’یہ ہنر ہی ہمارا سرمایہ ہے‘

ہوا میں مٹی اور لکڑی کے دھوئیں کی بو رچی بسی ہے۔ ایک بڑے ٹب میں سفید مٹی رکھی ہوئی ہے۔ اس مٹی کے دھبوں سے سیمنٹ کا فرش داغدار ہو رہا ہے۔ برتن کے سانچے اور نامکمل برتن جا بجا بکھرے پڑے ہیں، جس کی وجہ سے یہاں چلنا بھی مشکل ہے۔ ’’سنبھل کر،‘‘ حمید احمد ہر ایک کو مسلسل احتیاط برتنے کی تلقین کرتے ہیں۔

بارہ سال کا ایک لڑکا چاک پر بیٹھا اسے چلانے کی مشق کر رہا ہے۔ یہ حمید کے بیٹے محمد سلمان ہیں۔ ان کا پورا جسم سفید مٹی کے غبار میں اٹا ہوا ہے۔ وہ اپنی دائیں ٹانگ سے نیچے زمین پر موجود چاک کو چلاتے ہوئے بائیں ٹانگ پھیلاتے ہیں۔ وہ پورے انہماک کے ساتھ اپنے کام میں مصروف ہیں۔

’’اسے [برتن کو] آہستہ سے اتارو،‘‘ حمید انہیں ہدایت دیتے ہیں۔ تاریخ خود کو دہرا رہی ہے، کیوں کہ ۴۹ سال کے ہنرمند کمہار تقریباً نو سال کے تھے جب انہوں نے اپنے والد سے اس مخصوص کک وہیل تکنیک کو سیکھنا شروع کیا تھا۔ ’’میں نے شروعات میں کچھ برتن توڑ دیے تھے،‘‘ وہ مسکراتے ہوئے یاد کرتے ہیں۔ ’’یہ ہنر مشق سے ہی آتا ہے۔‘‘

دس بھائیوں میں سے ایک، حمید ساتویں نسل کے کمہار ہیں۔ اتر پردیش کے سیرامک سٹی خورجہ میں صرف انہی کا خاندان ایسا ہے جو آج بھی اس تکنیک کا استعمال کر رہا ہے۔ خورجہ اپنے مخصوص برتنوں کے لیے مشہور ہے۔ یہ برتن زیادہ تر مسلم کاریگر بناتے ہیں۔

’’ہمارے آباء و اجداد ملتان [موجودہ پاکستان کے صوبہ پنجاب کا ایک شہر] سے یہاں آکر آباد ہوئے تھے،‘‘ حمید کے بڑے بھائی سعید بتاتے ہیں۔ وہ وضاحت کرتے ہیں کہ ملتانی کمہاروں نے خورجہ کو اس کے مخصوص مٹی کے برتن دیے، جو آج کل خورجہ میں تقریباً ۲۵ ہزار کمہاروں کی روزی روٹی کا ذریعہ ہے۔

احمد برادران کی برتنوں کی ورکشاپ ایک کوٹھی میں ہے جو تقریباً ایک صدی پرانی ہے اور اندرون شہر میں واقع ہے۔ ان کے خاندان کے لوگ الگ الگ گھروں میں رہتے ہیں، لیکن ان میں ایک مضبوط رشتہ ہے۔ مرد مل کر کام کرتے ہیں۔ ’’ہمارے اتحاد نے ہمارے کاروبار کو تحفظ فراہم کیا ہے،‘‘ حمید کہتے ہیں۔

چاک پر آنے کے بعد حمید بایئں ہاتھ سے مٹی کے پیڑے کو پکڑتے ہیں، جب کہ ان کا دایاں ہاتھ اس پر رقص کرنا شروع کر دیتا ہے۔ برتن بناتے ہوئے ان کی انگلیاں باہر نکلتی ہیں، اور شکل لیتے برتن کے ارد گرد گھمائی جاتی ہیں۔ اگرچہ برسوں سے کام کرنے کی وجہ سے ان کے ہاتھ سخت ہوگئے ہیں۔ اس کے باوجود ان کا لمس مضبوط لیکن نازک ہے۔ جیسے جیسے مٹی شکل لینے لگتی ہے وہ اسے چھوڑتے ہیں۔ دباؤ بالکل درست ہونا چاہیے۔ زیادہ دباؤ سے برتن کے کنارے گر جاتے ہیں۔ بہت کم دباؤ سے کوئی شکل نہیں بنتی۔

