सरकार, मजूरन के ठिकेदार के गुलाम काहे बनावता?

पछिला सात बरिस से सफाई कर्मचारी के जिनगी आ संघर्ष फोटो के सहारे देखावत आ लिखत आवत बानी. एतना दिन में हम कबो ओह लोग के ढंग के ना त मास्क पहिरले देखनी, ना सुरक्षा के कवनो सामान काम में लावत देखनी. तनी-मनी जे देखनी, ओह लोग के आपन बनावल आ जुगाड़ कइल रहे.

भारत में विज्ञान त चान-तारा छू रहल बा, बाकिर आदमी नाला-गटर में उतारल जा रहल बा. इहंवा ऊ लोग के जान दांव पर रहेला, आ केतना बेरा त जानो चल गइल बा. साफ जनाता कि तरक्की भले भइल होखे, बाकिर जात-पात के देवार आजो ओतने बरियार बा.

सफाई कर्मचारी के कोविड महामारी, चाहे कवनो बड़ आपदा में मजबूती से तैनात रहे खातिर “फ्रंटलाइन वर्कर्स” के रूप में इयाद कइल जाला. बाकी घरिया ओह लोग के बस कचरा उठावे आ गंदगी साफ करे वाला के तौर पर देखल जाला.

एक से 13 अगस्त, 2025 तक सफाई कर्मचारी लोग आपन नौकरी के निजीकरण के खिलाफ चेन्नई के नगर निगम ग्रेटर चेन्नई कॉरपोरेसन के हेड ऑफिस, रिपन बिल्डिंग के बाहिर लगातार धरना पर बइठल रहल. धरना के तेरहवां दिन तमिलनाडु सरकार पुलिस लगवा के ओह लोग के जबरिया उहंवा से हटा देलक.

जोन 5 (रायपुरम) आ 6 (तिरु वी का नगर) के कामगार लोग 1 अगस्त से हड़ताल पर बइठल रहे. ऊ लोग ग्रेटर चेन्नई कॉरपोरेसन के एह इलाका सब में ठोस कूड़ा-कचरा सब हटावे आ साफ करे के काम निजी कंपनियन के देवे के बिरोध करत रहे.

एह कर्मचारी लोग खातिर निजीकरण खाली तनखे कटे के ना, बलुक जिनगी आ सम्मानो के सवाल बा. एह सफाई कर्मचारी में से जादेकरके दलित मेहरारू लोग बा, जे बरिसन से शहर के साफ करत आइल बा. नगर निगम से सीधा नौकरी खतम होखे के मतलब बा, कानून के हिसाब से स्थायी नौकरी के आस खतम होनाई. ई रोजी-रोटी बचावे के लड़ाई बा. समाज के नजर ना आवे वाला आपन मिहनत के “कुशलता” के नाम पर आउरो कमतर करार देवे जाए से भी ओह लोग के इंकार बा.

नेता-प्रतिनिधि लोग तबे कवनो जगह पर गोड़ धरेला, जब सफाई कर्मचारी लोग ओह जगह के चमकावे, ब्लीचिंग पाउडर छिड़क के साफ-सुथ्थर ना बना देवेला. बाकिर दुख के बात बा जे समाज के बेमारी से बचावेला, उहे जात-पात के फेर में सम्मान आ बराबरी से बेदखल बा. पुश्त दर पुश्त ऊ लोग ठगाएल चलल आ रहल बा.

हड़ताल के एह 13 दिन में हम पांच दिन ऊ लोग संगे रहनी, ओह लोग के जिनगी आ संघर्ष दर्ज कइनी. साफ बुझात रहे सफाई कर्मचारी लोग के जिनगी में एक बूंद सुधार नइखे आइल. पीढ़ियन से आपन जिनगी आ जवानी सफाई के काम में गला देला के बावजूद आज ओह लोग के हाथ खाली बा.

