‘ई कारीगरी हमनी के पूंजी बा’

माटी के गंध आ लकड़ी के धुंआ से पूरा वातावरण गमकता. पक्का पर जगहे-जगहे बड़का टब में रखल उज्जर माटी के छींटा पड़ल बा. सांचा आउर अधबनल बरतन सब चारो ओरी अइसे छितराइल बा कि गोड़ धरे के जगह नइखे. हमीद अहमद चेतावत बाड़न, “ध्यान से चलीं.”

बारह साल के छोट लइका माटी के चाक चलावल सीख रहल बा. ई हमीद के लइका, मोहम्मद सलमान बाड़न. बच्चा उज्जर माटी के धूर में लेसराइल बा. एकदम ध्यान लगइले बावां गोड़ एक ओरी खींच, दहिना गोड़ से नीचे चकरी घुमावत बा.

“अइसे धीरे-धीरे उठाव,” हमीद उनका सिखावत बाड़न. इतिहास अपना के दोहराता- 49 बरिस के ई उस्ताद कुम्हार नौ साल के रहस त आपन बाऊजी से अइसहीं गोड़ से चकरी चलावे के सीखत रहस. ऊ तनी हंसत कहलन, “पहिले-पहिले त हमरा हाथ से माटी के केतना बरतन फूट गइल. सीखे में समय लागेला.”

दस ठो भाई में से एक, हमीद सतमा पीढ़ी के कारीगर ठहरलन. आज खुरजा के एह ‘सिरामिक सिटी’ में खाली उनकरे परिवार में ई कला बचल बा. खुरजा, मुसलमान लोग के बनावल बरतन खातिर प्रसिद्ध बा.

“हमनी के बाप-दादा लोग मुल्तान के धरती छोड़ के आपन भाग आजमावे खातिर इहंवा आ गइल,” हमीद के बड़का भाई सईद कहले. उनकर कहे के मतलब कि खुरजा में माटी के ई खास कला, मुलतानी कुम्हार लोग इहंवा लेके आइल. आज खुरजा में कोई 25,000 कुम्हारा के घर एकरे से चल रहल बा.

अहमद के भाई के वर्कशॉप सौ बरिस पुरान एगो कोठी में बनल बा. ई सहर के भीतरी इलाका में पड़ेला. सभ परिवार आपन अलग-अलग घर में रहेला. बाकिर सभे में बहुते अपनापा बा. मरद लोग मिलके काम करेला. हमीद कहलन, “हमनी के एकते हमनी के काम बचवले बा.”

ओने चाक पर हमीद के बावां हाथ में माटी बा, आ दहिना हाथ माटी के आकार देवे में लागल बा. अंगुरी सब माटी के घेर के धीरे-धीरे उठावे का काम कर रहल बा. सालन कड़ा मिहनत करे से हाथ सख्त हो गइल बा, बाकिर एकर छुवन में अबहियो नरमी बा. माटी धीरे-धीरे उठेला आ फइलत जाला. दबाव के सही होखल जरूरी बा. काहेकि जादे दबाव पड़ी त माटी धंस जाई आ कम पड़ी त कुछ बनबे ना करी.

“ये कला सारे खुरजे में और कहां? (अइसन कला खुरजा के अलावे आउर कहंवा मिली?)” ऊ गर्व से कहत बाड़न. “हम एक क्ले से एक मिनट में ही कई तरह के आइटम बना सकते हैं (हमनी एगो माटी से एक मिनट में केतना तरह के आइटम बना सकिला),” सईद कहलन. हमीद के हाथ चाक पर फटाफट घूम रहल बा. ऊ लोग आपन घरो खातिर चाय के कप-पियाला, फूलदान आ सजावट के समान सब बनावेला.

काम में केतना मजूर लागी, ई बात ऑर्डर पर निर्भर करेला. वइसे औसतन तीन से चार लोग रोज काम करेला. काम भोरे नौ बजे से सुरु हो जाला आ सांझ के छव बजे ले चलेला. बीच-बीच में लोग खाली खाए खातिर रुकेला.

भाई लोग माटी गुजरात से आउर पत्थर राजस्थान से मंगावेला. बरखा के महीना में काम सुस्त पड़ जाला काहेकि हवा में नमी चलते माटी सही से सूख ना पावे. तीज-त्योहार में मांग फेरु बढ़े लागेला, खासकरके अगस्त के बाद वाला महीना में. ओह घरिया ऊ लोग के सबले जादे ऑर्डर आवेला. मुंबई, दिल्ली एनसीआर आ बेंगलुरू के बड़का-बड़का बजार में थोक दोकानदार के जरिए सामान भेजल जाला.

सब लोग मिलके नाना प्रकार के चीनी मिट्टी के बरतन गढ़ेला. जइसे कि टीपॉट, कप, कटोरा आ सजावटी फूलदान आदि. माहिर कारीगर लोग के फूलदानी गढ़े में मजा आवेला. हमीद तनी शान जतावत कहले, “हम अनगिनत तरह के फूलदान बना सकिला.”

