’یہ زمین میری ہے۔ میں اسے واپس لے کر رہوں گی‘

کملا دیوی جس زمین پر اب مزدوری کر رہی ہیں، وہاں سے وابستہ پرانی یادوں کی درد بھری لہریں انہیں گھیر لیتی ہیں۔ ایک زمانے میں اُن کا کنبہ ۱۸ ایکڑ زمین کا مالک تھا۔ ‘‘میں وہاں پر لوگوں سے مزدوری کرواتی تھی، لیکن اب میں خود ہی ایک مزدور ہوں،’’ وہ دھیمی آواز میں کہتی ہیں۔

کملا درج فہرست قبیلہ تھارو سے تعلق رکھتی ہیں، جس کی بڑی تعداد اُدھم سنگھ نگر میں رہتی ہے، جو ہمالیہ کے دامن میں واقع ایک زرخیز ضلع ہے۔ یہاں کے لوگوں کو اُتراکھنڈ کے اولین باشندوں میں شمار کیا جاتا ہے، جو نہایت ہی پسماندگی کا شکار ہیں۔

ایک ایسی ریاست میں جہاں ہر ۳۵ افراد میں سے ایک شخص قبائلی برادری سے تعلق رکھتا ہے، کملا جیسے بہت سے لوگوں کی زمینیں غیر قبائلیوں کے ہاتھوں میں چلی گئی ہیں۔ کملا کی زمین اِس بھروسے پر چلی گئی کہ وہ اپنے کُنبے کی ضرورتوں کو پورا کرنے کے لیے کسی بھی وقت کم شرح سُود پر قرض حاصل کر سکتی ہیں۔

‘‘ہمیں قرض کی ضرورت اس وقت آن پڑی جب میرے سسُر بیمار ہوئے۔ پھر میرے شوہر کے لیے۔ اس کے بعد میری نندوں کی شادی کے لیے…‘‘ یہ کہتے ہوئے اُن کی آواز بھر آئی۔

ستار گنج تحصیل کے پنڈاری گاﺅں میں ۴۷ سالہ کملا جب ۲۸ سال قبل دُلہن بن کر آئی تھیں، تب اُن کے سسُر تولہ سنگھ ایک خوشحال کسان ہوا کرتے تھے۔ وہ اپنے کُنبے کے خوشحال دنوں کو یاد کرتے ہوئے ہاتھ کے اشارے سے اپنے آنگن کو دکھاتی ہیں۔ ’’فصل کٹائی کے موسم میں گھر کا سارا آنگن اناجوں سے بھر جاتا تھا ۔ لالہ لو گ (تاجر) اپنے آدمیوں کے ذریعہ ہم سے خریدے گئے گیہوں اور چاول ٹرکوں میں لدوا کر لے جاتے تھے،‘‘ وہ کہتی ہیں۔

کملا کو ٹھیک سے یاد نہیں ہے کہ اُن کے کُنبے نے پہلی بار قرض کب لیا تھا، کیوں کہ یہ کام مردوں کے ذمہ ہی ہوا کرتا تھا۔ لیکن انہیں یہ اچھی طرح یاد ہے کہ ۲۰۰۵ کی سردیوں میں ایک دن ایک ساہوکار جو قریبی شہر سِتار گنج میں کپڑے کی دکان چلاتا تھا، اُن کے گھر میں آ کر ٹھہرا تھا۔

’’صبح سے لے کر رات دیر گئے تک وہ میرے شوہر کے پاس بیٹھا رہا۔ اُس کے ساتھ ایک مقامی شخص بھی تھا۔ ‘مجھے اپنی زمین دے دو، حالات ٹھیک ہو جائیں گے‘، وہ بستر پر بیمار پڑے میرے شوہر سے اصرار کرتا رہا۔ صبح ہونے تک وہ انکار کرتے کرتے بہت تھک چکے تھے،‘‘ کملا یاد کرتی ہیں۔ ان کے شوہر ہریش چندر نے ۵۰ روپے کے ایک اسٹیمپ پیپر پر اُس دن دستخط کیے اور رام اوتار گوئل نام کے ایک غیر قبائلی شخص کو ۶۸ ہزار ۳۶۰ روپے کے عوض ساڑھے تین بیگھہ (تقریباً ۵۸ء۰ ایکڑ) زمین منتقل کر دی۔ قانونی طور پر اس کی اجازت کلکٹریٹ سے حاصل کرنا لازمی تھا، جسے نظر انداز کیا گیا۔ کوئی بیعہ نامہ درج نہیں کیا گیا۔ اِس کے باوجود، زمین چلی گئی۔