नाम जाहिर ना करे के शर्त पर हड़ताल पर बइठल कर्मचारी लोग हमरा के बहुते कुछ बतइलक. एगो कर्मचारी कहलन, “भाई, ऊ लोग बिना कवनो नोटिस देले हमनी के नौकरी दोसरा के दे देलक. जदि कुछ बदलल जरूरिए रहे त पहिले हमनी के बतावे, जुटावे आउर फरिया के समझावे के चाहत रहे. अइसन कुछुओ ना कइलक लोग आ खाली कह देलक, तू लोग के इहंवा अब कवनो काम नइखे. जा प्राइवेट कंपनी में लग जा. सोलह बरिस ले एह निगम खातिर कमर तुड़ मिहनत कइनी. आउर अब अचके ई लोग कहता, इहंवा से चल जा. बिना पानी, बिना छुट्टी काम करत रहनी, तनखो देरी से मिलत रहे. बच्चा सब के करजा लेके पढ़इनी. इहो नौकरी चल जाई, त हमनी के करजा कइसे सधी? हमनी त नौकरी पक्को करे के नइखी कहत, हमनी के ओतने तनखा दे द जे पहिले मिलत रहे.”

हड़ताल पर बइठल 2,000 से जादे कर्मचारी लोग में से केतना लोग त 16, चाहे 20 बरिस से लगातार काम कर रहल बा. सभे के नौकरी ग्रेटर चेन्नई कॉरपोरेसन में एनयूएलएम (नेशनल अरबन लाइवलीहुड मिसन) के जरिए मिलल रहे. तनखा 23,000 रहे.

अचके बिना पहिले से बतइले सफाई के काम प्राइवेट कंपनी के दे देवल गइल आ तनखा 23,000 से घटाके 16,000 कर देवल गइल. एकरा खिलाफ ऊ लोग रिपन बिल्डिंग के सामने लगातार 13 दिन तक धरना देलक. पछिला बीस बरिस से कर्मचारी लोग एहि आस में काम करत रहे कि एक दिन ओह लोग के नौकरी पक्का हो जाई. बाकिर भइल उलटा. ओह लोग के काम निजी कंपनियन के दे देवल गइल. मजूरियो घटा देवल गइल. गांव-समाज के तनिको परवाह नइखे कि एकरा से ओह लोग के दिमागी सेहत पर केतना खराब असर पड़ी.

ऊ लोग कोई नौकरी पक्का करवावे खातिर हड़ताल पर ना बइठल रहे. ऊ लोग त बस इहे मांगत रहे कि निगम ओह लोग के जेतना पइसा देता, ओतने आगे भी मिलत रहो. एकरा उलट ओह लोग के कम पइसा वाला ठेका के काम में धकेल देवल गइल. आपन लरिका-फरिका के भुखले-पियासले छोड़ के ऊ लोग तेज घाम आ बरखा में दिन-रात रिपन बिल्डिंग के सोझे बइठल रहल. हड़ताली लोग में तीन-चौथाई मेहरारू लोग रहे, जेकरा में केतना विधवा रहे.

एगो महिला कर्मचारी बतइली, “केतना मेहरारू सब के घरवाला मर चुकल बा, चाहे पियक्कड़ बा. अइसन परिस्थिति में त बढ़निए (झाड़ू) घरवाला बा, आ कचरा के कामे कुल-खानदान.” दोसर कर्मचारी कहेली, “हमनी के लरिका सब पूछेला, ‘अम्मा अगिला महीना के किराया कइसे दियाई?’ पोता-पोती पूछेला, रउआ हमनी के अब कुछ काहे ना दियावेनी? बताईं, अब हम का कहीं?”

पिछला सरकार जादेतर सफाईकर्मी के ठेका पर डाल देले रहे. वर्तमानो सरकार उहे नीती जारी रखले बा. सफाईकर्मी के स्थायी करे के ओह लोग के चुनावी वादा घोषणापत्र ले सीमित रह गइल बा.

चेन्नई नगर निगम एगो प्रेस रिलीज जारी कइलक आ कहलक कि सफाईकर्मी लोग के धरना देवे से आम जनता के दिक्कत होता, रिपन बिल्डिंग लगे ट्रैफिक जाम होखता. इहो कहल गइल कि गली-मोहल्ला गंदा रह जाई त 20 लाख से जादे लोग पर असर पड़ी.

