‘इहीच काम हमर रोजी-रोटी के जरिया आय’

बीते सात बछर ले, मंय फोटो मन के जरिया ले सफईकर्मी मन के जिनगी अऊ लड़ई ला दरज करत आवत हवं. अतक बछर मं, मंय कभू घलो सफईकर्मी ला काम के मुताबिक मास्क धन सुरच्छा के सामान पहिरके काम करत नइ देखेंय. जेन घलो थोर- बहुत अऊजार वो मन बऊरथें, वोला खुदेच बनाथें अऊ जतन करके राखथें.

भारत मं अतक जियादा वैज्ञानिक उन्नति होय के बाद घलो, हमन लोगन मन ला जमीन भीतरी बने नाली मं भेजत हवन, जिहां वो मन अपन जान ला जोखिम मं डारथें- अऊ अक्सर अपन जान गंवा देथें. येकर ले ये साफ आय के विज्ञान ह भलेच कतको तरक्की कर लेय हो, फेर जात ला लेके हमर सोच ह समाज मं कतक गहिर ले जमे हवय.

समाज सफईकर्मी मन ला सिरिफ आड़े बखत मइंच “आगू पांत के काम करेइय्या” के रूप मं सुरता करथे – जइसने कोविड महामारी धन प्राकृतिक आपदा. बाकी सब्बो बखत, वो मन ला सिरिफ ‘कचरावाले’ कहिथे.

1 ले 13 अगस्त, 2025 तक, सफईकर्मी मं सफाई के काम ला निजी कंपनी ला देय के खिलाफ रिपन भवन – जेन ह शहर के नगर निगम, ग्रेटर चेन्नई कॉर्पोरेशन के आफिस आय- मं सरलग धरना दीन, तेरहवां दिन, तमिलनाडु सरकार ह पुलिस के मदद ले वोला जबरन उहाँ ले हटा दीस.

जोन 5 (रॉयपुरम) अऊ 6 (तिरु विका नगर) के मजूर 1 अगस्त ले विरोध प्रदर्सन करत हवंय, जब ग्रेटर चेन्नई कॉर्पोरेशन ह ये इलाका मं सफई के काम ला निजी ठेकदार मन ला सौंपे के फइसला करिस.

ये मजूर मन बर, जेन मं अधिकतर दलित माईलोगन मन हवंय अऊ जेन मन कतको बछर ले शहर के सफई करे हवंय, निजीकरण सिरिफ मजूरीच के सवाल नो हे, फेर मान-सम्मान अऊ जिनगी गुजारे के सवाल घलो आय. निगम के सीधा काम खोय के मतलब आय श्रम कानून के तहत स्थायी दर्जा पाय के आस ला घलो गंवाय. वो मन के विरोध न सिरिफ जीविका के लड़ई आय फेर काबिलियत के नांव मं अपन मिहनत ला अऊ जियादा गिरे नइ देय के विरोध घलो हवय.

नेता, एमएलए, मंत्री कोनो घलो आयोजन वाले जगा के सफईकर्मी मन के बढ़िया सफई करे के पहिली, ब्लीचिंग पाउडर छिड़के बगेर अऊ जगा ला सुग्घर बनाय बगेर उहाँ गोड़ नइ धरेंय. अऊ ओकर बाद घलो, जेन लोगन मन समाज ला कतको बीमारी ले बचाथें, वो मन ला जात सेती, अपन जइसने मइनखे के रूप मं मान अऊ बेवहार करे नइ जावय. पीढ़ी दर पीढ़ी वो मन ला धोखा देय जावत हवय.

वो 13 दिन के विरोध-प्रदर्सन के बखत, मंय वो मन के संग पांच दिन गुजारेंय अऊ वो मन के जिनगी अऊ लड़ई ला दर्ज करेंय. मोला ये बात सफ्फा-सफ्फा समझ मं आगे के सफईकर्मी मन अपन जिनगी मं थोकन घलो उन्नति देखे नइ यें. कतको पीढ़ी ले, वो मन अपन जवानी अऊ जिनगी के बड़े अकन हिस्सा सफई करत खपा दे हवंय, अऊ बदला मं, वो मन अपन सब्बो कुछु गवां दे हवंय.

