تارو کی کہانی سنگت رام کی زبانی

ساڑھے پانچ دہائیوں تک سنگت رام کے لیے زندگی اور موت کے درمیان بال برابر کا فاصلہ ہوا کرتا تھا۔ وہ اپنے انگوٹھے کے ناخن کو اپنی شہادت کی انگلی سے چھو کر اس فاصلہ کے بارے میں سمجھاتے ہوئے کہتے ہیں، ’’اگر وہ بال کی چوڑائی کے برابر بھی توازن کھو دے تو آپ ڈوب جائیں گے۔‘‘ بیاس کی تند رو، برفیلے پانیوں سے گزرنا ہر کس و ناکس کے بس کی بات نہیں تھی۔ ہلتی اور ہوا بھری بیلوں کی کھال پر تو یقینی طور پر نہیں، جو صدیوں سے یہاں ندیوں کو پار کرنے کا واحد ذریعہ تھی۔

سَنگت رام، جن کی عمر ۸۹ سال ہے، ہماچل پردیش کی وادی کُلّو کے آخری زندہ تاروؤں (ملاحوں) میں سے ایک ہیں۔ ان کا پیشہ بہت پہلے ختم ہو گیا تھا۔ اس پیشہ کی افادیت موجودہ صدی کے آغاز میں ختم ہونا شروع ہو گئی تھی۔ یہ وہ وقت تھا جب مختلف مقامات پر پل اور جھولے (ہاتھ سے کھینچنے والی روپ وے ٹرالیاں) وجود میں آنے لگے تھے۔ اس سے پہلے وہ اپنی’دیریا‘ پر مقامی دیوتاؤں کی مورتیوں سے لے کر بادشاہوں تک، باراتیوں سے لے کر لاشوں تک، فصلوں سے لے کر لکڑیوں تک، سب کچھ ندی کے پار پہنچایا کرتے تھے۔

’دیریا‘ بیل کی کھال ہوتی تھی جس میں ہوا بھر کر بیاس ندی کو عبور کرنے کے لیے بطور کشتی استعمال کیا جاتا تھا۔ دِیریا سے متعلق کہانیاں دو ہزار سال سے بھی پہلے کی ہیں، جب سکندر کی فوج نے ہندوستان میں مزید پیش قدمی سے انکار کرتے ہوئے بغاوت کر دی تھی۔ لوک کہانیوں میں بھی اس وقت مقامی لوگوں کے ذریعہ دیریا چلانے کا ذکر ملتا ہے۔ دوسری طرف یونانیوں کا خیال تھا کہ تند رو ندی کو عبور کرنا ناممکن ہے۔ بیاس سکندر کو پیش آنے والی سب سے مشکل رکاوٹوں میں سے ایک تھی۔ بعض مؤرخین کا دعویٰ ہے کہ یہ ہندوستان میں اس کے حملوں کی سب سے آخری مشرقی حد تھی، جس سے وہ آگے نہیں بڑھ سکا تھا۔

کئی صدیوں تک ان ملاحوں (جن میں شاید سنگت رام کے آباء و اجداد بھی شامل تھے) کے ذریعہ چلائی جانے والی دیریائیں بیاس کے بائیں اور دائیں کناروں کے درمیان پل کا کام کرتی رہیں۔ یہ ندی اونچی پہاڑی جھیل، بیاس کنڈ سے نکلتی ہے اور پنجاب کے میدانی علاقوں میں ہریکے کے مقام پر ستلج میں ضم ہونے سے پہلے ۴۷۰ کلومیٹر کا فاصلہ طے کرتی ہے۔

کُلّو وادی میں، تقریباً ۲۰ کلومیٹر کے پھیلاؤ تک پانچ تار (ندی کے نسبتاً پرسکون حصے) تھے، جہاں تارو کام کرتے تھے۔ ان کے نام تھے بُھوئِن تار (جسے آج کل بُھونتر کہا جاتا ہے)، بجورا میں ہاٹا تار، راہ تار، جوگنی تار اور جیا تار (بیاس کی معاون ندی پاروتی پر)۔ سنگت رام نے ہاٹا تار کی گزر گاہ پر کام کیا۔ وہ ندی کے ایک طرف کے پھیرے میں ۴۰۰ فٹ سے زیادہ کا فاصلہ طے کرتے تھے۔ وہ ایک ایسی ندی پر بیل کی ہوا بھری ہوئی کھال سے سفر کرتے تھے جو کبھی بھی خوفناک شکل اختیار کرسکتی تھی۔ ان کے زمانے میں ہاٹا تار میں پانی ۱۵ سے ۲۰ فٹ کے درمیان گہرا ہوتا تھا۔ لیکن اس ڈھلوان علاقے میں ندی اپنی گہرائی سے زیادہ اپنے تیز و تند بہاؤ کی وجہ سے خطرناک ہو جاتی تھی۔

