइसे कि ऊ कहत बाड़ी, "समुंदर में बाकी हर चीज दोसरा पर निर्भर करेला. हरियर शैवाल होला, छोट-छोट जीव ओकरा पर जिंदा रहेला, मछरी ओ छोट-छोट जीव के खाएले, आ हमनी के मछरी पर जीयत बानी के."

जब ज्वार हट जाला त समुंदर के गर्भ लऊकेला. रउरा केकड़ा, सीप, छोट-छोट मछरी देख सकेनी. इहे ऊ जगह ह जहवां ई समुंदर में गहिरा जाए से पहिले बढ़ेने. हमनी के सिखावे के जरूरत नईखे कि मछरी कहां पैदा होखेला. हमनी के रोज एकरा के देखत बानी जा– अंडा कहां बा, मछरी कहां कहां चलेले, केकड़ा कहां से निकलेले. समुन्दर ही हमनी के सब कुछ सिखावेला.” अमिता चट्टानी प्रजनन खिंचाव के बारे में सहजता से बात करेली, जवना के शंकोधर बिंदु के नाम से जानल जाला.

एकरा के दहानु के शोधकर्ता भूषण भोयर “एगो परतदार समुद्री पारिस्थितिकी तंत्र” कहेने. एकर आकार चट्टानी उभरल, इंटरटाइडल मडफ्लैट, क्रीक, मैंग्रोव आ वैटरना नियर नदी सभ के मीठा पानी के अरब सागर के साथ मिलावट से मिले ला. ऊ कहेने कि, 'नदी से आवे वाला ताजा पानी से लवणता नरम हो जाला, एहसे इन्हां जमीन से मात्र कुछ फीट नीचे मिलेवाला मीठा पानी खारा स्थिति पैदा करेला, जवन कि प्लवक अवुरी मछरी के भरपूर मात्रा में सहारा देला.

इहे नाजुक समुद्री चक्र बा जवन दहानु तट के किनारे जैव विविधता अवुरी मछरी पकड़े के अर्थव्यवस्था दुनो के कायम राखेला जवना में वाधवन बंदरगाह में बदलाव होई. ए इंटरटाइडल जोन में 1,448 हेक्टेयर के रिकलेमेशन आ जमीन भरला के साथ, साथ ही 10.14 किलोमीटर लंबा ब्रेकवाटर दीवार भी बने के बा.

सीएसआईआर–नेशनल इंस्टीट्यूट ऑफ ओशनोग्राफी (राष्ट्रीय समुद्र विज्ञान संस्थान) के रिपोर्ट में कहल गइल बा कि बड़ पैमाना पर समुंदर पाटे आ गहिराई तक खुदाई करे से एगो ‘टारल ना जा सके वाला’ तबाही होई. एह से मछरी के प्रजनन चक्र बिगड़ सकेला, समुद्री खाद्य श्रृंखला बदल सकेला आ तट के किनारे समुद्री जीव-जंतु के आवाजाही पर असर पड़ सकेला.

दहानु के मछरी मारे वाला समुदाय के अमिता आ अउरी लोग खातिर ई खाली पर्यावरण के चिंता ना ह. ज्वार-भाटा वाला ई तटीय इलाका पीढ़ीयन से ओह लोग खातिर रोजी-रोटी के ठिकाना रहल बा, जहंवा ऊ लोग हाथ से मछरी पकड़ के कमात आइल बा. पर्यावरण प्रभाव आकलन (ईआईए) के रिपोर्ट में दावा कइल गइल बा कि 5,333 घर सभ के लमसम 20,809 मछुआरा लोग जिंदा रहे खातिर एह पर्यावरण से भरपूर इलाका पर निर्भर बा. हालांकि ई कहल मुश्किल बा कि ईआईए के अध्ययन में अमिता जइसन छोट हाथ मछुआरन के गिनती भईल बा कि ना.

"कवनो अफसर हमहन हाथ से मछरी मारे वाला मछुआरा लोग के लगे ना आके पूछलस कि हमनी के का करेनी जा. ऊ लोग नाव वालन मछुआरा सभ से बात कईले होईहे.'' अमिता सफाई देत कहली. वाधवन बंडर विरोधी संघर्ष समिति ए बात के पुष्टि कई लस कि दहानु गांव के आसपास 200 से ढेर हाथ से मछरी मारे वाला मछुआरा हो सकत बाने. बंदरगाह बनला से पूरा समुदाय के मछरी मारे खातिर समुंदर में अईसन जगह ना मिली त हमनी के बस इहवां इ बंदरगाह नाही चाही.'' अमिता कहेली.

कुल 17,471 हेक्टेयर में से 571 हेक्टेयर में फइलल एह परियोजना के सड़क आ रेल गलियारा के वरोर, अगर, नरपड आ तारापुर समेत 16 गो गांवन से गुजरे के उमीद बा. जहां अधिग्रहित जमीन खातिर मुआवजा आ विस्थापित लोग के पुनर्वास के वादा कइल गइल बा ओहिजा समुंदर त खुदे परंपरागत मुआवजा के ढांचा से बाहर आवेला.

आ मछरी मारे वाला समुदाय खातिर असली नुकसान ओहिजा बा. “आमछी शेति समधराच। आता समुद्रचा कही सतबरा आहे का (हमार खेत ह समुंदर। तोहरा लगे समुंदर खातिर सतबरा बा कि ना)?” गुस्साइल विजय पूछत बाड़े.