हड़ताली मजूर मन नाम उजागर नइ करे के सरत मं मोर ले बात करिन. एक झिन मजूर ह मोला कहिस, “भाई, वो मन बगेर कोनो सूचना के हमर नऊकरी बदल दीन.गर बदलेच ला रइतिस, त हम सब्बो ला सूचना देय ला रहिस, सब्बो ला बला के समझाना रहिस. येकर छोड़, वो मन बस अतक कहिन- अब तुमन इहाँ काम नइ करत हव, कोनो निजी कंपनी मं नऊकरी कर लो. ये निगम मं 16 बछर तक ले कनिहा टूटे तक ले बूता करे के बाद, ये मन अचानक-भयानक मोला ये कहत हवंय? मंय बगेर पानी पीये, बिन नागा के अऊ बनेच बखत तक ले काम करे हवं. मोर लइका मन सिरिफ येकरे सेती पढ़े सकत हवंय काबर के हमन करजा ले लेथन. गर ये नऊकरी चले गीस, त हम अपन करजा कइसने चुकाबो? हमन स्थायी नऊकरी घलो मांगत नइ अन – बस उहिच मजूरी मंगत हवन जेन ह पहिली हमन ला मिलत रहिस.”

विरोध-प्रदर्शन मं जुटे 2,000 ले जियादा मजूर मन ले कतको 16 धन 20 बछर ले सरलग काम करत रहिन. वो मन ग्रेटर चेन्नई कॉर्पोरेशन के तहत एनयूएलएम (राष्ट्रीय शहरी आजीविका मिशन) के तहत काम करत रहिन अऊ वो मन ला 23,000 रूपिया महिना तनखा मिलत रहिस.

ओकर बाद अचानक, बगेर कोनो पहिली सूचना के, वो मन के काम के निजीकरण कर देय गीस अऊ वो मन के महिना के तनखा 23,000 रूपिया ले कम करके 16,000 रूपिया कर देय गीस. येकर विरोध मं, वो मन रिपन बिल्डिंग के बहिर सरलग 13 दिन तक ले प्रदर्सन करिन. 20 ले जियादा बछर ले, ये मजूर मन ये आस मं काम करत रहिन के एक दिन वो मन के नऊकरी स्थाई हो जाही. येकर छोड़, वो मन के काम ला ठेकेदार मन ला दे देय गीस अऊ वो मन के तनखा आधा ले घलो कम कर देय गीस. समाज ये समझत नइ ये के येकर ले वो मन के दिमागी हालत उपर काय असर परथे.

वो मन के विरोध स्थायी नऊकरी बर नइ रहिस. वो मन बस कम तनखा वाले ठेका के काम मं भेजे के बजाय निगम के तहत समान वेतन देय बर रहिस. अपन लइका मन ला घर मं जुच्छा पेट छोड़ के, वो मन 13 दिन तक ले रिपन बिल्डिंग के आगू भारी घाम अऊ झड़ी मं दिन-रात बइठे रहिन. प्रदर्सन करेइय्या मन मं तीन-चौथाई माईलोगन मन रहिन, जेन मं कतको बेवा रहिन.

एक झिन महतारी सफईकर्मी कहिथे, “कतको माईलोगन मन के घरवाला गुजर चुके हवंय, धन दरूहा आंय. अइसने मं, ये बुहारी हमर घरवाला आय, ये कचरा उठाय के काम हमर परिवार आय.” आने एक झिन कहिथे, “हमर लइका मन हमन ले पूछ्थें: अम्मा(दाई), अवेइय्या महिना घर भाड़ा बर कइसने करबो?’ हमर पोता-पोती मन कहिथें, अब तंय हमर बर कुछु नइ बिसोवस.’ हमन वो मन ला काय जुवाब देवन?”

येकर पहिली के सरकार मं अधिकतर सफईकर्मी मन ला ठेकाकर्मी बना दे गे रहिस. ये सरकार घलो इहीच रद्दा ला धरे हवय. सफईकर्मी मन ला स्थायी करे के राज करेइय्या पार्टी के चुनावी वादा सिरिफ ओकर घोसनापत्र मंइच रहिगे हवय.

चेन्नई निगम ह एक ठन प्रेस विज्ञप्ति जारी करके आरोप लगाइस के सफईकर्मी मन के विरोध प्रदर्सन सेती जनता ला भारी तकलीफ होय हवय अऊ रिपन बिल्डिंग तीर ट्रेफिक जाम होगे हवय, अऊ सफई नइ होय ले 20 लाख ले जियादा आबादी उपर असर परही.

