جنسی ہراسانی کے خلاف ٹرانس خواتین کا ووٹ

وارانسی میں، ووٹنگ کے دن سلمیٰ نے دیکھا کہ پولنگ بوتھ پر صرف دو قطاریں ہیں – ایک مردوں کی اور دوسری عورتوں کی۔ بنگالی ٹولہ کا پولنگ بوتھ مشہور و معروف وشوناتھ مندر کی جانب جاتی ہوئی ایک تنگ گلی میں واقع سرکاری اسکول میں بنایا گیا تھا۔

کوئی اور متبادل نہ دیکھ کر، ۲۵ سال کی اس ٹرانس خاتون کو عورتوں کی قطار میں کھڑا ہونا پڑا۔ وہ بتاتی ہیں، ’’آنکھیں بڑی ہوگئی تھیں سب کی۔ مردوں کا تاثر کچھ ایسا تھا کہ دیکھ کر بھی اَن دیکھی کی، جب کہ خواتین مسکرا کر آپس میں سرگوشیاں کرنے لگیں، جب میں ان کی قطار کے آخر میں جا کر کھڑی ہو گئی۔‘‘

حالانکہ، سلمیٰ کو ان باتوں سے کوئی فرق نہیں پڑا۔ ’’میں تو ووٹ دینے گئی تھی۔ میرے پاس ووٹ ڈالنے کا حق ہے اور میں نے اس کا استعمال اُس بدلاؤ کو لانے کے لیے کیا جس کی ہمیں آج ضرورت ہے۔‘‘

الیکشن کمیشن آف انڈیا (ای سی) کی جانب سے جاری اعداد و شمار کے مطابق، ہندوستان میں ۴۸۰۴۴ ’’تیسری صنف کے ووٹر‘‘ ہیں۔ لیکن اتنی بڑی تعداد میں ہونے کے باوجود ٹرانس افراد کے طور پر انہیں ووٹر شناختی کارڈ حاصل کرنے میں اچھی خاصی مشقت اٹھانی پڑتی ہے۔ ’پرزمیٹک‘ نامی غیر سرکاری تنظیم کی بانی ڈائرکٹر نیتی کا کہنا ہے کہ وارانسی میں ایسے افراد کی تعداد تقریباً ۳۰۰ ہے، اور ان کے لیے ووٹر آئی ڈی حاصل کرنا بہت مشکل رہا ہے۔ ’’تقریباً ۵۰ ٹرانس افراد کا ہم نے ووٹر آئی ڈی بنوایا تھا۔ لیکن الیکشن کمیشن نے گھر گھر جا کر تصدیق کرنا اس عمل کا حصہ بنا دیا ہے، حالانکہ برادری کے بہت سے لوگ نہیں چاہتے تھے کہ کوئی ان کے گھر جا کر ان کے جینڈر [صنف] کی توثیق کرے،‘‘ وہ کہتی ہیں۔

حالانکہ، سلمیٰ کو ووٹر آئی ڈی بنوانے میں کوئی پریشانی نہیں ہوئی۔ وہ کہتی ہیں، ’’نہ تو میں اپنی فیملی کے ساتھ رہتی ہوں اور نہ ہی کسی ایسے شخص کے ساتھ، جس کو میری شناخت کا علم نہ ہو۔‘‘

ناموافق حالات کی بناپر سلمیٰ کو پانچویں جماعت میں ہی اسکول کو خیرباد کہنا پڑا، کیوں کہ ان کے ہم جماعت ان کے بولنے اور چلنے کے طریقہ کی وجہ سے ان کو پریشان کرتے تھے۔ سلمیٰ اب اپنے بھائی کے ساتھ رہتی ہیں۔ ان کا بنارسی ساڑیوں کا ایک چھوٹا سا کاروبار ہے، جس سے وہ مہینہ میں تقریباً ۱۰ ہزار روپے تک کی کمائی کر لیتی ہیں۔ وہ مقامی دکانوں سے ساڑیاں خریدتی ہیں اور دوسرے شہروں میں اپنے گاہکوں کو فروخت کرتی ہیں۔

ایک دوسری ٹرانس خاتون شمع گزر بسر کے لیے وارانسی میں گزشتہ چھ برسوں سے سیکس ورکر کے طور پر کام کر رہی ہیں۔ وہ کہتی ہیں، ’’میں بلیا ضلع کے ایک گاﺅں میں پیدا ہوئی اور وہیں میری پرورش ہوئی۔ لیکن میری صنف کی وجہ سے وہاں حالات کافی مشکل ہوتے گئے۔ پڑوسی میرے والدین کو پریشان کرتے تھے۔ میرے والد میرے ’غیر معمولی‘ ہونے کی وجہ سے مجھے اور میری ماں کو گالیاں دیتے تھے۔ انہوں نے میری ماں کو مجھ جیسے بچہ کو جنم دینے کے لیے قصوروار ٹھہرایا، جس کا کوئی جینڈر نہیں تھا۔ ان سب سے پریشان ہو کر میں وارانسی آ گئی، جو سب سے قریبی شہر تھا۔‘‘ ووٹ ڈالنے کے دن وہ بوتھ پر جلدی پہنچ گئی تھیں۔ شمع پاری کو بتاتی ہیں، ’’میں مجمع اور لوگوں کی گھورتی نظروں سے بچنا چاہتی تھی۔‘‘