बाकिर असल बात त ई बा कि मजूर लोग आपन धरना शांति से कइलस, कवनो गड़बड़ी ना भइल.

एगो मजूर बतइलन, “बाढ़ आइल, तूफान आइल, त हमनी से स्थायी नौकरी के वादा कइल गइल. बाकिर कुच्छो ना भइल. चक्रवात घरिया हमनी भोरे पांच बजे घर से निकल जात रहीं. पानी से भरल गली से होके काम पर जाए पड़त रहे. तूफान में मरे वाला कुत्ता-बिलाई सब के हाथे उठइनी. काम पूरा करके देर रात थकल-मांदल घरे लउटत रहीं. ना त कवनो दस्ताना, ना कवनो बरसाती रहे. जब कवनो अफसर आवेला, तबे हमनी के दस्ताना, चाहे बरसाती दे देवल जाला. ना त हमनी के अपने कीने पड़ेला. साल में एक बार बस एगो कूड़ादान मिलेला. फावड़ा ले त हमनी के ना देवल जाए.”

ओह प्रेस रिलीज में त इहे दावा कइल गइल रहे कि निजीकरण से कर्मचारी लोग के बहुते सुविधा सब मिली. जइसे कि मुफ्त वरदी, बरसात में कचरा उठावे के साधन, पीएफ, मेडिकल इंश्योरेंस, बोनस, तीज-त्योहार भत्ता, बियाह-शादी में मदद (20,000 ले), पढ़ाई खातिर मदद (12,000 ले), चोट लगला मरला पर मुआवजा, सलाना मेडिकल चेकअप. असल में वादा पूरा होखेला कि ना, ई बहुते बड़ सवाल बा.

एगो दोसर सफाई कमर्चारी बतइलन, “पांच साल पहिले तक रोज दू ट्रक कचरा उठावल जात रहे. अब चार गो ट्रक हो गइल बा. गाड़ी आवे से पहिले, बरिसन हमनी हाथे गाड़ी से कचरा खींचत रहीं. कचरा अलग करे के काम केहू ना करे, हमनिए हाथ से करिले. चाहे डायपर होखे, नैपकिन, कि फूटल शीशा. छुट्टी ले लीहीं, त पूरा दिन के पइसा कट जाला. चोट लग जाव, त इलाज खातिर पइसो हमनिए के भरे पड़ेला. केतना बेरा त लोग पानियो खातिर ना पूछे.”

हड़ताल खतम भइल, त रामकी नाम के एगो प्राइवेट कंपनी आपन सफाईकर्मी के बिना कवनो सुरक्षा के साधन मुहैया करइले, ओह लोग से कचरा उठावे के कहलक. एह कंपनी पर धोखाधड़ी के केतना केस पहिले से दर्ज बा. मजूर लोग सवालो कइलक कि अइनस कंपनी के काम काहे सौंपल गइल.

एतने ना, स्वयं सहायता समूह के जरिए रखल गइल अस्थायी मजूर के “ठेका मजूर (कॉन्ट्रैक्ट वर्कर)” कहल एकदम गलत बा. निगम हाले में जोन 5 आ जोन 6 के काम रामकी ठिकेदारन के टेंडर के जरिए सुपुर्द कइले . बाकिर कवनो लिखित टेंडर प्रक्रिया के बना स्वयं सहायता समूह के कर्मचारी के “ठेका मजूर” कहल धोखा बा. ई बात रिटायर न्यायमूर्ति हरि परंधमान के जारी कइल फैसला के बाद, उच्च न्यायालय में जज सुरेश कुमार के अगुआई में दू-न्यायाधीश के पीठ कहले रहे.

एहि तरह एगो आउर सफाईकर्मी कहेलन, “हमनी के काम के हीन देखल जाला. ऊ लोग हमनी के बाल-बच्चा के आगू ना बढ़े देवे के चाहे. हमनी जइसहीं 23,000 कमाके तनी आगू बढ़नी, हमनी के धक्का मार के 15,000 पर धकेल देवल गइल. ई सब एह से कि हमनी के लरिका सब आगू ना बढ़ पावे. ऊ लोग चाहेला कि हमनी के पीढ़ी दर पीढ़ी कचरे उठावत रहे.”