फेर असल मं, मजूर मन बगेर कोनो बाधा-बिघन डारे शांतिपूर्ण ढंग ले अपन विरोध प्रदर्सन करिन.’

एक झिन मजूर बताथे, “हरेक पूर बखत, हरेक चक्रवात बखत, वो मन हमन ला परमानेंट करे के वादा करथें. फेर कुछु नइ होवय. चक्रवात बखत, हमन बिहनिया 5 बजे ले घर ले निकरके पुरवाले सड़क ले होवत काम करे जाथन. तूफान मं जेन कुकुर अऊ बिलई मर जाथें, वोला हमन अपन हाथ ले उठाथन, रतिहा मं हमन थक के, बिन दस्ताना के अऊ बगैर रेनकोट के काम ला खतम करथन. गर कोनो अफसर आ जाथे, तभेच वो मन हमन ला दस्ताना धन कोट देथें. नइ त हमन खुदेच बिसो लेथन. बछर भर मं एक बेर, वो मन हमन ला कचरा धरे के टुकना देथें. एक ठन रांपा घलो नइ.”

इही प्रेस विज्ञप्ति मं ये घलो दावा करे गे रहिस के निजीकरन ले मजूर मन ला कतको लाभ मिलही, जइसने मुफत मं वर्दी, बरसात मं कचरा हटाय के अऊजार, पीएफ, इलाज के बीमा, बोनस, तिहार भत्ता, बिहाव मं मदद (20,000 रूपिया तक), पढ़ई सेती मदद (12,000 रूपिया तक), एक्सीडेंट अऊ मौत के मुआवजा, सलाना मेडिकल जाँच. फेर ये वादा अमल मं कतक सफल होही, ये ह संदेहां मं हवय.

एक झिन दीगर मजूर कहिथे, “पांच बछर पहिली, दिन मं सिरिफ दू ट्रक कचरा आवत रहिस. अब चार ट्रक आथे. मोटर गाड़ी आय के पहिली, हमन ठेला चलावत रहेन. कोनो कचरा अलग नइ करय; हमन वोला अपन जुच्छा हाथ ले छांटथन- डायपर,सैनिटरी पैड, टूटे कांच. गर हमन छुट्टी लेथन, त एक दिन के रोजी घलो कट जाथे. गर हमन ला लग जाथे, त हमन अपन इलाज खुदेच करवाथन. कभू-कभू त लोगन मन हमन ला पिये बर पानी घलो नइ देवंय.”

जब विरोध-प्रदर्सन सिराइस, त रामकी (एक ठन निजी कंपनी जेकर उपर धोखाधड़ी के कतको मामला चलत हवय) के सफईकर्मी मन ला बगेर कोनो सुरच्छा सामान के, कचरा ढोवेइय्या गाड़ी मं भरके धरना वाले जगा के सफई करे बर लाय गीस. प्रदर्सन करेइय्या मन के सवाल रहिस के अइसने आरोप मन ले घिराय कम्पनी ले ये काम काबर देय गीस.

स्वयं सहायता समूह डहर ले नियुक्त अस्थायी कर्मी मन ला “ठेका कर्मी” कहे घलो पूरा तरीका ले गलत होही. फेर बगेर कोनो लिखित मं ठेका के काम के स्वयं सहायता समूह मन के कर्मी मन ला “ठेकेदार” कहे धोखाधड़ी के छोड़ कुछु अऊ नो हे. रिटायर जज हरि परंधमन के फइसला के बाद जज सुरेश कुमार के अध्यक्षता वाले दू जज के पीठ ह मद्रास हाई कोर्ट मं ये बात ला नजर मं लाइस.

जइसने के एक झिन मजूर ह कहिस: “येला नीच अऊ अपमान वाले पेशा माने जाथे. वो मन हमर लइका मन ला आगू बढ़े ले रोकथें. गर हमन 23,000 रूपिया कमाथन अऊ थोकन आगू बढ़थन, त वो मन हमर तनखा ला 15,000 रूपिया मं ले जाथें जेकर ले हमर लइका मन कभू येकर ले बहिर झन निकरे सकंय. वो मन चाहथें के हमन पीढ़ी दर पीढ़ी कचरा ढोवत रहन.”