’’یہ کلا (فن) سارے خورجے میں اور کہاں؟‘‘ وہ فخر سے دعویٰ کرتے ہیں۔ ’’ہم لوگ مٹی کے ایک پیڑے سے، ایک منٹ میں ہی کئی طرح کے آئٹم (چیزیں) بنا سکتے ہیں،‘‘ جب سعید یہ باتیں کہتے ہیں، تو حمید کے ہاتھ چاک پر تیزی سے حرکت کر رہے ہوتے ہیں۔ یہاں تک کہ وہ اپنے گھریلو استعمال کے لیے بھی کچھ چیزیں بناتے ہیں، جن میں چائے کے کپ اور پلیٹیں، گلدان اور دیگر آرائشی اشیاء شامل ہیں۔

کارکنوں کی تعداد آرڈر پر منحصر ہے۔ یہاں اوسطاً تین سے چار لوگ روزانہ صبح نو بجے سے شام چھ بجے تک کام کرتے ہیں، صرف دوپہر کو کھانے کا وقفہ ہوتا ہے اور کام رکتا ہے۔

احمد برادران گجرات اور راجستھان سے بالترتیب مٹی اور پتھر حاصل کرتے ہیں۔ مانسون کے مہینوں میں کام سست پڑ جاتا ہے، کیونکہ ہوا میں موجود نمی مٹی کے برتنوں کو اچھی طرح سے خشک نہیں ہونے دیتی۔ تہوار کے موسم میں، خاص طور پر اگست کے بعد کے مہینوں میں، مانگ پھر سے بڑھ جاتی ہے۔ اس دوران انہیں سب سے زیادہ آرڈر موصول ہوتے ہیں، جنہیں وہ تھوک فروشوں کے ذریعے ممبئی، دہلی این سی آر اور بنگلور کے بڑے بازاروں میں سپلائی کرتے ہیں۔

مجموعی طور پر وہ مختلف قسم کی سرامک ​​مصنوعات تیار کرتے ہیں، جن میں چائے دانی، کپ، پیالے اور آرائشی گلدان شامل ہیں۔ اس ہنرمند کاریگر کو گلدان بنانا پسند ہے۔ حمید فخر یہ انداز میں کہتے ہیں، ’’میں انہیں متعدد شکلوں اور سائزوں میں بنا سکتا ہوں۔‘‘

مصور نامی ایک ملازم ایک بڑے سے برتن میں بڑے احتیاط سے مٹی ملا رہا ہے اور پس منظر میں اس کے فون پر ایک قوالی بج رہی ہے۔ ’’یکساں کثافت کلیدی حیثیت رکھتی ہے،‘‘ ۲۵ سالہ کمہار ایک ایک کرکے مٹی کو سانچوں میں ڈالتے ہوئے کہتے ہیں۔ ’’اس سے حتمی مصنوعات کے معیار کا تعین ہوتا ہے۔‘‘ جب مٹی ڈھل کر برتن بن جاتی ہے، تو انہیں خشک ہونے کے لیے چھوڑ دیا جاتا ہے، جنہیں عبد الحمید کے حوالے کر دیا جاتا ہے۔ انہیں اس کام کا کئی دہائیوں کا تجربہ ہے۔ وہ پانی میں بھیگے ہوئے اسفنج کا استعمال کرتے ہوئے مٹی کے برتنوں کو آہستہ سے صاف کرتے ہیں، کھردرے کناروں کو ہٹاتے ہیں اور ان کی چمک بڑھانے کے لیے کیمیائی محلول میں ڈبو کر اگلے مرحلہ کے لیے ہر برتن کو تیار کرتے ہیں۔ ۷۵ سالہ عبدل بتاتے ہیں، ’’آخری مرحلہ میں نوک پلک کو درست کرنا بہت اہم ہے، اس سے ہمارے کام میں جان آتی ہے۔‘‘

