जमाना उतरल पार, तारू फंसलन मझधार

पचपन बरिस ले संगत राम के जिनगी आ मौत के बीच खाली एगो केस भर के अंतर रहे. ऊ अंगूठा के नोह से आपन पहिल अंगुरी छुआ के देखावत कहलन, “बस एतना चूक भइल, बाल बराबर, आ आदमी गइल सीधा पानी में.” ब्यास नदी के बरफ वाला पानी के तेज धार पार कइल हरेक के बस के बात ना रहे, खास करके फुलावल बैल के खाल पर. सदियन से इहंवा इहे खाल नदी पार करे के एकमात्र साधन रहे.

हिमाचल के कुल्लू घाटी में 89 बरिस के संगत राम अब गिनल चुनल तारू में से बानी. उनकर काम त बरिसन पहिलहीं बंद हो गइल. एह सदी के सुरुआत में जब पुल आ झूला बने के सुरु भइल, तारू लोग के दिन गिनाए लागल. ओकरा पहिले गांव के देवता से लेके राजा ले, बरात से जनाजा ले, अनाज से जंगल के लकड़ी ले- सब चीज ‘दिराया’ पर दरिया पार होखत रहे.

दिरिया माने बैल के फुलावल खाल. लोग के ब्यास नदी पार करावे के काम एकरे से लेवल जात रहे. दिरिया के कहानी दू हजार बरिस पुरान बा. ई तवन जमाना के बात बा जब सिकंदर के फौज भारत में आगू बढ़े से मना कर देले रहे. कहल जाला कि उहो घरिया लोग दिरिये से नदी पार करत रहे. तब यूनानी लोग के उफनत ब्यास नदी पार कइल असंभव लागल. सिकंदर खातिर ई नदी उनकर राह के सबले बड़ अड़चन रहे. इतिहास के कुछ जानकार लोग मानेला कि भारत में उनकर यात्रा पर इहंई अंकुश लाग गइल.

सदियन ले ब्यास के दुनो किनारा के जोड़े के काम दिरिया ही करत आइल. एकरा चलावे वाला तारू कहात रहे. ओह में संगत राम के पुरखा लोग भी रहे. ऊंच पहाड़ पर बसल ब्यास कुंड से जनमे वाली ब्यास नदी चार सौ सत्तर कोस से जादे रस्ता तय करके पंजाब के मैदान में हरिके लगे सतलुज में समा जाला.

कुल्लू घाटी में, कोई बीस किमी दूर ले ब्यास नदी से तनी शांत स्वभाव वाला, एकर पांच ठो ‘तार’ रहे. एह सब में तारू लोग दरिया पार करावे के काम करत रहे. ऊ पांच तार रहे- भुईं तार (जे आज बुनतर कहाला), बजौरा के हाता तार, राह तार, जोगनी तार आ जिया तार (जवन ब्यास के सहायक नदी पार्वती में पड़ेला). संगत राम हाता तार में लोग के एह पार से ओह पार ले जात रहस. हर फेरा में नदी के चार सौ फीट से जादे दूरी पार करे पड़त रहे, उहो बैल के फुलावल खाल पर. ओह घरिया हाता तार में पानी पनरह से बीस फीट गहिर होखत रहे. बाकिर असल डर गहिराई से ना, पानी के तेज बहाव से रहे.

पहिले लोग के नदी पार करावे वाला पुल तक जाए खातिर बहुते पैदल चले पड़त रहे. “हमनी के नदी के बावां किनारा पहुंचे खातिर 10 किमी चले पड़े, एह में दू से तीन घंटा लाग जाए. बाकिर तारू के मदद से हमनी बस तीन मिनट में ओह पार पहुंच जात रहीं,” बजौरा के रहे वाला आउर गांव में मंदिर के पुजारी, 76 बरिस के छबील दास शर्मा पारी से कहलन.

नदी पार करावे के ई तरीका तनी विचित्र रहे. तारू (खेवइया) दिरिया पर लेट जाए आ सवारी ओकर पीठ पर बइठे. केतना बेरा तारू के देह पर पूरा लेट जाए के पड़े. एकरा बाद दारू आपन गोड़ आउर एगो फली (छोट चप्पू) के मदद से दिरिया के खेवे लागे. तारू आपन गोड़ से खाली दिरिया के आगुए बढ़ावे के काम ना करत रहे, बलुक उहे गोड़ से ऊ ई अजीब तरह के नाव के डगमगाए से भी बचावत रहे. ध्यान एह बात पर रहत रहे कि पूरा भार दिरिया आ तारू के एकदम बीच में पड़े.