سیکورٹی کے نظریہ سے یہ شہر کبھی محفوظ جگہ نہیں رہا ہے، خاص کر ٹرانس افراد کے لیے۔ جب کہ ٹرانس جینڈر افراد (حقوق کا تحفظ) سے متعلق قانون حکومت کو ہدایت دیتا ہے کہ وہ ٹرانس جینڈر افراد کے بچاؤ، حفاظت اور باز آبادکاری کو یقینی بنانے کے لیے قدم اٹھائے اور ان کی ضروریات کو پورا کرنے کی سمت میں کام کرے۔ نیتی بتاتی ہیں کہ ان کی تنظیم کے پاس ہر مہینے ٹرانس جینڈر افراد کو ہراساں کیے جانے کے پانچ سے سات معاملے سامنے آتے ہیں۔

پاری کے ساتھ بات کرتے ہوئے ٹرانس خواتین نے اپنی پریشانیوں کی داستان سنائی۔ مثال کے طور پر سلمیٰ کو لوگوں کی چھیڑ چھاڑ، داداگیری کا سامنا کرنا پڑا، وہیں ارچنا جس بیوٹی پارلر میں کام کرتی تھیں وہاں کے مالک نے ان کا جنسی استحصال کیا۔ جب اَرچنا اپنی شکایت درج کرانے کی خاطر پولیس اسٹیشن پہنچیں، تو پولیس نے ان کی باتوں پر بھروسہ نہیں کیا اور مدد کرنے کی بجائے اُلٹا انھیں کو دھمکایا اور ان کی بے عزتی کی۔ لیکن ارچنا کو پولیس کے اس رویہ پر کوئی حیرانی نہیں ہوئی۔ وہ سال ۲۰۲۴ میں آئی آئی ٹی- بی ایچ یو میں ایک طالبہ کے ساتھ ہوئی اجتماعی عصمت دری کے واقعہ کا ذکر کرتے ہوئے کہتی ہیں، ’’جب ایک عورت ہی محفوظ نہیں ہے، تو ٹرانس خواتین کہاں سے محفوظ رہیں گی؟‘‘

ملک بھر میں بحث کا موضوع رہی وارانسی لوک سبھا سیٹ پر وزیر اعظم نریندر مودی نے انتخاب لڑا تھا، جنہوں نے اپنے قریبی مد مقابل اور کانگریس پارٹی کے لیڈر اجے رائے کو ڈیڑھ لاکھ ووٹوں سے ہرایا۔

سلمیٰ کہتی ہیں، ’’وزیر اعظم کو ہمارے شہر سے رکن پارلیمنٹ کے طور پر عہدہ سنبھالتے ہوئے دس سال گزر چکے ہیں، لیکن کیا انہوں نے کبھی ہماری خبر لی؟‘‘ اب انہیں اپنے مستقبل کی فکر ستانے لگی ہے۔ ’’مستقبل تو تاریک دکھائی دیتا ہے۔ لیکن ہماری نگاہیں حکومت کی جانب لگی ہوئی ہیں۔‘‘

شمع اور ارچنا بھی اس بات سے متفق ہیں۔ ان دونوں نے ۲۰۱۹ کے انتخابات میں اپنا ووٹ نریندر مودی کو دیا تھا، لیکن ۲۰۲۴ میں انہوں نے ایسا نہیں کیا۔ شمع کہتی ہیں، ’’اِس بار میں نے بدلاﺅ کے لیے ووٹ دیا۔‘‘

اَرچنا (۲۵سالہ) انڈر گریجویٹ طالبہ ہیں اور سیکس ورکر کے طور پر کام کر کے گزارہ چلاتی ہیں۔ وہ کہتی ہیں، ’’پہلے میں وزیر اعظم کی تقاریر سے کافی متاثر تھی۔ لیکن اب مجھجے معلوم ہے کہ وہ ٹیلی پرامپٹر [اسکرین پر تحریر کردہ] سے اپنی تقریر پڑھ رہے تھے‘‘

قانون میں ہوئی تبدیلی اور کاغذوں پر ملے اپنے حقوق کے بارے میں بھی انہیں ایسا ہی لگتا ہے۔

شمع کہتی ہیں، ’’دس سال قبل انہوں نے ہمیں تیسری صنف کے طور پر پہچان دے کر ایک چھوٹا سا قدم اٹھایا تھا، جسے انہوں نے تاریخی فیصلہ بتایا۔ لیکن اصل میں یہ بدلاؤ بھی صرف کاغذوں تک ہی محدود رہا۔ شمع سپریم کورٹ کے سال ۲۰۱۴ کے فیصلہ کا ذکر کر رہی ہیں، جس میں ’’حکومت کی رہنما ہدایات میں ٹرانس جینڈر افراد کو تیسرے جینڈر کے طور پر تسلیم‘‘ کیا گیا تھا۔ ان رہنما ہدایات میں تعلیمی اداروں اور سرکاری نوکریوں میں ٹرانس برادری کے لیے ریزرویشن اور سماجی فلاحی اسکیمیں شروع کرنے کی بات کہی گئی تھی۔

سال ۲۰۱۹ میں مرکزی حکومت نے ٹرانس جینڈر افراد (حقوق کا تحفظ) سے متعلق قانون پاس کیا، جس کے تحت نوکریوں میں ان کے خلاف ہونے والی تفریق کو دور کرنے اور ان کی حصہ داری کو یقینی بنانے کا انتظام کیا گیا؛ حالانکہ، اس میں تعلیمی اداروں میں داخلہ اور سرکاری نوکریوں میں ریزرویشن کا اہتمام نہیں کیا گیا۔

سلمیٰ کہتی ہیں، ’’ہم چاہتے ہیں کہ حکومت ہمیں چپراسی سے لے کر افسر تک کی ہر نوکری میں ریزرویشن دے۔‘‘

(کرداروں کی درخواست پر اسٹوری میں، نیتی اور سلمیٰ کے علاوہ باقی تمام افراد کے نام بدل دیے گئے ہیں۔)

ترجمہ نگار: وردت مسعودی