ये विरोध-प्रदर्सन के अगुवई मज़दूर अधिकार आंदोलन, एलटीयूसी, एआईसीसीटीयू अऊ यूयूआई यूनियन मन करिन. 13 दिन तक ले कोनो घलो सरकारी अफसर मजूर मन ले भेंट होय बर नइ आइन. सिरिफ यूनियन के नेता मन लेच गोठबात करिन, फेर काबर के सरकारी निजीकरन मं अड़े रहिस ते पाय के कोनो समझौता नइ होय सकिस. 13 वां दिन, सरकार ह पुलिस लगाके प्रदर्सन करेइय्या मन ला जबरदस्ती हटाके, सब्बो ला गिरफ्तार कर लीस. दूसर दिन भारी जूझे के बाद वो मन ला रिहा करे गीस.

निजीकरन ह सफईकर्मी मन के आवाज ला दबा दे हवय. गर वो मन अफसर ले सवाल करथें, त वो मन ला तुरते नऊकरी ले निकार दे जाथे. एक पईंत, जब मंय कोयंबटूर मं सफई के काम के दस्तावेजीकरन करत रहंय, त एक झिन करमचारी ह मोला अपन परेशानी बताइस. उहिच संझा, ठेकादार ह वोला नऊकरी ले निकार दे रहिस. निजीकरन के इही मतलब आय: वो मन के आवाज ला कुचर देय.

एक झिन मजूर ह दुख जतावत कहिथे, “हमन 8,10, इहाँ तक ले 15 बछर ले काम करत हवन. न दस्ताना, न मास्क, कुछु घलो देय नइ जाय. हमन सब्बो खुदेच बिसोथन. ओकर बाद घलो, सरकार ह हमन ला मऊका नइ दीस.इहीच काम हमर रोजी-रोटी के एकेच जरिया आय. हमन कोरोना बखत, चक्रवात बखत इहीच काम करेन, अऊ अब बदला मं हमन ला ठेकादार के तरी रखे जावत हवय.” एक झिन दीगर मजूर कहिथे, “गर कलैगनार अय्या [द्रमुक प्रमुख एम करुणानिधि] जींयत रइतिस, त वो ह हमर स्थायी नऊकरी तय करे रइतिस. हमन रोड मं बइठे हवन, बरसात मं भींगत हवन, घाम मं तपथन, अऊ बूता घलो करथन.”

इलाज के चिंता घलो भारी परत हवय.” हमन ले कुछु लोगन मन अब गरभ मं सूजन, गुर्दा के बीमारी अऊ देह के कतको दिक्कत ले जूझत हवंय. इहाँ तक के 55 अऊ 60 बछर ले ऊपर के माईलोगन मन, जेन मन 15 बछर ले काम करे हवंय, अचानक ये कहे जाथे के अब वो मन के नौकरी नइ ये. अतक बछर ले मिहनत के अब वो मन ला काय फायदा मिलत हवय?”

दूसर मन संसो जतावत कहिथें: “23,000 रूपिया के तनखा मं हमन ला मुस्किल ले छै महिना के पूरा तनखा मिले रहिस, ओकर बाद वो मन हमन ला मार डारिन. अब हमन गुजारा बर करजा लेवत हवन. बियाज बढ़त जावत हे. हमन ला समझ मं नइ आवत हे के गुजारा कइसने होही. हमर जिनगी चिंता मं पर गे हवय.”

“गर निगम मं इंजीनियर अऊ एकाउंटेंट मन ला घलो ठेका मं रखे जाय, त काय येला मानहीं? सिरिफ हमरेच निजीकरन काबर करे जावत हे? गर तमिलनाडु के लोगन मन के रच्छा बर नइ, त सरकार कोन काम के ? गर तमिलनाडु लाच अतक अपमानित करे जाही, त काय बाचही?”

समाज के “समाजिक नियाव” के मतलब इहीच आय के वो मन के संग बइठ के चाहा पियन, वो मन के संग खावन अऊ कुछु बखत ये बताय के दिखावा करे जाय के वो मं घलो हमर जइसने आय. ये ह बेतुका बात आय. असल सामजिक नियाव वो मन के संग खड़े होय, वो मन के हक के रच्छा करे, ओकर मांग ला अमल मं लाय अऊ ये तय करे आय, के हमर शहर के सफई करेइय्या मन के संग मान –सम्मान के बेवहार करे जाय. येकर ले कुछु घलो कम ढोंग आय.

ये कहिनी मूल रूप मं तमिल मं लिखे गे रहिस.

अनुवाद: निर्मल कुमार साहू