दिरिया बैल के खाल से बनत रहे. आमतौर पर एक बार में एकरा पर एके गो आदमी नदी पार करत रहे.

सवारी के गिनती जादे होखे, चाहे भारी सामान होखे, त दू ठो दिरिया के जोड़ के ओकरा पर एगो चारपाई रख देल जाए. तारू लोग तेसर दिरिया पर बइठके एह पूरा जुगाड़ के गोड़ से आगू धकेलत रहे.

दिरिया खाली ब्यासे के इलाका तक सीमित ना रहे. पुरनका यात्री लोग से पता चलेला कि ई नदी वाला नाव लोग के जीवन रेखा जइसन रहे, खास करके सतलज, झेलम आ सिंध नदी वाला इलाका में. कुछ-कुछ जगह पर त दिरिया के मस्सक कहल जात रहे. सन् 1904 में छपल आपन किताब ‘स्टीरियोस्कोप के नजर से भारत’ में विद्वान जेम्स रिकॉल्टन कहेलन, “ई दिरिया वाला लोग बाढ़ो में खाल के नाव चला सकेला, जबकि सबले कुशल तैराको एतना तेज धार में नदी पार ना कर सके.” कोई सौ बरिस पहिले, ब्रितानी खोजकर्ता विलियम ए. ग्रीन एकरा “संभवत: दुनिया के सबले पुरान आ सबले अजीब नाव सेवा” बतइले रहस.

संगत राम के तारू वाला काम हाता तार में जिनगी भर नाव चलावे वाला आपन बाऊजी से बिरासत में मिलल रहे. उनकर दादा भी इहे पेशा में रहलन. ऊ कहेलन, “हमनी के कुल परिवार नाव चलावत रहे.” (ऊ हिमाचल प्रदेस में अनुसूचित जाति के रूप में चिन्हित कोली समुदाय से आवेलन). ऊ पारी के बतइलन, “हमनी के परिवार सुजानपुर से आवेला.” उनकर पुरखा लोग हमीरपुर जिला में कोई 170 किमी नीचे ब्यास नदी के दक्खिनी किनारा पर बसल सुजानपुर छोड़ के, मसरोगी गांव आके बस गइल. ई गांव बजौरा शहर के सोझे नदी के बावां किनारे बसल बा. अबही फिलहाल ओह गांव में तारू पेशा से जुड़ल 13 ठो परिवार बा.

संगत राम बतावेलन कि तारू परिवार में सयान लरिका लोग सबले पहिले हर मौसम में उफने वाला ब्यास नदी पर काबू करे के सिखत रहे. “हम चौदह-पनरह बरिस के रहीं, त दिरिया के सवारी करे लागल रहीं. ओकहा पहिले हमनी के महीना भर ब्यास में तैरे आउर डूबकी लगावे के सिखावल जात रहे. संतुलन के कला साधे खातिर, फूलल खाल के चारो गोड़ पर चार-चार ठो पत्थर (मोटा-मोटी 3 से 6 किलो) बान्हल जाए. फेरु छोट लइका सब के दिरिया पर सवारी करे के कहल जाए. हम अबले बस एक बेरा गड़बड़ाएल बानी. ना त मजाल बा कबो गिरल होखीं, चाहे हमरा से कवनो सवारी डूबल होखे.” अइसे, उनका दिरिया चलावे के सिखावे वाला मामा डोले राम, एक दिन उफनत नदी में तेज धार पार करे घऱिया डूबके मर गइल रहस.

मई आ सितंबर के बीच नाव के काम रुक जात रहे. एह घरिया नदी में बहुते उफान रहे के चलते नाव चलावल मुस्किल रहत रहे. अक्टूबर से अप्रिल के बीच, जब ब्यास नदी शांत हो जात रहस, काम फेरु सुरु हो जाए. संगत राम बतावेलन, आजादी से पहिले नदी पार करे खातिर एक तराई (सवारी) के एक आना (1/16) देवे पड़त रहे. ओकरा बाद किराया दू आना हो गइल, आ 1947 के बाद 25 पइसा. एतना किराया कइएक दसक ले रहल. 1970 के दसक में नदी पार करे खातिर 50 आ 1990 के दसक में एक रुपइया हो गइल. ऊ बतावेलन, “हमनी खाली दूर-दराज से आइल बाइलिए लोग से पइसा लीहीं.” गांव के लोग नदी पार करावे के बदले आपन खेत के रबी आ खरीफ फसल में से कुछ हिस्सा, चाहे किसान जवन भी उगावे, ओकर कुछ हिस्सा किराया के रूप में देवत रहे.