پہلے لوگوں کو ندی عبور کرنے کے لیے پل کی تلاش میں پیدل لمبی دوری طے کرنی پڑتی تھی۔ بجورا کے رہائشی اور گاؤں کے مندر کے پجاری، ۷۶ سالہ چھبیل داس شرما پاری کو بتاتے ہیں، ’’ہمیں بائیں کنارے تک پہنچنے کے لیے ۱۰ کلومیٹر کا سفر کرنا پڑتا تھا، جس میں دو سے تین گھنٹے لگتے تھے۔ لیکن تارو کی مدد سے ہم تین منٹ میں دوسرے کنارے پر جا سکتے تھے۔‘‘

مسافروں کو ڈھونے کا یہ ایک عجیب وغریب طریقہ تھا۔ تارو، دیریا کے اوپر لیٹ جاتا تھا اور مسافر تارو کی پیٹھ پر سواری کرتا تھا، کبھی کبھی تارو کے اوپر لیٹ بھی جاتا تھا۔ تارو اپنی ٹانگوں اور پھالی (چھوٹی پتوار) کی مدد سے دیریا کو چلاتا تھا۔ تارو اپنے پیروں کا استعمال دیریا کو آگے بڑھانے کے ساتھ ساتھ اس عجیب و غریب کشتی کو متوازن کرنے کے لیے بھی کرتا تھا۔ اس میں نکتہ یہ تھا کہ پورے وزن کو دیریا اور تارو کے بیچ میں لایا جائے۔

ایک دیریا ایک ہی بیل کی کھال سے بنائی جاتی تھی اور عام طور پر ایک وقت میں ایک مسافر کو لے جاتی تھی۔

اگر مسافر زیادہ ہوتے یا سامان بھاری ہوتا تو وہ دو دیریاؤں کو ایک ساتھ جوڑ کر ان پر چارپائی لگا دیتے۔ اس کے بعد تارو تیسرے دیریا پر سوار ہو کر اس پورے انتظام کو آگے بڑھاتا۔

بیاس کے علاوہ دوسرے علاقوں میں بھی دیریا چلا کرتے تھے۔ ماضی کے سیاحوں کے بیانات سے معلوم ہوتا ہے کہ وہ ستلج، جہلم اور سندھو کے آس پاس رہنے والے لوگوں کی زندگی کا جزو تھے۔ ان میں سے بعض مقامات پر دیریا کو ’مسّک‘ کہا جاتا تھا۔ اپنی ۱۹۰۴ کی کتاب ’انڈیا تھرو دی اسٹیریوسکوپ‘ میں جیمز ریکالٹن نے لکھا ہے، ’’دیریا والے تیز سیلاب کے دوران کھالوں کو ندی میں چلا سکتے ہیں، جب کہ بہترین تیراک ندی کے تند بہاؤ میں بے بس ہو جاتا ہے۔‘‘ تقریباً ایک صدی قبل، نو آبادیاتی کھوجی ولیم اے گرین نے اس رجحان کو ’’شاید دنیا کی سب سے قدیم اور سب سے زیادہ دلچسپ ریور فیری‘‘ قرار دیا تھا۔

سنگت رام کو یہ پیشہ اپنے والد سے وراثت میں ملا، جنہوں نے اپنی پوری زندگی ہاٹا تار میں کام کرتے ہوئے گزاری۔ ان کے دادا نے بھی یہی کام کیا تھا۔ ’’ہمارا تعلق کشتی بانوں کے خاندان سے ہے،‘‘ وہ کہتے ہیں۔ [وہ کولی برادری سے تعلق رکھتے ہے، جو ہماچل پردیش میں درج فہرست ذات کے طور پر درج ہے]۔ ’’ہمارا خاندان سوجان پور سے یہاں آ کر آباد ہوا تھا،‘‘ وہ پاری کو بتاتے ہیں۔ سوجان پور، ہمیر پور ضلع میں بیاس کے جنوبی کنارے پر بہاؤ کے رخ کی جانب تقریباً ۱۷۰ کلومیٹر کی دوری پر واقع ہے۔ وہاں سے ہجرت کرنے کے بعد ان کے آباء و اجداد بجورا شہر کی طرف ندی کے بائیں کنارے پر واقع مسروگی گاؤں میں آباد ہوئے۔ فی الحال اس گاؤں میں رہنے والے ۱۳ کنبے اپنا سلسلہ نسب تاروؤں سے جوڑتے ہیں۔