"हमनी के एहिजा पीढ़ी दर पीढ़ी रही आईल बानी के. एहिजा घोल मछरी आ बहुत प्रजाति के झींगा मिलेला जवन महंग बिकाला. ई बंदरगाह केकरी खातिर बनत बा? बड़हन उद्योगपतिन खातिर. एहिजा के आई? बड़ व्यापारी. आ हमहन गरीब जनता के एहिजा से भगा दिहल जाई," ऊ कहने.

इहां तक कि ईआईए रिपोर्ट में भी मानल गईल बा कि बंदरगाह से मौजूदा मछरी पकड़े के मैदान तक पहुंच प रोक लगा दिहल जाई. एहमें एक बेर के नकद मुआवजा आ अस्थायी आय सहायता के पात्र प्रभावित समूहन में नाव पर मछरी मारे वाला घर वालन, नाव मालिकन, चालक दल के सदस्यन आ मजदूरन के पहचान कइल गइल बा. अमिता जइसन नाव के बिना मछरी मारे वाला लोग मुआवजा के पात्रता के मापदंड में कतहीं ना आवेला. कवनो अचंभा नइखे कि अमिता के वादा मुआवजा के बारे में कवनो अंदाजा नइखे.

एह तट पर दहानु के मछुआरन आ किसानन के ई संघर्ष करीब पैंतीस साल पहिले 1990 के दशक में शुरू भइल रहे जब ऊ लोग पहिला बेर बंदरगाह बनावे के योजना के विरोध कइने. ए लोग के लंबा अभियान के बदले सुप्रीम कोर्ट के बीच में आके आ फेर एगो विशेष पर्यावरण प्राधिकरण के गठन करे के पड़ल.

वाधवन बंडर विरोधी संघर्ष समिति के अध्यक्ष 70 साल के नारायण पाटिल बतावेने, "हमनी के 1996 में सुप्रीम कोर्ट गईल रहनी अवुरी जस्टिस सी.एस.धर्माधिकारी के अध्यक्षता में दहानु तालुका पर्यावरण संरक्षण प्राधिकरण (डीटीईपीए) के गठन भईल रहे. बाद में बंदरगाह के विरोध करे वाला हमनी के मामला के नवगठित प्राधिकरण के लगे पहुंचावल गईल आ बरिसन ले एकरा के घिसरवला के बाद आखिरकार 1998 में बंदरगाह के विकास के अनुमति से स्थायी तौर पर मना क दिहल गईल गईल.” आज 25 साल बाद वाधवन बंदरगाह के मंजूरी आ गईल बा त एकर कारण ई नईखे कि स्थानीय विरोध सुतल बा, बाकिर ए परियोजना के आसपास के नियम में बदलाव भईल बा.

नारायण पाटिल कहेने, "2014 के बाद सरकार व्यवस्थित तरीका से खुदे कानून के भंग करत रहल, डीटीईपीए (सुप्रीम कोर्ट के ओर से नियुक्त) के पुरान सदस्यन के 2023 में बदल दिहल गईल. आ विडंबना ए बात के बा कि ए परियोजना के ओही प्राधिकरण से मंजूरी मिलल जवन एक बेर एकरा के स्थायी तौर प इनकार क देले रहे." एकरे बाद फरवरी 2024 में पर्यावरण, वन आ जलवायु परिवर्तन मंत्रालय ए प्रोजेक्ट के पर्यावरण मंजूरी दे दिहलस.

ईआईए रिपोर्ट 2023 में ई मानल गइल बा कि बंदरगाह के निर्माण से वाधवन के तटरेखा पर बिपरीत असर पड़ी जहां मछुआरा लोग बढ़िया होला आ झींगा पकड़ेने. सरकार के प्रस्तावित समाधान बा ‘आजीविका विविधीकरण’ जवना में युवा मछुआरन खातिर खुला समुंदर में पिंजरा से मछरी मारे के प्रशिक्षण भी शामिल बा.

युवा मछुआरा में से एगो 32 साल के कल्पेश आक्रे, जिनकर खातीर इ अपरंपरागत मछरी मारे के योजना बनावल जाता, कहेने, "अब हमनी के का करे के बा, अगर बंदरगाह एहिजा आई, पिंजरा से मछरी कईसे पकड़ल जाला? समुद्र हमनी खातीर स्वाभाविक रूप से मछरी पकड़ले के तैयारी करेला. "ऊ अबे कुछु छव घंटा मछरी मारी के सांझी के समुंदर से घरे लवटल बाड़े. समुंदर के पानी से भींजल देही, बालू से ढंकल कपड़ा, एक हाथ में कुंडल वाला मछरी मारे के जाल आ दोसरा हाथ में लकड़ी के लमहर खंभा, पिंजरा में मछरी मारे पर उनके बहुते कम भरोसा बा.

पछिला कुछु साल में बंदरगाह के निर्माण पूरा स्पीड से शुरू भइल बा, जवना के शुरुआत समुद्र में रिकलेमेशन, सड़क के निर्माण से भइल बा. विडंबना ई बा कि सड़क निर्माण स्थल से 500 मीटर के भीतर भारतीय नगरिक सुरक्षा संहिता के धारा 163 के लागू कइल गइल बा काहे से कि गांव के लोगन से विरोध प्रदर्शन जइसन कवनो गैरकानूनी जुटान ना होखे. ई प्रतिबंध सितंबर महीना ले सक्रिय रही.

कुछु दिन में कल्पेश आ अमिता समुन्दर में हाथ से मछरी मारे लवट अइहें. जबकि तटरेखा बदलत रहेला, ज्वार-भाटा ए सबके इकलौता उम्मीद बा. आ वाधवन तट रेखा पर बढ़त तूफान के बीच में अमिता लालसा से कहली, “हमहू एकदिन एगो नाव कीनब.”