नदी के पानी तेज भइला पर, नदी पार करे के एकमात्र उपाय दिरिये बचत रहे. सन् 1970 के विप्लवकारी बाढ़ में जब भुनतार पुल टूट गइल, त संगत राम गोतिया-देयाद के लोग राजा भगवंत सिंह के कहला पर भनुतारे बस गइल. ऊ बतावेलन, “पुल बने में तीन बरिस लागल. तीन बरिस नदी के दुनो किनारा के बीच हमनिए इंसानी पुल रहीं.”

संगत राम के 53 बरिस के भतीजा, गौतम राम खातिर परिवार के सदियन पुरान पेशा उनकर रोजगार बनल. बाकिर जब ऊ 1980 क दसक में ई काम सुरु कइलन, ई पेशा के दिन लदे लागल. उहे जमाना में इहंवा तार से चले वाला ट्रॉली लागल. फेरु 2002 में बजौरा पुल बन गइल. अइसे में गौतम खातिर दिरिया अब खाली अपना काम खातिर रह गइल. ऊ एकरा से सामान आ लकड़ी ढोवे, मछरी मारे के काम करस. आखिर में ऊ ई सब छोड़ के शिक्षा विभाग में क्लर्क हो गइलन. बाकिर 1995 के बाढ़ उनका अबले याद बा. ऊ बतावेलन, “हमार दादा सुंदरु राम आ एगो चाचा गशनु राम के, ओह बाढ़ में कुल्लू के डिप्टी कमिश्नर से सिफारिशी प्रमाण पत्र मिलल रहे.” ऊ लोग भुनतार डिस्पेंसरी से डॉक्टर आ मरीज लोग के बाढ़ से बचइले रहे. एतने ना, ऊ लोग नदी में तइरत लाश सब के दिरिया के मदद से बाहर निकलक, जहंवा केहू के जाए के साहस ना रहे.”

दिरिया, गांव के देवता लोग के भी खास सवारी रहे. कुल्लू घाटी के एगो प्रसिद्ध कथा बा कि पुरनका जमाना में संगत राम के पुरखा लोग तैर के नदी पार कइलक आ मैदानी इलाका से देवी सत्यमती के ले आइल. गौतम बतावेलन, “हमनी के राजा (कुल्लू के राजा) बावां किनारा, हुरला गांव जात रहस. ऊ हर बेरा हमनी के पीठ पर बइठा के नदी पार करावस. हमनी हर घड़ी, हर पल सतर्क आ तइयार रहत रहीं.”

तारू परिवार के पेट भरे वाला दिरिया के काम खतम भइला पर, धूप से दूर घर के भीतर जतन से रख देवल जाला.

दिरिया बनावे आउर ओकरा संभार के रखे के काम में दलित समुदाय के गढ़ल लोक ज्ञान आ विज्ञान शामिल रहे. संगत राम कहेलन कि सुरु-सुरु में दिरिया मिलत ना रहे, काहेकि ई खाली मैदानिए इलाका में उपलब्ध रहे. गांव में बनावे के सुरु करे से पहिले, दिरिया 120 रुपइया में कीन के लावे पड़त रहे. “बाकिर हमनी के पुरखा लोग धीरे-धीरे गांव के लोग के मरल बैल के खाल उतारे आउर ओकरा से दिरिया बनावे के सिखावे लागल.” अब त ई बहुत सस्ता मिल जाला.