سنگت رام کا کہنا ہے کہ تارو گھرانے کے کسی بھی بچے کے لیے سن بلوغ کو پہنچنے کے بعد سب سے ضروری چیز ہر موسم میں بیاس کے بہاؤ پر عبور حاصل کرنا تھی۔ ’’میں نے ۱۴ یا ۱۵ سال کی عمر میں دیریا کی سواری شروع کی تھی۔ اس سے پہلے ہمیں بیاس میں کئی مہینوں تک غوطہ لگانے اور تیراکی کرنے کے لیے کہا گیا تھا۔ توازن کا فن سیکھنے کے لیے، تین سے چھ کلوگرام کے چار پتھروں کو ہوا بھری ہوئی بیل کی کھال کی ٹانگوں سے باندھ کر نوعمر لڑکوں سے ان کی سواری کے لیے کہا جاتا تھا۔ میں نے صرف ایک دفعہ توازن کھویا تھا۔ اس کے علاوہ نہ میں خود کبھی گرا، نہ کسی مسافر کو گرنے دیا۔ تاہم، ان کے ماما (ماموں) ڈولے رام، جنہوں نے انہیں دیریا کی سواری سکھائی تھی، متلاطم ندی کو عبور کرتے ہوئے اپنی جان سے ہاتھ دھو بیٹھے تھے۔

مئی اور ستمبر کے درمیان جب ندی کے تیز بہاؤ میں دیریا کا تیرنا ناممکن ہو جاتا، تو کام معطل رہتا تھا۔ اکتوبر اور اپریل کے درمیان دیریا دوبارہ چلنا شروع ہوجاتی تھیں، اس عرصے میں بیاس کا پانی نسبتاً پرسکون ہوا کرتا تھا۔ سنگت رام کا کہنا ہے کہ آزادی سے پہلے ندی کے پار ترائی (سواری) کا کرایہ ایک آنہ (روپے کا ۱/۱۶واں حصہ) تھا، پھر دو آنہ ہوا، اور ۱۹۴۷ کے بعد کا کرایہ ۲۵ پیسے ہوا جو کئی دہائیوں تک جاری رہا۔ سال ۱۹۷۰ کی دہائی میں ایک طرف کا کرایہ ۵۰ پیسے اور ۱۹۹۰ کی دہائی میں ایک روپیہ ہو گیا۔ وہ کہتے ہیں، ’’ہم صرف ان نامعلوم لوگوں سے پیسے لیتے تھے جو دور دراز مقامات سے آتے تھے۔ ربیع اور خریف دونوں موسموں کے بعد گاؤں والوں سے فصل کا ایک حصہ، یا کسان جو کچھ بھی پیدا کرتے تھے وہی ان کا کرایہ ہوتا تھا۔

جب بھی ندی کے بہاؤ میں شدت آتی تھی، دیریا ہی اسے عبور کرنے کا واحد ذریعہ ہوتا تھا، جسے لوگ استعمال کر سکتے تھے۔ سال ۱۹۴۷ کے تباہ کن سیلاب کے دوران جب بھونتر پل منہدم ہو گیا، تو سنگت رام کے خاندان کے کچھ افراد کُلّو کے راجہ بھگونت سنگھ کے حکم پر بھونتر منتقل ہو گئے۔ ’’اس پل کو دوبارہ بنانے میں تین سال کا وقت لگا۔ اس دوران ہم ہی ندی کے دونوں کناروں کے درمیان واحد پل تھے،‘‘ وہ کہتے ہیں۔