पिछवाड़े वर्कशॉप में काम करे वाला मुसव्विर के मोबाइल पर कव्वाली चल रहल बा. ऊ बड़का टब में धीरे-धीरे माटी घोरत बाड़न. पच्चीस बरिस के कुम्हार कहेलन, “माटी सही-सही गाढ़ भइल जरूरी बा.” कहत-कहत ऊ माटी के तनी-तनी करके सांचा में ढारत जात बाड़न. “सही गाढ़ रहे से माल नीमन बनी.” माटी के आकार देके सुखावे खातिर छोड़ देवल जाला. फेरु एकरा अब्दुल हमीद लगे भेजल जाला. दसियों साल के तजुरबा रखे वाला ई कलाकार पानी में भींजल स्पंज से धीरे-धीरे माटी के सामान सब साफ करेलन. खर-पतवार हटा के, माल के चमक बढ़ावे खातिर ओकरा रसायन के घोल में डुबावे के तइयारी होखे लागेला. “ई आखिरी काम बहुते जरूरी बा. एकरा से बरतन में जान आ जाला,” 75 बरिस के अब्दुल फरिया के कहलन.

अब्दुल हमीद के कबो आपन कारखाना रहे, बाकिर आजकल ऊ अहमद आउर उनकर भाई लोग संगे काम करेलन. “यहां जिसकी जितनी उम्र होगी, उतनी इज्जत दी जाएगी (इहंवा जे जेतने उमिरगर होई, ओतने इज्जत पाई),” सईद पूरा काम पर नजर रखत कहलन.

खुरजा में माटी के काम पर मरद लोग के कब्जा बा. “हमनी इहंवा मेहरारू लोग ई काम ना करे,” हमीद कहलन. बाकिर ऊ लोग करखाना में “हाथ से बरतन साफ करे, धोवे आउर जरूरत पड़ला पर संभारेला,” ऊ समझइलन.

मेहरारू लोग करखाना के बड़ गोदाम में काम करेला. अबही शबाना खान 20 ठो आउर मेहरारू लोग संगे सेरामिक प्लेट धोवत बाड़ी. 48 बरिस के सबाना उज्जर प्लेट के बहुते संभार के रगड़त बतइली, “हमनी ई काम छव घंटा करिला. एकरा खातिर 300 रुपइया दिहाड़ी मिलेला.” पूरा गोदाम में पानी के छप-छप आउर प्लेट के खन-खन सुनाई दे रहल बा.

“इहे प्लेट सब फाई-स्टार होटल में जाला,” ऊ कहली. उनकर बोली में नरमी रहे, बाकिर ओह में आपन काम के प्रति मान झलकत रहे.

सईद अहमद के कहनाम बा, “पहिले खुरजा में कोयला से चले वाला मोटा-मोटी 200 भट्ठी रहे.” भाई लोग में जादे सईदे ग्राहक लोग से बात करेलन. “भट्ठी में 120 घंटा ले बरतन पाकेला. करियर धुंआ चारो ओरी भर जाला. ई एकदम तगड़ा आ बिना रुके चले वाला काम रहल. केतना पीढ़ी से ई जिनगी के हिस्सा रहल बा.”

कोयला से चले वाला ई भट्ठी से पर्यावरण के नुकसान होत रहे आउर ई बहुते मिहनतो मांगत रहे. एह से सन् 1990 के बाद एकरा पर रोक लाग गइल. बाद में डीजल आ तेल से चले वाला भट्ठी से काम होखे लागल. एकरा शटल किल्न आ टनल किल्न कहल गइल. अब बरतन पकावे में दू से तीन दिन लागेला आउर खरचा भी कम हो गइल बा. सन् 2016 में नेशनल ग्रीन ट्रिब्यूनल के आदेस के बाद नैचुरल गैस के इस्तेमाल सुरु भइल. नवेद खान के इंडिया आर्ट सिरेमिक्स, जे 1972 से चल रहल बा, खातिर फायदेमंद साबित भइल. ऊ कहत बाड़न, “नैचुरल गैस के इस्तेमाल टिकाऊ बरतन बनावे ओरी बड़ा कदम बा. कम बरबादी में जादे माल बन पा रहल बा.”

बाकिर अहमद ब्रदर्स आउर दोसर छोट स्तर पर काम करे वाला कुम्हार लोग खातिर ई खबर बहुते भारी पड़ल.

अहमद के परिवार लगे 1946 से कोइला वाला डाउन-ड्राफ्ट (डीडी) भट्ठी रहल, जेकरा सन् 1990 के बाद से बंद कर देवल गइल. तबे से ऊ लोग गांव के दोसरा भट्ठियन पर निर्भर बा.