عبد الحمید کبھی اپنی فیکٹری کے مالک تھے، لیکن اب وہ احمد برادران کے ساتھ مل کر کام کرتے ہیں۔ ’’جس کی جتنی عمر ہوگی، اسے اتنی ہی عزت دی جائے گی ،‘‘ اس پورے آپریشن کی نگرانی کرنے والے سعید مزید کہتے ہیں۔

خورجہ میں کوزہ گری کے کام میں مردوں کی اکثریت ہے۔ حمید کہتے ہیں، ’’ہمارے خاندان کی خواتین کام نہیں کرتیں۔‘‘ وہ وضاحت کرتے ہیں، لیکن ’’ضرورت پڑنے پر مٹی کے برتنوں کو دستی طور پر دھونے، صاف کرنے اور ان کے رکھ رکھاؤ کے لیے،‘‘ وہ ورکشاپ میں خواتین کو بھی کام پر رکھتے ہیں۔

ورکشاپ میں ایک بڑے گودام کے اندر خواتین کام کرتی ہیں۔ یہاں شبانہ خان تقریباً ۲۰ خواتین کے ساتھ سیرامک ​​کی پلیٹیں دھو رہی ہیں۔ ’’ہم روزانہ چھ گھنٹے تک کام کر کے ۳۰۰ روپے کماتے ہیں،‘‘ ایک سفید پلیٹ کو احتیاط سے صاف کرتے ہوئے ۴۸ سالہ شبانہ کہتی ہیں۔ پانی کے چھڑکنے اور پلیٹوں کے ٹکرانے کی آواز گودام میں گونج رہی ہے۔

’’یہ اس نوع کی پلیٹیں ہیں جنہیں آپ فائیو اسٹار ہوٹلوں میں دیکھیں گے،‘‘ وہ مزید کہتی ہیں، ان کی آواز میں اپنے کام کے تئیں فخر یہ انداز نمایاں ہے۔

’’خورجہ میں کوئلہ سے چلنے والی [ڈاون ڈرافٹ] تقریباً ۲۰۰ بھٹیاں تھیں،‘‘ سعید احمد کہتے ہیں۔ اپنے بھائیوں میں سعید ہی ہیں جو زیادہ تر گاہکوں کے ساتھ معاملہ طے کرتے ہیں۔ ’’ہر بھٹی ۱۲۰ گھنٹے کے چکروں میں برتنوں کو پکانے کے لیے جلائی جاتی تھی، جس کی چمنی سے سیاہ دھوئیں کے بادل آسمان میں نکلتے دکھائی دیتے تھے،‘‘ وہ مزید کہتے ہیں، ’’یہ ایک انتہائی درجہ کا نہ رکنے والا عمل ہوتا تھا۔ یہ نسل در نسل یہاں کی زندگی کا حصہ رہا ہے۔‘‘

سال ۱۹۹۰ کی دہائی آتے آتے، کوئلہ سے چلنے والی بھٹیاں، جو کہ محنت طلب اور ماحولیات کے لیے خطرناک تھیں، ترک کر دی گئیں اور ان کی جگہ زیادہ کارآمد ڈیزل اور پھر تیل سے چلنے والے شٹل بھٹیوں اور ٹنل بھٹیوں نے لے لی۔ اس کی وجہ سے بھٹیوں کی فائرنگ کے چکر دو یا تین دن تک کم ہو گئے اور توانائی کی لاگت بھی کم ہو گئی۔ سال ۲۰۱۶ کے نیشنل گرین ٹربیونل کے حکم کے بعد ان بھٹیوں میں قدرتی گیس کے استعمال نے نوید خان کے انڈیا آرٹ سیرامکس کی مدد کی ہے۔ ان کی بھٹی ۱۹۷۲سے جاری ہے۔ آرڈر کا حوالہ دیتے ہوئے، اس بڑے ورکشاپ کے مالک کہتے ہیں: ’’یہ [قدرتی گیس] پائیدار برتن سازی کے لیے ایک بڑا قدم ہے اور اس سے ہمیں کم خرچ میں زیادہ پیداوار حاصل کرنے میں مدد مل رہی ہے۔‘‘