سنگت رام کے بھتیجے، ۵۳ سالہ گوتم رام کے لیے صدیوں پرانا خاندانی پیشہ اپنانا ایک فطری عمل تھا۔ لیکن جیسے ہی انہوں نے ۱۹۸۰ کی دہائی میں اسے اپنایا، اس کی افادیت ختم ہونے لگی۔ اسی دہائی میں یہاں ایک کیبل ٹرالی وجود میں آئی۔ اس کے بعد ۲۰۰۲ میں بجورا میں پل تعمیر ہوگیا۔ لہٰذا، گوتم کے لیے دیریا ذاتی استعمال کی چیزوں اور لکڑی کی نقل و حمل، یا ماہی گیری کا ذریعہ بن گئی۔ انہوں نے محکمہ تعلیم میں کلرک کی نوکری اختیار کرنے کے بعد اس کام کو چھوڑ دیا۔ تاہم ۱۹۹۵ کے سیلاب کی ان کی یادیں تازہ ہیں۔ ’’میرے دادا سندرو رام اور ایک چچا، گشنو رام نے اس سیلاب کے دوران کلو کے ڈپٹی کمشنر سے سند توصیفی حاصل کیا تھا۔ انہوں نے بھونتر ڈسپنسری سے لوگوں اور ڈاکٹروں کو بچایا اور دیریا کا استعمال کرتے ہوئے ایسے مقامات سے لاشوں کو پانی سے نکالا، جہاں کسی اور کو جانے کی ہمت نہیں تھی۔"

دیریا مقامی دیوتاؤں کی مورتیوں کی نقل و حمل کا ایک عام ذریعہ تھی۔ وادی کُلّو کا ایک مشہور قصہ ہے کہ سنگت رام کے آباء و اجداد ندیوں میں تیر کر دیوی ستیہ وتی کو قدیم زمانے میں میدانی علاقوں سے لے کر یہاں آئے تھے۔ گوتم کہتے ہیں، ’’ہمارے راجا [کلو کے مقامی حکمراں] بائیں کنارے پر واقع ہُرلا گاؤں جایا کرتے تھے اور ہماری پیٹھ پر بیٹھ کر ندی کو پار کرتے تھے۔‘‘

دیریا، جس سے ہر ایک تارو کنبہ اپنی روزی روٹی کماتا تھا، گھر میں بہترین جگہ پر رکھا جاتا تھا، تاکہ استعمال میں نہ ہونے پر وہ سورج کی براہ راست روشنی سے محفوظ رہے۔

دیریا بنانے اور اسے محفوظ کرنے میں دلت برادریوں کی ایجاد کردہ اور ترقی یافتہ لوک حکمت اور سائنس شامل ہے۔ سنگت رام کا کہنا ہے کہ شروع میں دیریا کا حصول بہت مشکل ہوتا تھا، کیونکہ یہ صرف میدانی علاقوں میں ہی دستیاب ہوتے تھے۔ مقامی طور پر بنائے جانے سے قبل ایک دیریا کی قیمت ۱۲۰ روپے ہوتی تھی۔ ’’لیکن آہستہ آہستہ ہمارے آباء و اجداد نے ہمارے گاؤں کے ایک مقامی شخص کو مردہ بیل کی کھال اتارنے اور دیریا تراشنے کی تربیت دی۔‘‘ پھر وہ بہت کم قیمت پر ملنے لگے۔

دیریا بنانے میں سات سے دس دن لگتے تھے۔ سال ۱۹۵۰ کی دہائی میں ایک دلت کاریگر کو اس کی مزدوری کے طور پر ایک سیر گھی (تقریباً ۹۳۳ گرام)، کئی کلو اناج، اور پانچ روپے ادا کیے جاتے تھے۔ تاروؤں کے پاس پہنچنے کے بعد انہیں دیودار کے تیل (ہمالیائی دیودار کی لکڑی سے حاصل کردہ تیل) سے کھال کو صاف کیا جاتا تھا اور سوراخوں کو بند کرنے، جلد کو سیاہ کرنے اور سڑنے سے روکنے کے لیے کَرال انجیر کے درخت (فائیکس تجاکیلا) کے پاؤڈر سے کھال کو گھِسا جاتا تھا۔ بکرے یا کَرتھ (ہمالیائی تَہر یا جنگلی پہاڑی بکری) کی کھال کا ایک چھوٹا ٹکڑا دیریا میں ہوا بھرنے کے لیے پچھلی ٹانگ پر ٹانک دیا جاتا تھا۔ گوتم رام کہتے ہیں، ’’اس میں ہوا بھرنے میں دو سے چار منٹ لگتے تھے۔ احتیاط کے ساتھ استعمال کرنے پر ایک کھال ۱۵ سے ۲۹ سال تک چلتی تھی، صرف ٹانکوں کو وقتاً فوقتاً درست کرنا پڑتا تھا۔‘‘