سال ۲۰۰۵ سے لے کر ۲۰۱۱ میں ان کی وفات تک، ہریش نے ایسے کئی اقرار ناموں پر دستخط کیے۔ فیملی کی ۱۸ ایکڑ پر مشتمل ساری زمین دھیرے دھیرے رہن رکھی گئی یا تو بیچ دی گئی۔ کملا کے پاس ۹ ایکڑ زمین کے صرف چار اقرار ناموں کے کاغذات موجود ہیں۔

”ہمارے پانچ بچے تھے، جن کی نگہداشت کرنی تھی۔ میری بڑی بیٹی اس وقت محض ۱۷ سال کی تھی۔ ہم نے اپنی تقریباً تمام زمین دو ساہوکاروں کے ہاتھوں کھو دی۔ میرا ہمیشہ سے یہی خیال تھا کہ ہماری زمین کچھ وقت کے لیے ہی رہن رہے گی۔ جب میں نے اُن سے اس کا تقاضا کیا، تاکہ میں زمین کا کچھ حصہ قرض ادا کرنے کے لیے فروخت کر سکوں، تو مجھے بتایا گیا کہ یہ زمین پہلے ہی فروخت ہو چکی ہے۔ یہ تو ڈکیتی تھی،‘‘ وہ کہتی ہیں۔

پنڈاری سے تقریباً ۶۰ کلومیٹر دور، اُدھم سنگھ نگر کے ایک دوسرے گاؤں میں بُسکا قبیلہ سے تعلق رکھنے والی ۳۱ سالہ منگولہ سنگھ کو بھی اسی قسم کے نقصان سے دوچار ہونا پڑا۔ اپنی فیملی کے کھیت کے ایک حصہ کو رہن پر رکھے جانے کی وجہ بیان کرتے ہوئے وہ کہتی ہیں، ‘‘میرا بھائی پھول شادی کرنا چاہتا تھا جو گاﺅں میں بے مثال ہو۔ اسے شراب نوشی اور جُوا کھیلنے کی لت لگ گئی تھی۔ مجھے لگا کہ شادی کے بندھن میں بندھ جانے سے وہ سُدھر جائے گا۔’’

گیارہ سال کی عمر میں ہی والدین کی وفات کے بعد منگولہ کو تین بھائی بہنوں میں بڑی ہونے کی وجہ سے والدین کا کردار ادا کرنا پڑا اور اپنے کُنبے کی ۵ ایکڑ زمین کے کام کو سنبھالنا پڑا۔ ”میرے پاس اور کیا چارہ تھا؟‘‘ وہ پوچھتی ہیں۔

بچوں کی کم سنی کی وجہ سے رشتہ داروں نے مشورہ دیا کہ منگولہ اپنی زرخیز زمین کاشتکاروں کو پٹّہ پر دے دیں، جس کے عوض انہیں فی ایکڑ سالانہ پیشگی کرایہ، ۱۵ ہزار روپے مل سکیں، جس کی مدت تین سے پانچ سال تک مقرر ہو۔ زمین کے ایک چھوٹے حصہ کو الگ رکھا گیا، تاکہ بچوں کی ضروریات پوری ہو سکیں۔ اسکول کی پڑھائی، گھریلو کام کاج اور کھیتی باڑی کے علاوہ انہوں نے انتھک کوششیں کیں، تاکہ ان کے بھائی تعلیم حاصل کر سکیں۔ لیکن بڑا بھائی پورن بہت بیمار رہتا تھا اور چھوٹا حد درجہ کاہل تھا۔

