எல்லை இல்லா புலிகள்

லக்ஷ்மன் பைதாவின் மைத்துனர். இவரது மனைவி உடல்நிலை சரியில்லை என்று கூறியதும், ​​அவர் உடனடியாக ரயிலில் ஏறி வீட்டிற்கு விரைந்தார்.

50 வயதான, புலம்பெயர்ந்த தொழிலாளியான இவர், பீகாரில் இருந்து ஆந்திராவிற்கு கல் வெட்டும் தொழிற்சாலையில் வேலை செய்ய அடிக்கடி பயணம் செய்பவர். தனது மனைவியின் உடல்நிலை சரியில்லை என்று அறிந்ததும், முன்பதிவின்றி, ரயில் டிக்கெட்டை மட்டும் வாங்கிக் கொண்டு கிளம்பினார். 2,000 கிலோமீட்டருக்கும் அதிகமான தொலைவில் இருந்த மேற்கு சம்பாரண் மாவட்ட ஜிம்ரி கிராமத்தில் உள்ள தனது வீட்டிற்குச் செல்ல அவருக்கு இரண்டு நாட்கள் ஆனது.

ஒரு வழியாக வீடு திரும்பியவருக்கு, மனைவியின் உடல்நிலை சற்று தேறியிருந்தது நிம்மதி. ஆனால் அவரது மனைவி அவரைக் கண்டதும் கட்டிப்பிடித்து அழ துவங்கிவிட்டார். “எனக்கு எதுவும் புரியவில்லை. என் மனைவியிடம் அழுவதற்கான காரணத்தை கேட்டேன்,” என்று சம்பவத்தை நினைவு கூருகிறார் லக்ஷ்மன்.

“நம் மகன் ராஜ்குமாரை, புலி கொன்றுவிட்டது,” என்று சந்தாவதி தேவி அவரிடம் கூறியதும், அவர் உடைந்து விட்டார். 47 வயதான அவர் மனைவி செய்தி அறிந்ததுமே மயங்கி விழுந்து விட்டார். அதனால் அவரது கணவரை வரவழைக்க வேண்டியிருந்தது.

அவர்களது மூன்றாவது மகனான ராஜ்குமார், குடும்பத்தின் ஐந்து ஆடுகளை மேய்ச்சலுக்கு அழைத்துச் சென்றிருந்தார். 13 வயதான அச்சிறுவன் தான் பெரும்பாலும் ஆடுகளைப் பராமரித்து வந்தான். மேய்ச்சலுக்கு அவற்றை, அவனது வீட்டிலிருந்து ஒரு கிலோமீட்டர் தொலைவில் இருக்கும் வால்மீகி புலிகள் சரணாலயத்திற்கு அருகில் கொண்டு செல்வான்.

ஆனால் மே 14, 2022 அன்று, ஆடுகளை மேய்த்துக் கொண்டிருந்தபோது, புலி (பாந்தெரா டைகிரிஸ்) ஒன்று அவனைத் தாக்கியது. வழிப்போக்கர் ஒருவர் தாக்குதலைக் கண்டு கிராமத்தை நோக்கி ஓடினார். சுயநினைவற்ற ராஜ்குமாரின் உடல் 25 கிலோமீட்டர் தொலைவில் உள்ள பாகஹா துணைப்பிரிவு மருத்துவமனைக்கு கொண்டு செல்லப்பட்டது. ஆனால் அங்கு அவர் இறந்துவிட்டதாக அறிவிக்கப்பட்டது.

“புலி அவனது வலது கை, முதுகு மற்றும் வயிறைத் தின்றிருந்தது,” என்று சந்தாவதி தேவி நினைவுகூருகிறார்.

வன விலங்குகளால் கொல்லப்பட்ட ஒருவரின் குடும்பம், ரூ.10 லட்சம் இழப்பீடு பெற முடியும் என்று வனத்துறை, சுற்றுச்சூழல் மற்றும் காலநிலை மாற்ற அமைச்சகம் கூறுகிறது. இது மையப் பகுதிகளில் அல்லாது, புலிகள் மற்றும் பிற வனவிலங்குகள் வாழும் சரணாலயங்களைச் சுற்றி வாழும் மனித மரணங்கள் மற்றும் சேதங்களுக்கானது; இங்கு மனித நடமாட்டம் கண்டிப்பாக தடைசெய்யப்பட்டுள்ளது. VTR-ன் மையப்பகுதி 598.45 சதுர கிலோமீட்டர் பரப்பளவில் பரவியுள்ளது; அடுத்த 300.93 சதுர கி.மீ. இடையகப் பகுதி.