مردہ بیل عام طور پر مقامی مسلم برادری سے حاصل کیے جاتے تھے۔ سال ۱۹۴۷ سے پہلے کُلّو وادی میں مسلمانوں کی ایک خاصی تعداد موجود تھی۔ علاقہ کے مسلمان دیریا کو بہت اہمیت دیتے تھے۔ ’’وہ ہم سے کہتے تھے کہ جب پانی میں نیا دیریا ڈالا جائے تو انہیں مطلع کر دیا جائے،‘‘ سنگت رام کہتے ہیں۔ ’’دیریا پر رکھنے کے لیے وہ اپنے ساتھ دیریا کے برابر کا کپڑے کا ایک ٹکڑا لاتے تھے۔ برادری کی طرف سے تارو کو کپڑے کے پانچ سیٹ، کھانے، گھی، چینی اور اناج کے علاوہ دیے جاتے تھے۔ پہلا مسافر ہمیشہ بیل کا مالک ہوتا تھا، جسے رسم کے طور پر ندی کے دونوں طرف کا سفر کرایا جاتا تھا۔ اسے مبارک سمجھا جاتا تھا۔ بیل کا مالک پوری زندی دیریا کی مفت سواری کرتا تھا۔‘‘

تاہم، ماضی کے متنوع سماجی گروہوں اور مذاہب کے درمیان یہ باہمی تعامل ذات پات کی تقسیم کی دیواروں کو نہ گرا سکا۔ زیادہ تر تارو کولی ذات سے تعلق رکھنے والے دلت ہوتے ہیں۔ صدیوں سےدیوتاؤں کی مورتیوں اور راجاؤں کو ان دلتوں کی پیٹھ پر سوار ہو کر دریا عبور کرنے میں کبھی کوئی اعتراض نہیں ہوا۔ لیکن اس کے باوجود آج بھی دلتوں کو ان راجاؤں کے بنائے ہوئے مندروں میں داخل ہونے سے منع کیا جاتا ہے۔ ان مندروں کو انہیں دیوتاؤں کی مورتیوں سے آباد کیا جاتا تھا، جنہیں وہ اپنی پیٹھ پر بیٹھا کر گہرے پانی کو عبور کیا کرتے تھے۔

سنگت رام نے بطور تارو اپنا آخری سفر ۲۰۰۲ میں کیا تھا۔ گزشتہ ڈھائی دہائیوں سے وہ عمر رسیدہ لوگوں کے لیے ہماچل پردیش حکومت کی ۱۷۰۰ روپے ماہانہ کی پنشن پر گزارہ کر رہے ہیں۔ انہیں اپنے بیٹے خوب رام سے بھی تھوڑی بہت مدد مل جاتی ہے، جو ایک بینک میں ’چپراسی‘ کا کام کرتے ہیں۔

جو نسل ۱۹۸۰ کی دہائی کے بعد پیدا ہوئی ہے، وہ اب بھی تاروؤں کو محض ایک اور نچلی ذات کے طور پر دیکھتی ہے۔ ایک بڑی سی تیرتی ہوئی بیل کی سیاہ کھال ان کی یاداشت میں نہیں ہے۔ انہوں نے ندی میں جو تیرتی چیزیں دیکھی ہیں وہ پلاسٹک کی ہوا بھری رافٹیں (چھوٹی کشتیاں) ہیں۔ بیاس کے دائیں کنارے پر کھڑے سنگت رام کی چھوٹی چھوٹی آنکھیں ان کی عینک کے موٹے شیشوں سے ہاٹا تار کو ڈھونڈ رہی ہیں، جس کے پانیوں پر انہوں نے ۵۵ سال حکومت کی۔ یہ وہی پانی ہے جس میں اب نیلے، پیلے اور نارنجی رنگ کی رنگ برنگی رافٹیں سیاحوں کی پرشور خوشی میں مدغم ہو رہی ہیں۔ وہ تجسس سے ان کی طرف دیکھتے ہیں اور آہستہ سے اپنے آپ سے کہتے ہیں، ’’ان پر سوار ہونا بالکل بھی خطرناک نہیں ہے۔ دیریا بیلن نما ہے، بالکل بیلن نما ہے۔ ایک غلط قدم اٹھایا اور آپ کا کام تمام ہوگیا۔‘‘ وہ اچانک دور حاضر میں دیریا کے بارے میں بات کرنے لگتے ہیں۔ ہاٹا تار زندہ ہو گیا ہے۔ سنگت رام ایک بار پھر تارو بن گئے ہیں۔

رپورٹر کا نوٹ: کُلّو کے آزاد محقق یتِن پنڈت کا تہ دل سے شکریہ۔

ترجمہ نگار: شفیق عالم