سال ۲۰۱۲ میں پھول نے نصف ایکڑ زمین ساڑھے چار لاکھ روپے میں بیچ ڈالی۔ ‘‘یہ زمین صرف ہم بھائیوں کی ہے۔ تمہارا اس پرکوئی حق نہیں ہے،’’ اُس نے منگولہ سے کہا جسے سُن کر وہ دم بخود رہ گئیں۔

”میری تمام جدوجہد اور قربانی رائیگاں ہو گئی۔ میں نے بچپن سے اپنی زمین کو بچانے کی جتنی بھی کوششیں کی تھیں، وہ سب ضائع ہو گئیں۔ اس کی بڑی وجہ یہ تھی کہ میں ایک عورت ہوں،’’ وہ کہتی ہیں۔

ایک ایسے ملک میں جہاں، سال ۲۰۱۰-۱۱ کی زرعی مردم شماری سے متعلق کل ہند رپورٹ کے مطابق، خواتین کے مقابلے میں مرد سات گنا زیادہ زرعی زمین کے مالک ہوں، منگلولہ کو حیرت ہوئی جب اُنہیں غدر پور تحصیل کے نند پور گاﺅں میں اپنے ہمسایوں کی تضحیک کا نشانہ بننا پڑا۔ انہوں نے اُن سے گزارش کی تھی کہ وہ پھول کو سمجھانے کی کوشش کریں۔

”وہ تو ایک مرد ہے۔ اُس کو اپنی زندگی گزارنے کے لیے زمین کی ضرورت ہے۔ تم کیوں اُس کے کام میں مداخلت کر رہی ہو؟’’ انہوں نے منگولہ کو جواب دیا۔ انہیں اس سے کوئی فرق نہیں پڑا کہ منگولہ ایک غیر شادی شدہ بے سہارا عورت ہیں۔

کچھ عرصہ گزرنے کے بعد پھول نے مزید نصف ایکڑ زمین بیچنے کی کوشش کی۔ یہ بھانپ کر منگلولہ نے حکم امتناعی حاصل کرنے کے لیے اُدھم سنگھ نگر میں سول جج کی عدالت میں مقدمہ دائر کیا، تا کہ پھول کو زمین بیچنے سے روکا جا سکے۔ لیکن تکنیکی بنیادوں پر مقدمہ خارج ہوگیا۔

سال ۲۰۱۵ کے وسط میں منگولہ کو اپنے بھائی کی جانب سے صُلح کی پیشکش یہ کہتے ہوئے کی گئی، ‘‘مجھے اِس بات کا اطمینان دلاﺅ کہ تمہیں میری کچھ پروا ہے اور تم میری مرضی کے مطابق میری شادی کراﺅگی۔ ایک ایکڑ زمین جو تم سمجھتی ہو تمہیں مل سکتی ہے، اُسے رہن پر دے دو [تاکہ شادی کے اخراجات پورے ہو سکیں]۔ بعد میں رہن شدہ زمین تمہارے لیے واپس حاصل کروں گا،’’ اس نے منگولہ سے کہا۔ اس نے جو پیشکش کی تھی، وہ نیک نیتی سے خالی تھی۔

”رہن کی مدت ختم ہونے میں چھ ماہ رہ گئے ہیں۔ اگر میں زمین کو نہ چھُڑا سکی، تو وہ ہمیشہ کے لیے ہاتھ سے نکل جائے گی۔ زمین کے بغیر میری حیثیت کیا رہ جائے گی؟ اگر میں شادی بھی کرنا چاہوں تو روپے پیسے کے بغیر کیسے کر پاؤں گی؟’’ یہ سوچ کر منگولہ پر مایوسی چھا جاتی ہے۔

سال ۲۰۱۲ سے سنبھال کر رکھا گیا کالے رنگ کا یہ بستہ عدالتی کاغذات سے بھرتا جا رہا ہے، جسے وہ ایک کنگنی سے لٹکائے رکھتی ہیں۔ یہ اُس دو کمروں والے مکان میں ہے، جہاں وہ اپنے دوسرے بھائی پورن کے ساتھ رہتی ہیں۔ اس صورتحال سے منگولہ کی مایوسی میں مزید اضافہ ہو رہا ہے۔