لیکن احمد برادران اور دوسرے چھوٹے درجہ کے کمہاروں کے لیے یہ اچھی خبر نہیں ہے۔

احمد خاندان ۱۹۴۶ سے کوئلہ سے چلنے والے ڈاؤن ڈرافٹ بھٹی کا مالک تھا جسے انہوں نے ۱۹۹۰ کی دہائی میں استعمال کرنا چھوڑ دیا۔ تب سے وہ قصبہ میں فائرنگ کی دیگر سہولیات پر انحصار کرتے ہیں۔

’’ہمارے پاس گیس سے چلنے والے پلانٹ کے لیے پیسے یا جگہ نہیں ہے،‘‘ سعید کہتے ہیں۔ ان کی کوئلہ سے چلنے والی ڈی ڈی بھٹی ان کے گھر کے قریب بیکار پڑی ہے۔ خورجہ کے آسمان میں اب بھی اس طرح کی چمنیاں ہر جگہ دکھائی دیتی ہیں، لیکن تمام بیکار ہیں۔

حالانکہ قدرتی گیس سے چلنے ولی سہولیات کارکردگی اور کم توانائی کی لاگت کا دعویٰ کرتی ہیں، لیکن ایک بھٹی کی تعمیر کے لیے درکار دو سے ڈھائی کروڑ روپے کی بڑی سرمایہ کاری کے سبب یہ بہت سے کاریگروں کے لیے ناقابل رسائی ہے۔ حمید کہتے ہیں، ’’بہت سے چھوٹے کمہار ہیں جنہوں نے اپنے کاروبار کو برقرار رکھنے کے لیے قرض لیا، جسے وہ واپس نہیں کر سکے۔ لہذا، انہیں یہ کام چھوڑنا پڑا۔‘‘

چھوٹے کمہار گیس سے چلنے والی فائرنگ کی سہولیات کرایے پر لینے کے لیے مجبور ہیں۔ نتیجتاً ان کا کم ہوتا منافع مزید کم ہو گیا ہے۔ احمد برادران کے بجٹ کا ۳۵ فیصد حصہ کرایہ کی بھٹی کے لیے مختص ہے۔ بڑھتی ہوئی پیداواری لاگت اور فائرنگ کی خدمات تک رسائی کی غیریقینی صورتحال نے انہیں مسابقت میں رہنے کے لیے جدوجہد کرنے پر مجبور کر دیا ہے، خاص طور پر جب جدید بھٹیوں پر امیر کمہار کی اجارہ داری ہے۔

حمید بتاتے ہیں کہ اب ان کا منافع ۵-۱۵ فیصد تک رہتا ہے، لیکن جب وہ کوئلہ سے چلنے والی بھٹیوں کا استعمال کرتے تھے، تو وہ ۳۰ فیصد سے زیادہ منافع حاصل کرلیتے تھے۔ اس کی وجہ یہ تھی کہ انہیں ٹرانسپورٹ اور کرایے کی بھٹیوں پر خرچ نہیں کرنا پڑتا تھا۔ ’’بڑے کمہار جو مشینیں استعمال کرتے ہیں وہ زیادہ منافع حاصل کرتے ہیں، کیونکہ ان کی پیداواری صلاحیت زیادہ ہے،‘‘ حمید کہتے ہیں۔