एगो दिरिया बनावे में सात से दस दिन लाग जात रहे. 1950 के दसक में एगो दलित कारीगर के दिरिया बनावे खातिर एक सेर घीव (कोई 933 ग्राम), कुछ किलो अनाज आउर पांच ठो रुपइया मिलत रहे. दिरिया मिलला के बा तारू लोग एकर खाल के देवदार के तेल (हिमालय के देवदार के लकड़ी से निकालल) से शुद्ध करे. आउर कराल गूलर के गाछ (फिक्सस जाकेला) के छाल के पाउडर ओकरा में रगड़त रहे. अइसन करे से खाल के रोमछिद्र सब बंद हो जात रहे. खाल करिया पड़ जात रहे आउर सड़े से बच जात रहे. दिरिया में हवा भरे खातिर पिछलका गोड़ पर बकरी, चाहे कर्थ (हिमालयी तहर,चाहे जंगली पहाड़ी बकरी) के खाल के एगो छोट टुकड़ा सी देवल जात रहे. गौतम बतावेलन, “दिरिया में हवा भरे में दू से चार मिनट लग जात रहे. अच्छा से देखभाल कइल जाव, त एक खाल 15 से 20 साल चले. बस बीच-बीच में सिलाई करके ठीक करत रहे के पड़त रहे.”

मरल बैल जादे करके गांवे के मुस्लिम लोग इहंवा से आवत रहे. सन् 1947 से पहिले कुल्लू घाटी में मुस्लिम लोग के अच्छा आबादी रहे. ऊ लोग दिरिया के बहुत मान देवे. संगत राम बतावेलन, “ऊ लोग कहे कि दरिया में नया दिरिया उतारे घरिया हमनी के जरूर बतइह. जब दिरिया उतारे के समय आवे, ऊ लोग दिरिया जेतना लमहर कपड़ा लावे आउर ओकरा पर डाल देवे. मुस्लिम लोग रसम के तौर पर तारू के पांच सेट कपड़ा भेंट करे. खाए-पिए के सामान, चीन्नी आउर अनाज अलग से.” दिरिया के सबसे पहिल सवारी ओकर मालिके करे. रसम के तौर पर मालिक के नदी में आगे-पाछू घुमावल जाए. ई सब कइल शुभ मानल जात रहे. मालिक से नदी पार करावे खातिर पइसा ना मांगल जाए.

पहिले के जमाना में अलग-अलग समाज आ धरम के लोग में मेलजोल त रहे, बाकिर ओकरा से जांत-पात के देवाल ना गिरल. जादे करके तारू लोग कोली जाति से आवे वाला दलित रहे. सदियन से इहे दलित लोग देवी-देवता आ राजा सब के दिरिया पर आपन पीठ पर बइठा के नदी पार करइलस. बाकिर आज उहे राजा के बनावल मंदिर आउर देवता जवन मंदिर में स्थापित बाड़न, दलित लोग के घुसे ना देवल जाला.

संगत राम 2002 में अंतिम बेरा फेरी लगवले रहस. पिछला पच्चीस बरिस से ऊ हिमाचल सरकार के 1700 रुपइया महीना के वृद्धावस्था पेंशन से गुजारा कर रहल बाड़न. बैंक में पिउन (चपरासी), बेटा खूब राम से उनका बीच-बीच में मदद मिलत रहेला.

सन् 1980 के दसक के बाद जनमल पीढ़ी आजो तारू के छोट देखेला. ऊ लोग कबो ‘बड़, करिया आ तइरत बैल’ ना देखलक. नदी में ऊ लोग के सामना बस पिलास्टिक के इनफ्लेटेबल राफ्ट (बोट) से भइल. ब्यास नदी के दहिना ओरी ठाड़ संगत राम के आंख मोट चश्मा के भीतरी से हाता तार खोजता. उहे हाता तार जेकरा पर ऊ 55 बरिस राज कइलन. आज उहे नदी बुल्लू, पियर आ नारंगी रंग के बोट (राफ्ट) से भर गइल बा. सब जगह पर्यटक के हंसी-मस्ती गूंजत रहेला. ऊ सभे के बहुते जिज्ञासु नजर से देखे आउर अपने में बड़बड़ाए लागत बाड़न, “एकरा पर चढ़े में कवनो खतरा नइखे. दिरिया त बेलनाकार, एकदम बेलनाकार बा. एक गलती भइल ना कि सवारी गइल पानी में.” ऊ अचानक दिरिया के बारे में अइसे बोले लागत बाड़न, जइसे अभी के बात होखे. अइसन लागता हाता तार जिंदा हो गइल बा. संगत राम फेरु से तारू बन गइल बाड़न.

लेखक के बात: कुल्लू में रहे वाला स्वतंत्र शोधकर्ता यतीन पंडित के कोटि-कोटि धन्यबाद.

ईस्टोरी पारी सीनियर फेलोशिप 2025 के अंतर्गत प्रकाशित भइल बा.

अनुवाद: स्वर्ण कांता