“हमनी लगे ना पइसा बा, ना गैस वाला प्लांट लगावे खातिर जगह,” सईद कहले. उनकर कोइला वाला भट्ठी घर के लगे ठाड़ बा, बेकार पड़ल. खुरजा के आसमान में अइसने चिमनियन के लाइन लागल बा, बाकिर सब ठप्प.

नेचुरल गैस के भट्ठी सस्ता आउर काम के त बा, बाकिर एकरा लगावे में दू से ढाई करोड़ के खरचा आवेला. कुम्हार लोग के पहुंच से ई बाहिर के बात बा. हमीद कहले, “छोट-छोट कुम्हार लोग के धंधा चलावे खातिर करजा लेवे पड़ल. बाकिर उधार चुकता ना कर पावे चलते मजबूरी में ओह लोग के काम छोड़ देवे पड़ल.”

छोट कुम्हार लोग के गैस वाला भट्ठी किराया पर लेवे पड़ेला. एहसे ओह लोग के मुनाफा घटल जा रहल बा. अहमद ब्रदर्स के बजट के 35 प्रतिशत भट्ठी के किराया देवे में चल जाला. लागत बढ़ रहल बा आउर भट्ठी के सुविधा कबो मिलेला, कबो ना मिले. बड़का कुम्हार लोग त नयका भट्ठी के कब्जिया लेले बा. एह से छोटका कुम्हार लोग के बजार में टिकल मुस्किल हो रहल बा.

हमीद बतावत बाड़न कि आजकल उनकर मुनाफा बस 5 से 15 प्रतिशत ले रहेला. पहिले जब ऊ कोयला वाला भट्ठी पर काम करत रहस, मुनाफा 30 प्रतिशत ले रहत रहे. कारण, भाड़ा आ भट्ठी के किराया में पइसा ना लागत रहे. हमीद कहत बाड़न, “मसीन वाला बड़का कुम्हार लोग जादे मुनाफा कमा रहल बा, काहे कि ऊ लोग मालो जादे बना रहल बा.”

सईद कहतारे, “कोयला बंद भइला के बाद केतना छोट कुम्हार लोग धंधा बंद कर देलक. बाकिर हमनी अबहियो काम कर रहल बानी. हमनी घाटा पर जादे ध्यान नइखी देत. ई कारीगरी हमनी के असल दौलत बा.”

समान ढोवल बड़का झंझट वाला काम बा, आ ढोवे घरिया हरमेसा एकर टूटे के डर बनल रहेला. कबो-कबो त नवेद के करखाना में समान ले जाए खातिर, ट्रॉली के इंतजारी में हफ्ता-हफ्ता ले रुके पड़ेला. नवेद काम खातिर तीन हजार रुपइया लेवेला. बाकिर हमीद के कहनाम बा कि करखाना मालिक के असली खरचा त डेढ़ो हजार से कम बा. सईद कहेलन, “समान टूटलो पर हमनी के पूरा पइसा भरे पड़ेला.”

चौबीस घंटा ले समान भट्ठी में रहेला. काम तीन पारी में होखेला. पहिले सामान के गरमावल (प्री-हीटिंग), फेरु पकावल (फायरिंग) आ आखिर में ठंडा कइल (कूलिंग) जाला. पहिलका पारी में तापमान 500 से 750 डिग्री सेल्सियस रहेला आ एकरा में 10 घंटा लागेला. दोसरका पारी में माटी के चार घंटा ले खूब जरत आंच पर पकावल जाला. एह घरिया तापमान 1250 डिग्री रहेला. माटी पूरा तरीका से सख्त हो जाला, तब ओकरा आखिर में, यानी अंतिम पारी में सेराए खातिर छोड़ल जाला. अंतिम पारी में तापमान के धीरे-धीरे 900 से 200 डिग्री ले गिरावल जाला. एह चरण में दस घंटा के समय लागेला.

हमीद फरिया के बतइलन, “हर चरण में काम सही-सही भइल बहुते जरूरी रहेला. एको चूक भइल, त माल सत्यानास हो जाई.”

ठंडा करे वाला चरण पूरा भइला के बादो माटी के बरतन सब धिकल (गरम) रहेला. सब के बहुते संभार के उठावे पड़ेला. मजूर में से एगो, मुकुंद बतावेलन, “जेतना ध्यान आग में पकावे घरिया देवे पड़ेला, ओतने ठंडा करे घरिया भी जरूरी बा. बरतन जल्दी से ठंडा हो गइल, त ऊ दरक सकेला, फाट सकेला.”

कइएक घंटा ले प्रचंड गरमी में रहला के बाद, चीनी मिट्टी के सामान सब चमचम करत भट्ठी से बाहर निकलेला, आउर बिकाए खातिर तइयार हो जाला.

“इहे ऊ घड़ी बा, जब दिन-रात कइल आपन मिहनत सवारथ (सफल) लागेला,” हमीद संतोष भरल हंसी हंसत कहलन.

अनुवाद: स्वर्ण कांता