کوئلہ پر پابندی کے بعد کوزہ گری کے کئی چھوٹے کارخانے بند ہو گئے،‘‘ یہ کہتے ہوئے سعید مزید اضافہ کرتے ہیں، ’’لیکن ہم ابھی تک یہ کام جاری رکھے ہوئے ہیں، کیونکہ نقصانات سے ہمیں کوئی فرق نہیں پڑتا ہے۔ یہ ہنر ہی ہمارا سرمایہ ہے۔‘‘

فائرنگ کے لیے چیزوں کی نقل و حمل ایک جوکھم بھرا کام ہے۔ اس دوران برتنوں کے ٹوٹنے کا خدشہ رہتا ہے اور بعض اوقات انہیں کئی دنوں تک ٹرالی کا انتظار کرنا پڑتا ہے۔ احمد برادران اپنے برتنوں کو نوید کی فیکٹری میں پکاتے ہیں، جو اپنی خدمات کے لیے تقریباً ۳۰۰۰ روپے کرایہ لیتے ہیں، جبکہ انہیں صرف تقریباً ۱۲۰۰ روپے کا خرچ آتا ہے، حمید دعوی کرتے ہیں۔

سعید کہتے ہیں، ’’اگر ہم ناقص یا خراب سامان حاصل کرتے ہیں، تب بھی ہمیں پوری رقم ادا کرنی ہوتی ہے۔‘‘

برتن ۲۴ گھنٹے تک بھٹی میں رہتے ہیں اور تین مراحل کے عمل سے گزرتے ہیں، جو پری پرنٹنگ سے شروع ہوتا ہے، اور اس کے بعد آگ دکھائی جاتی ہے اور آخر میں ٹھنڈا کیا جاتا ہے۔ پہلے مرحلہ میں، جس میں درجہ حرارت ۵۰۰ سے ۷۵۰ ڈگری سیلیس تک ہوتا ہے، ۱۰ گھنٹے لگتے ہیں۔ دوسرے مرحلہ میں، چار گھنٹے کے دوران درجہ حرارت ۱۲۵۰ ڈگری تک جا سکتا ہے۔ اس مرحلہ میں، مٹی سخت ہو جاتی ہے جس کے بعد اسے آخری مرحلہ میں ٹھنڈا کرنے کے لیے رکھا جاتا ہے۔ ٹھنڈا کرنے کی جگہ پر درجہ حرارت ۱۰ گھنٹے میں دھیرے دھیرے ۹۰۰ سے ۲۰۰ ڈگری سیلیس تک کم ہو جاتا ہے۔

حمید کہتے ہیں، ’’ہر مرحلہ میں درستگی بہت ضروری ہے، کیونکہ معمولی لغزش بھی حتمی مصنوع کے معیار کو متاثر کر سکتی ہے۔‘‘

فائرنگ کے مرحلہ کے بعد سیرامکس کولنگ ژون میں داخل ہوتے ہیں، جہاں درجہ حرارت ۱۰ گھنٹوں کے دوران بتدریج ۹۰۰ سے ۲۰۰ ڈگری سیلسیس تک کم ہو جاتا ہے۔

کولنگ کے عمل کے باوجود برتن گرم رہتے ہیں اور انہیں احتیاط سے سنبھالنا پڑتا ہے۔ ’’ٹھنڈا کرنے کے مرحلہ پر اتنی ہی توجہ کی ضرورت ہوتی ہے جتنی کہ فائرنگ کے مرحلے میں ہوتی ہے،‘‘ مکند نامی کارکن کہتے ہیں۔ ’’اگر برتن بہت جلدی ٹھنڈے ہو جائیں تو وہ پھٹ سکتے ہیں۔‘‘

گھنٹوں تک شدید گرمی برداشت کرنے کے بعد، بھٹی سے چمکتی ہوئی سیرامکس نکلتی ہیں، جو فروخت کے لیے تیار رہتی ہیں۔

’’یہی وہ مقام ہے جہاں ہماری تمام محنت رنگ لاتی ہے،‘‘ حمید اطمینان سے مسکراتے ہوئے کہتے ہیں۔

ترجمہ نگار: شفیق عالم