شیر کی آبادی بڑھنے سے انسانی اموات میں اضافہ

جب لکشمن بیٹھا کے سالے نے فون کر کے انہیں بتایا کہ ان کی بیوی بیمار ہے، تو انہوں نے بغیر کسی تاخیر کے گھر جانے کے لیے ٹرین پکڑ لی۔

مہاجر مزدور لکشمن (۵۰) پتھر کاٹنے والی فیکٹری میں کام کرنے کے لیے اکثر بہار سے آندھرا پردیش جاتے تھے۔ جب انہیں بیوی کی بیماری کی خبر ملی، تو انہوں نے بغیر ریزرویشن والا ایک ٹکٹ لیا اور گھر کے لیے روانہ ہو گئے۔ دو دن بعد وہ مغربی چمپارن ضلع میں واقع اپنے گاؤں جِمری پہنچے۔ یہ سفر ۲۰۰۰ کلومیٹر سے بھی زیادہ کا تھا۔

آخرکار، گھر پہنچنے کے بعد انہوں نے راحت کی سانس لی، کیوں کہ ان کی بیوی کی صحت کافی بہتر ہو چکی تھی۔ لیکن، ان کی بیوی انہیں گلے لگا کر بے تحاشہ رونے لگی۔ ’’میری سمجھ میں کچھ نہیں آیا۔ میں نے بیوی سے پوچھا کہ وہ کیوں رو رہی ہے،‘‘ لکشمن اس واقعہ کو یاد کرتے ہوئے بتاتے ہیں۔

’’ایک شیر نے ہمارے بیٹے راج کمار کو مار ڈالا،‘‘ چنداوتی دیوی نے کانپتی ہوئی آواز میں بتایا۔ تقریباً ۴۷ سال کی چنداوتی اس خبر کو سن کر بیہوش ہو گئی تھیں، جس کے بعد لکشمن کو واپس بلایا گیا تھا۔

راج کمار، جو اپنے ماں باپ کی تیسری اولاد تھا، اُس دن بکری چرانے گیا تھا۔ تقریباً ۱۳ سال کا راج کمار اکثر بکریوں کو چرانے والمیکی ٹائیگر ریزرو کے ارد گرد کے علاقہ میں لے جایا کرتا تھا، جو اس کے گھرسے مشکل سے ایک کلومیٹر کی دوری پر ہے۔

لیکن، ۱۴ مئی ۲۰۲۲ کو جب وہ اپنی بکریوں کو چرا رہا تھا، تو اس پر ایک شیر (پینتھیرا ٹائیگرس) نے حملہ کر دیا۔ ایک راہگیر نے پورے واقعہ کو دیکھا اور گاؤں کی طرف بھاگا۔ راج کمار کا بے جان جسم بگہا کے سب ڈویژنل اسپتال لے جایا گیا، جو ۲۵ کلومیٹر دور تھا، اور وہاں اسے مردہ قرار دے دیا گیا۔

جنگلی جانوروں کے ذریعہ مارے گئے شخص کی فیملی کو ماحولیات، جنگلات اور ماحولیاتی تبدیلی کی وزارت کی طرف سے ۱۰ لاکھ روپے کا معاوضہ دیا جاتا ہے۔ یہ معاوضہ ان انسانوں کے لیے ہوتا ہے جو بفر ژون میں رہتے ہیں، نہ کہ اس علاقہ میں جہاں انسانی سرگرمیوں پر پوری طرح سے پابندی ہے۔ والمیکی ٹائیگر ریزرو کا مرکزی علاقہ ۴۵ء۵۹۸ مربع کلومیٹر میں پھیلا ہوا ہے؛ اور ۹۳ء۳۰۰ مربع کلومیٹر بفر ژون ہے۔

’’مرکزی علاقہ کی طبعی طور پر نشاندہی نہیں کی گئی ہے، اس لیے مقامی لوگوں کو پتہ نہیں چل پاتا ہے کہ وہ کہاں داخل ہو رہے ہیں،‘‘ جنید کہتے ہیں، جو تین دہائیوں سے ٹائیگر ریزرو میں ٹریکر کے طور پر کام کر رہے ہیں۔ ’’اسی لیے لوگ غلطی سے مرکزی علاقہ میں داخل ہو جاتے ہیں،‘‘ وہ مزید کہتے ہیں۔

راج کمار کے گھر والے کہتے ہیں کہ شیر نے ۱۳ سال کے بچے کے جسم کو مرکزی علاقہ میں گھسیٹ لیا۔ اور، اسی وجہ سے تمام حالات بدل گئے۔ ’’محکمہ جنگلات کے اہلکاروں نے مجھے بتایا کہ لاش کو مرکزی علاقہ سے برآمد کیا گیا تھا،‘‘ لکشمن نے اس رپورٹر کو بتایا۔ ’’مرکزی علاقہ میں میرے بیٹے کی لی گئی تصویریں اور ویڈیو سوشل میڈیا پر پوسٹ ہو گئے، اس لیے میں معاوضہ نہیں پا سکتا۔‘‘

لکشمن، اہلکاروں کے دعوے کو خارج کرتے ہوئے کہتے ہیں، ’’ایک ۱۳ سال کا لڑکا گھنے جنگل میں کیسے جا سکتا ہے؟ شیر مرکزی علاقہ سے باہر آیا، میرے بیٹے کو مار ڈالا اور اسے گھسیٹ کر جنگل میں لے گیا۔‘‘ صدمہ میں ڈوبے ہوئے والد مزید کہتے ہیں، ’’وہ پڑھنے لکھنے میں بہت اچھا تھا اور سرکاری نوکری کرنا چاہتا تھا۔‘‘

ہمالیہ کے شیوالک کوہستانی سلسلہ میں واقع والمیکی ٹائیگر ریزرو (وی ٹی آر)، ۱۹۹۴ میں پروجیکٹ ٹائیگر کا حصہ بنا اور یہاں شیروں کی تعداد میں زبردست اضافہ ہوا۔ سال ۲۰۰۶ میں ۱۰ کے مقابلے ۲۰۲۲ میں یہ تعداد بڑھ کر ۵۴ ہو گئی۔ ’’یہ ایک اعلی کثافت والا شیروں کا علاقہ ہے، اس لیے یہاں انسانوں اور شیروں کے درمیان تصادم اور ٹکراؤ کا امکان زیادہ رہتا ہے،‘‘ نیشنل ٹائیگر کنزرویشن اتھارٹی (این ٹی سی اے) کی رپورٹ ’ہندوستان میں شیروں کی حالت – شکاری اور شکار‘ میں کہا گیا ہے۔

آس پاس کے ۸-۹ حساس گاؤوں میں رہنے والے لوگ اکثر جنگل کے بفر ژون میں ایندھن کی لکڑی اور اپنے جانوروں کو چارہ کے لیے لے جاتے ہیں۔

سال ۲۰۲۲ میں، شیر کے حملوں میں نو لوگوں کی موت ہوئی۔ وی ٹی آر ایک ایسا ٹائیگر ریزرو ہے، جہاں انسان اور جنگلی جانوروں کے درمیان ٹکراؤ کی حالت بنی ہوئی ہے۔ مزید معلومات کے لیے فلم دیکھیں: شیروں اور انسانوں کا ٹکراؤ۔

ترجمہ نگار: قمر صدیقی