“மையப் பகுதி எல்லையைக் குறிக்க குறியீடு ஏதும் கிடையாது. எனவே, மையப் பகுதி தொடங்கும் இடம் உள்ளூர்வாசிகளுக்குத் தெரியாது,” என்கிறார் ஜுனைத். இவர் கிட்டத்தட்ட முப்பது வருடங்களாக VT-ல் புலிகள் கண்காணிப்பாளராக உள்ளார். “மக்கள் தவறுதலாக மையப் பகுதிக்குள் நுழைகிறார்கள்,” என்று அவர் மேலும் கூறுகிறார்.

அவர்களது 13 வயது மகனின் உடலை, மையப் பகுதிக்குள் புலி இழுத்துச் சென்றதாக அவரது குடும்பத்தினர் கூறுகின்றனர். அது தான் சிக்கலை உருவாக்கியது. “உடல், மையப் பகுதியிலிருந்து மீட்கப்பட்டதாக வனத்துறை அதிகாரிகள் என்னிடம் கூறினர்,” என்று லக்ஷ்மன் நிருபரிடம் கூறினார். “மையப்பகுதியில் இருந்த எனது மகனின் புகைப்படம் மற்றும் வீடியோக்கள் சமூக ஊடகங்களில் வெளியிடப்பட்டன. அதனால் எனக்கு இழப்பீடு கிடைக்கவில்லை.”

“ஒரு 13 வயது சிறுவனால் எப்படி அவ்வளவு ஆழமான காட்டுக்குள் செல்ல முடியும்? புலி மையப்பகுதியில் இருந்து வெளியே வந்து தான், என் மகனைக் கொன்று காட்டுக்குள் இழுத்துச் சென்றது,” என்று மறுக்கிறார், லட்சுமண். மனமுடைந்த தந்தை மேலும் கூறுகையில், “என் மகன் படிப்பில் மிகவும் சிறந்தவன். அரசு ஊழியராக வேண்டும் என்று விரும்பினான்,” என்கிறார்.

இமயத்தின் சிவாலிக் மலைத்தொடரில் அமைந்துள்ள VTR, 1994-ல் புலிகளை காக்கும் திட்டத்தின் ஒரு பகுதியாக மாறியது. 2006-ல் 10லிருந்து 2022-ல் 54 என அன்றிலிருந்து புலிகளின் எண்ணிக்கையும் அதிவேகமாக வளர்ந்துள்ளது. “இப்பகுதியில் புலிகளின் எண்ணிக்கை அதிகரித்துள்ளதால், காப்பகத்தை சுற்றி வாழும் மனிதர்களை தாக்கும் நிலை உருவாகியுள்ளது” என்று வேட்டையாடிகளாகவும், வேட்டையாடப்படுபவையாகவும் இருக்கும் இந்தியப் புலிகளின் நிலை என்ற தேசிய புலிகள் பாதுகாப்பு ஆணையத்தின் (NTCA) அறிக்கை கூறுகிறது.

சுற்றியுள்ள 8-9 பாதிக்கப்படக்கூடிய கிராமங்களில் வசிக்கும் உள்ளூர்வாசிகள், பெரும்பாலும் விறகுக்காகவும், விலங்குகளை மேய்ப்பதற்காகவும், வன இடையக மண்டலத்திற்குள் செல்கிறார்கள்.

2022-ல், புலியால் தாக்கப்பட்டு ஒன்பது பேர் இறந்தனர். VTR, மனிதர்களும் விலங்குகளும் இணைந்து வாழ முனையும் ஒரு புலிகள் சரணாலயம் ஆகும். காணொளி: புலியின் கண்ணில்.

தமிழில் : அஹமத் ஷ்யாம்