विरोध प्रदर्शन मजदूर अधिकार आंदोलन, एलटीसीयू, एसआईसीसीटीयू आ यूयूआई यूनियन सब के नेतृत्व में भइल. बाकिर पूरा 13 दिन एको सरकारी अधिकारी सफाईकर्मी से भेंट करे ना आइल. खाली यूनियन नेता लोग से बतियावल गइल. सरकार निजीकरण पर डटल रहल, जेसे कवनो समझौता ना हो पाइल. तेरहवां दिन सरकार पुलिस बल के मदद से प्रदर्शनकारी सब के धरना स्थल से जबरिया हटइलक. सभे के गिरफ्तारो कइल गइल. बहुते संघर्ष के बाद अगिला दिन ओह लोग के छोड़ल गइल.

निजीकरण सफाई कर्मचारी सब के मुंह सी देले बा. सरकार से सवाल पूछत देरी नइखे, कि नौकरी खतम हो जात बा. एक बेरा हम कोयंबटूर में सफाईकर्मी लोग के काम के बारे में लिखत-देखत रहनी. उहे घरिया एगो कर्मचारी हमरा के आपन परेसानी बतइले रहस. उनकरा उहे संझा ठिकेदार नौकरी से निकाल देलक. इहे बा निजीकरण, मजूर के आवाज दबा द.

एगो आउर मजूर आपन तकलीफ बतावे लगलन, “हमनी 8, 10, इहंवा ले कि पनरह-पनरह बरिस से ई काम करत बानी. ना हाथ में दस्ताना, ना मुंह पर मास्क, कुछो ना मिलल. सब चीज हमनी अपने कीननी. एतना के बावजूद सरकार हमनी के कवनो मौका ना देलक. हमनी के कमाई के इहे एकमात्र जरिया बा. कोरोना रहे त कचरा उठइनी, तूफान आइल त पीछे ना हटनी. बदला में का मिलल, हमनी के ठिकेदारन के हवाले कर देवल गइल.”

बेमारी के डर आ चिंतो भारी पड़त बा. “केहू के बच्चादानी सूज गइल बा, त केहू किडनी आ दोसर बेमारी से लड़ता. इहंवा ले कि पनरह-पनरह साल से काम कर रहल 55-60 बरिस के मेहरारू तक के मुंहे पर कह देवल गइल कि अब ओह लोग के काम नइखे. एतना बरिस पसीना बहइला के का फायदा भइल?”

दोसरो लोग आपन तकलीफ बतावे लागल, “23,000 के तनखा त रहे, बाकिर मुस्किल से छव महीना पूरा पइसा मिलल होई. ओकरा बाद कांट-छांट सुरु हो गइल. अब त करजे लेके जियत बानी हमनी. ब्याज बढ़त चलल जा रहल बा. समझे में नइखे आवत कइसे चली. जिनगिए सवाल बन गइल बा.”

“जदि कॉरपोरेशन के इंजीनियर आ अकाउंटेंट लोग के काम ठेका पर दे देवल जाव, त ऊ लोग मानी? तहमनी संगे अइसन काहे कइल जा रहल बा? सरकार के काम आपन लोग के संभारे के नइखे का? जदि तमिलनाडु अपने इज्जत एह तरहा उछाली, त का रह जाई?”

समाज खातिर हमनी संगे बइठ के चाय पियल, एक बेर के खाना खायल, हंसल-बोलल आ जतावल कि ऊ लोग हमनिए जइसन बा, ‘समाजिक न्याय’ रह गइल बा. ई सब फालतू बात बा. असल समाजिक न्याय त तब होई जब मजूर लोग के हक सुरक्षित रही, मांग पूरा होखी आ पूरा शहर के साफ रहे वाला के इज्जत मिली. ना त सब ढोंग बा.

स्टोरी मूल रूप से तमिल में लिखल गइल बा.

अनुवाद: स्वर्ण कांता